29 C
Phnom Penh

វៀតណាម​បញ្ជាក់​ថា បាន​ផ្ទេរភាគហ៊ុន​ក្នុង​គម្រោង​សាង​សង់​ទំនប់​សេសាន​ឲ្យ​ក្រុមហ៊ុន​ចិនហើយ​​

ដោយ ឌឹ ខេមបូឌា ដេលី

បទវិភាគ

តំណាង​ក្រុមហ៊ុន​អគ្គិសនី​​វៀតណាម​អន្តរជាតិ (Electricity Vietnam International) ជា​ក្រុម​ហ៊ុន​របស់​រដ្ឋ​វៀតណាម​​ បាន​​បញ្ជាក់​កាល​ពី​ម្សិលមិញ​ថា ក្រុម​ហ៊ុនសមភាគី​កម្ពុជា​និង​​ប្រទេសចិន​បាន​ទិញ​​ភាគហ៊ុន​របស់​ខ្លួន​ក្នុង​គម្រោង​​សាង​សង់​ទំនប់​វារី​អគ្គិសនី​ ក្នុង​ខេត្ត​ស្ទឹង​ត្រែង​ហើយ។

លោក​ កៅយ៉ាងយូ (Cao Dang Du) តំណាង​​ក្រុមហ៊ុន​​អគ្គិសនី​រដ្ឋ​វៀតណាម​ប្រចាំ​កម្ពុជា​ បាន​ឲ្យ​ដឹង​ថា ក្រុមហ៊ុន​ចិន ហាយ​ដ្រូឡាន​កាង ​បាន​​ទិញ​ភាគ​​ហ៊ុន​​ពី​​ក្រុមហ៊ុន​អគ្គិសនី​រដ្ឋ​វៀត​ណាម​ ប៉ុន្ដែ​លោក​ គិតម៉េង ​ប្រធាន​ក្រុម​ហ៊ុន​រ៉ូយ៉ាល់​គ្រុប បានអះអាង​ថា ក្រុមហ៊ុន​អគ្គិសន​ី​រដ្ឋ​វៀតណាម​នៅ​​មានភាគហ៊ុន​១០​ភាគ​រយ​ក្នុង​គម្រោង​សាង​សង់​ទំនប់​វារី​អគ្គិសនី​ទន្លេ​សេសាន​ដដែល​ ហើយ​​​ក្រុមហ៊ុន​រ៉ូយ៉ាល់​គ្រុប​​​ដែល​ជា​​ដៃ​គូ​​របស់​ក្រុម​ហ៊ុន​​ចិន​ហាយ​ដ្រូឡាន​កាង​ (Hydrolancang) ​​កាន់​កាប់​​ភាគ​ហ៊ុន​៩០​ភាគ​រយ​។លោក យ៉ាង យូ ​មាន​ប្រសា​សន៍​ថា“​យើង​បាន​ផ្ទេរ [គម្រោង​នេះ] ទៅ​ឲ្យ​ក្រុម​ហ៊ុន​រ៉ូយ៉ាល់​គ្រុប​ និង​ក្រុមហ៊ុន​ចិន​ ហាយ​ដ្រូ​ឡានកាង​រួច​ហើយ​។ ក្រុមហ៊ុន​ចិន​នេះ​ ក៏​បាន​​​បង់​ប្រាក់​​ទៅ​ឲ្យ​ក្រុមហ៊ុន​​អគ្គិសនី​រដ្ឋ​វៀត​ណាម​​​​ជិត​អស់​ផង​ដែរ​”។

លោក យ៉ាង យ​ូ បាន​មាន​ប្រសាសន៍​ថាលោក​មិន​បាន​ដឹង​អំពី​ចំនួន​ទឹក​ប្រាក់​វិនិយោគ​ទុន​សរុប​របស់​​ក្រុមហ៊ុន​​អគ្គិសនី​រដ្ឋ​វៀត​ណាម​ទេ​ ហើយ​លោក​បាន​បដិសេធ​មិនធ្វើ​អត្ថា​ធិប្បាយ​ថា តើ​ក្រុមហ៊ុន​របស់​លោក នឹង​ទទួល​​បាន​ចំណែក​ហ៊ុន​​ពីប្រាក់​ចំណេញ​ដែល​បាន​មក​ពី​ទំនប់​វារី​អគ្គិសនីនេះ​ឬអត់​នោះទេ​។

