29 C
Phnom Penh

ប៊ន សំណាង និង សុខ សំអឿន ត្រូវ​ផ្ដន្ទា​ទោស​ជា​ថ្មី​ឡើង​វិញ​ ពី​បទ​បាញ់​សម្លាប់​លោក ជា វិជ្ជា

ដោយ ឌឹ ខេមបូឌា ដេលី

បទវិភាគ

កាល​ពី​ម្សិលមិញ​ សាលាឧទ្ធរណ៍​បាន​ផ្ដន្ទា​ទោស​បុរស​ពីរ​នាក់​ឡើង​វិញឲ្យ​ជាប់​ពន្ធនា​​​គារ​​​​ម្នាក់​ៗរយៈ​ពេល២០ឆ្នាំ​​​ ​​​ដែល​មជ្ឈដ្ឋាន​ទូទៅ​ជឿ​​​ថាត្រូវ​បាន​គេ​ទម្លាក់​កំហុស​ចំពោះ​ការ​​សម្លាប់​​លោកជាវិជ្ជាមេ​ដឹ​ក​នាំ​សហជីព​សេរី​កម្មករ​​​​។ ​ប្អូន​​ប្រុស​ជន​រង​គ្រោះ​​លើក​ឡើង​ថាសាលក្រម​នេះ​ ពិត​ជា​អយុត្តិធម៌​ណាស់​។

សេចក្ដី​សម្រេច​ដែល​អន្ដរជាតិ​បាន​រិះ​គន់​យ៉ាង​ខ្លាំង​ចំពោះ​ការ​ផ្ដន្ទាទោស​​​ពួក​គេ​លើក​ដំបូង​​ និង​​សេចក្ដី​សម្រេច​របស់​តុលាការ​កំពូល​ កាល​ពី​ឆ្នាំ​២០០៨ដែល​​ស្នើ​​ឲ្យ​សំណុំ​រឿង​ប្រឆាំង​នឹង​បុរស​ទាំង​ពី​រនាក់​នេះ​ ត្រូវ​ផ្អាក​ និង​ត្រូវ​ស៊ើប​អង្កេត​ឡើង​វិញ​ ដោយ​សារតែ​ខ្វះ​ភ័ស្ដុតាង​​នោះ​​ គឺ​ជា​ទីបញ្ចប់​នៃ​​ការ​បើក​សវនាការ​ឡើង​វិញ​​នៅ​​សាលា​ឧទ្ធរណ៍កាល​ពី​ថ្ងៃ​ទី​៧ខែ​វិច្ឆិកា​ ប៉ុន្ដែ​ គ្មាន​ភ័ស្ដុតាង​ថ្មី​ណា​មួយ​ត្រូវ​បាន​បង្ហាញ​នោះ​ទេ។

ប៊ន សំណាង អាយុ៣១ឆ្នាំ និង​ សុខសំអឿនអាយុ៤៤ឆ្នាំបាន​ស្រែក​ទ្រហោ​យំ​ នៅ​ពេល​គេ​នាំ​ពួក​គេ​ទាំង​ពី​រ​នាក់​ ចេញ​ពី​បន្ទប់​សវនាការ​​។ លោក ជួន ស៊ុនឡេងប្រធាន​ក្រុមប្រឹក្សា​ជំនុំ​ជម្រះ​បាន​ផ្ដន្ទាទោស​ និងបង្គាប់​ឲ្យ​​គេ​ចាប់​ខ្លួន​បុរស​ទាំង​ពីរ​នាក់​នេះ​ឡើង​វិញ ពី​បទ​បាញ់​​សម្លាប់​​លោក​ ជាវិជ្ជាខណៈ​លោក​កំពុង​អាន​កាសែត​នៅ​ខាង​ក្រៅ​វត្ត​លង្កា ក្នុង​ខណ្ឌ​ចំការ​មន​ រាជ​ធានី​ភ្នំពេញ កាល​ពី​ថ្ងៃ​ទី​២២ ខែមករាឆ្នាំ​២០០៤។

