លោក ហ៊ុន សែន បានមានប្រសាសន៍កាលពីម្សិលមិញថា ប្រទេសកម្ពុជាកំពុងប្រឈមនឹងកង្វះកម្លាំងពលកម្មច្រើនដោយសារតែពលករដែលទៅធ្វើការក្នុងប្រទេសថៃ មានចំនួនច្រើន ដោយជំរុញឲ្យនិយោជកជួយកាត់បន្ថយការចំណាកស្រុកខុសច្បាប់ តាមរយៈការធ្វើឲ្យប្រសើរឡើងនូវលក្ខខណ្ឌការងារក្នុងស្រុក។
លោក ហ៊ុន សែន ក៏បានអបអរសាទរផងដែរចំពោះការវិយោគរបស់ជប៉ុន នៅក្នុងប្រទេសនេះដែលលោកមានប្រសាសន៍ថា នឹងជួយកម្ពុជាបង្កើនកេរ្តិ៍ឈ្មោះរបស់ខ្លួនជាមជ្ឈមណ្ឌលផលិតកម្ម។
លោកបានមានប្រសាសន៍អំឡុងពិធីបញ្ចុះបឋមសិលាសាងសង់រោងចក្រផលិតគ្រឿងបន្លាស់រថយន្តថ្មីមួយដែលមានតម្លៃជាទឹកប្រាក់ចំនួន២៤លានដុល្លាររបស់ក្រុមហ៊ុន សាជីវកម្ម យ៉ាហ្សាគី (Yazaki Corpration) របស់ជប៉ុន ដែលមានទីតាំងនៅក្នុងតំបន់សេដ្ឋកិច្ចពិសេសកោះកុង ជិតព្រំដែនថៃ។
លោកបានមានប្រសាសន៍ថា “ កន្លែងណាដែលមានការងារល្អនៅក្នុងស្រុក វាជួយកាត់បន្ថយការចំណាកស្រុកខុសច្បាប់។ហើយពេលនេះ មានប្រជាពលរដ្ឋកម្ពុជា ជាច្រើនដែលធ្វើចំណាកស្រុកដោយខុសច្បាប់ដើម្បីទៅធ្វើការនៅព្រះរាជាណាចក្រថៃ”។ លោក បន្ថែមថា កង្វះកម្លាំងពលកម្មនៅក្នុងប្រទេសធ្វើឲ្យប៉ះពាល់ដល់ប្រទេសនេះទាំងមូល ប៉ុន្តែ “ ជាពិសេសរាជធានីភ្នំពេញ”។
លោកបានថ្លែងថា “ ពេលនេះមានការបើកទូលាយសម្រាប់ក្រុមហ៊ុនគ្រប់ប្រភេទក្នុងវិស័យកសិកម្ម ឧស្សាហកម្ម និងសេវាកម្ម ដើម្បីធ្វើឲ្យប្រាកដថា កម្មកររបស់យើងមិនត្រឹមតែទទួលបានការងារប៉ុណ្ណោះទេ ថែមទាំងទទួលបានប្រាក់ខែ ការស្នាក់នៅ និងលក្ខខណ្ឌការងារទៀតផង”។
លោកនាយករដ្ឋមន្ត្រី ហ៊ុន សែន បានកោតសរសើរក្រុមហ៊ុនសាជីវកម្មយ៉ាហ្សាគី ដែលមានមូលដ្ឋាននៅទីក្រុងតូក្យូ ដែលនឹងផ្តល់ការងារដល់ប្រជាពលរដ្ឋចំនួន៦០០នាក់ ហើយផលិតកុងទ័រ ប្រព័ន្ធខ្សែភ្លើងរថយន្តសម្រាប់រថយន្ត។
លោក ហ៊ុន សែន បានមានប្រសាសន៍ថា “អ្វីដែលយើងកំពុងមើលឃើញនៅទីនេះ គឺថា បច្ចេកវិទ្យាជាន់ខ្ពស់បានមកដល់កម្ពុជាហើយ។ ក្រុមហ៊ុននេះនឹងផលិតខួរក្បាល និងសរសៃឈាមរថយន្ដ ហេតុដូច្នេះកម្មករ និងកម្មការិនីគួរតែផ្ដោតការយកចិត្តទុកដាក់ ពីព្រោះវា [យ៉ាហ្សាគី] នឹងមិនត្រឹមតែផ្គត់ផ្គង់ដល់ប្រទេសកម្ពុជាប៉ុណ្ណោះទេ គឺថែមទាំងផ្គត់ផ្គង់ដល់បណ្ដារោងចក្រផ្សេងទៀតទូទាំងសាកលលោកផងដែរ”។
