កាលពីថ្ងៃសុក្រ លោកនាយករដ្ឋមន្ត្រីហ៊ុន សែន បានបញ្ជាក់ពីជំហររបស់លោកថានៅក្នុងប្រទេសកម្ពុជាគ្មានអ្នកទោសនយោបាយទេ ចំណែកឯប្រព័ន្ធតុលាការកម្ពុជាគឺឯករាជ្យ ដោយមិនមានការជ្រៀតជ្រែកពីនយោបាយឡើយ ហើយបានចោទប្រកាន់មនុស្ស ដែលលោកមិនបញ្ចេញឈ្មោះថា បង្ខំលោកឲ្យរំលោភច្បាប់ ដោយស្នើឲ្យលោកដោះលែងអ្នកទោសទាំងអស់ដោយលោកបានបញ្ជាក់ថា អំណាចនោះហួសពីលទ្ធភាពរបស់លោក។
ថ្លែងទៅកាន់សិស្ស និសិ្សតកសិករនិងមន្ត្រីរដ្ឋាភិបាលជាង១.០០០នាក់ នៅឯពិធីចែកប័ណ្ណកម្មសិទ្ធិដីធ្លីមួយ នៅខេត្តព្រះវិហារលោក ហ៊ុនសែនក៏បានថ្លែងប្រាប់អង្គការក្រៅរដ្ឋាភិបាលនានា និងអ្នកនយោបាយថាវិវាទដីធ្លីអាចនឹងបន្តកើតមាន ប្រសិនបើពួកគេធ្វើអន្តរាគមន៍ ហើយលោកបានបន្ទោសប្រព័ន្ធផ្សព្វផ្សាយព័ត៌មានថា បានលាបពណ៌អាក្រក់ដល់ប្រទេសកម្ពុជា។
ដោយងាកទៅថ្លែងអំពីបញ្ហាអ្នកទោសនយោបាយ ដែលលើកឡើងដោយលោកប្រធានាធិបតីសហរដ្ឋអាមេរិក បារ៉ាក់ អូបាម៉ា (BarackObama) ដែលបានធ្វើទស្សនកិច្ចក្នុងប្រទេសកម្ពុជា កាលពីថ្ងៃច័ន្ទ ក្នុងអំឡុងកិច្ចពិភាក្សាទ្វេភាគីជាមួយលោកនៅរាជធានីភ្នំពេញ លោក ហ៊ុនសែន បានថ្លែងថា អ្នកទោសនៅក្នុងពន្ធនាគាររបស់ប្រទេសកម្ពុជាមិនមានការបែងចែកឋានៈទេ។ លោក ហ៊ុន សែន ក៏បានបន្ថែមថា ប្រព័ន្ធតុលាការកម្ពុជា ដែលត្រូវបានគេចោទប្រកាន់ជាទូទៅថា ស្ថិតក្រោមឥទ្ធិពលរបស់គណបក្សកំពុងកាន់អំណាច គឺជាតុលាការឯករាជ្យ និងប្រកាន់ភ្ជាប់តាមច្បាប់។
លោកថ្លែងដោយមិនបញ្ចេញឈ្មោះអ្នកទោសនយោបាយចំឈ្មោះថា “ ដូចខ្ញុំបានជម្រាបរួចហើយថា ប្រទេសកម្ពុជាមិនមានអ្នកទោសនយោបាយទេ ប៉ុន្តែ មានអ្នកនយោបាយដែលត្រូវបានគេរកឃើញមានពិរុទ្ធភាព ពីបទប្រព្រឹត្តិបទឧក្រិដ្ឋ”។