លោក​ចៅ​ក្រម ជួនស៊ុនឡេងបាន​មាន​ប្រសាសន៍​​ទៅ​កាន់​ប្អូន​​ប្រុស​របស់​មេដឹក​នាំ​សហជីព​សេរីកម្មករ​ ដែល​​ត្រូវបាន​​គេ​បាញ់​ សម្លាប់​រូប​នេះ​ថា “ តុលាការ​បាន​ផ្ដន្ទាទោស​ ប៊នសំណាងនិង​ សុខសំអឿនឲ្យ​ជាប់​ពន្ធនា​គារ​ម្នាក់​ៗ​២០​ឆ្នាំហើយ​​បង្គាប់​ឲ្យ​ពួក​គេ​​សង​ជំងឺ​ចិត្ត​​​៤០​លាន​រៀល​ទៅ​ឲ្យ​​លោកជាមុនី្ន”។ លោក​បាន​បន្ដ​ថា “ តុលាការ​បាន​ចេញ​សេចក្ដី​បង្គាប់​ឲ្យ​ឃុំ​ខ្លួនប៊នសំណាងនិង​ សុខសំអឿនពី​បទ​ឃាតកម្ម​​​គ្រោង​ទុក​ជាមុន”។

បុរស​ទាំង​ពីរ​នាក់​នេះបាន​លើក​ដៃ​សំពះ​នៅ​ពេល​គេ​នាំ​ពួកគេ​ទាំង​ពីរ​ចេញ​ពី​តុលា​ការ​ និង​នាំ​ចូល​ទៅ​ក្នុង​រថយន្ដ​ ដែល​កំពុង​តែ​រង់ចាំ​ មុន​ពេល​ត្រូវ​បាន​បញ្ជូន​ទៅ​កាន់​ពន្ធនាគារ​ព្រៃស។ ប៊នសំណាងបាន​ស្រែក​ទាំង​ទឹក​ភ្នែក​ថា “ ​វា​ពិតជា​អយុត្តិធម៌​ណាស់​ ខ្ញុំ​ទូល​ថ្វាយ​ព្រះ​មហាក្សត្រ​ឲ្យ​ជួយ​ខ្ញុំ​ផង​។ខ្ញុំ​មិន​មែន​ជា​ឃាត​ករ​ទេ​ ប៉ុន្ដែគេ​បាន​ចាប់​ខ្ញុំ​ម្ដង​ទៀត​ហើយ​”។

សុខសំអឿនក៏​បាន​ស្នើ​​សុំ​​ឲ្យ​មាន​​យុត្តិធម៌​ដែរ ចំណែក​ប្រពន្ធ​របស់​គាត់​ព​​​​កូនស្រី​អាយុ​២​ឆ្នាំ​ដើរ​យំ​នៅ​ពី​ក្រោយ​គាត់​​​។ សុខសំអឿនបាន​​ស្រែក​​យំ​ថា “ វា​ពិត​ជា​​អយុត្តិធម៌​ណាស់​ ពី​ព្រោះ​ខ្ញុំ​មិន​បាន​ដឹង​អ្វី​ទាល់​តែ​សោះ​អំពី​​រឿង​នេះ​”។ ប៉ុន្ដែ វា​មិន​ដូច​ជា​ហេតុ​ការ​ណ៍​នៅខាង​ក្រៅ​សាលាដំបូង​រាជ​ធានី​ភ្នំពេញ កាល​ពី​ម្សិលមិញ ដែល​​​សកម្មជន​មក​ពី​សហគមន៍​បឹង​កក់​ត្រូវ​បាន​ផ្ដន្ទាទោស​ឲ្យ​ជាប់​ពន្ធនាគារ​រយៈ​ពេល​បីឆ្នាំនោះ​ មនុស្ស​​ទាំង​អស់​​ស្ងៀម​ស្ងាត់​​នៅក្នុង​បរិវេណ​​សាលាឧទ្ធរណ៍​។ ក្នុង​ចំណោម​មនុស្ស​មួយ​ចំនួន​ដែល​ដើរ​ចុះ​ដើរ​ឡើង​នោះគឺ​លោកអំសំអាតអ្នក​គ្រប់​គ្រង​បច្ចេកទេស​នៅ​អង្គការ​សិទ្ធិ​មនុស្ស​លីកាដូ​ ​បាន​លើក​ឡើង​ថាសាលក្រម​នេះ​ គឺ​មិន​អាច​ទទួល​យក​បាន​នោះ​ទេ​។

