ឯកអគ្គរដ្ឋទូតសហរដ្ឋអាមេរិកប្រចាំប្រទេសកម្ពុជា កំពុងព្យាយាមបញ្ជាក់ឲ្យបានច្បាស់លាស់ចំពោះព័ត៌មានខុសស្តីពីបំណុលរបស់កម្ពុជានៅជំពាក់អាមេរិក អំឡុងដើមទសវត្សរ៍ទី៧០ ក្នុងរបបយោធារបស់លោកសេនាប្រមុខ លន់ នល់ ដែលគាំទ្រដោយសហរដ្ឋអាមេរិក ហើយបានក្លាយទៅជាបញ្ហាចម្រូងចម្រាសរវាងប្រទេសទាំងពីរ។
យោងតាមក្រសួងការបរទេសសហរដ្ឋអាមេរិក បានឲ្យដឹងថា ប្រទេសកម្ពុជាបានបដិសេធមិនព្រមសងបំណុលដែលបានកើនឡើង អំឡុងរបបសាធារណរដ្ឋខ្មែរ ដែលមានរយៈពេលដ៏ខ្លី គឺចាប់ពីឆ្នាំ១៩៧០ដល់ឆ្នាំ១៩៧៥ នៅពេលរបបយោធារបស់ លន់ នល់បានគ្រប់គ្រងរដ្ឋាភិបាលក្រុងភ្នំពេញនោះ។ បំណុលនេះមានទឹកប្រាក់សរុបប្រមាណ៤៤៥លានដុល្លារ រួមទាំងការប្រាក់ ដែលបានកើនឡើងត្រឹមឆ្នាំ២០០៩ផងដែរ។
លោកវីលៀមថដ (William Todd) ឯកអគ្គរដ្ឋទូតប្រចាំប្រទេសកម្ពុជា បានការពារបំណុលនិងការពារការទាមទារឲ្យប្រទេសកម្ពុជាសងបំណុលនេះវិញ នៅក្នុងការលើកឡើងដែលចេញផ្សាយកាលពីថ្ងៃអាទិត្យ នៅក្នុងកាសែតរស្មីកម្ពុជា ដែលជាកាសែតខ្មែរនាំមុខគេ ក៏ដូចជានៅក្នុងគេហទំព័រព័ត៌មានជាភាសាអង់គ្លេសផងដែរ។
ដោយដាក់ចំណងជើងថា “ បកស្រាយការយល់ខុសស្តីពីបំណុល”លោក វីលៀមថដបានសរសេរថាប្រទេសទាំងពីរបានឯកភាពគ្នាថាការដោះស្រាយបញ្ហាបំណុលនេះនឹងជួយច្រើនដល់ការពង្រឹងទំនាក់ទំនងទ្វេភាគី រវាងប្រទេសទាំងពីរ ជួយជំរុញការអភិវឌ្ឍសេដ្ឋកិច្ចរបស់ប្រទេសកម្ពុជា ដោយលើកកម្ពស់ទំនុកចិត្តពីម្ចាស់ឥណទាន និងលទ្ធភាពក្នុងការទទួលបានថវិកាពីទីផ្សារទុនអន្តរជាតិសម្រាប់ប្រទេសកម្ពុជា”។
ប៉ុន្ដែ លោកឯកអគ្គរដ្ឋទូតមានប្រសាសន៍ថា “ មានការយល់ខុស” ពីរឿងបំណុល ដែលរដ្ឋាភិបាលកម្ពុជាជឿជាក់ថា ខ្លួនមិនមានការទទួលខុសត្រូវ ដោយសារបំណុលនេះបានកើតឡើង អំឡុងរបបមិនមែនប្រជាធិបតេយ្យដែលមានលក្ខណៈខុសគេ និងអំឡុងពេលដែលអាមេរិកបានទម្លាក់គ្រាប់បែក មកលើប្រទេសកម្ពុជា ដោយបានធ្វើឲ្យខូចខាតយ៉ាងខ្លាំងដល់តំបន់នៅតាមទីជនបទ និងបានសម្លាប់ប្រជាពលរដ្ឋខ្មែរអស់យ៉ាងច្រើន។
លោកវីលៀមថដ សរសេរថា “ បំណុលនេះបានកើតឡើង ពីការផ្តល់ទំនិញកសិកម្ម ដូចជាអង្ករ និងម្សៅមី ដោយទូទាត់ជាប្រាក់កម្ចីមាន ការប្រាក់ទាប ពីក្រសួងកសិកម្មសហរដ្ឋអាមេរិកដល់ប្រទេសកម្ពុជា នៅដើមទសវត្សរ៍ឆ្នាំ១៩៧០”។
