29 C
Phnom Penh

តុលាការ​ផ្តន្ទាទោស​សកម្មជន​ទាម​ទារ​សិទ្ធិ​ដីធ្លី​​​សហគមន៍​បឹងកក់​

ដោយ ឌឹ ខេមបូឌា ដេលី

បទវិភាគ

កាលពី​ម្សិល​មិញ​សាលាដំបូង​រាជធានី​ភ្នំ​ពេញ​​​ បាន​​​ផ្តន្ទាទោស​​​​​អ្នក​ស្រី យ៉ម បុប្ផាសកម្មជនប្រ​ឆាំង​នឹង​ការ​បណ្តេញ​ចេញ​​នៅ​សហគមន៍​បឹង​កក់​​ឲ្យ​ជាប់​ពន្ធនាគារ​រយៈ​ពេល​បី​ឆ្នាំ​​​ចំពោះ​ការ​ជាប់​​​ពាក់​ព័ន្ធ​​ក្នុង​ការ​វាយ​​ដំ​បុរស​ពីរ​នាក់​ ហើយ​សាលា​ដំបូង​រាជ​ធានី​ភ្នំ​ពេញ​បាន​ផ្តន្ទាទោស​សមាជិក​គ្រួសារ​​របស់​អ្នក​ស្រី​បី​នាក់​ពី​បទ​​ល្មើស​ដូចគ្នា​ផង​ដែរ​។

ការ​សម្រេច​របស់​តុលាការ​បាន​ធ្វើ​ឲ្យ​សកម្មជន​ជា​​មិត្ត​ភក្តិ​​​​ផ្ទុះ​កំហឹង​នៅ​ខាង​ក្រៅ​តុលាការ​ និង​មាន​ការចំអកពី​​​អង្គការ​សិទ្ធិ​មនុស្ស​​ដែល​​ជឿថា ការ​ផ្តន្ទាទោស​នេះ​​​មាន​គោល​បំណង​បង្ក្រាប​សកម្មជន​ប្រ​ឆាំង​នឹង​ការ​បណ្តេញ​ចេញ​និង​អ្នក​តវ៉ាទាមទារ​សិទ្ធិ​ដីធ្លី​​ដែល​បាន​ចំណាយ​​ពេល​ជា​ច្រើន​ឆ្នាំ​តវ៉ា​ប្រឆាំង​​ចំពោះ​ការ​បណ្តេញ​ប្រ​ជា​ពល​រដ្ឋ​ជា​ច្រើន​គ្រួសារ​ចេញពី​ដី​ក្នុង​សហគមន៍​បឹង​កក់​​ដែល​គ្រប់​គ្រង​ដោយ​ក្រុម​ហ៊ុនស៊ូកាគុអុីនជា​ក្រុម​ហ៊ុន​មួយ​​ដែល​​​​លោកឡៅម៉េង​ឃិនសមាជិកព្រឹទ្ធសភា​មក​ពី​គណបក្ស​ប្រ​ជា​ជន​កម្ពុជា​ មាន​ភាគ​ហ៊ុន​ដែរ​នោះ​។

អ្នកស្រីយ៉មបុប្ផាអាយុ​២៩ឆ្នាំត្រូវ​បាន​ចាប់​ខ្លួន​​កាល​ពីខែ​កញ្ញា ​​​ហើយ​ត្រូវ​បាន​ចោទ​ប្រ​កាន់​ពី​បទ​​ជាប់​ពាក់​ពន្ធ​នឹង​ការវាយ​ដំ​​អ្នក​រត់​ម៉ូតូ​ឌុប​​ ឈ្មោះវ៉ាតថៃសេងនិងឈ្មោះ​ ង៉ែតចិត្តកាល​ពី​ថ្ងៃ​ទី​៧ខែ​សីហា​។​ប្តី​របស់​អ្នក​ស្រីលោកលួសសាខនក៏​ត្រូវ​បាន​ចាប់​ខ្លួន​ផង​ដែរ​​ ប៉ុន្តែ​ក្រោយ​មក​បាន​ដោះ​លែង​ឲ្យ​នៅ​ក្រៅ​ឃុំ​បណ្តោះ​អាសន្ន​។

