29 C
Phnom Penh

កូនស្រី​រដ្ឋ​មន្ត្រី​ក្រសួង​ព្រះ​បរម​រាជ​វាំង​​ ទទួល​បាន​កិច្ច​សន្យា​​ លើ​គម្រោង​សាង​សង់​ព្រះ​មេរុ

ដោយ ឌឹ ខេមបូឌា ដេលី

បទវិភាគ

ការសាង​សង់​ព្រះ​មេរុ​សម្រាប់​ព្រះរាជ​ពិធី​ថ្វាយ​ព្រះ​ភ្លើង​បូជា​ព្រះ​បរម​សព​សម្តេច​​​ឪ នរោត្តមសីហនុ​ នឹង​ប្រព្រឹត្ត​ទៅ​នៅ​ខែ​កុម្ភៈ​ ហើយនឹង​​​ចំណាយ​ទឹក​ប្រាក់​អស់​​ចំនួន៥​លាន​ដុល្លារ ​​ហើយ​​កិច្ច​សន្យា​​សាង​សង់​នេះ​​ត្រូវ​បាន​ប្រ​គល់​ឲ្យ​ទៅ​ក្រុម​ហ៊ុន​​របស់​​កូន​ស្រី​​លោក គង់ សំអុល​ រដ្ឋមន្ត្រីក្រសួង​ព្រះ​​បរម​រាជ​វាំង​។

យោង​តាម​កម្មករ​​ដែល​ធ្វើការ​នៅ​ការ​ដ្ឋាន​​សាង​សង់​​​ព្រះ​មេរុ​នេះ​បាន​ឲ្យ​ដឹង​ថា ​ក្រុមហ៊ុនវីស៉្បាន ​ខូ អិលធីឌី ​(Vispan Co. Ltd.,) ​​ជា​ក្រុម​ហ៊ុន​ស្ថាបត្យកម្ម និង​រចនា​ប្លង់​​របស់​លោកស្រីគង់បញ្ញា​ ជា​កូន​ស្រី​របស់​លោកគង់​ សំអុលគឺ​ជា​​ក្រុម ហ៊ុន​មួយ​ក្នុងចំណោម ក្រុម​ហ៊ុនដែល​កំពុងសាងសង់​ព្រះមេរុ​នេះ។

កាលពី​ម្សិល​មិញ​​កម្មករ​​ដែលកំពុង​​ធ្វើការ​នៅ​ឯការដ្ឋាន​សាង​សង់ព្រះ​មេរុ​នោះ​ភាគ​ច្រើន​​​​​ពាក់​អាវ​យឺតដែល​​មាន​​រូប​សញ្ញា​របស់​ក្រុម​ហ៊ុនវីស៉្បាន​។ កាលពី​ម្សិល​មិញ​​​ការហៅ​​​ទូរស័ព្ទ​​ទៅ​កាន់​លេខ​ទូរស័ព្ទ​ដែល​បាន​ចុះ​បញ្ជីរ​បស់​ក្រុម​ហ៊ុន​​វីស៉្បានអ្នក​តំណាង​ក្រុម​ហ៊ុនមិន​​អាចបញ្ជាក់​​​ថា​ ការសាង​សង់​ព្រះ​មេរុ​សម្រាប់​​ថ្វាយ​ព្រះ​ភ្លើង​បូជា​ព្រះ​បរម​សព​សម្តេច​​ឪ នរោត្តមសីហនុ​ ជាប់​ពាក់​ព័ន្ធ​ជា​មួយ​ក្រុមហ៊ុន​ ឬ​មិន​អាច​បញ្ជាក់​ពី​ តួនាទី​របស់​លោកស្រីបញ្ញា ថា​ជា​ម្ចាស់​ក្រុមហ៊ុន​នេះ​បាន​ទេ​។​ពួក​គេ​ក៏បាន​បដិសេធ​​មិន​ប្រាប់​ឈ្មោះ​​ពួក​គេ​ផង​ដែរ​ដោយ​សារ​ពួក​គេ​មិន​ត្រូវ​បាន​អនុញ្ញាត​ឲ្យ​និយាយ​ជា​មួយ​អ្នកយកព័ត៌មាន​។

ក្រុម​ហ៊ុន​នេះ​ធ្លាប់​​ទទួល​បាន​​កិច្ច​សន្យា​សាង​សង់​អគារ​របស់​​រដ្ឋាភិបាល​​ជា​​ច្រើន​រួម​ទាំង​​​អាគារ​ទីស្តីការ​គណៈរដ្ឋ​មន្ត្រី​នៅ​រាជ​ធានី​ភ្នំ​ពេញ​ផង​ដែរ​។