លោក​បាន​មាន​ប្រសាសន៍​ថា “ ខ្ញុំ​គិតថាគេ​​មិន​អាច​រក​ឃើញ​ឃាតករពិត​​ឃើញ​នោះ​ទេ​ ពីព្រោះ​ឃាតករ​ក្លែង​ក្លាយ​ឥឡូវ​នេះ​ក្លាយ​​ជា​មនុស្ស​ជាប់​ទោស​ទៅហើយ​”។

កាល​ពី​ថ្ងៃ​ទី​១៩ខែ​មីនាឆ្នាំ​២០០៤ ​លោកហីុងធីរិទ្ធចៅក្រម​ស៊ើប​អង្កេត​​សាលាដំបូង​រាជធានី​ភ្នំពេញ​ បាន​ច្រាន​ចោល​សំណុំ​រឿង​ប្រឆាំង​​ ប៊នសំណាងនិង​ សុខសំអឿនដោយ​​លើក​ឡើង​ថា ខ្វះ​ភ័ស្ដុតាង​។ ប៉ុន្ដែ លោក​ចៅ​ក្រម​ ហ៊ីងធីរិទ្ធត្រូវ​បាន​ដក​ចេញ​ពី​តំណែងប្រាំ​ថ្ងៃ​ក្រោយ​មក​ ហើយ​ត្រូវ​បាន​ផ្ទេរ​ទៅ​កាន់​សាលាដំបូង​ខេត្ត​ស្ទឹង​ត្រែង​វិញ។

កាល​ពី​ថ្ងៃ​ទី​១ខែមិថុនាឆ្នាំ២០០៤លោកធូ​ មណីចៅក្រម​សាលាឧទ្ធរណ៍​បាន​ច្រាន​ចោល​​សេចក្ដី​សម្រេច​របស់​ចៅក្រមហ៊ីងធីរិទ្ធ ហើយ​​បាន​​ចេញ​ដី​​កា​បង្គាប់​​ឲ្យ​ធ្វើ​ការ​ចោទ​ប្រកាន់​ពីបទ​ធ្វើឃាត​ប្រឆាំង​ ប៊នសំណាងនិង​ សុខសំអឿន ​ឡើង​វិញ​។

ប៊នសំណាងនិង​ សុខសំអឿនត្រូវ​សាលា​ដំបូង​រាជ​ធានី​ភ្នំពេញ​ផ្ដន្ទាទោស​ កាល​ពីខែ​សីហាឆ្នាំ២០០៥ពី​បទ​ធ្វើ​ឃាត​លោកជាវិជ្ជា ​ឲ្យ​ជាប់​ពន្ធនាគារ​ម្នាក់​ៗ​២០​ឆ្នាំនៅក្នុង​​​ករណី​​​ប្រឌិត​​​មួយ​​​ ដែល​​​បង្កើត​​​ឡើង​​​ដោយ​​​ការ​​​ស៊ើប​​​អង្កេត​​​របស់​​​នគរបាល​​​ ដែល​​​ដឹក​​​នាំ​ដោយ​​​លោក ហេង ពៅ អតីតស្នង​​​ការ​​​នគរ​បាល​​​រាជធានី​​​ភ្នំពេញ​​​។ ក្រោយ​​​មក ​​​លោក ​ហេង ពៅ​​​ ត្រូវ​​​បាន​​​ដំឡើង​​​ឋានៈទៅ​​​ជា​​​ទី​​​ប្រឹក្សា​​​​​​របស់​​​លោក​​​នាយក​​​រដ្ឋមន្ត្រី ​ហ៊ុន ​សែន​និង​​​ជា​​​អនុរដ្ឋលេខា​​​ធិការ​​​ក្រសួង​​​មហាផ្ទៃ​​​​​​​​​។

