30 C
Phnom Penh

សាលា​ឧទ្ធរណ៍​គួរ​តែ​បង្ហាញ​ភ័ស្ដុតាង​លើ​ករណី​លោក ម៉ម សូណង់ដូ

ដោយ ឌឹ ខេមបូឌា ដេលី

បទវិភាគ

ការ​រិះគន់ចំពោះ​​សេចក្ដី​សម្រេច​របស់​សាលាឧទ្ធរណ៍​កាល​ពីថ្ងៃ​សុក្រ​ ដែល​បាន​បដិសេធ​មិន​ដោះ​លែង​លោក​ ម៉មសូណង់ដូម្ចាស់​ស្ថានីយវិទ្យុ​សម្បុក​ឃ្មុំ​ឲ្យ​នៅ​ក្រៅ​ឃុំ​បណ្ដោះ​អាសន្ន​ បាន​បន្ដ​រហូត​ដល់​ចុង​សប្ដាហ៍​ដោយ​អង្គការ​សិទ្ធិ​មនុស្ស បាន​ចោទ​សួរ​អំពី​ហេតុ​ផល​ផ្លូវ​ច្បាប់​​នៅ​ពី​ក្រោយ​ការ​បដិសេធ​​​នេះ​ និង​បាន​គូស​បញ្ជាក់​​ថា​ មាន​​បទដ្ឋាន​ពីរ​នៅ​ក្នុង​ប្រព័ន្ធ​តុលាការ​។

លោកយ៉េងវីរៈ​ នាយក​ប្រតិបត្តិ​នៃមជ្ឈ​មណ្ឌល​អប់រំ​ច្បាប់​សម្រាប់​សហគមន៍​ បាន​មាន​ប្រសាសន៍​ថា“ លោកម៉ម​ សូណង់​ដូគឺ​ជា​បុរស​វ័យ​ចំណាស់​ម្នាក់​ ហេតុ​ដូច្នេះ​​លោក​នឹង​មិន​គេច​ខ្លួន​ឡើយ​។លោកវីរៈ​ បាន​ច្រានចោល​នូវ​ការ​អះអាង​របស់​សាលា​ឧទ្ធរណ៍​ដែលថាលោកម៉មសូណង់ដូ ​អាច​គំរាម​កំហែង​​សាក្សី​ ​ដែល​ធ្វើ​​​ឲ្យ​ខូច​សណ្ដាប់​ធ្នា​ប់​​សាធា​រណៈ​នោះ​។ លោកយ៉េងវីរៈបាន​ថ្លែង​ថា “ គ្មាន​រឿង​គំរាម​​កំហែង​​សាក្សី​ឡើយ​ ហេតុ​ដូច្នេះគ្មាន​សញ្ញា​​បង្ហាញ​ពី​​ការ​គំរាម​​កំហែង​ទេ​”។

លោកម៉មសូណង់ដូត្រូវ​បាន​ផ្ដន្ទាទោស​ឲ្យ​ជាប់​ពន្ធនាគារ​រយៈ​ពេល​២០​ឆ្នាំ កាល​ពី​ខែ​​តុលា ពីបទ​ញុះញង់​ឲ្យ​បង្កើត​ចលនា​​បះ​បោរ​នៅ​តាម​​ជន​បទ​។ អ្នក​គាំ​ទ្រ​ជា​ច្រើន​របស់​ម្ចាស់ស្ថានីយវិទ្យុ​សម្បុក​ឃ្មុំ​រូប​នេះ​ បាន​លើក​ឡើង​ថា ការ​ចោទ​ប្រកាន់​នេះ​មាន​ពាក់​ព័ន្ធ​នឹង​នយោបាយ​ ហើយ​មាន​ការ​ប៉ុនប៉ង​ពី​រដ្ឋា​ភិបាល​ ដើម្បី​បំបិទ​​​មាត់​​អ្នក​​រិះគន់​​ម្នាក់​​ក្នុង​ចំណោម​អ្នក​រិះ​គន់​រដ្ឋាភិបាល​​តាម​​ប្រព័ន្ធ​ផ្សព្វ​ផ្សាយ​​ក្នុង​ស្រុក​ ដែល​​​ភាគ​ច្រើន​ស្ថិត​ក្រោម​​​​ស្ថានីយ​វិទ្យុ​ និង​​ទូរទស្សន៍​​គាំ​ទ្រ​គណ​បក្ស​កាន់​អំណាច​។

