កាលពីថ្ងៃសុក្រលោក សួង សោភ័ណប្រធានចលនាយុវជនគណបក្ស សម រង្ស៊ី បានដាក់ពាក្យបណ្តឹងមួយ ចោទលោកនាយករដ្ឋមន្ត្រី ហ៊ុន សែន ពីបទមនុស្សឃាតគិតទុកជាមុនចំពោះការស្លាប់ប្រជាពលរដ្ឋចំនួន៣៥៣នាក់ ដែលបានស្លាប់ក្នុងករណីផ្អើលរត់ជាន់គ្នា អំឡុងពិធីបុណ្យអុំទូកកាលពីឆ្នាំ២០១០។
នៅពេលសួរថា ហេតុអ្វីទើបដាក់ពាក្យបណ្តឹងបន្ទាប់ពីមានឧបទ្ទវហេតុដ៏រន្ធត់រយៈពេលពីរឆ្នាំមកហើយនោះ លោកសោភ័ណ មានប្រសាសន៍ថា លោកត្រូវការពេលវេលាដើម្បីប្រមូលភ័ស្តុតាងឲ្យបានគ្រប់គ្រាន់ដើម្បីដាក់បន្ទុកលើលោកនាយករដ្ឋមន្ត្រី។លោកបានបន្តថា លោកក៏មានគម្រោងដាក់ពាក្យបណ្តឹងប្រឆាំងនឹង លោក ទូច ណារ៉ុថ អតីតស្នងការនគរបាលរាជធានីភ្នំពេញលោក កែប ជុតិមា អភិបាលរាជធានីភ្នំពេញ និងលោក គង់ សំអុល រដ្ឋមន្ត្រីព្រះបរមរាជវាំងផងដែរ។
លោក សោភ័ណ បានលើកឡើងថាលោកបានប្រមូលភ័ស្តុតាងបានគ្រប់គ្រាន់ដើម្បីបញ្ចាក់ថាការស្លាប់របស់អ្នកមកលេងបុណ្យអុំទូកដែល ភាគច្រើនបំផុតត្រូវបានជាប់គាំងជាច្រើនម៉ោងនៅលើស្ពានកោះពេជ្រ ដែលឥឡូវនេះបានវាយកម្ទេចចោលហើយនោះគឺជាគម្រោងរៀបចំទុកជាមុន មិនមែនជាការគាប់ជួននោះទេ ហើយថា ស្ពានដែលត្រូវបានវាយកម្ទេចចោល គឺដើម្បីបំបាត់ភ័ស្តុតាងនៃអំពើឃាតកម្មនោះ។
លោកមានប្រសាសន៍បន្តថា យើងបានឃើញថាលោក ហ៊ុន សែន ដែលជាអ្នកទទួលខុសត្រូវមិនបានចាត់វិធានការណាមួយ [ដើម្បីជួយប្រជាពលរដ្ឋទាំងនោះទេ] គឺគ្រាន់តែបានបាញ់ទឹកទៅលើជនរងគ្រោះ ដែលមានការពិបាកដកដង្ហើម។ខ្ញុំសង្កេតឃើញថា មិនមានវត្តមានមន្ត្រីនគរបាលនៅតាមគោលដៅនោះទេ ប៉ុន្តែនៅចុងខាងលិចនៃស្ពានកោះពេជ្រក៏ត្រូវបានគេបិទផងដែរ។
គណបក្សប្រឆាំងគឺគណបក្ស សម រង្ស៊ី បានដកខ្លួនចេញពីបណ្តឹងនោះ ដែលប្តឹងទៅសាលាដំបូងរាជធានីភ្នំពេញ ហើយនឹងបញ្ជូនទៅតុលាការយុត្តិធម៌អន្តរជាតិនៅទីក្រុងឡាអេ ផងដែរ។
លោកយឹមសុវណ្ណអ្នកនាំពាក្យគណបក្ស សម រង្ស៊ី មានប្រសាសន៍ថា ពាក្យបណ្តឹងនោះមិនពាក់ព័ន្ធនឹងគណបក្សរបស់លោកទេ ហើយបដិសេធមិនធ្វើអត្ថាធិប្បាយបន្ថែមទៀតទេ។
មិនមានមន្ត្រីរដ្ឋាភិបាលណាម្នាក់ ឬអាជ្ញាធររៀបចំបុណ្យជាតិ និងអន្តរជាតិជាអ្នកទទួលខុសត្រូវចំពោះការស្លាប់ប្រជាពលរដ្ឋចំនួន៣៥៣នាក់នោះទេ ប៉ុន្តែ គ្រួសារជនរងគ្រោះត្រូវបានផ្តល់សំណង។ ការសម្លាប់មនុស្សដោយគិតទុកជាមុនអាចប្រឈមទោសជាប់ពន្ធនាគារអស់មួយជីវិត។
លោក សុខ រឿន ព្រះរាជអាជ្ញារងអមសាលាដំបូងរាជធានី ថ្លែងថា លោកមិនទាន់បានទទួលពាក្យបណ្តឹងនោះនៅឡើយទេ។
លោក ផៃ ស៊ីផាន អ្នកនាំពាក្យទីស្តីការគណៈរដ្ឋមន្ត្រីមានប្រសាសន៍ថា លោកបានដឹងអំពីពាក្យបណ្តឹងនោះ ប៉ុន្តែ លោកមិនមានបំណងធ្វើអត្ថាធិប្បាយអំពីពាក្យបណ្តឹងនោះទេ លោកថា ជាពាក្យបណ្តឹងមិនបានការឡើយ។
យោងតាមរដ្ឋធម្មនុញ្ញរបស់យើងដែលការពារប្រជាពលរដ្ឋ ហើយប្រជាពលរដ្ឋអាចដាក់ពាក្យបណ្តឹងប្រឆាំងអ្នកណាម្នាក់បាន។ដូច្នេះនោះគឺជាសិទ្ធិរបស់គាត់ប្រសិនបើគាត់មានបំណងចង់ប្តឹង៕
ប្រែសម្រួលដោយឃិនណៃ