26 C
Phnom Penh

លោក​ ហ៊ុន សែន ព្រមាន​ដាក់​ពាក្យ​បណ្តឹង​​បក​ ចំពោះ​ករណី​ផ្អើល​រត់​ជាន់​គ្នានៅ​កោះ​ពេជ្រ​

ដោយ ឌឹ ខេមបូឌា ដេលី

បទវិភាគ

កាល​ពី​ម្សិលមិញ​ លោក​នាយក​រដ្ឋ​មន្ត្រីហ៊ុនសែនបាន​គំរាម​ប្ដឹង​បក​វិញ​ប្រឆាំង​នឹង​​​ប្រធាន​ចលនា​យុវជន​គណបក្ស​ សម រង្ស៊ីប្រ​​សិន​បើ​តុលាការ​រក​ឃើញ​ថា លោកមិន​មែន​​ជា​អ្នកទទួល​ខុស​ត្រូវចំពោះ​ការ​​ផ្អើល​រត់​ជាន់​គ្នា​កាល​ពី​២០១០​ នៅ​រាជ​ធានី​ភ្នំពេញ​ដែល​បណ្ដាល​ឲ្យ​ប្រជាពលរដ្ឋចំនួន​​៣៥៣​នាក់​បាន​ស្លាប់​ អំឡុង​ពិធី​បុណ្យ​អុំ​ទូក​។

លោក​ សួងសុ​ភណ្ឌប្រធាន​ចលនា​យុវ​ជន​​គណបក្ស​ សម រង្ស៊ី បាន​ចោទ​ប្រកាន់​លោក​នាយក​រដ្ឋ​មន្ត្រី​ហ៊ុន សែន ថា​ ជា​អ្នក​ទទួល​ខុសត្រូវ​​ចំពោះ​​​ការ​ស្លាប់​​របស់​ប្រជាពលរដ្ឋ​ទាំង​នោះ​នៅ​ក្នុង​ពាក្យ​បណ្ដឹង​មួយ​ ដែល​បាន​ដាក់​​ប្ដឹង​ទៅ​សាលាដំបូង​រាជ​ធានីភ្នំពេញ​ កាល​ពី​ថ្ងៃ​សុក្រ​។លោកក៍​​​មាន​គម្រោង​​​ដាក់​ពាក្យ​បណ្ដឹង​ស្រដៀង​គ្នា​​នេះ​ដែរ​ប្រឆាំង​នឹងលោកទូច ណារ៉ុថ​ អតីត​ស្នង​ការ​នគរបាល​រាជធានី​ភ្នំពេញ​ លោក​ កែប ជុតិមា​ អភិបាល​រាជធានី​ភ្នំពេញ​ និង​លោកគង់សំអុល​ រដ្ឋ​មន្ត្រី​ព្រះ​បរម​រាជ​វាំង​។

កាល​ពី​ព្រឹក​ម្សិល​មិញ​​​ខណៈ​ពេល​ចែក​ប័ណ្ណ​កម្មសិទ្ធិ​ដី​ធ្លី​នៅ​ខេត្ត​ព្រះ​សីហនុ លោកហ៊ុនសែន​ បាន​សន្យា​ថាលោក​មិន​ជ្រៀត​ជ្រែក​​ក្នុង​ករណី​​នេះទេ​។ លោក​ថ្លែង​បន្ដ​ថា “ ឥឡូវ​នេះ​យើង​មិន​និយាយ​អ្វី​ឲ្យ​​ប៉ះ​ពាល់​ដល់​​ឯករាជភាពរបស់​តុលាការ​ទេ​ ​ហើយទុក​​ករណី​នេះ​ឲ្យ​តុលា​ការ​​ជា​អ្នក​សម្រេច​ ប៉ុន្ដែ​ប្រ​សិន​​បើ​​ខ្ញុំ​មិន​មាន​ទោស​ទេ ខ្ញុំ​សូម​ព្រមាន​ថា ខ្ញុំ​អាច​នឹង​ដាក់​ពាក្យ​​បណ្ដឹង​របស់​ខ្ញុំ​វិញ”។

