កាលពីម្សិលមិញនៅក្នុងរាជធានីភ្នំពេញក្រុមហ៊ុនរ៉ូយ៉ាល់គ្រុបបានចុះកិច្ចព្រមព្រៀងជាមួយក្រុមហ៊ុនចិនឈ្មោះ ហាយដ្រូឡានកាង (Hydrolancang Inertnational Energy Co.Ltd) ដើម្បីសាងសង់ទំនប់វារីអគ្គិសនីទន្លេសេសានក្រោម២ដ៏ចម្រូងចម្រាសនៅក្នុងខេត្តស្ទឹងត្រែង។
បន្ទាប់ពីលោកគិត ម៉េង ប្រធានក្រុមហ៊ុនរ៉ូយ៉ាល់គ្រុបនិងលោកហួងកាងមិញប្រធានក្រុមហ៊ុន ហាយដ្រូឡានកាង បានចុះហត្ថលេខាលើកិច្ចព្រមព្រៀងវិនិយោគទុនរួចមក តំណាងមកពីក្រុមហ៊ុនទាំងពីរបានចុះហត្ថលេខាលើកិច្ចព្រមព្រៀងដោយឡែកមួយទៀតជាមួយនឹងក្រសួងហិរញ្ញវត្ថុនិងក្រសួងឧស្សាហកម្មដែលអនុញ្ញាតឲ្យដំណើរការសាងសង់គម្រោងនេះ។
យោងតាមការលើកឡើងនៅក្នុងពិធីនោះបានឲ្យដឹងថា ការសាងសង់នេះនឹងមានរយៈពេលប្រាំឆ្នាំ ហើយទំនប់នេះនឹងដំណើរការរយៈពេល៤០ឆ្នាំមុនពេលផ្ទេរកម្មសិទ្ធិឲ្យរដ្ឋាភិបាល។ប៉ុន្ដែ ការលើកឡើងនោះពុំមានសេចក្ដីលម្អិតពាក់ព័ន្ធនឹងកិច្ចព្រមព្រៀងនោះទេ។
កាលពីម្សិលមិញនេះដែរ ទីភ្នាក់ងារព័ត៌មានចិន ស៊ីនហួ (Xinhuo)បានរាយការណ៍ថា តម្លៃវិនិយោគទុនលើទំនប់នេះមានទឹកប្រាក់សរុបចំនួន៧៨១លានដុល្លារ ហើយនៅពេលគម្រោងនេះចាប់ផ្ដើមប្រតិបត្តិការ រដ្ឋាភិបាលនឹងទទួលបានចំណូលពន្ធពីទំនប់នេះជាទឹកប្រាក់ចំនួន២៩,៦លានដុល្លារក្នុងមួយឆ្នាំៗ។
យោងតាមឯកសារមួយដែលទទួលបានកាលពីដើមខែនេះបង្ហាញថា ក្រុមហ៊ុន រ៉ូយ៉ាល់គ្រុបនឹងមានភាគហ៊ុនរហូត៩០ភាគរយនៅក្នុងគម្រោងជាដៃគូជាមួយក្រុមហ៊ុន ហាយដ្រូឡានកាង ចំណែកឯក្រុមហ៊ុនអគ្គិសនីដ៏ធំនៅប្រទេសវៀតណាមវិញរដ្ឋាភិបាលមានភាគហ៊ុនត្រឹមតែ១០ភាគរយប៉ុណ្ណោះ។
កាលពីម្សិលមិញ ពុំំមានការពន្យល់ណាមួយពាក់ព័ន្ធនឹងមូលហេតុដែលតំណាងរបស់ក្រុមហ៊ុនអគ្គិសនីវៀតណាមមិនមានវត្តមានក្នុងពិធីចុះហត្ថលេខានោះទេហើយលោក កាងមិញ ប្រធានក្រុមហ៊ុន ហាយដ្រូឡានកាង ក៏បដិសេធមិនធ្វើអត្ថាធិប្បាយអំពីការពាក់ព័ន្ធរបស់ក្រុមហ៊ុនលោកនៅក្នុងគម្រោងនេះដែរ។
