លោកខៀវកាញារីទ្ធរដ្ឋមន្ត្រីក្រសួងព័ត៌មានបានមានប្រសាសន៍ថា លោកនាយករដ្ឋមន្ត្រីហ៊ុនសែនបានរិះគន់សាលាឧទ្ធរណ៍ចំពោះការដោះលែងអ្នកជំនួញម្នាក់ ដែលត្រូវបានតុលាការផ្តន្ទាទោសដាក់ពន្ធនាគារមុនពេលកំណត់ដែលឥឡូវនេះត្រូវជាប់ពន្ធនាគារម្តងទៀត បន្ទាប់ពីត្រូវបានចោទប្រកាន់ពីបទជួញដូរគ្រឿងញៀនក្នុងពេលថ្មីៗនេះ។
លោក តាន់សេងហាក់ដែលធ្លាប់មានឈ្មោះជា “ ឧកញ៉ា” ត្រូវបានចោទប្រកាន់ពីបទជួញដូរគ្រឿងញៀន បន្ទាប់ពីនគរបាលប្រឆាំងការជួញដូរគ្រឿងញៀនបានឆ្មក់ចូលភូមិគ្រឹះរបស់លោកនៅក្នុងខណ្ឌសែនសុខ ក្នុងរាជធានីភ្នំពេញកាលពីថ្ងៃទី២៧ខែវិច្ឆិកាដែលនៅទីនោះ នគរបាលបានរកឃើញគ្រឿងញៀនប្រភេទកូកាអុីន និងមេតំហ្វេតាមីនឧបករណ៍ផលិតគ្រឿងញៀន ព្រមទាំងគ្រាប់កាំភ្លើងផងដែរ។
នៅមុនការចាប់ខ្លួននេះ លោកសេងហាក់ដែលជាអតីតទីប្រឹក្សាផ្ទាល់របស់លោក ជាស៊ីម ប្រធានព្រឹទ្ធសភា ធ្លាប់បានជាប់ ពន្ធនាគារពីបទចាប់យកដីធ្លី និងបទល្មើសប្រើប្រាស់អាវុធខុសច្បាប់។
លោក ខៀវ កាញារីទ្ធ បានលើកឡើងក្នុងសារមួយកាលពីថ្ងៃសុក្រថា លោក ហ៊ុនសែន បានលើកឡើងអំពីករណីអ្នកជំនួញនេះ ខណៈដែលលោក ដឹកនាំកិច្ចប្រជុំមួយនៅទីស្តីការគណៈរដ្ឋមន្ត្រីកាលពីពីថ្ងៃសុក្រ។
លោកខៀវកាញារីទ្ធមានប្រសាសន៍បន្តថា “ លោកហ៊ុនសែនបានរិះគន់សាលាឧទ្ធរណ៍ចំពោះករណីលោក តាន់ សេងហាក់ ដែលក្រោយមកលោកត្រូវបានសាលាឧទ្ធរណ៍ដោះលែងស្ងាត់ៗ ហើយលោក [ហ៊ុនសែន] ដឹងពីការដោះលែងលោក តាន់សេងហាក់ នេះ បន្ទាប់ពីនគរបាលអង្គភាពប្រឆាំងការជួញដូរគ្រឿងញៀនបានចាប់ខ្លួនជននេះម្តងទៀតតែប៉ុណ្ណោះ”។
លោក ខៀវ កាញារីទ្ធ បានពន្យល់ថាលោកសេងហាក់ ធ្លាប់ជាប់ពន្ធនាគារពីបទបាញ់បោះសេរីនៅពេលយប់។ លោក សេងហាក់ ត្រូវបានចាប់ខ្លួនដាក់ពន្ធនាគារកាលពីឆ្នាំ២០០៧ពីបទចាប់យកដីខុសច្បាប់។គាត់ត្រូវបានចោទប្រកាន់ផងដែរពីបទប៉ុនប៉ងមនុស្សឃាតដោយបាញ់មន្ត្រីនគរបាលម្នាក់ កាលពីឆ្នាំ២០០៥។
លោក អ៊ុក សាវុធ អគ្គព្រះរាជអាជ្ញាសាលាឧទ្ធរណ៍បដិសេធមិនធ្វើសេចក្តីអត្ថាធិប្បាយ អំពីការដោះលែងលោក តាន់សេងហាក់ និង ការរិះគន់សាលាឧទ្ធរណ៍ពីសំណាក់លោកហ៊ុនសែន ទេ។ លោកស៊្រុនលាងប្រធានមណ្ឌលកែប្រែទី១នៅពន្ធនាគារព្រៃស មានប្រសាសន៍ថា លោកសេងហាក់ ដែលបច្ចុប្បន្ននេះកំពុង ត្រូវបានឃុំខ្លួនបណ្តោះអាសន្នពីបទជួញដូរគ្រឿងញៀន ធ្លាប់បានជាប់ពន្ធនាគារពីរដងមកហើយ។លោកបន្ថែមថា លោកមិនបានដឹងថា លោកសេងហាក់ចាកចេញពីពន្ធនាគារទាំងពីរលើកនោះដោយវិធីណាទេ។
លោកមានប្រសាសន៍បន្តទៀតថា “ នៅករណីទី២នេះដែលខ្ញុំបានដឹងគឺលោក ត្រូវបានដោះលែងពីពន្ធនាគារ។ប៉ុន្តែខ្ញុំមិនបានចាំថា គាត់ត្រូវបានគេដោះលែងនៅពេលណា ឬដោយមូលហេតុអ្វីនោះទេ”។
លោកម៉មភាសាមេធាវីលោកសេងហាក់ បានបដិសេធមិនប្រាប់អំពីប្រវត្តិជាប់ពន្ធនាគាររបស់កូនក្តីលោក ឬលោកត្រូវបានដោះលែងឲ្យមានសេរីភាព បន្ទាប់ពីតុលាការផ្តន្ទាទោសទាំងពីរលើកដោយវិធីណានោះទេ។
លោកឧត្តមសេនីយ៍ឯកយឹមលាងប្រធានអង្គរក្សលោកជា ស៊ីមបានមានប្រសាសន៍ថាលោកសេងហាក់ត្រូវបានដកចេញពីតួនាទីជាទីប្រឹក្សារបស់ប្រធានព្រឹទ្ធសភានិងប្រធានគណបក្សកំពុងកាន់អំណាចរួចហើយ ដោយសារលោកបានជាប់ពាក់ព័ន្ធក្នុងការចាប់យកដីខុសច្បាប់ ប៉ុន្តែ លោកបានបដិសេធមិនធ្វើអត្ថាធិប្បាយបន្ថែមទៀតទេ៕
ប្រែសម្រួលដោយឃិនណៃ