អ្នកស្រាវជ្រាវនៅមជ្ឈមណ្ឌលសិក្សាទំនាក់ទំនងអន្តរជាតិដ៏ល្បីឈ្មោះនៅក្នុងទីក្រុងបេ៉កាំង ត្រូវបានប្រព័ន្ធផ្សព្វផ្សាយរដ្ឋចិនដកស្រង់សម្តី កាលពីម្សិលមិញថា វាជាការឆាប់ពេកហើយ ដែលថាក្រុមហ៊ុនចិនគួរតែទទួលរងការស្តីបន្ទោសចំពោះការបាក់ទំនប់វារីអគ្គិសនីស្ទឹងអាតៃក្នុងខេត្តពោធិ៍សាត់ កាលពីថ្ងៃសៅរ៍ ដែលក្រុមហ៊ុនចិនជាអ្នកសាងសង់។
ទ្វារទឹកធ្វើពីបេតុងរបស់ទំនប់វារីអគ្គិសនីស្ទឹងអាតៃក្នុងស្រុកវាលវែង ខេត្តពោធិ៍សាត់ដែលចំណាយទុនចំនួន២៥៥លានដុល្លារនោះបានបាក់ខណៈដែលគេកំពុងសាកល្បងតួប៊ីនកាលពីថ្ងៃសៅរ៍។ ចរន្តទឹកហូរដ៏ខ្លាំងបានកួចយកកម្មករខ្មែរបីនាក់ទៅបាត់រហូតដល់ថ្ងៃនេះ និងបានធ្វើឲ្យកម្មករបួននាក់ផ្សេងទៀតរងរបួសយ៉ាងធ្ងន់ធ្ងរ។
ទំនប់ដែលកំពុងសាងសង់ដោយក្រុមហ៊ុនសាជីវកម្មរដ្ឋដ៏ធំមួយឈ្មោះតាថាងចិន របស់គណបក្សកុម្មុយនីស្តចិននេះ គ្រោងសាងសង់ឲ្យរួចរាល់ក្នុងខែឧសភាឆ្នាំ២០១៣។
យោងតាមសេចក្ដីរាយការណ៍ ដែលកាសែតរដ្ឋចិនឈ្មោះ ឆាយណាដេលី (China Daily)បានចុះផ្សាយកាលពីម្សិលមិញបានឲ្យដឹងថា លោកស្រី សុង យុីងហួយ (Song Yinghui)អ្នកស្រាវជ្រាវប្រចាំវិទ្យាស្ថានទំនាក់ទំនងអន្តរជាតិអចិន្ត្រៃយ៍ចិនដ៏ល្បីឈ្មោះបានលើកឡើងថា សាជីវកម្មតាថាងចិននេះគួរតែចេញផ្សាយរបាយការណ៍ និយាយអំពីឧបទ្ទវហេតុបាក់ទំនប់អាតៃនេះជាសាធារណៈ។
លោកស្រីបានមានប្រសាសន៍ថា “ នេះជាការឆាប់ពេកហើយដែលត្រូវស្តីបន្ទោសក្រុមហ៊ុនចិន ចំពោះឧបទ្ទវហេតុនេះមុនពេលចេញផ្សាយរបាយការណ៍អំពីលទ្ធផលស៊ើបអង្កេត”។កាសែតឆាយណាដេលីបានដកស្រង់សម្តីរបស់លោកស្រី យីងហួយ ថា “ វាជាការមិនទទួលខុសត្រូវទាល់តែសោះ ដែលត្រូវថ្កោលទោសចំពោះហេដ្ឋារចនាសម្ព័ន្ធសាងសង់ដោយក្រុមហ៊ុនចិនទាំងអស់ព្រោះតែឧបទ្ទវហេតុនេះនោះ”។