លោកចៅ​ក្រមសួសសំអាតកាល​ពី​ម្សិល​​មិញ​បាន​ផ្តន្ទាទោស​​អ្នកស្រី​​ បុប្ផា ឲ្យ​ជាប់​ពន្ធនាគារ​រយៈពេល​បី​ឆ្នាំ​​ពី​​​បទ​បង្ក​​អំពើ​ហិង្សា​ដោយ​​ចេតនា​ដែល​មាន​ស្ថាន​ទម្ងន់​ទោស​​។រីឯ​ប្តី​របស់​អ្នកស្រី​ត្រូវ​បាន​កាត់ឲ្យ​ជាប់​​ទោស ​និង​ព្យួរទោស​រយៈពេល​បី​ឆ្នាំ ហើយ​​ប្អូន​ប្រុស​របស់​អ្នកស្រី​ឈ្មោះ​ យ៉មកន្លង់និង​ឈ្មោះយ៉ម សិទ្ធ​​ ក៏​ត្រូវ​បាន​តុលាការ​ផ្តន្ទា​ទោស​កំបាំង​មុខ​ឲ្យ​ជាប់​ពន្ធនាគារ​ម្នាក់ៗ​រយៈ​ពេល​បី​ឆ្នាំ​ផង​ដែរ​ពី​បទ​​​ប្រើប្រាស់​​ពូថៅនិងទួណឺវីស​វាយ​បុរស​ទាំង​​​ពី​រនាក់​នោះ។

លោក​ចៅ​ក្រម សំអាត មាន​ប្រ​សាសន៍​ថា​ “ តុលាការ​បាន​បង្គាប់​ឲ្យ​​អ្នកស្រីយ៉មបុប្ផាលោកយ៉មកន្លង់និងលោកយ៉មសិទ្ធ​ សង​ជំងឺ​ចិត្ត​​ចំនួន ៦០​លាន​រៀល​​ឲ្យ​ទៅ​ជន​រង​គ្រោះ​ទាំង​ពីរ​នាក់​​ ហើយ​តុលាការ​បញ្ជាឲ្យ​ចាប់​ខ្លួន​និង​ឃុំ​ខ្លួន​លោកយ៉មកន្លង់និងលោកយ៉មសិទ្ធ​”។

លោក សំ​អាត បាន​​បន្ថែម​ថា​ “ យោង​តាម​​ភ័ស្តុតាង​និង​សាក្សី​​ឲ្យ​ដឹង​ថាចុង​ចោទ​ទាំង​បួន​នាក់​នេះ​​បាន​ចេញ​មក​ជាមួយ​គ្នា ហើយ​បាន​វាយ​​ជន​រងគ្រោះ​។​លោក លួស​ ​សាខន ​​ក៏​មាន​​វត្តមាន​នៅ​កន្លែង​កើត​ហេតុ​ដែរ ​ប៉ុន្តែ​​គាត់​មិនបាន​វាយ​ជន​រង​គ្រោះ​ទេ​”។

ដោយ​បង្ហាញ​ពី​ហេតុ​ផល​​ចំពោះ​ការ​សម្រេច​របស់​តុលាការ​នេះ​លោកចៅក្រម​ សំអាត ​​​ថ្លែង​ថា​​ ចុង​ចោទ​មិន​មា​ន​ភ័ស្តុតាង​​​សម្រាប់គាំ​ទ្រ​​​ការ​អះអាងរបស់​ខ្លួន​ដែល​ថា​​ពួក​គេ​មិន​បាន​ឃើញ​​ការ​វាយ​​​តប់​គ្នា​នោះ​ទេ។

