អ្នក​ការ​ទូតសហភាព​អឺរ៉ុប​គាំ​ទ្រ​ ដល់​បុគ្គលិក​អង្គការ ​អាដហុក​ ដែល​ត្រូវ​តុលាការចោទ​ប្រកាន់​

មន្ត្រី​ការ​ទូត​មក​ពី​ប្រទេស​ក្នុង​សហភាព​អឺរ៉ុប​ និង​តំណាង​គណៈ​ប្រតិភូ​សហភាព​អឺរ៉ុប​​ប្រចាំ​ប្រទេស​កម្ពុជា​ បាន​ជួប​ប្រជុំ​គ្នា​ជាមួយ​បុគ្គលិក​អង្គការ​សិទ្ធិ​មនុស្ស​អាដហុក នៅក​្នុងរាជ​ធានីភ្នំពេញ​ កាល​ពី​ថ្ងៃ​ពុធ ដើម្បី​ពិភាក្សា​ពីបទ​ល្មើស​ដែល​​តុលាការចោទ​ប្រកាន់​មក​លើ​លោក ចាន់ សុវេ៉ត អ្នក​ស៊ើប​អង្កេត​បញ្ហា​រំលោភសិទ្ធិមនុស្សរបស់​អង្គការ​​នេះ។

ដើម្បីសម្តែងការ​គាំ​ទ្រចំពោះលោក ចាន់ សុវ៉េត មន្ត្រី​ស្ថាន​ទូត​របស់ប្រទេស​ដាណឺម៉ាក បារាំង​ ស៊ុយអ៊ែត និងប្រទេស​អង់គ្លេស​ បាន​ថត​រូប​កៀក​ស្មា​គ្នា​ជាមួយ​បុគ្គលិក​អង្គការ​អាដហុក​ជាន់​ខ្ពស់​រួម​ទាំង​លោក សុវ៉េត ផង​ដែរ​ រួចហើយបាន​ចែក​ចាយ​ជាសាធារណៈ អំពីកិច្ច​ប្រជុំ​នោះ​។

នៅ​ក្នុង​សេចក្ដី​ថ្លែង​ការ​ណ៍​មួយ​ ដែល​មាន​ភ្ជាប់រូប​ថត​លោក ចាន់ សុវ៉េត មិន​បាន​បញ្ជាក់ឲ្យបានច្បាស់លាស់​ អំពី​​លទ្ធផល​នៃ​ការ​ពិភាក្សារបស់អ្នកការទូត​ជាមួយ​អង្គការ​អាដហុក​ ដែល​ទទួល​បាន​មូលនិធិ​ចំនួន​២,៦​លាន​ដុល្លារ​ពី​សហភាព​អឺរ៉ុប​សម្រាប់​គម្រោង​​ការ​ពារ​សិទ្ធិ​មនុស្ស​នៅក្នុង​ប្រទេស​កម្ពុជា​ ចាប់​តាំង​ពី​ឆ្នាំ​២០០៥​មក​។

សេចក្ដី​ថ្លែង​ការណ៍​នោះ​​លើក​ឡើង​ថា  “ ​នៅ​ក្នុង​ឱកាសនេះ អ្នក​ការទូត បាន​ជួប​ប្រជុំ​​ជាមួយ​បុគ្គលិក​អង្គការ​អាដហុក​ រួម​ទាំង​លោក ចាន់ សុវ៉េត ដែល​ត្រូវ​បាន​តុលាការ​កោះហៅ​ឲ្យចូលខ្លួន​ទៅបំភ្លឺនៅចំពោះមុខ​ចៅក្រម​ស៊ើប​សួរ​ នៅ​ថ្ងៃ​ទី​២៤ ខែ​ធ្នូ​ នៅ​ម៉ោង​២ និង​៣០​នាទី​រសៀល​។ អង្គការ​អាដហុក​ សូមបញ្ជាក់ជាថ្មីម្តងទៀតថា ​ខ្លួន​តែង​តែធ្វើ​សកម្មភាព​​ស៊ើប​អង្កេត​អំពី​បញ្ហា​រំលោភ​សិទ្ធិ​មនុស្ស​ បើក​វគ្គបណ្តុបណ្តាល និង​ផ្ដល់​ជំនួយ​ដល់ប្រជាពលរដ្ឋ និងដល់​សហគមន៍ ​ដែល​ទទួល​រង​គ្រោះដោយ​ការ​រំលោភ​យកដី​ធ្លី​ និង​បញ្ហា​វិវាទ​ផ្សេងទៀត​ ដោយស្របតាម​ច្បាប់​”។