ទោះ​​​ជា​​​យ៉ាងណា​​​ លោក ហេង ពៅ បាន​​​ទទួល​​​រង​​​ការ​​​ឈឺ​​​ចាប់ ដោយសារ​​​តែ​​​បាត់​​​បង់​​​អំណាច​​​របស់​​​ខ្លួន​​​ ព្រោះតែ​​​​​​ជាប់​​​​​​ពាក់​​​ព័ន្ធ​​​ទៅ​​​នឹង​​​បញ្ហា​​​នយោបាយ នៅ​​​ក​​្នុង​​​ប្រទេស​​​កម្ពុជា​​ហើយ​​​ឥឡូវ​​​នេះ កំពុង​​​តែ​​​ជាប់​​​ពន្ធនាគារ​​​រយៈ​​​ពេលជាង​​​​​​១០០​​​ឆ្នាំ​​​ ពីបទ​​​ប្រព្រឹត្ត​​​បទ​​​ឧក្រិដ្ឋ​​​មួយ​​​ចំនួន​​​ រួម​​​ទាំង​​​ការ​​​ធ្វើ​​​ឃាត​ចៅក្រមសាលា​ដំបូង​​​រាជធានី​​​ភ្នំពេញ​​​ម្នាក់​​​ផង​​​ដែរ​​​។

កាល​​​ពី​​​ខែ​​​សីហា ឆ្នាំ​​​២០០៦ ទស្សនាវដ្ដី​​​ ឡិចប្រេស (L’Express) ប្រចាំ​​​សប្ដាហ៍​​​របស់​​​ប្រទេស​​​បារាំង​​​ បាន​​​ចេញ​​​ផ្សាយ​​​​បទ​​​សម្ភាស​​​មួយ​​​ជាមួយ​​​លោក​​​ ហេង ពៅ អំឡុង​​​ពេល​​​លោក​​​ជាជន​​​​​​ភៀស​​​ខ្លួន​​​មួយ​​​រូប​​​នៅ​​​​​​ប្រទេស​​​​សិង្ហបុរី​​​ ដោយ​​​ពេល​​​នោះ​​​លោក​​​​​អះអាង​​​ថា ​លោក ហុក ឡងឌី អគ្គស្នង​​​ការ​​​នគរបាល​​​ជាតិ​​​បាន​​​ចេញ​​​បទ​​​បញ្ជា​​​ឲ្យ​​​ទម្លាក់​​​កំហុស​​​លើ ​ប៊ន ​សំណាង និង​​​ សុខ សំអឿន ថា ជា​​​អ្នក​​​ធ្វើ​​​ឃាត​លោក ជា វិជ្ជា មេដឹក​​​នាំ​​​សហជីព​​​សេរីកម្មករ​​​​ដែល​និយាយ​ឥត​សំចៃ​រូប​នេះ​​។

ទស្សនាវដ្ដី​​​ ឡិចប្រេស​​​បាន​​​ដក​​​ស្រង់​​​សម្ដី​​​លោក ហេង​​​ ពៅ ថា “ សម្រាប់​​​ខ្ញុំ​​​មិន​​​ចាំ​​​បាច់​​​គិតយូរ​​​នោះ​​ទេ គឺ​​​​​ជន​​​សង្ស័យ​​​ទាំងពីរ​​​​​ ប៊ន ​សំណាង​និង​​​ សុខ សំអឿន មិន​​​ជាប់​​​ពាក់​​​ព័ន្ធ​​​នឹង​​​រឿង​​​ឃាតកម្ម​​​នេះ​​​ឡើយ​​​”។ អំឡុង​​​ការ​​​បើក​​​សវនាការ​​​ជំនុំ​​​ជម្រះ​​​​​ឡើង​​​វិញ​លើ​រឿង​ក្តី​របស់​​​ ប៊ន សំណាង និង​​​ សុខ ​សំអឿន កាល​​​ពី​​​ថ្ងៃ​​​ទី​​​៧ ខែ​​​វិច្ឆិកា ​លោក ​ហេងពៅ បាន​​​បដិសេធ​​​មិន​​​ផ្ដល់​​​សក្ខី​​​កម្ម​​​នោះ​​​ទេ ​ដោយ​​​បាន​​​អះអាង​​​ថា ការ​​​កាន់​​​សាសនា​​​គ្រិស្ត​​ បច្ចុប្បន្ន​​​ អំឡុង​​​ពេល​​​​​លោក​​​ត្រូវ​​​ឃុំ​​​ខ្លួន​​​នៅ​​​​​​ពន្ធនា​គារ​​​ព្រៃស​​​រារាំង​​​មិន​​​ឲ្យ​​​ធ្វើ​​​ដូច្នេះ​ទេ។