ទោះ​ជា​យ៉ាង​ណា​ តុលាការ​​​ជំនុំ​ជម្រះ​តែ​​ភ័ស្តុតាង​ពី​ជន​រង​គ្រោះ​​ប្រ​ឆាំង​នឹង​ចុង​ចោទ​ប៉ុណ្ណោះ​​ និង​​​មិន​បាន​សម្ភាស​សាក្សី​ផ្សេង​ទៀត​​នៅ​កន្លែង​កើត​ហេតុ​ទេ​។ លោកនីចរិយាប្រធាន​​ផ្នែក​សើុប​អង្កេត​​​ប្រ​ចាំ​អង្គការ​សិទ្ធិ​មនុស្ស​អាដហុក​ បាន​មាន​ប្រសាសន៍​ថា​ ភ័ស្តុតាង​ដែល​បាន​បង្ហាញ​នៅ​ក្នុង​តុលាការ​នោះ គឺ​គ្រាន់​តែ​ជា​​ការ​លើក​ឡើង​នូវ​​ពាក្យ​សម្តី​របស់​ជន​រងគ្រោះ​​ប្រឆាំង​នឹង​ជន​ជាប់​ចោទ​ប៉ុណ្ណោះ។ លោកនីចរិយាមាន​ប្រសាសន៍​បន្ត​ថា​“ ​តុលាការ​ផ្អែក​លើ​​ដើម​បណ្តឹង​រដ្ឋប្បវេណី​​[ជនរង​គ្រោះ]​ដែល​បាន​ផឹក​ស៊ី​” នៅ​មុន​ពេល​ មាន​​ឧបទ្ទវហេតុ​នោះ​ ហើយ​​លោក​បន្ថែម​ថា​លោកជឿថា​ការ​​ចោទ​ប្រ​កាន់​ប្រ​ឆាំង​នឹង​អ្នក​ស្រី យ៉ម ​បុប្ផា ត្រូវ​បាន​គេ​ប្រឌិត​ឡើង​​ ដោយ​សារ​តែ​​អ្នក​ស្រី​ធ្វើ​សកម្មភាព​ជា​ប្រចាំ​ក្នុង​នាម​ជា​អ្នក​តវ៉ា​​សិទ្ធិដី​ធ្លី​។

គណៈកម្មាធិការ​​ប្រព្រឹត្តិកម្ម​នៃ​អង្គការ​សមាគម​ការ​ពារ​​សិទ្ធិ​មនុស្ស​​កម្ពុជា ជា​សម្ពន្ធ​អង្គការមួយ ​ដែល​មាន​អង្គការ​ក្រៅ​រដ្ឋា​ភិបាល​​ចំនួន​២១​បាន​​លើក​ឡើង​ក្នុង​សេចក្តី​ថ្លែង​ការណ៍​មួយ​ថា “ ការ​ជំនុំជម្រះ​ក្តី​នេះ​​​បង្ហាញ​ថា​មាន​​ភាព​មិន​ប្រក្រតី​​ ​ខណៈ​ដែល​​សេចក្តី​សម្រេច​េនះ​មិន​មាន​ភាព​រឹង​មាំ​ឡើយ​ដោយ​សារ​​​​ខ្វះ​​​ភ័ស្តុតាង។​ផ្ទុយ​ទៅ​វិញ​ ការ​ផ្តន្ទា​ទោសអ្នក​ស្រីយ៉មបុប្ផាបាន​បញ្ជាក់​ពីការ​ប្រើ​ប្រាស់​ប្រ​ព័ន្ធតុលាការ​​ប្រ​ឆាំង​នឹង​សកម្ម​ជន​ទាម​ទារ​សិទ្ធិ​ដីធ្លី​ដែល​មាន​បំណង​​ជំទាស់​នឹង​អាជ្ញាធរ​និងក្រុម​ហ៊ុន​ឯក​ជន​មាន​អំណាច​​តាម​រយៈ​ពាក្យ​បណ្តឹង​​ប្តឹងទាម​ទារ​សិទ្ធិ​ដី​ធ្លី​របស់​ពួក​គេ”។

កាល​ពី​ម្សិល​មិញអ្នក​ស្រី​ បុប្ផាបាន​សម្រក់​ទឹក​ភ្នែក​នៅ​ពេល​ត្រូវ​បាន​គេ​នាំ​ចេញ​ពី​តុលា​ការ​​ ហើយ​បញ្ជូន​ទៅ​កាន់​ពន្ធនាគារវិញ អ្នក​ស្រី​​បាន​​ជំទាស់​នឹង​ការ​សម្រេច​នេះ។អ្នក​ស្រី​បាន​ប្រាប់​អ្នកយក​ព័ត៌មាន​នៅ​ខាង​ក្រៅ​តុលាការ​ថា “ តុលាការ​មិន​បាន​ផ្តល់​យុត្តិធម៌​ឲ្យ​ខ្ញុំ​ទេ។ សង្គម​បច្ចុប្បន្ន​​នេះ ជា​សង្គម​​ប្រាក់​ដុល្លារ​។​ខ្ញុំសង្ឃឹម​ថា ​នៅ​ថ្ងៃ​ណា​មួយ​ខ្ញុំ​នឹង​ទទួល​បាន​យុត្តិ​ធម៌​”។

