យោងតាមក្រុមមន្ត្រីមូលដ្ឋាន បានឲ្យដឹងថា ក្រុមអ្នកភូមិ ដែលមានកំហឹង បានសម្លាប់ជនសង្ស័យជាសមាជិកក្រុមចោរប្លន់ម្នាក់កាលពីថ្ងៃសុក្រ នៅក្នុងស្រុកក្រគរ ខេត្តពោធិ៍សាត់ ដោយនិយាយថា បុរសអាយុ២២ឆ្នាំនេះ គឺជាមេក្រុមចោរប្លន់នៅមូលដ្ឋាន។
លោក មោគ កោ ដែលជាមេឃុំ បានមានប្រសាសន៍ថា បុរសឈ្មោះ ប្រាជ្ញ សុភក្ដិ បានផឹកស្រាជាមួយនឹងបុរសបួននាក់ផ្សេងទៀតនៅម៉ោងប្រហែល៥ល្ងាច នៅឃុំស្នាអន្សាស្រាប់តែនៅពេលនោះក្រុមអ្នកភូមិ បានយកដំបងវាយសម្លាប់បុរសម្នាក់នេះ។
លោកបនទៀតថា “ពេលនគរបាលបានមកដល់ អ្នកភូមិទាំងនេះ បានសម្លាប់បុរសនេះរួចទៅហើយ។យើងមិនបានដឹងថា អ្នកភូមិណាដែលបានសម្លាប់បុរសនេះទេ ពីព្រោះមានមនុស្សជាច្រើននាក់។មនុស្សទាំងអស់ក្នុងឃុំនេះខ្លាចជននេះ ពីព្រោះជននេះ មានចរិតកាចសាហាវខ្លាំងណាស់។ប្រសិនបើអ្នកភូមិរាយការណ៍ពីជននេះប្រាប់នគរបាលនោះ ជននេះគំរាមថានឹងដុតផ្ទះពួកគេចោល”។
លោក មោគ កោ បានមានប្រសាសន៍បន្ថែមថា ជនដែលត្រូវគេវាយសម្លាប់រូបនេះ ធ្លាប់បានជាប់ពន្ធនាគារពីបទប្រើអំពើហិង្សាដោយចេតនា កាលពីឆ្នាំមុន បន្ទាប់ពីមានការវាយតប់គ្នា ដែលជននេះបានជាប់ពាក់ព័ន្ធ និងបានបណ្តាលឲ្យអ្នកភូមិម្នាក់រងរបួស ប៉ុន្តែ ជននេះត្រូវបានដោះលែងដោយគ្មានការចោទប្រកាន់ទៅវិញ។
លោក ភួង សុធា អ្នកសម្របសម្រួលរបស់អង្គការសិទិ្ធមនុស្សអាដហុក ប្រចាំខេត្តពោធិ៍សាត់បានមានប្រសាសន៍ថា ការវាយសម្លាប់ពីក្រុមអ្នកភូមិបែបនេះមិនមែនជារឿងថ្មីនោះទេ ហើយលោកមានប្រសាសន៍បន្ថែមថា កង្វះជំនឿលើក្រុមមន្ត្រីមូលដ្ឋានបានបណ្ដាលឲ្យក្រុមអ្នកភូមិអនុវត្តច្បាប់ដោយខ្លួនឯង៕
ប្រែសម្រួលដោយ ស៊ុំ សុខភុំ