ការបិទផ្លូវជាច្រើនខ្សែ ការកកស្ទះចរាចរណ៍ និងការធ្វើដំណើរវាងនៅរាជធានីភ្នំពេញក្នុងរយៈពេលបីថ្ងៃមកនេះ នឹងបញ្ចប់នៅថ្ងៃនេះ នៅពេលមេដឹកនាំពិភពលោកចាកចេញ បន្ទាប់ពីការបិទកិច្ចប្រជុំកំពូលអាស៊ាន និងអាសុីបូពា៌នោះ។
គិតត្រឹមល្ងាចម្សិលមិញ និងនៅពេលដែលមេដឹកនាំពិភពលោក បានចាកចេញទៅវិញនោះមហាវិថីព្រះនរោត្ដម បានបើកឲ្យដំណើរការឡើងវិញ ហើយការធ្វើចរាចរណ៍ បានវិលមករកភាពប្រក្រតីវិញហើយ ដោយអនុញ្ញាតឲ្យយានយន្ដធ្វើដំណើរដោយសេរី គ្មានការរឹតបន្តឹងពីនគរបាលឡើយ។
លោក ហេង ចាន់ធារី នាយការិយាល័យនគរបាលចរាចរណ៍ផ្លូវគោករាជធានី បានមានប្រសាសន៍កាលពីម្សិលមិញថា “ ចរាចរណ៍នឹងវិលមកប្រក្រតីភាពឡើងវិញ ហើយផ្លូវជាច្រើនកន្លែងទៀត នឹងចាប់ផ្ដើមបើកឲ្យធ្វើដំណើរឡើងវិញ នៅរសៀលនេះ និងថ្ងៃស្អែក ពេលគណៈប្រតិភូទាំងអស់ ចាកចេញពីប្រទេសកម្ពុជា” ។
អាជ្ញាធរ បានបិទមួយរយៈនូវកំណាត់ផ្លូវជាច្រើននៅមហាវិថី សហព័ន្ធរុស្សុី ព្រះនរោត្ដម ព្រះមុនីវង្ស និង មហាវិថី ម៉ៅ សេទុង នៅពេលគណៈប្រតិភូអន្តរជាតិ បានអញ្ជើញមកដល់កាលពីចុងសប្ដាហ៍ និងអំឡុងពេលកិច្ចប្រជុំកំពូលអាស៊ាន និងអាសុីបូពា៌ ដែលបានប្ដូរផ្លូវធ្វើដំណើរចម្ងាយរាប់សិបគីឡូម៉ែត្រ និងបង្កឲ្យមានការកកស្ទះចរាចរណ៍ជាច្រើនកន្លែង និងការពន្យារពេលជាងបីម៉ោង។កាលពីរសៀលថ្ងៃច័ន្ទពេលលោកបារ៉ាក់ អូបាម៉ា (Barack Obama) ប្រធានាធិបតីសហរដ្ឋអាមេរិក បានអញ្ជើញមកដល់អាកាសយានដ្ឋានអន្តរជាតិភ្នំពេញ នោះ អ្នកបើកបរយានយន្តបានកកស្ទះចរាចរណ៍រហូតដល់យប់ជ្រៅ។ កាលពីម្សិលមិញ ខណៈពេលដែលលោក អូបាម៉ា ចេញដំណើេរ អ្នកបើកបរយានយន្តត្រូវរង់ចាំអស់ជាច្រើនម៉ោងទៀត ។
លោក ចេវ ហាក់ នាយរងការិយាល័យនគរបាលចរាចរណ៍ផ្លូវគោករាជធានី បានមានប្រសាសន៍ថា “ យើងបានបិទមហាវិថី សហព័ន្ធរុស្សុី ចាប់ពីរង្វង់មូល ចោមចៅ រហូតដល់អគារទីស្ដីការគណៈរដ្ឋមន្ត្រី ប្រហែលពីម៉ោង៣រសៀល រហូតដល់ម៉ោង៦ល្ងាច ពេល លោក បារ៉ាក់ អូបាម៉ា ប្រធានាធិបតីសហរដ្ឋអាមេរិក ចាកចេញពីអាកាសយានដ្ឋានអន្តរជាតិភ្នំពេញ។ ចរាចរណ៍បានកកស្ទះអស់ជាច្រើនម៉ោង ពីព្រោះ យើងបានបិទផ្លូវទាំងនេះ ប៉ុន្តែ វាមិនយូរណាស់ណានោះទេ” ។
ដោយចាប់ផ្ដើម កាលពីសប្ដាហ៍មុន នគរបាល បានបិទផ្លូវដែលអ្នកបើកបរយានយន្តប្រើ ដើម្បីបត់ចូលទៅមហាវិថីសហព័ន្ធរុស្សុី និងព្រះមុនីវង្ស ហើយបានជូនដំណឹងដល់ម្ចាស់ហាង នៅតាមផ្លូវទាំងពីរឲ្យបិទទ្វាររយៈពេល១០ថ្ងៃ។ ផ្លូវទាំងនេះគ្រោងបើកឲ្យដំណើរការឡើងវិញនៅថ្ងៃសុក្រ៕
ប្រែសម្រួលដោយ ស៊ុំ សុខភុំ