មេធាវីតំណាងកម្មការិនីកាត់ដេរចំនួនបីនាក់ដែលទទួលរងគ្រោះដោយអំពើបាញ់ប្រហារ អំឡុងការតវ៉ាដ៏ហឹង្សានៅខាងក្រៅរោងចក្រផលិតស្បែកជើង ក្នុងក្រុងបាវិត កាលពីដើមខែនេះ បានដាក់ពាក្យបណ្តឹងទៅសាលាដំបូងខេត្តស្វាយរៀង ដើម្បីប្តឹងជំទាស់សេចក្តីសម្រេចដែលបានលើកលែងរាល់ការចោទប្រកាន់ទាំងអស់ប្រឆាំងនឹងអតីតអភិបាលក្រុងបាវិត។
មន្ត្រីតុលាការបានលើកឡើងកាលពីថ្ងៃអង្គារថា ការចោទប្រកាន់ លោក ឈូក បណ្ឌិតអតីតអភិបាលក្រុងបាវិតពីបទបាញ់ប្រហារនឹងត្រូវបានលើកលែងថ្វីបើលោក ស ខេង រដ្ឋមន្ត្រីក្រសួងមហាផ្ទៃ បានកំណត់ថា លោកជាជនសង្ស័យដ៏សំខាន់មួយរូបនៅក្នុងករណីនេះ បន្ទាប់ពីការបាញ់ប្រហារលើកម្មការិនីចំនួនបីនាក់ក្តី។
លោក ជិន លីដា មេធាវីតំណាងជនរងគ្រោះទាំងបីនាក់ មានប្រសាសន៍ថា “ យើងបានដាក់ពាក្យបណ្តឹងទៅកាន់សាលាដំបូងខេត្តស្វាយរៀងរួចហើយ ដើម្បីប្តឹងទាស់នឹងការសម្រេចលើកលែងការចោទប្រកាន់លោក ឈូក បណ្ឌិត”។
លោក ទេព ផល្លា ក្រឡាបញ្ជីរបស់ចៅក្រមសើុបសួរ បានបញ្ជាក់ថា លោកបានទទួលពាក្យបណ្តឹងនេះហើយ កាលពីម្សិលមិញ។ ឥឡូវនេះ ជនសង្ស័យតែម្នាក់គត់នៅក្នុងករណីនេះ គឺជាលោក ស ចន្ថា នាយការិយាល័យនគរបាលព្រហ្មទណ្ឌក្រុងបាវិត ដែលកាលពីខែសីហា ត្រូវបានតុលាការចោទប្រកាន់ ដំណាលនឹងលោក ឈូក បណ្ឌិត ពីបទបង្ករបួសស្នាមដោយអចេតនា ពីបទបាញ់ប្រហារលើកម្មការិនីចំនួនបីនាក់ ដែលក្នុងនោះ មានម្នាក់បានទទួលរងរបួសធ្ងន់។
ជនរងគ្រោះ នុត សុខន អាយុ២៣ឆ្នាំ ដែលជាជនរងគ្រោះម្នាក់ក្នុងចំណោមជនរងគ្រោះទាំងបីនាក់ បាននិយាយកាលពីម្សិលមិញថា នាងពិតជាខឹងយ៉ាងខ្លាំងនៅពេលទទួលដំណឹងថា បទចោទប្រកាន់លោកឈូក បណ្ឌិត ត្រូវបានតុលាការលើកលែងថ្វីបើមានសាក្សីមួយចំនួនដែលអង្គការសិទ្ធិមនុស្សបានសម្ភាសនៅពេលនោះ ឆ្លើយថា ពិតជាបានឃើញលោក ឈូក បណ្ឌិត បាញ់កម្មការិនីទាំងបីនាក់មែន។
