37 C
Phnom Penh

អាកប្បកិរិយា​គ្រូពេទ្យ​គ្មាន​ក្រម​​សីលធម៌បណ្តាល​ឲ្យ​ក្មេង​​ប្រុស​ស្លាប់ ដោយសារពស់​​ចឹក​នៅ​ខេត្ត​បន្ទាយ​មានជ័យ

ដោយ ឌឹ ខេមបូឌា ដេលី

បទវិភាគ

កាលពី​ម្សិល​មិញ​មន្ត្រី​សាលាខេត្តបាន​មាន​ប្រសាសន៍​​ថា បុគ្គលិក​​មន្ទីរពេទ្យ​​​​នៅ​ក្នុង​ខេត្ត​បន្ទាយមានជ័យ​ដែល​​មិនព្រម​ព្យា​បាល​​ក្មេង​ប្រុស​អាយុ​៧​ឆ្នាំម្នាក់ដែល​​ត្រូវ​ពស់​វែក​​ចឹក​​កាល​ពី​សប្តាហ៍​មុន​នោះ​ គឺជា​អាកប្ប​កិរិយា​​អសីលធម៌​ ​ហើយ​ត្រូវ​បាន​គេ​​ស្តី​បន្ទោស​​ថាបណ្តា​ល​ឲ្យ​ក្មេង​ប្រុសនេះស្លាប់​​។

លោក កែវ រតនៈ អ្នក​នំាពាក្យ​សា​លា​ខេត្ត​​បន្ទាយ​មានជ័យ​មាន​ប្រសា​សន៍​ថា “ ពួក​គេ​មិន​​បាន​អនុវត្ត​តាម​ក្រម​សីលធម៌​របស់​គ្រូ​ពេទ្យ ​ដើម្បី​ព្យាបាល​អ្នក​ជំងឺ​នោះ​ទេ​។វា​ជា​កំហុស​របស់​គ្រូពេទ្យ​ទាំ​ង​នោះ​ ​ដែល​បណ្តាល​ឲ្យ​ក្មេង​ប្រុសនេះ​ស្លាប់​”។

លោក រតនៈ បានមាន​ប្រសាសន៍បន្តថាអាជ្ញាធរ​បាន​សម្រេច​ដក​ប្រធាន​មន្ទីរពេទ្យ​លោកគឹមសំអុលនិង​វេជ្ជបណ្ឌិត​ អុិនសុធារិទ្ធិពី​តួនាទី​របស់​ពួកគេ ​ហើយ​បាន​បញ្ជូន​ពួកគេ​ឲ្យ​ទៅ​ធ្វើការ​នៅក្នុង​មន្ទីរ​សុខា​ភិបាល​ខេត្ត​វិញ​។ទាំង​លោកសំអុលនិង​លោកសុធារិទិ្ធ​មិន​អាច​ទាក់​ទង​បាន​ទេកាលពីម្សិលមិញ។

កុមារា​ឈ្មោះ មឿន ម៉េត ត្រូវ​បាន​គេ​បញ្ជូន​ជាបន្ទាន់​ទៅកាន់​មន្ទីរ​ពេទ្យ​ស្រុក​ថ្ម​ពួកកាលពីថ្ងៃព្រហស្បតិ៍ បន្ទាប់​ពី​ត្រូវ​ពស់​វែក​ក្របី​​ចឹក​ចំ​ម្រាម​ដៃ​នៅ​ក្នុង​ឃុំ​បន្ទាយ​ឆ្មារ​។​ទោះ​បី​ជា​មន្ទីរ​ពេទ្យ​មាន​ឧបករណ៍​​​ និង​ថ្នាំ​បន្សាប​​ពិស​​ ដែល​ត្រូវ​ការជា​​ចាំបាច់​ដើម្បី​សង្គ្រោះ​ជីវិត​ក៏ដោយ ​​​ក៏​ពួក​គេ​មិន​បាន​ប្រើដើម្បីសង្គ្រោះជីវិត​ក្មេង​ប្រុស​នេះ​​​ឡើយ។