ការ​អះអាង​​អំពី​ការ​បង្កើត​ចលនា​អបគមន៍​នេះ​​កើត​មាន​តាំង​ពី​ខែ​ឧសភា ​ដែល​នៅ​ពេល​​​នោះ អាជ្ញាធរ​បាន​បើក​យុទ្ធនាការ​ដ៏ធំមួយ​ ដើម្បី​បណ្ដេញ​ប្រជាពលរដ្ឋ​រាប់​រយ​គ្រួសារ​នៅ​ក្នុង​ខេត្ត​ក្រចេះ ដោយ​មាន​ការ​​បាញ់​ប្រហារ​ទៅលើ​ក្មេង​ស្រី​អាយុ​១៤​ឆ្នាំម្នាក់​នៅ​ក្នុង​ប្រតិបត្តិ​ការ​នោះ​ផង​ដែរ​។ អង្គការ​សិទ្ធិ​មនុស្ស ​បាន​ថ្កោល​ទោស​ការ​អះអាង​របស់​រដ្ឋាភិបាល​ដែល​ថាអ្នក​ភូមិ​បាន​ចូល​រួម​ក្នុង​ចលនា​អបគមន៍​នេះ ដោយ​បាន​​ចាត់​ទុក​ការ​អះអាងនេះ​​​ថាជា​លេស​ដើម្បី​បណ្ដេញ​អ្នក​ភូមិ​រាប់​រយ​គ្រួសារ​ជំនួស​មុខ​ឲ្យ​ក្រុមហ៊ុន​ចម្ការ​កៅស៊ូ​​មួយ។

នៅ​ក្នុង​ការ​បដិសេធ​សំណើសុំ​នៅ​ក្រៅ​ឃុំ​បណ្ដោះ​អាសន្ន​របស់​លោក​ ម៉មសូណង់ដូក្រុម​ចៅ​ក្រម​បាន​លើក​ឡើង​ថា ពួក​គេ​ខ្លាច​ក្រែង​បុរស​អាយុ​៧២​ឆ្នាំ​រូប​នេះ​​គាប​សង្កត់​​សាក្សី​ និង​បង្កចលាចល​​សាធារណៈ​។ ​ព្រះ​រាជ​​អាជ្ញា​ក៏​បាន​​លើក​ឡើង​​ដែរ​ថាលោកម៉មសូណង់ដូដែល​មាន​សញ្ជាតិ​ពីរ​គឺ​សញ្ជាតិ​ខ្មែរនិង​សញ្ជាតិ​បារាំងអាច​នឹង​រត់​គេច​ខ្លួន​។

លោកស្រីណាលីពីឡូក (Naly Pilorge) នាយិកាអង្គការ​សិទ្ធិ​មនុស្ស​លីកាដូ​បាន​មាន​ប្រសាសន៍​ថាសេចក្ដី​សម្រេច​នេះ​មិន​សូវ​ជា​សម​ហេតុ​សម​ផល​ឡើយ​ ព្រោះ​ថាលោកម៉មសូណង់ដូបាន​វិល​មក​កាន់​ប្រទេស​កម្ពុជា​​វិញ​កាល​ពី​ខែ​កក្កដា បន្ទាប់​ពី​លោក​​បានដឹង​ថា ខ្លួន​នឹង​ត្រូវ​ប្រឈម​នឹង​ការ​ចោទ​ប្រកាន់​មកលើ​​រូប​លោក​ ដែល​លោក​បាន​បដិ​សេធ​យ៉ាង​ដាច់​អហង្ការ​នោះ​។

លោក​ស្រី​បាន​​លើក​ឡើង​ថា“ ​យើង​បាន​ដឹង​យ៉ាង​ច្បាស់​តាំង​ពី​ដំបូង​មក​ថាលោក​ ម៉មសូណង់​ដូ ​វិល​ត្រឡប់​មក​កាន់​ប្រទេស​កម្ពុជា​វិញ​​ដោយ​ខ្លួន​ឯង ដូច្នេះ​មិន​ចាំ​បាច់​ខ្លាច​លោក​ចាក​ចេញ​ពី​ប្រទេស​ម្ដង​ទៀត​ឡើយ​”។

លោកស្រីណាលីពី​ឡូ​កបាន​ថ្លែង​ថាការ​បដិសេធ​មិន​ដោះ​លែង​ឲ្យ​នៅ​ក្រៅ​ឃុំ​នេះ​ ក៏​​មិន​ស្រប​នឹង​​សេចក្ដី​សម្រេចផ្សេងៗ​ទៀត​​ក្នុង​ពេល​ថ្មី​ៗ​នេះ របស់​ប្រព័ន្ធ​តុលាការ​ ​ដោយ​លោកស្រី​បានគូស​​​បញ្ជាក់​ពី​ករណី​របស់​លោកឈូកបណ្ឌិតអតីត​អភិបាល​ក្រុង​បាវិតដែល​ត្រូវ​បាន​ចោទ​ប្រកាន់​ជា​ច្រើន​ខែ​កន្លង​មក​ហើយ​​ពី​បទ​បាញ់​ប្រហារ​កម្មការិនី​រោង​ចក្រ​ចំនួន​បី​នាក់​ ប៉ុន្ដែមិន​ដែល​ត្រូវ​បាន​​ឃាត់ខ្លួននិង​នាំ​យក​​មក​បើក​សវនាការ​ឡើយ​។លោកស្រីបាន​មាន​ប្រសាសន៍​ថា “ ​គ្មាន​ការ​ចាប់​ខ្លួន​ និង​ការ​ឃុំ​ខ្លួន​ជា​បណ្ដោះ​អាសន្ន​មុន​ពេល​បើក​សវនាការ​ចំពោះ​លោកឈូកបណ្ឌិតឡើយ​”។