អំឡុង​​​ពេល​​​បើក​​​សវនាការ​​​ជំនុំ​​​ជម្រះ​​​ក្ដីឡើង​​​វិញ​​​នោះ​​​ ព្រះរាជ​​​អាជ្ញា​​​សាលា​ឧទ្ធរណ៍​​​មិន​​​បាន​​​បង្ហាញ​​​ភ័ស្ដុតាង​​​ថ្មី​​​​ដើម្បី​ដាក់​បន្ទុក​បុរស​​​ទាំង​​​ពីរនាក់​​​នេះ​​​ឡើយ​​​ ហើយ​​​បាន​​​លើក​​​ឡើ​​ង​​​ថា ការ​​​ស៊ើប​​​អង្កេត​​​លើក​​​ទី២ នៅ​​​ក្នុង​​​​រឿង​ក្តី​ធ្វើ​​​ឃាត​​​នេះ ​​​គឺ​​​​​ដូច​​​ទៅ​​​នឹង​​​សេចក្ដី​​​សន្និដ្ឋាន​​​ កាល​​​ពី​​​លើក​​​ដំបូង​​​ ដែលថា ​​​បុរស​​​ទាំងពីរនាក់​​​នេះ​​​​​ជា​អ្នក​ប្រព្រឹត្ត​​​​​បទ​​​ឧក្រិដ្ឋ​​​នេះ ទោះ​​​បី​​​ជា​​​បុរស​​​ទាំង​​​ពីរនាក់​​​នេះ​​​​បដិសេធ​យ៉ាង​​​ដាច់​​​ខាត​​​ថា ពួកគេ​​​បាន​​​នៅ​​​កន្លែង​​​ផ្សេង​​​​នៅ​​​​ពេល​​​នោះ​​​ក៏ដោយ​​​។

លោក ជា មុន្នី ដែល​​​ត្រូវ​​​បាន​​​គេ​​​បោះ​​​ឆ្នោត​​​ឲ្យ​​​ធ្វើ​​​ជា​​​មេ​​​ដឹក​​​នាំ​​​សហជីព​​​សេរីកម្មករ​​​ បន្ទាប់​​​ពី​​​បង​​​ប្រុស​​​របស់​​​ខ្លួន​​​ត្រូវ​​​បាន​​​គេ​​​សម្លាប់​​នោះ​​​ បាន​​​ជំទាស់​​​​យ៉ាង​​​ដាច់​​​អហ័ង្ការ​​​ថា ការ​​​បើក​​​សវនាការ​​​ជំនុំ​​​ជម្រះ​​​ក្ដី​​​ឡើង​​​វិញ​​​ កាល​​​ពី​​​ម្សិលមិញ គឺ​​​ជា​​​ឆាក​​​​ល្ខោន​​​។

លោក ជា មុន្នី បាន​​​មាន​​​ប្រសាសន៍​​​ថា “​​​ខ្ញុំ​​​នឹង​​​មាន​​​វិប្ប​ដិសារី​​​ចំពោះ​​​រឿង​​​នេះ​​​ អស់​​​មួយ​​​ជីវិត​​​ ពី​​​ព្រោះ​​​ខ្ញុំ​​​មិន​​​ទាន់​​​ទទួល​​​បាន​​​យុត្តិធម៌​​​សម្រាប់​​​បង​​​ប្រុស​​​របស់​​​ខ្ញុំ​​​នៅ​​​ឡើយ​​​ទេ​​​”។​​​

 

© 2024, ខេមបូឌា ដេលី. All rights reserved. No part of this article may be reproduced in print, electronically, broadcast, rewritten or redistributed without written permission.

អត្ថបទទាក់ទង

អត្ថបទអានច្រើន

សេចក្ដីរាយការណ៍ពិសេស