ក្រុមហ៊ុនចិនចំនួនពីរគ្រោងចាប់ផ្តើមការងារស្ថាបនាផ្លូវដែកមួយខ្សែប្រវែង៤០០គីឡូម៉ែត្រ ព្រមទាំងបង្កើតរោងចក្រផលិតដែកថែប និងកសាងកំពង់ផែនៅខែកក្កដាខាងមុខនេះ តែមិនទាន់មានការវាយតម្លៃពីផលប៉ះពាល់បរិស្ថាន (EIA) នៅឡើយទេ ហើយបណ្តាខេត្តអាចទទួលរងផលប៉ះពាល់ ក៏មិនទាន់បានដឹងពីគម្រោងសាងសង់ហេដ្ឋារចនាសម្ព័ន្ធដ៏ធំនេះនៅឡើយដែរ។
នៅក្នុងពិធីចុះហត្ថលេខា នៅភ្នំពេញកាលពីថ្ងៃច័ន្ទ ក្រោមវត្តមានរបស់លោក ត្រាំ អីុវតិក រដ្ឋមន្ត្រីក្រសួងសាធារណការ និងដឹកជញ្ជូន ក្រុមហ៊ុនដ៏ធំរបស់ចិន គឺក្រុមហ៊ុន Cambodia Iron and Steel Mining Industry Group and China Railway Group Limited បានចុះកិច្ចព្រមព្រៀងលើគម្រោងមួយ ដែលមានទំហំទឹកប្រាក់ប្រមាណ៩,៦ពាន់លានដុល្លារ។
ក្នុងផែនការប្រកបដោយមហិច្ឆតានេះ ផ្លូវដែកមួយខ្សែនឹងត្រូវបានស្ថាបនាឡើងនៅឆ្នាំ២០១៧ ដោយចាប់ ផ្តើមពីចំណុចរោងចក្រផលិតដែកថែប ក្នុងខេត្តព្រះវិហារ ឆ្លងកាត់ខេត្តកំពង់ធំ កំពង់ឆ្នាំង កំពង់ស្ពឺ និងខេត្តកោះកុង ឆ្ពោះទៅកាន់កំពង់ផែមួយនៅលើកោះស្មាច់ ក្នុងខេត្តកោះកុង។
លោក ម៉ុក ម៉ារ៉េត រដ្ឋមន្ត្រីក្រសួងបរិស្ថាន លើកឡើងក្នុងសារមួយកាលពីម្សិលមិញថា ឯកសារវាយតម្លៃពីផលប៉ះពាល់បរិស្ថានពីគម្រោងនេះ“ មិនទាន់ឲ្យ (ក្រសួងបរិស្ថាន)
នៅឡើយទេ” ។ លោកបានមានប្រសាសន៍ថា “តាមធម្មតា ក្រុមហ៊ុនគួរតែបំពេញកាតព្វកិច្ចនេះ ដើម្បីទទួលបានការគាំទ្រពីរដ្ឋាភិបាលចិន និងការគាំទ្រពីបណ្តាម្ចាស់លុយរបស់គម្រោងនេះ”។
ក្រុមហ៊ុន China Railways បានសិក្សាពីផលប៉ះពាល់លើគម្រោងផ្លូវដែកនេះរួចហើយកាលពីឆ្នាំ២០១១ ប៉ុន្តែមិនទាន់ប្រកាសលទ្ធផលជាសាធារណៈនៅឡើយ ប៉ុន្តែចំណែកមន្ត្រីរដ្ឋាភិបាលក៏មិនទាន់បានបញ្ជាក់ច្បាស់ថា ផ្លូវរថភ្លើងនេះនឹងរត់កាត់ទីណាខ្លះ និងប្រជាពលរដ្ឋប៉ុន្មាននាក់នឹងត្រូវផ្លាស់ប្តូរទីលំនៅនោះទេ។
លោក ពៅ ម៉ាលី អនុប្រធាននាយកដ្ឋានដឹកជញ្ជូននៃក្រសួងសាធារណការ និងដឹកជញ្ជូន បានមានប្រសាសន៍ថា លោកជឿថា គម្រោងនេះនឹងមានផលប៉ះពាល់ដល់ផ្ទះសំបែងរបស់ប្រជាពលរដ្ឋមួយចំនួន ពីព្រោះវាមានប្រវែងរហូតដល់ទៅជាង៤០០គីឡូម៉ែត្រឯណោះ។
លោកមានប្រសាសន៍ថា “ នៅពេលប៉ះពាល់ផ្ទះប្រជាពលរដ្ឋ ពួកគេ [ក្រុមហ៊ុន] ត្រូវផ្តល់សំណង” ឲ្យស្របតាមច្បាប់ភូមិបាល។
លោក ម៉ម សម្បត្តិ ប្រធានសម្ពន្ធភាពកម្ពុជា ដើម្បីតម្លាភាពចំណូលធនធាន ដែលជាក្រុមអង្គការក្រៅរដ្ឋាភិបាល បានមាន
ប្រសាសន៍ថា លោកមានការព្រួយបារម្ភអំពីផលប៉ះពាល់របស់គម្រោងមកលើប្រជាពលរដ្ឋ និងមកលើបរិស្ថាន។ លោកមានប្រសាសន៍ថា“ វានៅសល់តែប្រាំពីរខែទៀតប៉ុណ្ណោះ។ ដើម្បីអនុវត្តគម្រោងនិងវាយតម្លៃពីផលប៉ះពាល់ វាត្រូវការពេល វេលាយូរ។ ការពិគ្រោះយោបល់ជាមួយនឹងសហគមន៍ គឺជារឿងសំខាន់ណាស់”។
លោក ប៊ុន លើត អភិបាលខេត្តកោះកុង មានប្រសាសន៍ថា លោកទទួលបានដំណឹងអំពីការអភិវឌ្ឍនេះ ដែលរួមមានផែនការសង់ស្ពានមួយខ្សែប្រវែងបីគីឡូម៉ែត្រ នៅក្នុងស្រុកគិរីសាគរផង ប៉ុន្តែ មិនទាន់មានការពិភាក្សា
អំពីផលប៉ះពាល់ទៅលើប្រជាពលរដ្ឋ ឬផលប៉ះពាល់ទៅលើបរិស្ថាននៅឡើយទេ។ លោកមានប្រសាសន៍ថា “ ខ្ញុំទទួលបានដំណឹងថា នឹងមានក្រុមហ៊ុនចិនមួយមកអភិវឌ្ឍលើកោះនេះ ប៉ុន្តែខ្ញុំមិនទាន់ទទួលបានឯកសារផ្លូវការនៅឡើយទេ”។
លោក កង ហ៊ាង អភិបាលខេត្តកំពង់ស្ពឺ និងលោក អ៊ុច សាម៉ុន អភិបាលរងខេត្តកំពង់ធំសុទ្ធតែបានមានប្រសាសន៍ថា ពួកលោកបានដឹងពីគម្រោងអភិវឌ្ឍន៍នេះ ប៉ុន្តែមិនទាន់ទទួលបានដំណឹងជាផ្លូវការនៅឡើយទេ៕សុខុម