វិទ្យាស្ថានទំនាក់ទំនងអន្តរជាតិអចិន្ត្រៃយ៍ចិនដ៏ល្បីនេះ គឺជាក្រុមផ្តល់យោបល់ ដែលមានមូលដ្ឋាននៅទីក្រុងប៉េកាំង ហើយតែងតែត្រូវប្រព័ន្ធផ្សព្ធផ្សាយរដ្ឋចិនដកស្រង់សម្តី ហើយក៏ជាស្ថាប័នមួយ មានទំនាក់ទំនងជាមួយក្រសួងសន្តិសុខជាតិរបស់សាធារណរដ្ឋប្រជាមានិតចិននិងគណបក្សកុម្មុយនីស្ដ។
សេចក្តីរាយការណ៍របស់កាសែត ឆាយណាដេលី ក៏បានដកស្រង់សម្តីរបស់មន្ត្រីនគរបាលកម្ពុជាម្នាក់ ដែលបកស្រាយប្រាប់ទីភ្នាក់ងារព័ត៌មានរដ្ឋចិនពីមូលហេតុនៃការបាក់ទំនប់នេះផងដែរ។
មន្ត្រីនគរបាលដែលមិនបញ្ចេញឈ្មោះរូបនេះត្រូវបានដកស្រង់សម្តីថា “ យើងសនិ្នដ្ឋានថា ឧបទ្ទវហេតុនេះកើតឡើងដោយសារតែច្រកទ្វារទឹក ដែលមានទទឹង១០ម៉ែត្របានប្រេះ ហើយនៅពេលដែលរងសម្ពាធទឹកខ្លាំងពេក វាក៏ផ្ទុះបែកតែម្តង”។
លោកថេងឡេងអធិការនគរបាលស្រុកវាលវែង មានប្រសាសន៍ថាកាលពីម្សិលមិញការខិតខំស្វែងរកជនជាតិខ្មែរ ដែលបាត់ខ្លួននៅតែបន្តអស់រយៈពេលជាងបួនថ្ងៃហើយបន្ទាប់ពីទទួលដំណឹងថា ពួកគេត្រូវបានទឹកកួចយកទៅបាត់នោះ។លោកបន្ដថាគ្រួសារកម្មករបាត់ខ្លួនដែលរស់នៅក្នុងខេត្តកំពតបានធ្វើដំណើេរទៅកាន់កន្លែងកើេតហេតុដើម្បីរង់ចាំដំណឹងអំពីសាច់់ញាតិរបស់ខ្លួន។
លោកថេងឡេងបានមានប្រសាសន៍ថា”ពួកគេសង្ឃឹមថាក្រុមហ៊ុននេះនឹងផ្តល់ប្រាក់សំណងឲ្យពួកគេ”។ លោក សុន ឆ័យ តំណាងរាស្ត្រមកពីគណបក្ស សមរង្ស៊ីបានអំពាវនាវឲ្យមានការស៊ើបអង្កេតឯករាជ្យមួយ អំពីឧបទ្ទវហេតុនេះ ហើយលោកមានប្រសាសន៍ថាឧបទ្ទវហេតុនេះ បង្កឡើងដោយការធ្វេសប្រហែសរបស់គម្រោងហេដ្ឋារចនាសម្ព័ន្ធរបស់ចិនទាំងអស់នៅក្នុងប្រទេសកម្ពុជា។
យោងតាមរបាយការណ៍របស់កាសែតឆាយណាដេលីនេះដែរបានឲ្យដឹងថាឧបទ្ទវហេតុនេះបានញ៉ាំងឲ្យលោកហុងឡី (Hong Lei) អ្នកនាំពាក្យក្រសួងការបរទេសចិនធ្វើអត្ថាធិប្បាយ ដោយជំរុញឲ្យក្រុមហ៊ុនដែលពាក់ព័ន្ធក្នុងគម្រោងសាងសង់ទំនប់នេះ “ ខិតខំប្រឹងប្រែងស្វែងរក និងសង្គ្រោះអ្នកបាត់ខ្លួន”៕
ប្រែសម្រួលដោយហមសុផាណ្ណា