លោក ខៀវ កាញរីទ្ធ រដ្ឋ​មន្ត្រីក្រ​សួង​ព័ត៌មាន​បាន​បង្វែរសំណួរ​ទាក់​ទង​នឹង​​ការ​សាង​សង់​ព្រះ​មេរុ​សម្រាប់​ថ្វាយ​ព្រះ​ភ្លើង​បូជា​ព្រះ​បរម​សព​សម្តេច​​ឪនរោត្តមសីហនុទាំង​អស់​ទៅកាន់​ក្រសួង​ព្រះ​បរមរាជវាំង​វិញ​ដែល​លោកមាន​ប្រសាសន៍​ថា​ ជា​អ្នក​មើល​ការ​ខុស​ត្រូវ​លើ​ការ​សាង​សង់​ទាំង​អស់​។

លោកអៀងបញ្ញកាមន្ត្រី​ជាន់​ខ្ពស់​មួយ​រូប​នៅ​ក្រសួង​ព្រះ​បរម​រាជ​វាំង បាន​​មាន​ប្រ​សាសន៍​ថា​​ លោកមិនអាច​ឆ្លើយ​សំណួរ​ចំពោះ​ការ​សាង​សង់​ព្រះ​មេរុ​បាន​ទេហើយ​បាន​បដិសេធ​មិន​​និយាយ​​​ទៀត​ឡើយ​។

លោកផៃស៊ីផានអ្នក​នាំ​ពាក្យទីស្តីការ​គណៈរដ្ឋមន្ត្រី ​បង្វែ​រសំណួរ​ទាំង​អស់​ទៅ​សាលា​រាជធានី​ភ្នំ​ពេញ​​ ហើយ​​លោក ឡុង ឌីម៉ង់​អ្នក​នាំពាក្យ​សាលា​រាជធានី​​មាន​ប្រ​សាសន៍​ថា​​ ក្រ​សួង​ព្រះ​បរមរាជ​វាំង​ជាអ្នក​​ទទួល​ខុស​ត្រូវ​​លើ​ការ​សាងសង់​ព្រះ​មេរុ​នេះ។

កាលពីព្រឹក​ម្សិល​មិញលោកគង់​ សំអុលដែល​ត្រូវ​បាន​គេ​ឃើញ​ កំពុង​ពិនិត្យ​​មើល​គម្រោង​​សាង​សង់​​នេះ ​​​បានឲ្យ​នគរបាល​រាជ​ធានី​នាំ​អ្នក​យក​ព័ត៌មាន​ចេញ​ពី​ការដ្ឋាន​​សាង​សង់​​ព្រះ​មេរុ​​នេះ។

ព្រះ​អង្គ​ម្ចាស់ស៊ីសុវត្ថិ​ ធម្មិកោអ្នកនាំ​ពាក្យ​ព្រះ​រាជ​ខុទ្ទកាល័យ ​និង​ជា​ជំនួយការ​ផ្ទាល់​របស់​អតីត​ព្រះ​មហាវីរក្សត្រ​ សម្តេច​ឪនរោត្តមសីហនុ​ មាន​បន្ទូល​ថា​ ព្រះរាជ​ខុទ្ទ​កាល័យ​ដែល​​គ្រប់​គ្រង​ដោយ​​ព្រះ​មហា​ក្សត្រ​នរោត្តមសីហមុនី​ ​មិន​មាន​ជាប់​ពាក់​ព័ន្ធ​ក្នុង​ការ​រៀប​ចំព្រះ​រាជ​​ពិធី​ថ្វាយ​ព្រះ​ភ្លើង​បូជា​ព្រះ​បរមសព​​សម្តេច​ឪនរោត្តមសីហនុ​ ទេ​ ប៉ុន្តែ​ព្រះ​អង្គ​មាន​បន្ទូល​ថា​ ព្រះអង្គត្រូវ​បាន​គេ​ជូន​ដំណឹង​ថាការ​សាង​សង់​ព្រះ​មេរុ​នោះ​មាន​តម្លៃ​ប្រហែល​ប្រាំ​លាន​ដុល្លារ​​។គម្រោង​​​សាង​សង់​ព្រះ​មេរុ​សម្រាប់​​ថ្វាយ​ព្រះ​ភ្លើង​បូជា​​ព្រះ​បរម​សព​សម្ដេ​ចឪ​ គឺ​មិន​មែន​ជា​គម្រោង​ទី១​​ដែល​កូន​ស្រី​របស់​លោកគង់សំអុលធ្លាប់​បាន​សហការសាង​សង់​នោះ​ទេ​។