យោងតាមឯកសារដែលទទួលបានពីក្រសួងបានឲ្យដឹងថា កិច្ចព្រមព្រៀងដែលធ្វើឡើងដោយក្រុមហ៊ុនរ៉ូយ៉ាល់គ្រុប ក្រុមហ៊ុនហាយដ្រូឡានកាង និងក្រុមហ៊ុនអគ្គិសនីវៀតណាម មានឈ្មោះថាក្រុមហ៊ុនថាមពលវារីអគ្គិសនីទន្លេសេសានក្រោម២(Hydro Power Lower Seasan 2 Co.Ltd.)។
ដោយមានទីតាំងស្ថិតនៅជិតចំណុចប្រសព្វនៃទន្លេសេសាននិងទន្លេស្រែពកក្នុងខេត្តស្ទឹងត្រែង គម្រោងទំនប់វារីអគ្គិសនីកម្លាំង៤០០មេហ្គាវ៉ាត់នេះ នឹងតម្រូវឲ្យប្រជាពលរដ្ឋប្រហែល៥.០០០នាក់ផ្លាស់ទីលំនៅចេញពីទីនោះ ទោះបីជាអ្នកជំនាញបរិស្ថានជឿជាក់ថា អ្នកភូមិច្រើនពាន់នាក់ទៀត នៅផ្នែកខាងលើនិងខាងក្រោមទន្លេនេះនឹងរងផលប៉ះពាល់ក៏ដោយ។ របាយការណ៍មួយក៏បានបា៉ាន់ស្មានថា ទំនប់វារីអគ្គិសនីទន្លេសេសានក្រោម២នេះអាចបង្កឲ្យបាត់បង់បរិមាណត្រីក្នុងទន្លេមេគង្គចំនួន៩,២ភាគរយ។ នៅខាងក្រៅពិធីចុះហត្ថលេខាក្នុងសណ្ឋាគារកំាបូឌីយ៉ាណា របស់ ក្រុមហ៊ុនរ៉ូយ៉ាល់គ្រុបលោកគិតម៉េងបានមានប្រសាសន៍ថា ថាមពលទាំងអស់ដែលបានមកពីទំនប់នេះនឹងសម្រាប់ផ្គត់ផ្គង់ក្នុងប្រទេសកម្ពុជា។
លោកគិតម៉េង បានមានប្រសាសន៍ថា“ ថាមពល១០០ភាគរយនឹងផ្តល់ឲ្យប្រជាពលរដ្ឋកម្ពុជា ដើម្បីអភិវឌ្ឍសេដ្ឋកិច្ចខ្លួន”។ ដើម្បីសម្រាលក្តីបារម្ភរបស់អ្នកភូមិរាប់ពាន់នាក់ដែលត្រុូវផ្លាស់លំនៅដ្ឋានដើម្បីបើកផ្លូវសាងសង់ទំនប់នេះ លោកគិតម៉េង បានមានប្រសាសន៍ថា គេនឹងបង្កើតគណៈកម្មាធិការអន្តរក្រសួងមួយដើម្បីធ្វើឲ្យប្រាកដថាការតាំងលំនៅថ្មីនិងការផ្តល់ប្រាក់សំណងត្រូវបានអនុវត្តដោយយុត្តិធម៌។
ទោះបីជាមានការអះអាងរបស់លោកគិត ម៉េង ក៏ដោយ ក៏លោក ចាន់ថន តំណាងអ្នកភូមិនៅក្នុងឃំុស្រែគរបានលើកឡើងថាអ្នកភូមិមិនទាន់ទទួលបានព័ត៌មានណាមួួយពាក់ព័ន្ធនឹងអនាគតរបស់ខ្លួនឡើយ។
លោក ចាន់ ថន បានសួរថា “ តើអ្នកសប្បាយចិត្តទេ ប្រសិនបើអ្នកត្រូវគេបណ្តេញចេញពីលំនៅដ្ឋាន បាត់បង់មុខរបរនិងអាជីពរបស់អ្នកនោះ?”៕
ប្រែសម្រួលដោយហមសុផាណ្ណា