ធនាគារពិភពលោក បដិសេធមិនលើកឡើងថា តើខ្លួននឹងបន្ដផ្ដល់ជំនួយហិរញ្ញវត្ថុដល់ប្រទេសកម្ពុជាទៀត ឬក៏អត់នោះទេ ថ្វីបើមន្ត្រីធនាគារពិភពលោកម្នាក់ បានប្រាប់អ្នកតវ៉ាប្រឆាំងការបណ្ដេញចេញ កាលពីសប្ដាហ៍មុនថា ធនាគារពិភពលោកគ្រោងនឹងបន្ដផ្ដល់ជំនួយហិរញ្ញវត្ថុដល់ប្រទេសកម្ពុជានៅឆ្នាំក្រោយក្ដី។
កាលពីខែសីហាឆ្នាំ២០១១លោក អេននីតេឌិកសុន (Annette Dixon) នាយកធនាគារពិភពលោកប្រចាំអាស៊ីអាគ្នេយ៍ មានប្រសាសន៍ថា ការផ្ដល់ប្រាក់កម្ចីថ្មីទៅឲ្យរដ្ឋាភិបាល ត្រូវបានផ្អាកចាប់តាំងពីខែធ្នូឆ្នាំ២០១០មកម្លេ៉ះហើយនឹងមិនបន្ដទៀតឡើយ រហូតទាល់តែមានការឯកភាពគ្នាជាមួយអ្នកភូមិសហគមន៍បឹងកក់។
ការផ្អាកមូលនិធិនេះ ត្រូវបានធ្វើឡើង បន្ទាប់ពីមានការត្រួតពិនិត្យឡើងវិញរបស់ក្រុមជំនាញខាងផ្នែកត្រួតពិនិត្យនៃធនាគារពិភពលោកដែលបានរកឃើញថាការផ្ដល់ប័ណ្ណកម្មសិទ្ធិដីធ្លីរបស់រដ្ឋាភិបាល ដែលជាគម្រោងមួយឧបត្ថម្ភដោយធនាគារពិភពលោក បានធ្វើឲ្យអ្នកភូមិសហគមន៍បឹងកក់បាត់បង់សិទ្ធិកាន់កាប់ដីធ្លីរបស់ខ្លួន និងនាំឲ្យមានការបណ្ដេញចេញទ្រង់ទ្រាយធំ។
តំណាងចំនួនប្រាំពីររូបរបស់សហគមន៍បឹងកក់ បានជួបជាមួយលោក អាឡាស់សានេ សូ (Alassane Sow) អ្នកគ្រប់គ្រងប្រចាំប្រទេសរបស់ធនាគារពិភពលោកកាលពីថ្ងៃព្រហស្បតិ៍ ក្នុងរាជធានីភ្នំពេញ ហើយលោកបានរាយការណ៍ថា លោកបានប្រាប់អ្នកតំណាងទាំងនោះថាធនាគារពិភពលោកមានគម្រោងចាប់ផ្ដើមផ្ដល់ប្រាក់កម្ចីថ្មីឲ្យប្រទេសកម្ពុជា។
អ្នកស្រីទេពវន្នីតំណាងសហគមន៍បឹងកក់បានលើកឡើងថាសំណុំរឿងនៅបឹងកក់នៅមិនទាន់ដោះស្រាយនៅឡើយទេ ហេតុដូច្នេះហើយធនាគារពិភពលោកមិនគួរបន្ដផ្ដល់ជំនួយហិរញ្ញវត្ថុរបស់ខ្លួនទៅឲ្យរដ្ឋាភិបាលឡើយ។
អ្នកស្រីបាននិយាយថា “ យើងនឹងតវ៉ាប្រសិនបើធនាគារពិភពលោកផ្ដល់ប្រាក់កម្ចីទៅឲ្យរដ្ឋាភិបាលដោយស្ងាត់ៗនោះ។ជំនួយពីធនាគារពិភពលោកបានបង្ខំឲ្យគ្រួសារជាច្រើននៅសហគមន៍បឹងកក់ត្រូវចាកចេញពីផ្ទះសំបែងរបស់ខ្លួន”។
នៅក្នុងការឆ្លើយតបទៅនឹងសំណួរអំពីកិច្ចប្រជុំ និងការបន្ដផ្ដល់ជំនួយហិរញ្ញវត្ថុទៅឲ្យរដ្ឋាភិបាលរបស់ធនាគារពិភពលោក លោក ប៊ូ សារឿន មន្ត្រីទំនាក់ទំនងរបស់ធនាគារពិភពលោក បានប្រាប់ឲ្យអ្នកយកព័ត៌មានមើលព័ត៌មាននៅក្នុងគេហទំព័ររបស់ធនាគារពិភពលោក ដែលលោកបានលើកឡើងថា ព័ត៌មាននៅក្នុងគេហទំព័រនោះបង្ហាញពីគោលជំហររបស់ធនាគារពិភពលោក។