លោកចាន់សុជាតិ​ មេធាវីកា​រពារ​អ្នកស្រីបុប្ផា ថ្លែងថា លោក​នឹង​ពិភាក្សា​ជាមួយ​កូន​ក្ដី​របស់​លោក​​ថា​ តើ​អ្នក​ស្រី​អាច​ដាក់​ពាក្យ​បណ្ដឹង​ឧទ្ធរណ៍​​ជំទាស់​នឹង​​សាល​ក្រម​នេះ​ឬយ៉ាង​ណា​។ នៅ​ខាង​មុខ​តុលាការ​ក្រុម​អ្នក​តវ៉ា​បាន​ប្រមូល​ផ្ដុំ​គ្នា​តាំង​ពី​ព្រឹក​ព្រលឹម ហើយ​​​​ត្រូវ​​បាន​នគរបាល​ប្រឆាំង​កុបកម្ម តាម​ឃ្លាំ​មើល​យ៉ាង​យក​ចិត្ត​ទុកដាក់​​ ហើយ​​​កាលពី​ម្សិល​មិញ​​និង​កាល​ពី​ថ្ងៃ​ពុធ បាន​បិទ​ផ្លូវ​នៅ​ពេល​ជំនុំ​ជម្រះក្តី​​បាន​ចាប់​ផ្ដើម​។

កាល​ពី​​ដំបូង​ នៅ​ទីនោះ​មាន​ទិដ្ឋភាព​សប្បាយ​រីករាយ​ នៅ​ពេល​ដែល​អ្នក​ស្រីទឹមសាក់មុនី ជា​សកម្មជន​នៅ​ក្នុង​សហគមន៍​បុរីកីឡា​ ដែល​ត្រូវ​តុលាការ​ផ្ដន្ទាទោស​ពី​បទ​ចេញ​សេចក្ដី​ប្រកាស​ក្លែង​ក្លាយ​ និង​​ត្រូវ​បាន​តុលាការ​​ដោះលែង​​​ កាល​ពី​ល្ងាច​ថ្ងៃ​ពុធ​​​នោះបាន​​ចេញ​មក​ខាង​ក្រៅ​។ប៉ុន្ដែបន្ទាប់​ពី​បាន​ទទួល​ព័ត៌មាន​ថាអ្នក​ស្រីបុប្ផាត្រូវ​បាន​តុលា​ការ​ផ្ដន្ទាទោស​នោះ អ្នក​គាំ​ទ្រ​រាប់​រយ​នាក់​បាន​ស្រែកខ្លាំងៗ និង​ផ្ទុះ​​កំហឹង​​​ដោយ​សារ​​ខែល​​នគរបាល​បង្ក្រាប​កុប្បកម្ម​។

ស្ត្រី​ចំណាស់​អាយុ​ប្រហែល​​៧០​ឆ្នាំ​ម្នាក់​​ ដែល​ជា​សកម្មជន​នៅ​ក្នុង​សហគមន៍​បឹង​កក់​ជាយូរ​មក​ហើយ​នោះ​បាន​ដួលសន្លប់​ ​ប្រហែ​ល​ជា​ដោយ​សារ​ឆក់​នឹង​ខែល​អគ្គីសនី​របស់​​នគរបាល​ប្រឆាំង​កុប្បកម្ម​​ ហើយ​យ៉ាង​ហោច​ណាស់​មាន​មនុស្ស​ពីរនាក់​ផ្សេងទៀត​បាន​សន្លប់​នៅ​ពេល​ប្រតាយប្រតប់​គ្នា​ជាមួយ​នគរបាល​។