លោក ចាន់ សុវ៉េត ​នឹងចូល​បំភ្លឺ​ដល់​តុលាការ​នៅថ្ងៃ​ច័ន្ទ​ ពី​បទ​សង្ស័យ​ថា លោក​បាន​ជួយ​ជន​ល្មើស​ម្នាក់ ​ទាក់​ទង​នឹង​ចលនា​អបគមន៍​ នៅ​ភូមិ​ប្រម៉ា ក្នុងខេត្ត​ក្រចេះ​ កាល​ពី​ខែ​ឧសភា។

នៅ​ខណៈ​ពេល​ដែល​រដ្ឋាភិបាល​បាន​ចាត់ទុកឧបទ្ទវហេតុ​នោះ​ថា ជា​ការសកម្ម​ភាព​បះបោរ ដើម្បី​បំបែក​រដ្ឋ​ ដែល​ក្រុមអង្គការ​សិទ្ធិ​មនុស្ស​នានា ចាត់ទុក​សកម្ម​ភាព​របស់ប្រជាពលរដ្ឋនាពេល​នោះ​ថា ជា​ការ​ព្យាយាម​ ដើម្បី​ការពារ​ដី​របស់​ខ្លួន កុំឲ្យ​ក្រុមហ៊ុន​ចម្ការ​កៅស៊ូ​ឯក​ជន​មួយយកបាន​។

អំពើ​ហិង្សា​ដែល​បាន​កើត​ឡើង​នៅ​ក្នុង​ព្រឹត្តិការនោះ​ ដែល​បណ្ដាល​ឲ្យ​ក្មេង​ស្រី​ម្នាក់​អាយុ​១៤​ឆ្នាំម្នាក់ស្លាប់ ដោយសារ​គ្រាប់កំាភ្លើងរបស់នគរបាល​ ឬ​កង​រាជ​អាវុធ​ហត្ថ​ មុលពេលចាប់ផ្តើមបណ្តេញ​អ្នក​ភូមិ​ប្រម៉ា។

អាជ្ញាធរ​មិន​បាន​​ស៊ើប​អង្កេត​ចំពោះ​ការ​ស្លាប់​របស់​ក្មេង​ស្រី​នោះ​ទេ​។ ប៉ុន្ដែ លោក ម៉ម សូណង់ដូ ម្ចាស់​ស្ថានីយ​វិទ្យុ​សម្បុកឃ្មុំ​ត្រូវ​បានតុលាការ​ផ្តន្ទា​ទោស​ឲ្យជាប់​ពន្ធនាគារ​រយៈ​ពេល​២០​ឆ្នាំ​ កាល​ពី​ខែ​តុលា​ បន្ទាប់​ពី​តុលាការ​ បាន​រក​ឃើញ​ថា លោក​មាន​ពិរុទ្ធ​ភាព​ពី​បទ​ជួយ​បង្កើត​ចលនា​អបគមន៍​នោះ​។ នៅ​ពេលហេតុ​ិការណ៍​នោះ​បាន​កើត​ឡើង លោក សូណង់ដូ មិន​បាន​នៅ​ក្នុង​ប្រទេស​ទេ​​។

លោក ប៊ុន រដ្ឋា ដែលតុលាការ​ចោទថា​ជា​មេដឹក​នាំ​ចលនា​អបគមន៍​ត្រូវ​បាន​ផ្តន្ទា​ទោស​ឲ្យ​ជាប់​ទោស​​​រយៈ​ពេល​៣០​ឆ្នាំ​ ដោយកំបាំង​មុខ ប៉ុន្ដែ បច្ចុប្បន្ន​នេះ​លោក​កំពុង​លាក់​ខ្លួន​នៅ​ក្រៅ​ប្រទេស​។