នៅក្នុងមតិមួយ ដែលគេបង្ហោះនៅលើគេហទំព័រធនាគារពិភពលោក កាលពីថ្ងៃទី៧ខែធ្នូប៉ាមេឡាខក (Pamela Cox) អនុប្រធានធនាគារពិភពលោកប្រចាំតំបន់អាស៊ីបូពា៌ និងប៉ាស៊ីហ្វិកមិនបាននិយាយអ្វីពីការផ្អាកផ្ដល់ជំនួយហិរញ្ញវត្ថុទៅឲ្យរដ្ឋាភិបាលឡើយ ប៉ុន្ដែបានមានប្រសាសន៍ថា ធនាគារពិភពលោកអាច ត្រៀមខ្លួនជួយជំរុញ និងប្រាប់ឲ្យកម្ពុជាប្រឹងប្រែងសម្រេចឲ្យបាននូវគោលដៅអភិវឌ្ឍន៍របស់ខ្លួន។
តំណាងសហគមន៍បឹងកក់ ដែលបានជួបជាមួយលោក អាឡាស់សានេ សូកាលពីថ្ងៃព្រហស្បតិ៍ បានលើកឡើងថាអ្នកគ្រប់គ្រងប្រចាំប្រទេសរបស់ធនាគារពិភពលោកបានប្រាប់ពួកគេថារដ្ឋាភិបាលបានផ្ដល់ការធានាដល់ធនាគារពិភពលោកថា អ្នកភូមិសហគមន៍បឹងកក់ទាំងអស់ ត្រូវបានផ្តល់ប្រាក់សំណងសម្រាប់ការណ្ដេញចេញរួចហើយ។
ប៉ុន្ដែអ្នកភូមិសហគមន៍បឹងកក់ និងអង្គការសិទ្ធិមនុស្សលើកឡើងថា អ្នកភូមិប្រហែល៦០គ្រួសារ នៅមិនទាន់ទទួលបានប្រាក់សំណង ឬក៏ប័ណ្ណកម្មសិទ្ធិដីធ្លីនៅឡើយទេ នៅក្នុងចំណោមអ្នកភូមិប្រហែល៣.៥០០គ្រួសារ ដែលត្រូវបានគេបណ្ដេញចេញដោយបង្ខំពីបឹងកក់ ដើម្បីបើកផ្លូវសម្រាប់ក្រុមហ៊៊ុនសំណង់មួយ ដែលគ្រប់គ្រងដោយសមាជិកព្រឹទ្ធសភាមួយរូបមកពីគណបក្សកាន់អំណាច គឺគណបក្សប្រជាជនកម្ពុជារបស់លោកនាយករដ្ឋមន្ត្រីហ៊ុនសែន។
លោកដេវីដប្រេដ (David Pred) មន្ត្រីគ្រប់គ្រងនៅអង្គការ Inclusive Developent International បានមានប្រសាសន៍អំពីការឆ្លើយតបមិនច្បាស់លាស់ទាក់ទិននឹងការបន្ដផ្ដល់ជំនួយហិរញ្ញវត្ថុទៅឲ្យរដ្ឋាភិបាលរបស់ធនាគារពិភពលោកថា “ រឿងនេះមិនពាក់ព័ន្ធនឹងជម្លោះដីធ្លីទាំងមូលនោះទេ”។
លោកបានមានប្រសាសន៍ថា “ វាពាក់ព័ន្ធនឹងគោលនយោបាយគាំពាររបស់ធានាគារពិភពលោក និងកាតព្វកិច្ចរបស់រដ្ឋាភិបាលកម្ពុជាក្នុងការគោរពតាមគោលនយោបាយទាំងនេះ”។
លោកដេវីដប្រេដបានបន្ថែមថាលោកជីមយ៉ុងគីម (Jim Yong Kim) ដែលជាអ្នកជំនួសតំណែងរបស់លោក រ៉ូបឺតហ្សូអេលិក (Robert Zoellick) កាលពីខែកក្កដាគួរតែបន្ដជំហរ របស់ធនាគារពិភពលោក មកលើប្រទេសកម្ពុជា៕
ប្រែសម្រួលដោយស៊ាស៊ុយឈាង