តំណាងក្រុមហ៊ុនអាកាសចរណ៍ អ៊ែរហ្វ្រង់ កាអិលអឹម (Air France-KLM) បានឲ្យដឹងកាលពីម្សិលមិញថា បន្ទាប់ពីទើបតែបានចាប់ផ្តើមការហោះហើររវាងទីក្រុងប៉ារីស និងរាជធានីភ្នំពេញបានតែពីរឆ្នាំប៉ុណ្ណោះ ក្រុមហ៊ុនអាកាសចរណ៍មួយនេះមានគម្រោងឈប់ហោះហើររវាងទីក្រុងទាំងពីរក្នុងខែមីនាឆ្នាំ២០១៣ ដោយសារមានការធ្លាក់ចុះនូវចំនួនអ្នកធ្វើដំណើរ។
លោក ហ្សូអ៊ែប ប្រីស (Joep Bruijs) នាយកប្រចាំតំបន់ទទួលបន្ទុកខាងប្រតិបត្តិការដឹកជញ្ជូនទំនិញរបស់ក្រុមហ៊ុន Air France-KML បានមានប្រសាសន៍តាមទូរស័ព្ទពីទីក្រុងបាងកកថា “ យើងមានផែនការបញ្ឈប់ការហោះហើរនៅដំណាច់ខែមីនាខាងមុខនេះ”។
លោក ហ្សូអ៊ែប ប្រីស បានឲ្យដឹងថា ចំនួនអ្នកដំណើរមិនគ្រប់គ្រាន់ ដើម្បីឲ្យក្រុមហ៊ុនអាចបន្តដំណើរការជើងហោះហើរទៀតបានទេ។ លោកបានមានប្រសាសន៍ដោយសំដៅដល់សំណួរជាច្រើនទៀតចំពោះលោក ហ៊ែវេ មូលីន (Herve Moulin) អ្នកចាត់ការទូទៅប្រចាំតំបន់របស់ក្រុមហ៊ុន Air France–KLM ដែលមិនអាចទាក់ទងសុំការពន្យល់បានដូច្នេះថា “ បើនិយាយពីខាងអ្នកដំណើរវិញ យើងមិនអាចរកប្រាក់គ្រប់ថ្ងៃចំណាយបាននោះទេ”។
ក្រុមហ៊ុន Air France-KLM ដែលបានចាប់ផ្តើមបើកប្រតិបត្តិការជើងហោះហើរពាណិជ្ជកម្មមកកាន់ប្រទេសកម្ពុជាសាជាថ្មី កាលពីខែមីនាឆ្នាំ២០១១ បន្ទាប់ពីបានអវត្តពីប្រទេសកម្ពុជាអស់រយៈពេល៣៧ឆ្នាំមក ហើយនាពេលបច្ចុប្បន្ននេះ កំពុងបើកការហោះហើររវាងទីក្រុងប៉ារីស និងរាជធានីភ្នំពេញចំនួនបីជើងក្នុងមួយសប្តាហ៍ ដោយប្រើយន្តហោះធុនប៊ូអុីង៧៧៧អេស (Boeing 777s) ចំណុះ៣០៩កៅអុី ហើយទៅឈប់សំចតនៅក្រុងបាងកក។
ជើងហោះហើរលើកដំបូងរបស់ក្រុមហ៊ុនអាកាសចរណ៍ Air France-KLM គិតចាប់តាំងពីឆ្នាំ១៩៧៤បានមកចុះចតនៅអាកាសយានដ្ឋានអន្តរជាតិភ្នំពេញកាលពីថ្ងៃទី២៧ ខែ មីនា ឆ្នាំ២០១១ ហើយត្រូវបានទទួលសា្វគមន៍យ៉ាងអធិកអធមពីសំណាក់ក្រុមមន្ត្រីជាច្រើនរូប ដែលបានលើកឡើងថា សេចក្តីសម្រេចរបស់ក្រុមហ៊ុន Air France-KLM គឺជាសញ្ញាមួយ ដែលស្តែងឲ្យឃើញពីការស្នើសុំជាលក្ខណៈអន្តរជាតិរបស់កម្ពុជាដែលមានការកើនឡើង។
ព្រឹត្តិការណ៍ចុះចតដំបូងត្រូវបានចូលរួមដោយលោកឧបនាយករដ្ឋមន្ត្រី សុខ អាននាយកប្រតិបត្តិក្រុមហ៊ុន Air France-KLM លោក ភ្យែ ហង់រី ហ្គួហ្កន (Pierre Henri Gourgeon) និងរដ្ឋលេខាធិការក្រសួងដឹកជញ្ជូនបារាំង លោក ថេរី ម៉ារៀនី (Theirry Mariani)។
លោក ហូ វណ្ឌី សហប្រធានក្រុមការងារអភិវឌ្ឍន៍ទេចរណ៍រដ្ឋ និងឯកជន បានមានប្រសាសន៍ថា លោកមានការភ្ញាក់ផ្អើលដែលទទួលបានដំណឹងថា ក្រុមហ៊ុន Air France-KLM នឹងឈប់ការហោះហើរមកកាន់រាជធានីភ្នំពេញ។
លោកបានមានប្រសាសន៍ដូច្នេះថា “ វាគឺជាការភ្ញាក់ផ្អើលសម្រាប់ខ្ញុំ។ យើងមានក្តីបារម្ភចំពោះរឿងនេះ ហើយយើងមិនចង់ទទួលបានដំណឹងបែបនេះទេ”។
លោក ហូ វណ្ឌី ក៏បានស្នើសុំផងដែរ ដេើម្បី ធ្វើយ៉ាងណាកុំឲ្យក្រុមហ៊ុនអាកាសចរណ៍ផ្សេងៗទៀតដកខ្លួនចេញពីប្រទេសកម្ពុជា ហើយលោកស្នើសុំដល់រដ្ឋាភិបាល និងក្រុមហ៊ុន អាកាសយានដ្ឋានកម្ពុជា (Cambodia Airport) ដែលជាប្រតិបត្តិករអាកាសយានដ្ឋានជាតិរបស់ប្រទេសកម្ពុជាឲ្យធ្វើការងាររួមគ្នា ដើម្បីលើកទឹកចិត្តដល់ក្រុមហ៊ុនអាកាសចរណ៍ ដូចជាការកាត់បន្ថយថ្លៃឈ្នួលចុះចត ថ្លៃឈ្នួលចត និងថ្លៃឈ្នួលហោះកាត់ជាដើម៕
ប្រែសម្រួលដោយ ហួង កុកទៀន