33 C
Phnom Penh

មានក្តី​​បារម្ភ​កាន់​តែ​ច្រើនជុំ​វិញសេច​ក្តីព្រាង​ច្បាប់​ស្តីពី​ការ​វាយ​តម្លៃពី​ផលប៉ះ​ពាល់ផ្នែក​បរិស្ថាន​​

ដោយ ឌឹ ខេមបូឌា ដេលី

បទវិភាគ

បណ្តា​អង្គ​ការក្រៅ​រដ្ឋាភិបាល​បាន​ លើក​ឡើង​ពី​បញ្ហាព្រួយ​បារម្ភ​ជា​ច្រើន​​ដែល​នឹង​ត្រូវ​ដាក់​ជូន​ទៅ​ក្រសួង​បរិស្ថាន​ក្នុង​ពេល​ឆាប់ៗ​នេះ ជុំ​វិញច្បាប់​វាយ​តម្លៃ​ពី​ផល​ប៉ះ​ពាល់ផ្នែក​បរិស្ថាន​ (EIA) ដែល​​ទើប​​ស្នើ​ឡើង​ និង​ដែល​​ត្រូវ​រដ្ឋាភិបាល​​ចេញ​​ផ្សាយ​កាលពី​សប្តាហ៍​មុន​។

ក្តី​ព្រួយ​បារម្ភដែល​​​ត្រូវ​បាន​អង្គការ​បណ្តាញ​សិក្សា​ពី​ផល​ប៉ះពាល់ផ្នែក​សង្គម​និង​បរិស្ថាន​​ដោយសារ​ឧស្សាហ​កម្ម​និស្សារណ​កម្ម (Extractive Industry Social and Environment Impact Network) ​ជាសមន្ធ​អង្គ​ការ​ក្រៅ​រដ្ឋាភិបាលបាន​ចង​ក្រង​ឡើងនេះបង្ហាញ​ពី​ការ​ខ្វះ​ចន្លោះ​ដ៏​ធំ​មួយ​​​​​នៅ​ក្នុង​សេចក្តី​ព្រាង​ច្បាប់​ដែល​អនុញ្ញាត​​ឲ្យគម្រោង​នានា​​របស់​រដ្ឋ​ដែល​គេ​គិត​ថា“ មាន​លក្ខណៈ​បន្ទាន់”ដំណើរ​ការ​ដោយ​មិន​ចាំ​បាច់​​មាន​ការ​វាយ​តម្លៃ​ពី​ផល​ប៉ះ​ពាល់។

លិខិត​ឆ្លើយ​តប​​ពី​​​អង្គការ​ Extractive Industry Social and Environment Impact Network​ លើក​​ឡើង​ថា“ មួយ​ផ្នែកមន្ត្រី​ក្រសួង​គួរ​តែ​ទទួល​បានការ​លើក​ទឹក​ចិត្ត​ឲ្យ​​បង្កើត​​គោល​ការណ៍​ដើម្បី​​ជួយ​កំណត់ថា តើ​បណ្តា​គម្រោង​ណា​មួយ​ពិតជា​​មាន​​ភាព​បន្ទាន់នោះ”។

​ទោះ​បីជាលិខិត​ឆ្លើយ​តប​​នេះ​បានកោត​សរ​សើរ​​ចំពោះ​ការ​បញ្ចូល​​​ពិគ្រោះយោ​បល់​​ជាសាធារណៈនៅ​ក្នុង​សេច​ក្តី​ព្រាង​ច្បាប់​នេះ​ក្តី​ ក៏​​លិខិត​នេះ​គូស​បញ្ជាក់​​ថា “ ច្បាប​់នេះ​​គួរតែ​ផ្តល់សេចក្តី​លម្អិត​បន្ថែមទៀត​អំ​ពី​ដំណើរ​សម្រាប់​ស្វែង​រក​ការ​​ចូល​រួម​​ជា​សា​ធារ​​ណៈ​ រួម​ទាំង​បទប្បញ្ញត្តិ​នានា​​ដែល​ធានា​ថា សាធារណ​ជនទទួល​បាន​ព័ត៌​មាន​ទាន់​​ពេល​វេលា និង​គ្រប់​គ្រាន់អំពី​គម្រោង​នេះ​និងឱកាស​របស់​ពួកគេ​ក្នុង​ការ​​ចូល​រួម”។