ប្រសិន​បើ​តុលាការ​រក​ឃើញ​ពិរុទ្ធភាព​ដូចការចោទ​ប្រកាន់​ថា បាន​ជួយ​ជន​ល្មើស​មែននោះ​លោក​ ចាន់ សុវ៉េត អាច​មានទោស​ជាប់​ពន្ធនាគារ​រហូត​ដល់​បី​ឆ្នាំ​។

លោក សុវ៉េត បានមាន​ប្រសាសន៍​កាល​ពី​ម្សិលមិញ​ថា ​​អ្នក​ការ​ទូត​​​ ក៏​បាន​ពិភាក្សា​អំពី​បទ​ល្មើស ​ដែលតុលាការ​កំពុងចោទ​ប្រកាន់​មកលើបុគ្គលិក​ និង​មន្ត្រីជាន់​ខ្ពស់របស់អង្គការ​អាដហុក​ផ្សេងៗ​ទៀត​ផង​ដែរ​។

លោក សុវ៉េត មាន​ប្រសាសន៍​បន្ដ​ថា “​អ្នក​ការ​ទូត​ទាំង​នោះ​បាន​លើក​ឡើង​ពី​ការព្រួយបារម្ភ ជំវិញ​ពាក្យ​បណ្ដឹង​ប្រឆាំង​នឹង​អ្នក​ការ​ពារ​សិទ្ធិ​មនុស្ស​របស់អង្គការ​អាដហុក​ ដូច​ជា​ករណី​​លោក បែ៉ន ប៊ុណ្ណារ៍ លោក ឆាយ ធី លោក សំ ចាន់គា និង​ការចោទប្រកាន់មកលើ​រូប​ខ្ញុំ​ផងដែរ”។

លោក​មាន​ប្រសាសន៍​បន្ដ​ទៀត​ថា “​បន្ទាប់​ពី​ការ​ប្រជុំរួច​ យើង​ក៏​បាន​លើក​ឡើង អំ​ពី​ការព្រួយបារម្ភ​ចំពោះបទល្មើស ដែលបានចោទ​ប្រកាន់​មកលើរូបខ្ញុំ ហើយ​ខ្លាចតុលាការ​ឃុំ​ខ្លួន​ខ្ញុំ​។ យើង​បាន​ស្នើ​ឲ្យ​មន្ត្រីការ​ទូត​ទាំង​នោះ​ជួយ​ធ្វើ​អន្ដរាគមន៍​ ដើម្បីឲ្យ​មាន​ការ​គោរព​សិទ្ធិ​មនុស្ស​ គោរព​ច្បាប់​ និង​ជួយការ​ពារកុំឲ្យគេប្តឹង​អ្នក​ការ​ពារ​សិទ្ធិ​មនុស្ស​ និង​អ្នក​កាសែត​”។

អ្នក​ការទូត​នឹងទៅ​សាលាដំបូង​រាជធានី នៅ​ថ្ងៃ​ច័ន្ទ​ផងដែរ​ ដើម្បី​ចូលរួម​ស្ដាប់​ចៅ​ក្រម​ស៊ើបសួរ​។

លោក ប៉ែន ប៊ុណ្ណារ៍ និង​លោក ឆាយ ធី ត្រូវ​បាន​សាលា​ដំបូង​ខេត្តរតនគិរីចោទ​ប្រកាន់​ពី​បទ​ញុះ​ញង់អ្នក​ភូមិ​ជន​ជាតិ​ភាគ​តិច​ទំពួន​ ប្រើអំពើហឹង្សា​ក្នុងការតវ៉ា​ប្រឆាំង​នឹងក្រុមហ៊ុន​ចម្ការ​កៅស៊ូ​ឯកជន​មួយ​។ លោក សំ ចាន់គា អ្នក​សម្រប​សម្រួល​របស់អង្គការ​អាដហុក​ប្រចាំ​ខេត្ត​កំពង់​ឆ្នាំង​ ត្រូវ​បាន​តុលាការចោទ​ប្រកាន់​ពី​បទ​បរិហារកេរ្ដិ៍​ក្នុងរឿងក្តីមួយ​ជាប់​ពាក់​ព័ន្ធ​ជាមួយ​ក្រុមហ៊ុនកសិឧស្សាហកម្ម​ ដែល​គ្រប់​គ្រង​ដោយ​លោក​ស្រី​ ជា ខេង ភរិយា​របស់​លោក​ ស៊ុយ សែម រដ្ឋ​មន្ត្រីឧស្សាហកម្ម​ រ៉ែ និង​ថាមពល​។

