មន្ត្រីក្រសួងព័ត៌មានបានរៀបចំកិច្ចប្រជុំមួួយកាលពីម្សិលមិញនៅក្នុងរាជធានីភ្នំពេញរវាងសមាគមអ្នកកាសែតថៃ និងក្លឹបអ្នកកាសែតកម្ពុជា ដើម្បីបង្កើតបណ្តាញទូរស័ព្ទទាក់ទងគ្នាជាបន្ទាន់ នៅពេលមានបញ្ហាភាន់ច្រឡំនៅក្នុងសេចក្ដីរាយការណ៍អំពីនយោបាយនៅក្នុងប្រទេសទាំងពីរ។
លោក ខៀវ កាញារីទ្ធ រដ្ឋមន្ត្រីក្រសួងព័ត៌មាន បានមានប្រសាសន៍ថា បណ្ដាញទូរស័ព្ទទាក់ទងគ្នាជាបន្ទាន់នេះ នឹងអនុញ្ញាតឲ្យក្រុមអ្នកកាសែតហៅទូរស័ព្ទទាក់ទងគ្នាទៅវិញទៅមកបាន ប្រសិនបើការផ្សព្វផ្សាយអំពីបញ្ហាណាមួយ ដែលអាចនឹងបង្កឲ្យមានការយល់ច្រឡំរវាងថ្នាក់ដឹកនាំរបស់ប្រទេសនីមួយៗនោះ។
លោក ខៀវ កាញារីទ្ធ បានមានប្រសាសន៍ទៀតថា “ យើងនឹងផ្ដល់ព័ត៌មានឲ្យគ្នាទៅវិញទៅមក ប្រសិនបើព័ត៌មាន ដែលចេញផ្សាយនេះ អាចបង្កឲ្យថ្នាក់ដឹកនាំប្រទេសទាំងពីរមានការយល់ច្រឡំនឹងគ្នានោះ”។
លោក ខៀវ កាញារីទ្ធ បានមានប្រសាសន៍ទៀតថា រដ្ឋាភិបាលបានចាត់ទុកក្រុមអ្នកកាសែតថា ជាអ្នកផ្ដល់ព័ត៌មានដ៏មានតម្លៃដោយបានមានប្រសាសន៍បន្ថែមថា លោកនាយករដ្ឋមន្ត្រី ហ៊ុន សែន ក៏មានបទពិសោធផងដែរ អំពីចំណុចខុសឆ្គងនេះ ប្រព្រឹត្តឡើងដោយក្រុមមន្ត្រីរបស់លោកតាមរយៈសេចក្ដីរាយការណ៍ព័ត៌មាននានា។
លោក ខៀវ កាញារីទ្ធ មានប្រសាសន៍ថា “ ក្រុមអ្នកកាសែត មានតួនាទីដ៏សំខាន់ដោយដើរតួជាអ្នកផ្ដល់ព័ត៌មាន ពីព្រោះយើងអាចដឹងអំពីការពិតបានតាមរយៈសេចក្ដីរាយការណ៍របស់ពួកគេ ហើយមន្ត្រីថ្នាក់មូលដ្ឋានក៏អាចទទួលព័ត៌មានពីលោកនាយករដ្ឋមន្ត្រីបានដែរ”។
លោក ឆាវ៉ារ៉ុង លីមប៉ាតតាម៉ាប៉ានី (Chava-rong Limpattamapanee) ប្រធានសមាគមអ្នកកាសែតថៃ បានប្រាប់អង្គប្រជុំថា ក្រុមរបស់លោករំពឹងថា នឹងធ្វើឲ្យទំនាក់ទំនងជាមួយនឹងបណ្ដាសមាជិករបស់ក្លឹបអ្នកកាសែតកម្ពុជា នឹងបានល្អប្រសើរឡើង តាមរយៈបណ្ដាញទូរស័ព្ទទាក់ទងគ្នាពេលបន្ទាន់នេះ។
លោក លីមប៉ាតតាម៉ាប៉ានី មានប្រសាសន៍ទៀតថា“ យើងនឹងបង្កើតបណ្ដាញទូរស័ព្ទទាក់ទងគ្នាពេលបន្ទាន់នេះ ដូច្នេះ យើងអាចផ្លាស់ប្ដូរព័ត៌មានទៅវិញទៅមកបានភ្លាមៗប្រសិនបើរដ្ឋាភិបាលប្រទេសទាំងពីរ មានការយល់ច្រឡំទៅវិញទៅមកនោះ”។
លោក ខៀវ កាញារីទ្ធ ក៏មានប្រសាសន៍ដែរថា ក្រសួងព័ត៌មានចង់ឲ្យសមាគមអ្នកកាសែតកម្ពុជា មានមេធាវីដើម្បីការពារខ្លួន។លោកបានមានប្រសាសន៍ទៀតថា “យើងបាននិងកំពុងលើកទឹកចិត្តឲ្យក្លឹបអ្នកកាសែតនីមួយៗ មានមេធាវី ពីព្រោះមេធាវី នឹងអាចការពារអ្នកកាសែតរបស់យើងបាន”។
អ្នកកាសែតចំនួនប្រហែល១០នាក់ ត្រូវបានគេសម្លាប់ក្នុងប្រទេសកម្ពុជា ចាប់តាំងពីដើមទសវត្សរ៍ឆ្នាំ១៩៩០ ហើយគ្មានជនដៃដល់ណាមួយ ត្រូវបានតុលាការចោទប្រកាន់ពីករណីសម្លាប់នេះឡើយ ហើយការធ្វើឃាតអ្នកកាសែតកាលពីពេលថ្មីៗនេះបានកើតមានឡើងនៅខេត្តរតនគិរី កាលពីខែកញ្ញា៕
ប្រែសម្រួលដោយ ស៊ុំ សុខភុំ