នៅ​ឯ​សិក្ខា​សាលា​មួយ​ក្នុងរាជធានី​​ភ្នំ​ពេញ​​កាល​ពី​ថ្ងៃ​ព្រហស្បតិ៍ ដែល​នៅ​ទី​នោះ​គេ​បាន​​​បញ្ចេញ​សេច​ក្តី​ព្រាង​ច្បាប់​នេះ​ មន្ត្រី​បាន​លើកឡើងថាមាន​តែ​ប្រ​ហែល​៥​ភាគ​រយ​ប៉ុណ្ណោះ​​នៃ​គម្រោង​នានា​ ដែល​រួម​មាន​រោង​ចក្រទំនប់​វារីអគ្គិសនី និង​ផ្លូវ​ថ្នល់​ ​អនុម័ត​ចន្លោះ​ពី​ឆ្នាំ​២០០៤​ដល់​ឆ្នាំ២០១១ ​​ពិតជា​បាន​ធ្វើ​ការ​វាយ​តម្លៃ​ពី​ផល​ប៉ះ​ពាល់​ផ្នែក​បរិស្ថាន​។

ខណៈដែល​សេចក្តី​ព្រាង​ច្បាប់​នេះ​លើក​ឡើង​ថា នឹង​ចេញ​អនុក្រឹត្យមួយ​​ដើម្បី​គ្រប់​គ្រងអ្នក​ពិគ្រោះ​យោបល់់នានាដែល​ធ្វើ​ការ​វាយ​តម្លៃ​ពី​ផល​ប៉ះពាល់​ផ្នែក​បរិស្ថាន​នោះអង្គ​ការ​ក្រៅ​រដ្ឋាភិបាល​ទាំង​នេះ​ក៏​បាន​លើក​ឡើង​ដែរ​ថា បណ្តា​អ្នក​ពិគ្រោះ​យោបល់​មិន​គួរ​មាន​ជម្លោះ​ផល​ប្រ​យោជន៍​ឡើយនិង​គួរ​ត្រូវ​បាន​វិនិច្ឆ័យ​ដោយ​ឯក​រាជ្យ​ដើម្បី​ផ្តល់​ការ​វាយ​តម្លៃ​ប្រកប​ដោយ​គុណ​ភាព​ខ្ពស់​។

លោកដេលឌាឡេ (Dayl Dealehr) ដែល​បាន​​ចូល​រួម​ពាក់​ព័ន្ធ​ក្នុង​ដំណើរ​ការ​ធ្វើសេច​ក្តី​ព្រាង​ច្បាប់​នេះនិង​​ប្រធាន​ក្រុម​ហ៊ុន ​Cambodia Environment Ltd ជា​ក្រុមហ៊ុន​មួយដែល​ធ្វើការ​​វាយ​តម្លៃ​ពី​ផល​ប៉ះពាល់​ផ្នែកបរិស្ថាន​ បាន​​មាន​ប្រ​សាសន៍​ថា “វា​ជា​រឿង​សំខាន់​ដែល​​គេ​មាន​ទំនុក​ចិត្ត​លើ​អ្នក​ផ្តល់​ការ​វាយ​តម្លៃ​​នេះ​។ ប៉ុន្តែ ខ្ញុំ​មិន​យល់​ស្រប​នឹង​សំណើ​ឲ្យ​អ្នក​ពិគ្រោះ​យោបល់នានាឆ្លងកាត់​ដំណើរ​ការ​ធ្វើ​តេស្ត​សាក​ល្បង​សមត្ថភាព​នោះ​ទេ”។