លោក ហ៊ុន សែន ក៏បានលើកឡើងផងដែរថា លោកត្រូវបានគេជំរុញឲ្យធ្វើអន្តរាគមន៍ទៅប្រព័ន្ធតុលាការ ដើម្បីឲ្យដោះលែងអ្នកទោសទាំងអស់។ ទោះជាយ៉ាងនោះក្តី លោក ហ៊ុន សែន មិនបានបញ្ជាក់ថា នរណាជាអ្នកជំរុញ និងដាក់សម្ពាធឲ្យលោកធ្វើដូច្នោះឡើយ។ កាលពីថ្ងៃច័ន្ទ លោក អូបាម៉ា បានលើកឡើងនៅពេលជួបជាមួយលោកនាយករដ្ឋមន្ត្រី អំពីការចាំបាច់ក្នុងការដោះលែងអ្នកទោសនយោបាយ។
លោក ហ៊ុន សែន បានថ្លែងបន្តទៀតថា“ ពួកគេចង់ឲ្យខ្ញុំធ្វើអន្តរាគមន៍។ មានសំណើជាច្រើនឲ្យខ្ញុំធ្វើអន្តរាគមន៍ ដើម្បីដោះលែងអ្នកទោសនយោបាយ។ បើខ្ញុំធ្វើដូច្នោះមែន ខ្ញុំនឹងក្លាយជាមនុស្សដូចគេចោទប្រកាន់”។
លោកថ្លែងបន្តថា “ លោកចោទប្រកាន់ខ្ញុំថា ខ្ញុំជាអ្នកគ្រប់គ្រងតុលាការ ដែលជាស្ថាប័នមួយឯករាជ្យ ធ្វើអ៊ីចឹងដូចជាឲ្យខ្ញុំប្រព្រឹត្តិខុសច្បាប់។ ពួកគេស្នើឲ្យខ្ញុំដោះលែងអ្នកនេះ ឬអ្នកទោសនោះ ប៉ុន្តែ តើខ្ញុំត្រូវធ្វើយ៉ាងណា បើតុលាការជាតុលាការឯករាជ្យ បើយើងប្រព្រឹត្តិបទឧក្រិដ្ឋ ត្រូវតុលាការផ្តន្ទាទោស។មិនមាននរណាម្នាក់អាចនៅពីលើច្បាប់ឡើយ”។
ដោយលើកយកជាឧទាហរណ៍មួយ ដើម្បីបញ្ជាក់ថា តុលាការឯករាជ្យ លោក ហ៊ុន សែនបានកត់សម្គាល់ថា មន្ត្រីរដ្ឋាភិបាលជាន់ខ្ពស់មួយចំនួន ក្នុងជួរមន្ត្រីកងរាជអាវុធហត្ថ មន្ត្រីនគរបាល និងមន្ត្រីរដ្ឋាភិបាល មកពីគណបក្សប្រជាជនកម្ពុជា ត្រូវបានតុលាការផ្តន្ទាទោសនិងដាក់ពន្ធនាគារពីបទឧក្រិដ្ឋជាច្រើន។
ចំពោះបញ្ហាដីធ្លី លោក ហ៊ុន សែន បានព្រមានថា ប្រសិនបើអង្គការក្រៅរដ្ឋាភិបាលឬគណបក្សនយោបាយណាជាប់ពាក់ព័ន្ធជម្លោះដីធ្លី អាចនៅតែមិនអាចដោះស្រាយបាន និងពិតជាជាប់គាំងមិនខាន។
លោកថ្លែងបន្តនៅក្នុងពិធីចែកប័ណ្ណកម្មសិទ្ធិដីធ្លីជូនប្រជាពលរដ្ឋចំនួន៥៧៧គ្រួសារ ដែលមានផ្ទៃដីសរុបចំនួន១.៩៧៩ហិកតាថា “ ខ្ញុំបានបញ្ជូនសារពីទីនេះថា ខ្ញុំនឹងមិនអាចដោះស្រាយបញ្ហាដីធ្លី នៅពេលណាជាប់ពាក់ព័ន្ធជាមួយនឹងអ្នកនយោបាយ និងអង្គការក្រៅរដ្ឋាភិបាល ឬគណបក្សនយោបាយឡើយ។