នៅ​ក្នុង​​ការ​ថ្លែង​សុន្ទរកថា​សម្ពោធដាក់​ឲ្យ​ប្រើ​ប្រាស់​ជា​ផ្លូវ​ការ​នៃ​​អគារ​ទី​ស្ដីការ​គណៈ​​រដ្ឋ​មន្ត្រី​កាល​ពីខែ​តុលាឆ្នាំ​២០១០​ លោកនាយករដ្ឋមន្ត្រី​​​ ហ៊ុនសែនបាន​ថ្លែង​អំណរ​គុណ​ចំពោះ​លោកគង់សំអុលនិង​​លោក​ស្រី​ បញ្ញាក្នុង​ការ​រួម​ចំណែក​របស់​ពួកគាត់​​។ លោកហ៊ុនសែនបាន​មាន​ប្រសាសន៍​នៅ​ពេល​នោះថា “ ខ្ញុំ​សូម​​ឆ្លៀ​ត​យក​ឱកាស​នេះ ដើម្បី​ថ្លែង​អំណរ​គុណ ចំពោះ​លោកឧប​​នាយក​រដ្ឋ​មន្ត្រី​ និង​ជារដ្ឋ​មន្ត្រី​ព្រះ​បរមរាជ​វាំង​…គង់សំអុល ​ចំពោះ​​ការ​ដឹក​នាំ​គណៈកម្មា​ធិការ​សិក្សា​​ និង​មើល​ការ​ខុស​ត្រូវ​លើ​ការ​សាង​សង់​​

អគារ​នេះ​។ សំណង់​អគារ​នេះ​ត្រូវ​បាន​សាង​​សង់​ដោយ​ក្រុម​ហ៊ុន​កម្ពុជា​ពីរ​ រួម​ទាំង​ក្រុម​ហ៊ុនវីស៉្បាន​ ដែល​ដឹក​នាំដោយ​លោក​ អ៊ុនផេង​ ពុទ្ធវិសាល​ និង​លោកស្រីគង់បញ្ញា”។ លោកគង់កុសលព្រឹទ្ធបុរស​មហា​វិទ្យា​ល័យ​ស្ថាបត្យកម្ម​ និង​នគ​រូប​នីយកម្ម​នៅ​សាកល​វិទ្យាល័យ​ភូមិន្ទ​ និងវិចិត្រ​សិល្បៈ​​បាន​​ថ្លែងថា ទោះ​បី​​​លោក​ស្រី​ បញ្ញា ជា​កូន​ស្រី​របស់​លោក គង់ សំអុល និង​មាន​ទំនាក់​ទំនង​ការ​ងារ​យ៉ាង​ជិតស្និទ្ធជាមួយ​រដ្ឋាភិបាល​ក៏​ដោយ ​​ក៏​លោក​​ស្រីជា​សិស្ស​គំរូ​ម្នាក់​​ដែរ​។

លោក​បាន​មាន​ប្រសាសន៍​បន្ដ​ថា “ ទោះ​បី​ជា​លោក​ស្រីមាន​ឋានៈ​ខ្ពង់​ខ្ពស់​ក៏ដោយ​ ក៏​លោក​ស្រី​រួស​រាយ​រាក់​ទាក់​ និង​ជា​សិស្ស​ឧស្សាហ៍​ព្យាយាម​”។

កាល​ពី​ឆ្នាំ​២០០២លោក​ស្រីបញ្ញានិង​លោក​ ពុទ្ធវិសាលជា​មិត្ត​រួម​ថ្នាក់​ម្នាក់​របស់​លោកស្រី​ បញ្ញា នៅ​សាកល​វិទ្យាល័យ​ភូមិន្ទ​និងវិចិត្រសិល្បៈ​ ត្រូវ​បាន​គេ​ជ្រើស​រើស​ជា​ជំនួយ​ការ​ផ្នែក​សិក្សា​ស្រាវ​ជ្រាវអំឡុង​ឆ្នាំ​ចុង​ក្រោយនៃ​ការ​សិក្សា​របស់​ពួក​គេនៅ​សាកល​វិទ្យា​ល័យ​​​ សម្រាប់​​កម្មវិធី​​សិក្សា​ស្រាវ​ជ្រាវ​មួយ​ដែល​រៀប​ចំ​ដោយ​មជ្ឈមណ្ឌល​សិក្សា​ភាសា​ខ្មែរ​ និង​មូលនិធិ Rockefeller នេះ​បើ​យោង​តាម​សេចក្ដី​ប្រកាស​ព័ត៌មាន​ ដែល​ចេញ​ដោយ​អង្គការ​នេះ​។ គេ​នៅ​មិន​ទាន់​ច្បាស់​ថា តើ​​ពួក​គាត់​​បាន​បង្កើត​ក្រុម​ហ៊ុន វីស៉្បាន​​នៅ​ពេល​​ណា​នោះ​ទេ​៕

ប្រែសម្រួលដោយឃិនណៃ

© 2024, ខេមបូឌា ដេលី. All rights reserved. No part of this article may be reproduced in print, electronically, broadcast, rewritten or redistributed without written permission.

អត្ថបទទាក់ទង

អត្ថបទអានច្រើន

សេចក្ដីរាយការណ៍ពិសេស