យ៉ាហ្សាគី គឹជាក្រុមហ៊ុនអន្ដរជាតិទី៣ហើយដែលបានបង្កើតរោងចក្រមួយនៅក្នុងតំបន់សេដ្ឋកិច្ចពិសេសក្នុងខេត្តកោះកុង ដែលបានបើកកាលពីឆ្នាំ២០០៦ដោយចូលរួមជាមួយក្រុមហ៊ុនផលិតរថយន្ដ ហ៊ីយ៉ាន់ដាយ (Hyundai) របស់កូរ៉េខាងត្បូង និងក្រុមហ៊ុនខេអិនអិន អាផារ៉េល (KNN Apparel) របស់ថៃ។ លោក ហ៊ុន សែន មានប្រសាសន៍ថា ក្រុមហ៊ុនទី៤មួយទៀតឈ្មោះមីកាសា (Mikasa)របស់ជប៉ុនដែលផលិតសម្ភារកីឡា នឹងបើករោងចក្រមួយក្នុងតំបន់សេដ្ឋកិច្ចពិសេសនេះក្នុងពេលឆាប់ៗនេះ។
ការវិនិយោគរបស់ជប៉ុននៅកម្ពុជាបានកើនឡើងជាលំដាប់ក្នុងរយៈពេលប៉ុន្មានឆ្នាំថ្មីៗនេះ។ទោះបីជាមានការផ្តោតជាយូរមកហើយលើវិស័យកាត់ដេរក្ដី ក៏ការវិនិយោគថ្មីៗកំពុងផ្លាស់ប្ដូរឈានទៅរកឧស្សាហកម្មធុនស្រាលដែលត្រូវការកម្លាំងពលកម្មច្រើន។
លោក មឿន តុលា ប្រធានកម្មវិធីការងារនៅមជ្ឈមណ្ឌលអប់រំច្បាប់សម្រាប់សហគមន៍បានមានប្រសាសន៍ថា ខណៈដែលក្រុមហ៊ុនជប៉ុនជាធម្មតាផ្ដល់លក្ខខណ្ឌការងារ និងការបណ្ដុះបណ្ដាលផ្នែកបច្ចេកទេសប្រសើរជាងក្រុមហ៊ុនមកពីបណ្ដាប្រទេសនានាដូចជាចិន និងវៀតណាមជាដើមនោះ ប្រាក់ឈ្នួលកម្លាំងពលកម្មរបស់ពួកគេប្រហែលជាស្រដៀងៗគ្នា។
លោកបានមានប្រសាសន៍ថា“ វាមិនខុសគ្នាពីក្រុមហ៊ុនផ្សេងៗប៉ុន្មានឡើយ។ពួកគេផ្ដល់ការបណ្ដុះបណ្ដាល ប៉ុន្ដែ និយាយពីប្រាក់ឈ្នួលកម្លាំងពលកម្ម ពួកគេសម្លឹងមើលគោលនយោបាយជាតិ”។
លោក ហ៊ីរ៉ូស៊ី ស៊ូហ្សូគី (Hiroshi Suzuki) នាយកប្រតិបត្តិ និងជាសេដ្ឋវិទូជាន់ខ្ពស់នៅវិទ្យាស្ថានស្រាវជ្រាវពាណិជ្ជកម្មកម្ពុជា បានយល់ស្របថា ខណៈដែលបណ្ដាក្រុមហ៊ុនជប៉ុនផ្ដល់អត្ថប្រយោជន៍បន្ថែមមួយចំនួន ដូចជាកន្លែងស្នាក់នៅ និងថ្លៃធ្វើដំណើរទៅធ្វើការនោះ នៅទីបំផុតពួកគេក៏ជ្រើសរើសធ្វើពាណិជ្ជកម្មក្នុងប្រទេសកម្ពុជា ពីព្រោះពួកគេអាចចំណាយទៅលើប្រាក់ខែទាបជាងនៅប្រទេសផ្សេងៗទៀតនៅក្នុងតំបន់។
លោកមានប្រសាសន៍ទៀតថា “ ក្រុមហ៊ុនជប៉ុន គឺជាក្រុមហ៊ុនឯកជន។ ពួកគេមកកម្ពុជាដោយសារតែអត្ថប្រយោជន៍របស់កម្ពុជា នៅត្រង់ថា ចំណាយទាបលើកម្លាំងពលកម្ម បើធៀបនឹងបណ្ដាប្រទេសជិតខាង”។
នៅក្នុងលិខិតមួយចុះកាលបរិច្ឆេទកាលពីម្សិលមិញ លោក ហ៊ុន សែន បានអបអរសាទរចំពោះលោក ស៊ីនហ្សូ អាបេ (Shinzo Abe) នាយករដ្ឋមន្ត្រីស្ដាំនិយមថ្មី របស់ជប៉ុន ដែលគណបក្សប្រជាធិបតេយ្យសេរី (LDP) របស់លោកទទួលបានជ័យជម្នះនៅក្នុងការបោះឆ្នោតជាតិ កាលពីថ្ងៃច័ន្ទ។
លោក ហ៊ុន សែន បានសរសេរថា “ ខ្ញុំមានការជឿជាក់យ៉ាងមុតមាំថា ក្រោមការដឹកនាំដ៏ឈ្លាសវៃរបស់ឯកឧត្ដម ទំនាក់ទំនងមិត្តភាពល្អឥតខ្ចោះ និងកិច្ចសហប្រតិបត្តិការប្រកបដោយផ្លែផ្ការវាងព្រះរាជាណាចក្រកម្ពុជា និងជប៉ុន នឹងត្រូវបានពង្រឹង និងពង្រីកបន្ថែមទៀត ដើម្បីផលប្រយោជន៍ទៅវិញទៅមកនៃប្រទេសរបស់យើងទាំងពីរ”៕
ប្រែសម្រួលដោយ តែម សុខុម