ស្របគ្នានឹងការផ្ដល់កម្ចីជាស្បៀងអាហារសហរដ្ឋអាមេរិកនៅពេលនោះ ក៏បានផ្ដល់ជំនួយផ្នែកយោធាមកឲ្យរដ្ឋាភិបាលរបស់លោក លន់នល់សម្រាប់ប្រើប្រាស់ក្នុងការប្រយុទ្ធ ដើម្បីកម្ចាត់ពួកកុម្មុយនីស្ដវៀតណាម ដែលស្ថិតនៅក្នុងប្រទេសកម្ពុជា។ការទម្លាក់គ្រាប់បែកដ៏សន្ធឹកសន្ធាប់របស់អាមេរិក នៅតាមបណ្តាខេត្តភាគឦសាន និងភាគខាងកើតនៃប្រទេសកម្ពុជា នៅក្នុងសង្គ្រាមរបស់ខ្លួនជាមួយនឹងពួកកុម្មុយនីស្ដវៀតណាម កើតឡើងមុន និងក្រោយរបប លន់ នល់បានឡើងកាន់អំណាច តាមរយៈការធ្វើរដ្ឋប្រហារក្នុងឆ្នាំ១៩៧០។
លោក វីលៀមថដបានការពារគោលជំហររបស់សហរដ្ឋអាមេរិកថា បំណុលនេះ គឺមិនអាចលុបចោលបានឡើយ ដោយបានលើកឧទាហរណ៍ផ្សេងៗនៃប្រទេសមួយចំនួន ដែលទទួលខុសត្រូវចំពោះបំណុលពីអតីតកាល ហើយបានលើកឡើងថា ស្ថិតក្រោមច្បាប់របស់សហរដ្ឋអាមេរិក ប្រទេសកម្ពុជាត្រូវតែសងប្រាក់បំណុលតាមចំនួនដែលមានសព្វថ្ងៃ មុនពេលសហរដ្ឋអាមេរិកអាចពិចារណាផ្ដល់សម្បទានចំពោះបំណុលដែលប្រទេសកម្ពុជាបានជំពាក់នេះ។
លោកឯកអគ្គរដ្ឋទូតបានសរសេរទៀតថា“ លើសពីនេះទៀត ការបង្កើតកម្មវិធីពិសេសស្តីការកាត់បន្ថយបំណុលសម្រាប់ប្រទេសមួយ ដែលគ្មានឆន្ទៈសងបំណុលតែមានលទ្ធភាពអាចសងបាន គឺជាគំរូមួយមិនល្អសម្រាប់ប្រទេសដទៃទៀត ដែលមានស្ថានភាពដូចគ្នានេះ”។
លោកវីលៀមថដបានមានប្រសាសន៍ថា ការចរចាដើម្បីកាត់បន្ថយប្រាក់បំណុលចំនួន១០០លានដុល្លាររបស់ប្រទេសកម្ពុជាត្រូវបានជាប់គាំង ចាប់តាំងពីឆ្នាំ២០០៦ហើយរដ្ឋាភិបាលកម្ពុជាមិនមានបំណងចង់ចរចាបន្ដទៀតឡើយ ប្រសិនបើគ្មានការផ្ដល់សម្បទានបន្ថែមនោះ។
លោកនាយករដ្ឋមន្ត្រី ហ៊ុនសែនបានជួបជាមួយប្រធានាធិបតីសហរដ្ឋអាមេរិកលោកបារា៉ក់អូបាម៉ា (Barack Obama) កាលពីខែមុន នៅក្នុងកិច្ចប្រជុំទ្វេភាគី ដែលគេបានហៅថា ជាកិច្ចប្រជុំមានភាពតានតឹងនោះ។ យោងតាមសេចក្ដីរាយការណ៍ពីកិច្ចប្រជុំ លោកបារា៉ក់អូបាម៉ាបានពិភាក្សាតែអំពីបញ្ហាសិទ្ធិមនុស្សក្នុងប្រទេសកម្ពុជា និងការទាមទារឲ្យមានការបោះឆ្នោតដោយសេរី រីឯលោកហ៊ុន សែន វិញបានស្នើឲ្យមានការលុបចោលបំណុលក្នុងរបប លន់នល់។
អ្នកប្រវត្តិសាស្ត្រខ្មែរជើងចាស់ លោកហិនរីឡូកាដ (Henri Locard) លើកឡើងថា វាមិនទំនងសោះ ចំពោះការទាមទារឲ្យប្រជាពលរដ្ឋខ្មែរសងប្រាក់កម្ចីជាស្បៀងអាហារសម្រាប់ផ្គត់ផ្គង់នៅពេលអត់ឃ្លាត ក្នុងរបបខ្មែរក្រហម។ លោកថ្លែងថា “ វាគឺជាជំនួយមនុស្សធម៌ វាមិនមែនការធ្វើពាណិជ្ជកម្មឡើុយ”។ លោកបន្ដថា ជាធម្មតា ជំនួយបន្ទាន់បែបនេះ គេមិនរំពឹងថាត្រូវសងវិញនោះឡើយ៕
ប្រែសម្រួលដោយស៊ាស៊ុយឈាង