លោក​ស្រី​បានមាន​ប្រសាសន៍​​បន្ថែម​​ថា “ លោកម៉មសូណង់ដូបាន​សម្រេច​ចិត្ត​វិល​ត្រឡប់​មក​កាន់​ប្រទេស​កម្ពុជា​វិញ ថ្វីបើ​លោក​ដឹង​ហើយ​ថា លោក​នឹង​ប្រឈម​ការ​ចោទ​ប្រកាន់​ ​ពីព្រោះ​លោក​ចង់​បង្ហាញ​ពី​ភាព​គ្មាន​ទោស​របស់​លោក​”។

លោកសុកសំអឿនប្រធាន​ក្រុម​អ្នកច្បាប់់​ការ​ពារ​សិទ្ធិ​កម្ពុជា​ ដែល​ជា​អង្គការ​ផ្ដល់​​ជំនួយផ្នែក​ច្បាប់​ដោយ​ឥត​គិត​ថ្លៃមួយ​ផ្សេង​ទៀត​​លើក​ឡើង​ថា ចៅ​ក្រម​សាលា​ឧទ្ធរណ៍​គួរ​​តែ​បាន​ផ្ដល់​ភ័ស្ដុតាង​មួយ​ចំនួន​ ដើម្បី​គាំ​ទ្រ​ការ​អះអាង​របស់​ខ្លួន​ដែលថាលោក​ ម៉ម ​សូណង់ដូអាច​​​ធ្វើ​ការ​គំរាម​កំហែង​ណាមួយ​​នោះ​។

លោកសុកសំអឿនដែល​បាន​ការ​ពារ​លោក​ ម៉មសូណង់ដូអំឡុង​ការ​បើក​សវនា​ការ​​របស់​លោក​នៅ​ក្នុង​សាលាដំបូង​រាជ​ធានី​ភ្នំពេញ​ កាល​ពី​ខែ​កញ្ញា ​បាន​ថ្លែងថា “ ប្រសិនបើ​លោក​ [ចៅក្រម​] លើក​ឡើង​​ដូច្នេះ លោក​ត្រូវ​តែ​មាន​ភ័ស្ដុតាង ​មិន​មែន​បាន​ត្រឹម​តែ​ខ្លាច​ក្រែងនោះ​ទេ”។លោក​​បន្ថែមថា “ ​តុលាការ​កម្ពុជា​ គឺ​អ៊ីចឹង​ឯង​ គ្មាន​ភ័ស្ដុ​តាងនោះ​ឡើយ​ បាន​ត្រឹម​តែ​ខ្លាច​ក្រែង​”។

កាល​ពី​ថ្ងៃ​សុក្រ​ គណៈកម្មាធិការ​ប្រព្រឹត្តិ​កម្ម​នៃ​អង្គការ​សហគមន៍​ការ​ពារ​សិទ្ធិ​​មនុស្ស​កម្ពុជា​ និង​អង្គការ​សិទ្ធិ​មនុស្ស​អាដហុក​ ក៏​បាន​ប្រកាស​មិន​យល់​ស្រប​ចំពោះ​សេចក្ដី​សម្រេច​របស់​តុលាការ​ដែល​បដិសេធ​មិន​ដោះ​លែង​លោកម៉មសូណង់ដូឲ្យ​នៅ​ក្រៅ​ឃុំ​បណ្ដោះ​អាសន្ន​ដែរ​។

លោកសសុវណ្ណមេធាវី​ការ​ពារ​ក្ដី​លោកម៉ម សូណង់ដូ បាន​ប្ដឹង​សារ​ទុក​​្ខ​ទៅ​តុលាការ​កំពូល ចំពោះ​ការ​បដិសេធ​មិន​ព្រម​ដោះ​លែង​ឲ្យ​នៅ​ក្រៅឃុំ​នេះ​ កាល​ពី​ថ្ងៃសុក្រ។ លោក​បាន​មាន​ប្រសាសន៍​ថាតុលា​ការ​កំពូល​នៅ​មិន​ទាន់​បាន​ឆ្លើយ​តប​នៅ​ឡើយ​ទេ៕

(រាយការណ៍​បន្ថែមដោយអ៊ាងម៉េងឡេង)

ប្រែសម្រួល​ដោយស៊ាស៊ុយឈាង

© 2024, ខេមបូឌា ដេលី. All rights reserved. No part of this article may be reproduced in print, electronically, broadcast, rewritten or redistributed without written permission.

អត្ថបទទាក់ទង

អត្ថបទអានច្រើន

សេចក្ដីរាយការណ៍ពិសេស