លោក​ថ្លែង​បន្ដ​ថា “ ​នៅ​ក្នុង​ករណី​នេះ​ បើសិន​ជា​ខ្ញុំត្រូវ​តុលាការ​រក​ឃើញ​ថា គ្មាន​កំហុស​ ខ្ញុំ​មាន​សិទ្ធិ​ប្តឹងបក​វិញ​។នេះគឺ​ជា​ការ​ចាំបាច់ ដើម្បី​ការ​ពារ​កិត្ត​ិយស ភាព​ថ្លៃ​ថ្នូ​រនិង​ប្រជាប្រិយភាព​របស់​ខ្ញុំ​ និង​កិត្ត​ិយស​របស់​រដ្ឋាភិបាល​”។

លោកហ៊ុនសែនបាន​ព្រមាន​ថាប្រសិន​បើលោក​ត្រូវ​បានតុលាការរក​ឃើញ​ថា មាន​ពិរុទ្ធភាព​នោះ​ មន្ត្រីជាន់​ខ្ពស់​ផ្សេងៗ​ទៀត​ត្រូវ​តែចូលពន្ធនាគារ​​ជាមួយគាត់។

លោក​ថ្លែង​បន្ដ​ទៀត​ថា “ ភ្លាម​នោះ​អ្នក​ទាំង​អស់​គ្នា​ត្រូវ​តែ​នៅ​ពីក្រោយ​ខ្ញុំ​នៅ​ក្នុង​ពន្ធនាគារ​។ បើសិន​ ហ៊ុន​ សែន នៅ​ក្នុង​​ពន្ធនាគារ​ នោះមិន​មាន​នរណា​ម្នាក់​អាច​រួច​ខ្លួន​បានឡើយ ហើយ​​អ្នក​​ចូល​ពន្ធនា​គារ​មុន​គេ​ គឺលោកសខេងរដ្ឋមន្ត្រី​ក្រសួង​មហាផ្ទៃ​ ទោះ​បី​ជា​ពួក​គេ​បាន​ប្ដឹងតែខ្ញុំ និង​សម្ដេច​ គង់សំអុល លោក ទូច ណារ៉ុថ និង​លោក កែបជុតិមា​ ក៏ដោយ”។

ទោះ​បី​ជា​របាយការណ៍​របស់ក្រុម​អង្គការ​សិទ្ធិ​មនុស្ស​ និង​អង្គការ​សហប្រជាជាតិ​បាន​រិះ​គន់​ប្រព័ន្ធ​តុលាការ​នៅ​ប្រទេស​កម្ពុជាថា ពុក​រលួយ​ និង​មិន​មាន​ឯករាជ្យ​​ក៏ដោយ ក៏​លោក ហ៊ុន សែន កាល​ពីម្សិល​មិញបាន​ថ្លែង​ថា ករណី​ចោទ​ប្រកាន់​លោក​ចុង​ក្រោយ​បំផុត​​នេះ គឺ​បញ្ជាក់​ថាតុលាការ​ឯករាជ្យ​។

លោកថ្លែង​បន្ដ​ថា ប្រជាពលរដ្ឋ​កម្ពុជា​មាន​​សិទ្ធិ​ប្ដឹង​នាយក​រដ្ឋ​មន្ត្រី​ ដូច្នេះ​ប្រជាពល​រដ្ឋ​ទាំង​នៅ​ក្នុង​ស្រុក​ និង​​អន្ដរជាតិ​​សូម​មេត្តា​ពិនិត្យ​មើល​ តើ​នៅ​ទី​ណា​មាន​សិទ្ធិ​ជាង?។ ប្រសិន​បើ​ រដ្ឋាភិបាលរបស់​លោក​ជា​រដ្ឋា​ភិបាល​ផ្ដាច់​​ការ​ គឺ​មិន​ចាំ​បាច់​ប្ដឹង​តាម​រយៈ​តុលាការ​ឡើយ​។ លោកសុភ័ណ្ឌមាន​ប្រសាសន៍​ថាលោក​មិន​ភ្ញាក់​ផ្អើល​ចំពោះ​ការ​ព្រមាន​របស់​លោក​នាយករដ្ឋ​មន្ត្រី​ទេ។