ឪពុកម្តាយ​របស់​ក្មេង​ប្រុស ​បាន​ចោទ​ប្រ​កាន់​ក្រុម​គ្រូពេទ្យ​ថា​ មិន​ព្រម​ប្រើថ្នាំ​​ ដើម្បី​ព្យាបាល​កូន​ប្រុស​របស់​ពួក​គាត់​​ទេ​​ ពីព្រោះ​ពួក​គេ​ទុក​ថ្នាំ​សម្រាប់​តែ​ក្រុម​និស្សិត​ស្ម័គ្រ​ចិត្ត​ដែល​ចូល​រួម​ក្នុង​​កម្មវិធី​ចែក​ប័ណ្ណ​កម្មសិទ្ធិ​ដី​ធ្លី​របស់​លោកនាយក​រដ្ឋមន្ត្រី ហ៊ុន សែន​ តែ​ប៉ុណ្ណោះ​។​ក្រុម​មន្ត្រី​មន្ទីរ​ពេទ្យ​បាន​​បដិសេធ​ចំពោះ​ការចោទ​​ប្រ​កាន់​ពីឪពុក​ម្តាយ​​ក្មេង​ប្រុស​រូប​នេះ​។

លោកកែវសុភក្ត្រាប្រធាន​មន្ទីរ​សុខា​ភិបាល​ខេត្ត​​មាន​ប្រ​សាសន៍​ថា ​​ក្រុម​គ្រូពេទ្យ​មាន​ការ​ព្រួយ​បារម្ភអំពី​ភាព​គ្រោះ​ថ្នាក់​​ក្នុង​ការ​ព្យាបាល​កុមារា​អាយុ​៧​ឆ្នាំ​នៅ​ក្នុង​មន្ទីរ​ពេទ្យ​ស្រុក​​ ដោយ​សារមន្ទីរ​ពេទ្យ​​មិន​មាន​សម្ភារ​គ្រប់​គ្រាន់​។

លោកបានមាន​ប្រ​សាសន៍​បន្តថា​ដោយ​សារ​ក្តី​បារម្ភ​នេះ​ក្រុម​គ្រូពេទ្យ​បាន​ណែ​នាំ​ឲ្យ​ឪពុក​ម្តាយ​​របស់​ក្មេង​ប្រុស​​​នេះ​យក​កូន​របស់​ខ្លួន​ទៅ​ព្យបាល​នៅ​មន្ទីរ​ខេត្ត​បន្ទាយ​មានជ័យ​វិញ ដែល​មាន​ចម្ងាយ​ប្រហែល​៤០គីឡូ​ម៉ែត្រពី​ទី​នោះ​។ កុមារា មឿនម៉េតបាន​ស្លាប់​បន្ទាប់​ពីត្រូវ​បាន​​គេ​បញ្ជូន​​ដល់​មន្ទីរពេទ្យខេត្ត​​។

លោក សុភក្ត្រា បានមាន​ប្រសាសន៍បន្ត​ទៀតថា “ ពួកគេ​​ [បុគ្គលិក​មន្ទីរ​ពេទ្យ​ស្រុក​] គួរតែ​ប្រើ​ថ្នាំ​បន្សាប​ពិស​ ដើម្បី​ជួយ​រក្សា​ជីវិត​របស់​កុមារានោះ”។ លោកធុយសាមឿនជាឪពុក​របស់​ក្មេង​ប្រុស​ មឿនម៉េតបាន​និយាយថាលោកបាន​ដាក់​ពាក្យ​បណ្តឹង​​​ទៅ​សាលា​ស្រុក​រួច​ហើយ​ កាលពីម្សិលមិញ​ ដោយស្នើ​សុំ​ឲ្យ​ពួកគេ​ចោទ​​ប្រកាន់​ក្រុម​គ្រូពេទ្យ​ថា ជាអ្នក​ទទួល​ខុស​ត្រូវ​ចំពោះ​ការ​ស្លាប់​កូន​ប្រុស​របស់​គាត់​ ហើយ​បាន​ទាមទារ​ឲ្យ​មាន​សំណង​សមរម្យ​ដល់​គ្រួសារ​របស់​គាត់​៕

ប្រែសម្រួលដោយឃិនណៃ​

© 2024, ខេមបូឌា ដេលី. All rights reserved. No part of this article may be reproduced in print, electronically, broadcast, rewritten or redistributed without written permission.

អត្ថបទទាក់ទង

អត្ថបទអានច្រើន

សេចក្ដីរាយការណ៍ពិសេស