នៅ​ឯ​​ម្ខាង​​ផ្លូវ​ទៀត​ ​មាន​ក្រុម​អ្នក​គាំ​ទ្រ​ខាង​ដើម​បណ្ដឹង​បាន​អប​អរសាទរ​ពី​សេចក្ដី​សម្រេច​របស់​តុលាការនេះ។ លោក​ អុីសុភ័ស្ថប្រធាន​សមាគមន៍​សហ​ព័ន្ធ​កម្ពុជា​ ដើម្បី​អភិវឌ្ឍន៍​ ​ដែល​មាន​សមាជិក​ជា​​​អ្នក​រត់​រ៉ឺម៉កម៉ូតូ​ និង​អ្នក​រត់​ម៉ូតូឌុប​ក្មេងៗ​ជា​ច្រើន​នាក់​​​​​ដែល​ធ្លាប់​បាន​​ធ្វើ​ការ​តវ៉ា​ប្រឆាំង​​​ស្រដៀង​គ្នា​​នេះ​​ជា​​​ច្រើន​ដងនោះ និយាយ​ថា “ សេចក្តី​សម្រេច​របស់​តុលាការ​ធ្វើ​ឲ្យ​យើង​​សប្បាយ​ចិត្ត”។ លោកសុភ័ស្ថបាន​អំពាវ​នាវ​ឲ្យ​នគរបាល​ចាប់​ខ្លួន​បុរស​ទាំង​ពីរ​នាក់​ ដែល​តុលាការ​បាន​កាត់​ទោស​កំបាំង​មុខ​ឲ្យ​ជាប់​ពន្ធ​នាគារ​ម្នាក់ៗ​រយៈ​ពេល​បីឆ្នាំ​នោះ​ជាបន្ទាន់​។

នៅ​​ពេល​ព្រឹក​​ថ្ងៃ​​នោះក្រុម​អ្នក​គាំ​ទ្រ​អ្នក​ស្រីបុប្ផាបាន​បណ្ដេញ​បុរស​ម្នាក់​ចេញ​ពី​ក្រុម​របស់​ពួក​គេ​ ដោយ​អះអាង​ថាបុរសនោះ​ជា​សមាជិក​សមាគមន៍​សហព័ន្ធ​កម្ពុជា​ ដើម្បី​អភិវឌ្ឍន៍ ហើយ​បាន​បណ្ដាល​ឲ្យ​មាន​ភាព​តាន​តឹង​រវាង​អ្នក​គាំ​ទ្រ​ទាំង​ពី​រក្រុម​។

លោកវ៉នពៅប្រធាន​សមាគមន៍​ឯករាជ​ប្រជា​ធិបតេយ្យ​សេដ្ឋកិច្ច​​ក្រៅ​ប្រព័ន្ធ​បាន​និយាយ​ថា លោក​បាន​ចូល​រួម​ធ្វើ​ការ​តវ៉ា​ជាមួយ​អ្នក​ភូមិ​បឹង​កក់​ ហើយ​បានព្រមាន​សមាជិក​សមាគមន៍​សហព័ន្ធ​កម្ពុជា ដើម្បី​អភិវឌ្ឍន៍​ថា​ពួកគេ​​ប្រហែល​ជា​កំពុង​ការ​ធ្វើ​តាម​​នរណា​ម្នាក់​​ដោយ​ការ​តវ៉ា​ប្រឆាំង​នឹង​អ្នក​ស្រី បុប្ផា។លោក​បន្ថែម​ថា “ សមាគមន៍​សហ​ព័ន្ធ​កម្ពុជា​ ដើម្បី​អភិវឌ្ឍន៍​ ត្រូវ​បាន​គេ​ប្រើ​ប្រាស់​ដោយ​អ្នក​ណា​ម្នាក់ ឬក្រុមហ៊ុន​ ឬក៏​អាជ្ញាធរ​ ពី​ព្រោះ​យើង​ជឿថា ពួក​គេ​ទាំង​​នោះ​ ត្រូវ​បាន​គេ​ជួល​ឲ្យ​មក​ទីនេះ ក្នុង​​ម្នាក់​​ប្រាំដុល្លារ​​មួយ​ថ្ងៃ​”៕

ប្រែសម្រួលដោយឃិនណៃ

 

© 2024, ខេមបូឌា ដេលី. All rights reserved. No part of this article may be reproduced in print, electronically, broadcast, rewritten or redistributed without written permission.

អត្ថបទទាក់ទង

អត្ថបទអានច្រើន

សេចក្ដីរាយការណ៍ពិសេស