ក្នុងពេលឆាប់ៗនេះ សាលាឧទ្ធរណ៍នឹងចេញសាលដីកាពាក់ព័ន្ធនឹងការបើកសវនាការឡើងវិញលើទណ្ឌិតពីរនាក់ ដែលមជ្ឈដ្ឋានទូទៅជឿថា ត្រូវបានគេទម្លាក់កំហុសនៅក្នុងឃាតកម្មសម្លាប់លោក ជា វិជ្ជា មេដឹកនាំសហជីពដ៏ល្បីឈ្មោះ។
សាលាឧទ្ធរណ៍គ្រោងនឹងប្រកាសសាលដីកានេះ កាលពីថ្ងៃទី២៦ខែវិច្ឆិកា។ប៉ុន្ដែបុ៉ន្មានថ្ងៃមុន លោកជួនសុ៊នឡេង ចៅក្រមជំនុំជម្រះមានប្រសាសន៍ថា ការប្រកាសសាលដីកានេះត្រូវពន្យារពេលវិញ ដោយសារតែរឿងក្ដីនេះ “ ស្មុគស្មាញខ្លាំងពេក”។
កាលពីថ្ងៃសុក្រ លោកបានមានប្រសាសន៍ថា សាលាឧទ្ធរណ៍កំពុងរៀបចំសាលដីកានេះ។ លោកបានបន្ថែមថា“ វាប្រហែលនឹងត្រូវប្រកាសនៅសប្ដាហ៍ទី៣នៃខែនេះ”។ ទណ្ឌិតឈ្មោះ ប៊ន សំណាង និង សុខ សំអឿន ត្រូវបានសាលាដំបូងរាជធានីភ្នំពេញ ផ្ដន្ទាទោសក្នុងឆ្នាំ២០០៥ ពីបទបាញ់សម្លាប់លោកជាវិជ្ជាដែលម្នាក់ៗត្រូវជាប់ពន្ធនាគាររយៈពេល២០ឆ្នាំ។
ដោយសារតែមានការជំទាស់យ៉ាងខ្លាំងទាំងក្នុង និងក្រៅប្រទេស តុលាការកំពូលបានដោះលែងទណ្ឌិតទាំងពីរនាក់នេះឲ្យនៅក្រៅឃុំបណ្ដោះអាសន្នកាលពីឆ្នាំ២០០៨ហើយក៏បានបញ្ជាឲ្យគេស៊ើបអង្កេតករណីនេះជាថ្មី ផងដែរ។
ក្នុងពេលបើកសវនាការជំនុំជម្រះកាលពីថ្ងៃទី៧ខែវិច្ឆិកាព្រះរាជអាជ្ញាសាលាឧទ្ធរណ៍មិនមានបង្ហាញភ័ស្តុតាងថ្មីប្រឆាំងទណ្ឌិតទាំងពីរនាក់នេះទេ និងបានលើកឡើងថាលទ្ធផលលើកទី២នៃការស៊ើបអង្កេតក្នុងករណីបាញ់សម្លាប់លោក ជា វិជ្ជាដូចគ្នានឹងលើកទី១ដែរគឺថាទណ្ឌិតឈ្មោះសំអឿននិង សំណាងពិតជាបានបាញ់សម្លាប់លោកជាវិជ្ជាប្រាកដមែន។
ជនសង្ស័យទាំងពីរនាក់បានឆ្លើយដោះសារថា ខ្លួនមិនបាននៅនឹងកន្លែងកើតហេតុនៅពេលមានការបាញ់សម្លាប់នោះទេប៉ុន្ដែ លោកហេងពៅមន្ត្រីនគរបាលដែលដឹកនាំការសើុបអង្កេតរឿងក្តីឃាតកម្មលើលោកជាវិជ្ជា អះអាងថាគាត់ត្រូវបានលោកហុកឡងឌី អតីតអគ្គស្្នងការនគរបាលជាតិបញ្ជាឲ្យទម្លាក់កំហុសលើទណ្ឌិតទាំងពីរនាក់នេះ។
លោកហេងពៅ ពេលនេះកំពុងជាប់ពន្ធនាគាររយៈពេលជាង១០០ឆ្នាំ ពីបទចោទប្រកាន់ជាច្រើនករណី។ លោក ជា មុនី បច្្ចុប្បន្នជាប្រធានសហជីពសេរីកម្មករមានប្រសាសន៍កាលពីម្សិលមិញថាការងារចាក់គ្រឹះសាងសង់រូបសំណាក់លោកជាវិជ្ជាត្រូវបានពន្យារពេលទៀតហើយ។
លោកជាមុនី បានឲ្យដឹងថាលោកកែបជុតិមាអភិបាលរាជធានីភ្នំពេញបានប្រកាសតាមលិខិតមួយកាលពីសប្ដាហ៍មុនថាការចាក់គ្រឹះសម្រាប់សាងសង់រូបសំណាក់នោះត្រូវបានពន្យារពេលរហូតដល់ពិធីបូជាព្រះបរមសពសម្ដេចឪ នរោត្តម សីហនុនៅថ្ងៃទី៤ខែកុម្ភៈ ចប់រួចរាល់សិន។
លោកមុនី បានមានប្រសាសន៍ថាលោកបានយល់ព្រមតាមការពន្យារពេលនេះប៉ុន្ដែមានហេតុផលតិចតួចណាស់ចំពោះការពន្យារពេលនេះ។ លោកបានមានប្រសាសន៍ថា “ ខ្ញុំគិតថា ការសាងសង់គ្រឹះសម្រាប់រូបសំណាកលោក ជាវិជ្ជា មិនធ្វើឲ្យប៉ះពាល់ដល់ពិធីថ្វាយព្រះភ្លើងឲ្យព្រះបរមសពទេ”។ខ្ញុំបានដាក់សំណើសុំសាងសង់គ្រឹះនេះកាលពីថ្ងៃទី១ខែតុលា ហើយខ្ញុំទើបតែទទួលបានលិខិតនេះពីបីថ្ងៃមុនប៉ុណ្ណោះ”។
រូបសំណាកលោកជាវិជ្ជា ក៏ត្រូវបានពន្យារពេលផងដែរ ដោយសារការសាងសង់លើកទី១ ដោយជាងចម្លាក់នៅក្នុងខេត្តសៀមរាបនោះមើលទៅមិនដូចលោកជាវិជ្ជាទេ ។អ្នកដែលបានឃើញរូបសំណាកលើកទី១បាននិយាយថា វាធាត់ជាងលោកជាវិជ្ជាកាលពីលោកនៅរស់។
ពេលដែលរូបសំណាកថ្មីសាងសង់រួច គេនឹងដាក់នៅពីខាងកើតវិមានឯករាជ្យ នៅទល់មុខវត្តលង្កា ជិតកន្លែងដែលលោកជាវិជា្ជា ត្រូវបានគេបាញ់សម្លាប់ទាំងកណ្ដាលថ្ងៃ ពេលកំពុងអានកាសែត៕
(រាយការណ៍បន្ថែមដោយឃីសុវុឌ្ឍី)
ប្រែសម្រួលដោយហមសុផាណ្ណា