32 C
Phnom Penh

ក្រុមអ្នក​​​តវ៉ា​​​នឹង​​​ការ​​​បណ្ដេញ​​​ចេញ​​​មានកាន់តែ​ច្រើន នៅ​​​ខាង​​​ក្រៅ​​​អគារការិយាល័យ​​នាយករដ្ឋមន្ត្រី

ដោយ ឌឹ ខេមបូឌា ដេលី

បទវិភាគ

ក្រុម​​​អ្នក​​​តវ៉ា​​​ប្រឆាំង​​​នឹង​​​ការ​​​បណ្ដេញ​​​ចេញ​​​​ពី​​​លំនៅ​​​ដ្ឋាន បាន​​​ធ្វើ​​​បាតុ​​​កម្ម​​​នៅ​​​ខាង​​​ក្រៅ​​​អគារ​​​ការិយា​​​ល័យ​​​របស់​​​លោក​​​នាយក​​​រដ្ឋ​​​មន្ត្រី​​​​ហ៊ុន សែន កាល​​​ពី​​​ម្សិល​​​មិញ ដែល​​​ជា​​​ការ​​​ធ្វើ​​​បាតុកម្ម​​​លើក​​​ទី២​​​នៅ​​​សប្ដាហ៍​​​នេះ និង​​​បាន​​​ប្រគល់​​​ញត្តិ​​​ជា​​​ច្រើន​​​ទៅ​​​ទី​​​ស្ដី​​​ការ​​​គណៈ​​​រដ្ឋ​មន្ត្រី​​​ដោយ​​​​​​បាន​​អំពាវនាវ​សុំ​​​ឲ្យ​​​លោកនាយក​​​រដ្ឋ​​​មន្ត្រី ហ៊ុន សែន ​​​ជួយ​​​ដោះ​​​ស្រាយ​​​វិវាទ​​​ដី​ធ្លី​របស់​​​ពួក​​​គាត់​​​ជា​​​ច្រើន​​​កន្លែង។

ក្រុម​​​អ្នក​​​តវ៉ា​​​ចំនួន​​​ប្រហែល​​​១០០​​​នាក់ ​ចេញ​មក​​​ពី​​​សហគមន៍​​​ប្រាំបួន​​​ដាច់​​​ដោយ​​​ឡែក​​​ពី​​​គ្នា​​​នៅ​​​ទូ​​​ទាំង​​​រាជ​​​ធានី​​​ភ្នំពេញ ដែល​​​សហគមន៍​​​នីមួយៗ ត្រូវ​​​បាន​​​បណ្ដេញ​​​ចេញ​ឬ ក៏​​​កំពុង​​​ប្រឈម​​​មុខ​​​​​​នឹង​​​ការ​​​បណ្ដេញ​​​ចេញ។​​​

ក្រុម​​​អ្នក​​​តវ៉ា​​​ទាំង​​​នេះ ត្រូវ​​​បាន​​ក្រុម​​​នគរ​​​បាល​​​​​​រារាំង​​​មិន​​​ឲ្យ​​​ចូល​​​ក្នុង​​​បរិវេណ​​​អគារ​​​នេះ​ប៉ុន្តែ​​​ ក្រោយ​​​មក​​​​​​ត្រូវ​​​បាន​​​អនុញ្ញាត​​​ឲ្យ​​​បញ្ជូន​​​​​​តំណាង​​​មួយ​​​ចំនួន​​​ចូល​​​ទៅ​​​ទីស្ដីការ​គណៈ​រដ្ឋមន្ត្រី​​​​​​តាម​​​ទ្វារ​​​មួយ​​​ទៀត ដើម្បី​​​ប្រគល់​​​ញតិ្ត​​​របស់​​​ពួក​​​គេ។

នៅ​ក្នុង​​​ចំណោម​​​អ្នក​​​តវ៉ា​​​ទាំង​​​នេះមាន​​អ្នកស្រី ច្រៃ នីម ជាគ្រួសារមួយ​​​ក្នុង​​​ចំណោម​​​​​​១៨២​​​គ្រួសារ ដែល​​​ប្រឈម​​​នឹង​​​ការ​​​បណ្ដេញ​​​​ចេញ​​​ពី​​​ផ្ទះ​​​សំបែង​​​ ស្ថិត​​​នៅ​​​ក្បែរអាកាស​​​យាន​​​ដ្ឋាន​​​អន្តរជាតិ​​​ភ្នំពេញ។

រដ្ឋាភិបាល បាន​​​បដិសេធ មិន​​​ផ្ដល់​​​សំណង​​​ដល់​​​គ្រួសារ​​​ទាំង​​​នេះ​​​ទេ ទោះ​​​បី​​​ជា​​​គ្រួសារ​​​ទាំង​​​​នេះ មាន​​​ប័ណ្ណ​​​ស្នាក់​​​នៅ ដែល​​​អាជ្ញា​ធរ ​ចេញ​​​ឲ្យ​​​ក៏​​​ដោយ។ អ្នក​​​ស្រី​​​និយាយ​​​ថា “ ខ្ញុំមិន​​​ចេញ​​​ពី​​​ផ្ទះ​​​ទេប្រសិន​​​បើមិនមានសំណង​​​​​​​​​សមរម្យ​​​​​​នោះ”។

លោក ប៊ុន អុ៊យ រដ្ឋលេខាធិការ​​​​​​ទី​​​ស្ដី​​​ការ​​​គណៈ​​​រដ្ឋមន្ត្រី បាន​​​បញ្ជាក់ថា លោកបាន​​​ទទួល​​​​ញត្តិ កាល​​​ពី​​​ម្សិល​​​មិញ​​​ ហើយ​​​​​​មាន​​​ប្រសាសន៍​​​ថា លោក​​​នឹង​​​បញ្ជូន​​​ញតិ្ត​​​ទាំង​​​នោះ​​​ទៅ​​​ខុទ្ទកា​ល័យ​​​របស់​​​លោក​​​នាយក​​​រដ្ឋមន្ត្រី ហ៊ុន​​​ សែន៕

         ប្រែសម្រួលដោយ ស៊ុំ សុខភុំ

© 2024, ខេមបូឌា ដេលី. All rights reserved. No part of this article may be reproduced in print, electronically, broadcast, rewritten or redistributed without written permission.

អត្ថបទទាក់ទង

អត្ថបទអានច្រើន

សេចក្ដីរាយការណ៍ពិសេស