លោក​មាន​ប្រសាសន៍​បន្ដ​ថា “ ​ខ្ញុំ​មិន​មាន​ការ​ព្រួយ​បារម្ភ​អំពី​ការ​ព្រមាន​របស់​លោក​ ហ៊ុនសែនចំពោះលោកប្ដឹង​ខ្ញុំ​នោះ​ទេ​ ហើយ​​

ខ្ញុំ​នឹង​មិន​មាន​ការ​សោក​ស្ដាយឡើយ​ប្រសិន​បើ​តុលាការ​រក​ឃើញ​ថា ខ្ញុំ​មាន​កំហុស​ដោយ​សារ​ខ្ញុំ​ការ​ពារ​សិទ្ធិ​ប្រជាពលរដ្ឋ​ដែល​បាន​ស្លាប់​ទាំង​នោះ​ ហើយ​ខ្ញុំ​សូម​ជំរុញ​ឲ្យ​មាន​ការ​គោរព​រដ្ឋ​ធម្មនុញ្ញ”។

ទោះ​បី​ជា​មន្ត្រី​រដ្ឋាភិបាលភាគ​ច្រើន​បាន​ទទួល​ស្គាល់​ថា មាន​ការ​ខ្វះចន្លោះ​​ក្នុង​ការ​គ្រប់​គ្រង​នៅ​ថ្ងៃ​បុណ្យ​អុំ​ទូក​ក្ដី ដែល​បណ្ដាល​ឲ្យ​មាន​ការ​ផ្អើល​រត់​ជាន់​គ្នា​ស្លាប់នៅ​កោះ​ពេជ្រនៅ​ថ្ងៃ​បញ្ចប់​នៃ​ពិធី​បុណ្យ​អុំទូក​ ហើយ​រដ្ឋា​ភិបាល​បាន​ធ្វើ​ការ​ស៊ើប​អង្កេត​រយៈ​ពេល​មួយ​សប្ដាហ៍​​ប៉ុណ្ណោះអំពី​ករណី​នោះ​ ហើយ​បាន​ប្រកាស​ថា មិន​មាន​​មន្ត្រី​ណា​ម្នាក់​ត្រូវ​បាន​ដាក់​ទោស​ចំពោះ​អ្វី​ដែល​គេ​ហៅ​ថា ការ​ផ្អើលរត់​ជាន់​គ្នា​ដោយ​មិន​នឹក​ស្មាន​ដល់​ឡើយ​។

ក្រុម​អង្គការ​សិទ្ធិ​មនុស្ស​ និងសមាជិក​សភា​គណបក្ស​ប្រឆាំង​បាន​បន្ទោស​ការ​ផ្អើល​រត់​ជាន់​គ្នា​នេះថា ដោយសារ​ខ្វះ​ការ​គ្រប់​គ្រង​ និង​គ្មានកម្លាំង​ការ​ពារ​គ្រប់​គ្រាន់​សម្រាប់​ដោះ​ស្រាយ​បញ្ហា​​ក្នុងពិធី​បុណ្យ​អុំ​ទូកនៅថ្ងៃ​ចុង​ក្រោយ​នៅ​រាជធានី​ភ្នំពេញ​៕

ប្រែសម្រួលដោយឃិនណៃ

 

© 2024, ខេមបូឌា ដេលី. All rights reserved. No part of this article may be reproduced in print, electronically, broadcast, rewritten or redistributed without written permission.

អត្ថបទទាក់ទង

អត្ថបទអានច្រើន

សេចក្ដីរាយការណ៍ពិសេស