ក្រុមមន្ត្រី​ការ​ទូត ​ដែល​បាន​ចូល​រួម​ក្នុង​កិច្ច​ប្រជុំ​ នៅ​ឯ​ការិយាល័យ​អង្គការ​អាដហុក​អាច​និយាយ​បាន​ថា ពួក​គេ​នឹង​តាម​ឃ្លាំ​មើល​សំណុំរឿង​របស់​លោក សុវ៉េត។

លោក ម៉ៃឃឺល អេងគីស (Michael Engguist) ទី​ប្រឹក្សា​គម្រោងអភិបាល​កិច្ច​ល្អ​ និង​កិច្ចការសិទ្ធិ​មនុស្ស​ប្រចាំ​ស្ថាន​ទូត​ដាណឺម៉ាក មាន​ប្រសាសន៍​ថា “​យើង​បានដឹងព័ត៌មាន​អំពី​ករណី​នេះហើយ​។ យើង​នឹង​តាម​ឃ្លាំ​មើល​ការ​ប្រែប្រួលក្នុង​រឿងនេះ​”។

លោក​ អាណេត ដាលស្ត្រម (Anette Dalstrom) លេខាទី១​របស់​ស្ថាន​ទូត​ស៊ុយអ៊ែត​​ មាន​ប្រសាសន៍​ថា “​យើង​នឹង​ឃ្លាំ​មើល​យ៉ាង​យក​ចិត្ត​ទុក​ដាក់បំផុត​”។

លោក នីកូឡាស់ បូឌូអុីន (Nicolas Baudouin) លេខាទី១​របស់​ស្ថាន​ទូត​បារាំង​ និង​លោក​ លីស្លី សាន់ឌឺសុន (Lesley Saunderson) ភារធារី​របស់​ស្ថាន​ទូត​អង់គ្លេស​ ដែល​មាន​វត្ត​មាន​ក្នុង​កិច្ច​ប្រជុំ​នោះដែរ​ បាន​បដិសេធ​មិន​ធ្វើ​អត្ថាធិប្បាយ​ឡើយ។

កាលពី​ខែ​តុលា សភា​សហភាព​អឺរ៉ុប​បាន​អនុម័ត​​សេចក្តីសម្រេចមួយ​ ដោយ​ចោទ​ប្រកាន់​ប្រទេស​កម្ពុជា​ថា រំលោភ​សិទ្ធិ​មនុស្ស។ កាល​ពី​ដើម​ខែនេះ ​ឯកអគ្គ​រដ្ឋ​ទូត​សហភាព​អឺរ៉ុប​ប្រចាំ​​ប្រទេស​កម្ពុជា​ លោក ហ្សង់ ហ្វ្រង់ស្វ័រ កូតាំង (Jean-Francois Cautain) បាន​ផ្ដល់​យោបល់​ឲ្យ​រដ្ឋាភិបាលធ្វើតាម​អនុសាសន៍​​​​របស់​លោក សុរិយា ស៊ូបេឌី ប្រេសិត​ពិសេស​អង្គការ​សហប្រជាជាតិ​ទទួល​បន្ទុក​សិទ្ធិ​មនុស្ស​ប្រចាំ​ប្រទេស​កម្ពុជា​ ដើម្បីពង្រឹង និង​ការ​ពារ​សិទ្ធិ​មនុស្ស​ឲ្យបានល្អថែម​ទៀត​៕

ប្រែសម្រួលដោយ ឃិន ណៃ

© 2012 – 2014, ខេមបូឌា ដេលី. All rights reserved. No part of this article may be reproduced in print, electronically, broadcast, rewritten or redistributed without written permission.