លោក​​មាន​ប្រ​សាសន៍​ថា នៅ​ក្នុង​ដំណើរ​ការវាយ​តម្លៃ​ពី​ផល​ប៉ះពាល់​ផ្នែក​បរិស្ថាន​ល្អ​បំផុត បណ្តា​អ្នក​ពិគ្រោះ​យោបល់​អាច​ប្រ​ឈម​​នឹងការ​បាត់​បង់​កេរ្តិ៍​ឈ្មោះរបស់​ខ្លួន​ដោយ​សារ​​ការ​ត្រួត​ពិនិត្យ​ពួក​គេ ​និង​​​ដោយសារ​ត្រូវ​​គេ​ត្រួត​ពិនិត្យ​​បែប​​នេះ​នោះ។

លោក ឌាឡេ បាន​​មាន​ប្រ​សាសន៍​ថាលោក​ក៏​មាន​គម្រោង​ដាក់​ជូន​​សំណើជា​លាយ​លក្ខណ៍​​អក្សរទៅ​ក្រសួង​នេះ​ផងដែរ​ទាក់​ទិន​នឹង​សេចក្តី​ព្រាង​ច្បាប់​នេះ។លោកមាន​ប្រ​សា​សន៍​​ថា សំណើ​ទាំង​នោះនឹង​រួមមាន​បទប្បញ្ញត្តិ​មួយដើម្បី​ធ្វើឲ្យ​ប្រាកដ​ថាគម្រោង​នានាមិន​ជាប់​គាំង​ ខណៈពេល​ដែលរដ្ឋាភិបាលគិត​ពិចារណា​អំពីការ​វាយ​តម្លៃ​ពី​ផល​ប៉ះ​ពាល់​ផ្នែកបរិស្ថាន​របស់​​ខ្លួន​។

លោក​មាន​ប្រ​សាសន៍​ថា“ ប្រសិន​បើ​គ្មាន​​ការ​ឆ្លើយ​តប​ក្នុងរយៈពេល៦០​ថ្ងៃឬ​៩០​ថ្ងៃពេល​នោះសន្មតថាគ្មានការ​ប្រ​ឆាំង​ជំទាស់”។

លោក ឌាឡេ មាន​ប្រ​សាសន៍​ថា បញ្ហា​ដ៏​ធំ​ជា​មួយ​នឹង​សេច​ក្តី​ព្រាង​ច្បាប់​នេះ​ គឺ​ការ​អនុ​វត្ត​។លោក​បន្ត​ថា“វា​នឹងមាន​ការ​កែ​ប្រែ​ខ្លះ​ៗដែល​ក្រសួង​ផ្សេងៗទៀត​ត្រូវ​ដោះ​ស្រាយ​ជា​មួយ​ក្រសួង​បរិស្ថាន”។

នៅ​ឯ​សិក្ខាសាលា​​កាល​ពី​សប្តាហ៍​មុនមន្ត្រី​មកពីស្ថាប័ន​ផ្សេងៗ​ក្នុង​ជួរ​រដ្ឋាភិបាលបាន​លើក​ឡើង​ពី​ក្តី​បារម្ភអំពីសេចក្តី​ព្រាង​ច្បាប់នេះ​ដែល​ផ្តល់​ឲ្យ​ក្រសួង​បរិស្ថាន​នូវ​ សិទ្ធិ​វ៉េតូ​ប្រ​កប​ដោយ​ប្រសិទ្ធ​ភាពលើ​ការ​អភិវឌ្ឍ​នានា។

លោក ឌាឡេ មា​នប្រ​សាសន៍​ថា “ ពួកគេប្រ​ហែល​ជា​ដឹង​​ថា​ពិបាក​នឹង​ទទួល​យក។វា​​អាច​​​ធ្វើ​ឲ្យ​ក្រសួង​មួយ​ចំនួន​បាត់​បង់​អំណាច​”៕

ប្រែ​សម្រួល​ដោយ​ តែមសុខុម​

© 2024, ខេមបូឌា ដេលី. All rights reserved. No part of this article may be reproduced in print, electronically, broadcast, rewritten or redistributed without written permission.

អត្ថបទទាក់ទង

អត្ថបទអានច្រើន

សេចក្ដីរាយការណ៍ពិសេស