លោកបានថ្លែងទៀតថា “ នោះហើយជាអ្វីដែលខ្ញុំបានលើកឡើងថា ពួកគេគួរកំុជាប់ពាក់ព័ន្ធជាមួយនឹងនយោបាយ ប្រសិនបើពួកគេចង់ឲ្យខ្ញុំដោះស្រាយបញ្ហាវិវាទដីធ្លីនោះ”។ ដោយលើកឡើងអំពី ការថ្លែងសុន្ទរកថាដ៏វែងរបស់លោក លោកក៏បានស្តីបន្ទោសប្រព័ន្ធផ្សព្វផ្សាយថា មិនបានផ្សាយអំពីសមិទ្ធផលរបស់រដ្ឋាភិបាល ក្នុងការចែកប័ណ្ណកម្មសិទ្ធិដីធ្លីដល់ប្រជាពលរដ្ឋទេ គឺនិយាយតែរឿងអាក្រក់ដើម្បីបង្ខូចកិតិ្តយសប្រទេសកម្ពុជា នៅលើពិភពលោក។
លោកបានមានប្រសាសន៍បន្ថែមទៀតថា “ ខ្ញុំបានប្រាប់ [អ្នកទេសចរបរទេស] ថា នៅប្រទេសកម្ពុជាមានពីរបែប ទី១ប្រទេសកម្ពុជានៅក្នុងប្រព័ន្ធផ្សព្វផ្សាយ និងប្រទេសកម្ពុជាមួយទៀត គឺជាប្រទេសកម្ពុជាពិតប្រាកដ។ ប្រទេសកម្ពុជា នៅក្នុងប្រព័ន្ធផ្សព្វផ្សាយ គឺជាឋាននរក ហើយប្រទេសកម្ពុជាពិតប្រាកដ គឺជាអ្វីដែលអ្នកបានឃើញ គឺជាទីកន្លែងមួយ ដែលមិនមានការហាមឃាត់ ក្នុងការធ្វើដំណើរឡើយ”។
លោក ឡៅ ម៉ុងហៃ អ្នកវិភាគនយោបាយឯករាជ្យ បានមានប្រសាសន៍ថា របាយការណ៍របស់លោក សុរិយា ស៊ូបេឌី ប្រេសិតពិសេសរបស់អង្គការសហប្រជាជាតិ ទទួលបន្ទុកសិទ្ធិមនុស្សនៅកម្ពុជា ដែលបានលើកឡើងអំពីវិវាទដីធ្លី ការបំបិទសិទ្ធិសេរីភាពក្នុងការបញ្ចេញមតិ និងទាមទារឲ្យធ្វើកំណែទម្រង់ប្រព័ន្ធបោះឆ្នោត ក៏បានបញ្ជាក់អំពីចំណុចខ្សោយនៃប្រព័ន្ធតុលាការផងដែរ ដោយលោកបានបញ្ជាក់ថា ស្ថិតក្រោមឥទ្ធិពលអ្នកមានប្រាក់ និងអ្នកមានអំណាច។
លោកថ្លែងបន្តថា “ នៅពេលណាប្រព័ន្ធតុលាការ ស្ថិតនៅក្រោមអំណាចអ្នកនយោបាយ សំណុំរឿងទាំងឡាយ និងអ្នកត្រូវបានតុលាការផ្តន្ទាទោស គឺពិតជាទាក់ទងនឹងរឿងនយោបាយ។ ដូច្នោះគេគឺជាអ្នកទោសនយោបាយ ពីព្រោះតុលាការជាស្ថាប័នមួយ ត្រូវបានប្រើប្រាស់ដោយអ្នកនយោបាយ ដើម្បីបំបិទមាត់គូប្រជែង ឬអ្នកនយោបាយប្រឆាំងផ្សេងទៀត”៕
ប្រែសម្រួលដោយ ឃិន ណៃ