ក្រុមហ៊ុន​រ៉ូយ៉ាល់​គ្រុប​កម្ពុជានិង​ក្រុមហ៊ុន​ចិន​ហាយដ្រូឡានកាង បាន​ចុះ​កិច្ច​ព្រមព្រៀង​​កាល​ពី​ខែ​មុន​ នៅ​ក្នុង​រាជ​ធានីភ្នំពេញ​ ដើម្បី​សាង​សង់​ទំនប់​វារី​អគ្គិសនីទន្លេសេសាន​កម្លាំង​៤០០​មេហ្គាវ៉ាត់​ ដែល​ត្រូវ​ចំណាយ​ពេលប្រាំ​ឆ្នាំ​​ទើ​ប​សង់​រួច​ និង​ត្រូវ​ប្រតិបត្ត​ិ​ជា​សហគ្រាស​ឯកជន​រយៈ​ពេល​៤០​ឆ្នាំ​ មុន​ពេល​​ប្រគល់​ទៅ​ឲ្យ​រដ្ឋាភិបាល​។

មន្ត្រី​នៅ​ស្ថាន​ទូត​វៀតណាម បាន​លើក​ឡើង​នៅ​ចុង​ខែ​វិច្ឆិកានេះថា ​ក្រុមហ៊ុន​រោង​ចក្រ​អគ្គិសនី​រដ្ឋ​វៀតណាម​ បាន​ “ ​បោះ​បង់”គម្រោង​នេះ​ ប្រហែល​ពីរខែ​មក​​ហើយ​។មន្ត្រី​ទាំង​នោះ​ក៏​បាន​ឲ្យ​ដឹង​ផង​ដែរ​ថា ភាគ​ហ៊ុន​១០​ភាគ​រយ​របស់​ខ្លួន​នោះ​គឺ​សម្រាប់​ការងារ​ស្រាវ​ជ្រាវ​ និង​ការ​សិក្សា​អំពី​អ្វី​ដែល​បាន​ធ្វើ​ឡើង​​នៅ​ពេល​ចាប់​​ផ្ដើមគម្រោង​នេះ​​កាល​ពី​ឆ្នាំ​២០០៩។

លោក​ សាននូ ​ក្រុមប្រឹក្សា​ស្រុក​សេសាន​បាន​មាន​ប្រសាសន៍​កាល​ពី​ម្សិលមិញ​ថាដើម្បី​​ត្រៀម​លក្ខណៈ​សម្រាប់​ការ​តាំង​​លំនៅ​ដ្ឋាន​ថ្មី​របស់​ប្រជាពលរដ្ឋ​ជាង​៥.០០០​គ្រួសារ​​ដែល​នឹង​ត្រូវ​ផ្លាស់​លំនៅ​​ដោយ​សារ​តំបន់​អាង​ស្ដុក​ទឹក​របស់​ទំនប់នេះ​ អាជ្ញាធរ​ខេត្ត​បាន​​បង្កើត​គណៈ​កម្មាធិការ​មួយ​​ទទួល​បន្ទុក​​វាស់​​វែង​ដី​នៅ​ទីតាំង​សាង​សង់​លំនៅ​ដ្ឋាន​ថ្មី។

លោក សំ អឿន តំណាង​អង្គការ​ស៊ីប៉ា (CEPA) ខេត្ត​ស្ទឹង​ត្រែង​ដែល​គាំ​ទ្រ​អ្នក​ភូមិ​នេះ​បាន​មាន​ប្រសាសន៍​ថា ទោះ​បី​ជា​មាន​ការ​​រៀបចំ​សម្រាប់​ប្រជាពលរដ្ឋ​ដែល​ត្រូវ​ផ្លាស់​លំនៅដ្ឋាន​នេះ​ក៏ដោយ​ ក៏​អ្នកភូមិ​នៅ​តែ​​មិន​ដឹង​ថា​ ពួកគេ​នឹង​ទទួល​បាន​ប្រាក់​សំណង​​​ប៉ុន្មានសម្រាប់​ការ​តាំង​លំនៅ​ថ្មី​របស់​ខ្លួន​ និង​មិន​ដឹង​ថា ការ​​សាង​សង់​ទំនប់​នេះ​ នឹង​ចាប់​ផ្ដើម​នៅ​ពេល​ណា​នោះទេ​៕

(រាយការណ៍​បន្ថែម​ដោយភោគដន)

ប្រែសម្រួលដោយហមសុផាណ្ណា

© 2024, ខេមបូឌា ដេលី. All rights reserved. No part of this article may be reproduced in print, electronically, broadcast, rewritten or redistributed without written permission.

អត្ថបទទាក់ទង

អត្ថបទអានច្រើន

សេចក្ដីរាយការណ៍ពិសេស