ជនរោងគ្រោះ សុខន និយាយបន្ថែមថា “ ខ្ញុំគិតថា សាលាដំបូងខេត្តស្វាយរៀង គឺមិនឯករាជ្យឡើយ ពីព្រោះពួកគេបានអនុញ្ញាតឲ្យលោករួចខ្លួនពីបទល្មើស លោកបាញ់ខ្ញុំ។
ខ្ញុំចង់ដាក់ពាក្យបណ្តឹងប្រឆាំង ឈូក បណ្ឌិត រហូតទាល់តែខ្ញុំទទួលបានយុត្តិធម៌ ហើយលោកត្រូវតែជាប់គុក”។ ថ្វីបើ លោក ឈូក បណ្ឌិត ត្រូវបានគេដកចេញពីតំណែងជាអភិបាលក្រុងបាវិត កាលពីខែមីនាក៏ដោយ ហើយបានផ្លាស់ឲ្យទៅធ្វើការនៅសាលាខេត្តក្តី លោក រស់ ផលរិទ្ធ អនុប្រធានរដ្ឋបាលសាលាខេត្តស្វាយរៀង បានមានប្រសាសន៍ថា លោក ឈូក បណ្ឌិត មិនដែលឃើញទៅធ្វើការឡើយ។
អង្គការសិទ្ធិមនុស្ស កាលពីម្សិលមិញបានរិះគន់យ៉ាងខ្លាំង ចំពោះការសម្រេចរបស់តុលាការ។ អង្គការសិទ្ធិមនុស្សអាដហុក បានលើកឡើងក្នុងសេចក្តីថ្លែងការណ៍មួយថាវាជាឧទាហរណ៍មួយទៀតបង្ហាញពី “វប្បធម៌និទណ្ឌភាព និងការមិនគោរពច្បាប់ ដែលធ្វើឲ្យប្រទេសកម្ពុជាមានផលលំបាក”។
សេចក្តីថ្លែងការណ៍ដដែលនេះបានលើកឡើងថា “ អ្នកមានទំនាក់ទំនងល្អជាមួយរដ្ឋាភិបាល អាចរួចខ្លួនពីបទល្មើសឧក្រិដ្ឋធ្ងន់ធ្ងររីឯប្រជាពលរដ្ឋក្រីក្រមិនដែលទទួលបានដំណោះស្រាយដ៏មានប្រសិទ្ធភាពឡើយ ហើយពួកគាត់ក៏លែងជឿលើប្រព័ន្ធតុលាការក្នុងប្រទេសកម្ពុជាទៀតដែរ”។
មជ្ឈមណ្ឌលសិទ្ធិមនុស្សកម្ពុជា ក៏បានអំពាវនាវឲ្យរោងចក្រផលិតស្បែកជើងកីឡាម៉ាក PUMA របស់ប្រទេសអាល្លឺម៉ង់ ឲ្យដករោងចក្រផលិតស្បែកជើងរបស់ខ្លួនចេញពីប្រទេសកម្ពុជាដែរ។
មជ្ឈមណ្ឌលសិទ្ធិមនុស្សកម្ពុជា បានលើកឡើងក្នុងសេចក្តីថ្លែងការណ៍ថា “ ជាអកុសលរោងចក្រស្បែកជើងកីឡាម៉ាក PUMA គ្មានជម្រើសផ្សេងនោះទេ ឥឡូវនេះ ក្រៅពីត្រូវដកខ្លួនចេញពីប្រទេសកម្ពុជាទាំងស្រុងនោះ។ បើពំុដូច្នោះទេ អ្នកប្រើប្រាស់នៅក្នុង
តំបន់អឺរ៉ុប នឹងមិនអត់ឱនឲ្យខ្លួនឡើយ ហើយម៉ាករបស់ខ្លួននឹងត្រូវគេចងចាំជាប់ជានិច្ចថា មានប្រឡាក់ឈាមកម្មការិនីទាំងនេះ”៕
ប្រែសម្រួលដោយ ស៊ា ស៊ុយឈាង