33 C
Phnom Penh

កាស៊ី​ណូ​ Ha Tien Vegas នៅ​ជាប់​ព្រំ​ដែន​កម្ពុជា​-វៀត​ណាម​ក្នុង​ខេត្ត​កំពត​បិទ​ទ្វារ​ហើយ

ដោយ ឌឹ ខេមបូឌា ដេលី

បទវិភាគ

និយោជិត​ និង​មន្ត្រី​នៅ​ខេត្ត​កំពត​បាន​ឲ្យ​ដឹង​កាល​ពី​ថ្ងៃ​ពុធ​ថា​ កាស៊ីណូ​ ហាទៀន​ វេ​ហ្គាស់​ អុីធើថេនមិន​ រីសត​ (Ha Tien Vegas Entertainment Resort)​ នៅ​ក្នុង​ខេត្ត​កំពត​ត្រូវ​បាន​បិទទ្វារ​ហើយ​ដោយ​សារ​តែ​គ្មាន​ភ្ញៀវ​ចូល​លេង​ច្រើន។​ កាស៊ីណូ​ Ha Tien Vegas​ នេះ​ត្រូវ​បាន​បើក​កាល​ពី​ឆ្នាំ​២០១០​នៅ​ជិត​ច្រក​ព្រំ​ដែន​អន្តរ​ជាតិ​ព្រែក​ចាក​រវាង​ប្រទេស​កម្ពុជា​ និង​ប្រទេស​វៀត​ណាម​ ហើយ​ត្រូវ​បាន​បើក​ដោយ​ក្រុម​ហ៊ុន​ សានុម​ អុីន​វែសមិន​ អិលធីឌី​ (Sanum Investments Ltd.)​ ជា​ក្រុម​ហ៊ុន​មួយ​ ដែល​មាន​មូល​ដ្ឋាន​ទីក្រុង​ម៉ាកាវ​ប្រទេស​ចិន​ ហើយ​ក្រុម​ហ៊ុន​នេះ​ក៏​មាន​បើក​កាស៊ីណូ​នៅ​ក្នុង​ប្រទេស​ឡាវ​ផង​ដែរ។

កាល​ពី​ខែ​មិថុនា​ ក្រុម​ហ៊ុន​បាន​រំសាយ​បុគ្គ​លិកចេញ​ពី​ការ​ងារ​ចំនួន​៥០០​នាក់​ ហើយ​បាន​បិទ​ទ្វារ​រមណីយដ្ឋាន​ ដែល​មាន​សណ្ឋាគារ​ចំនួន​​១៣០​បន្ទប់​របស់​ខ្លួន​ ដោយ​សារ​គ្មាន​ភ្ញៀវ​ចូល​ទៅ​លេង​កម្សាន្ត​ច្រើន​ ក៏​ប៉ុន្តែ​ ក្រុម​ហ៊ុន​នៅ​តែ​បន្ត​បើក​ដំណើរ​ការ​កាស៊ីណូ​របស់​​ខ្លួន​នៅឡើយ​ទេ​នៅ​ពេល​នោះ។

បើ​យោង​តាម​អ្នក​គ្រប់​គ្រង​បុគ្គលិក​របស់​កាស៊ីណូ​ Ha Tien Vegas​ នៅ​ក្នុង​ខេត្ត​កំពត​ ដែល​សុំ​មិន​បញ្ចេញ​ឈ្មោះ​ ដោយសារ​តែ​គេ​​មិន​អនុញ្ញាត​ឲ្យ​និយាយ​ជា​មួយ​អ្នក​សារ​ព័ត៌​មាន​បាន​ឲ្យ​ដឹង​ថា​ កាស៊ីណូ​នេះ​ត្រូវ​បាន​បិទ​ទ្វារ​ទាំង​ស្រុង​តែ​ម្តង​កាល​ពី​ថ្ងៃ​ច័ន្ទ។

អ្នក​គ្រប់​គ្រង​រូប​នេះ​បាន​ឲ្យ​ដឹង​ថា​ “ដោយ​សារ​តែគ្មាន​ភ្ញៀវ​ចូល​លេង​ច្រើន​ទើប​ធ្វើ​ឲ្យ​កាស៊ីណូ​នេះ​ក្ស័យ​ធន​” ហើយ​លោក​បន្ថែម​ថា​ ​លោក​កំពុង​រៀប​ចំ​បញ្ជី​មួយ​ ដើម្បី​​ធ្វើ​ឲ្យ​ប្រាកដ​ថា​ បុគ្គលិក​ទាំង​អស់​ ដែល​ត្រូវ​បាន​រំសាយ​ពី​ការ​​ងារ​អាច​ទទួល​បាន​ប្រាក់​​បំណាច់​របស់​ខ្លួន​។

លោក​ ឡឹក​ សុជាតិ​ នាយ​ប៉ុស្តិ៍​នគរបាល​ឃុំ​ឫស្សី​ស្រុក​ខាង​លិច​បាន​បញ្ជាក់​ថា​ កាស៊ីណូ​ ដែល​មាន​បុគ្គលិក​ធ្វើ​ការ​ចំនួន​៥០០​នាក់​នេះ​បាន​បិទ​ទ្វារ​ហើយ។ លោក​បាន​ឲ្យ​ដឹង​ថា​ “ភ្ញៀវ​ជា​ជន​ជាតិ​វៀត​ណាម​មាន​ចំនួន​តិច​ពេក​ ហើយ​អ្នក​ទាំង​នោះ​ទៅ​លេង​តែ​នៅ​កាស៊ីណូ​តូចៗ​នៅ​ព្រំ​ដែន​ទេ​”។

លោក​បាន​ឲ្យ​ដឹង​បន្ត​ទៀត​ថា​ មាន​ភ្ញៀវ​ជន​ជាតិ​វៀត​ណាម​ប្រមាណ​ជា​ពី​២០០​ទៅ​៣០០​នាក់​ក្នុង​មួយ​ថ្ងៃៗ​ ដែល​នៅ​តែ​បន្ត​ទៅ​លេង​នៅ​កាស៊ីណូ​តូចៗ​ចំនួន​បី​កន្លែង​ផ្សេង​ទៀត​នៅ​ជិត​ច្រក​ព្រំ​ដែន​អន្តរ​ជាតិ​នេះ៕ កុក​ទៀន

© 2024, ខេមបូឌា ដេលី. All rights reserved. No part of this article may be reproduced in print, electronically, broadcast, rewritten or redistributed without written permission.

អត្ថបទទាក់ទង

អត្ថបទអានច្រើន

សេចក្ដីរាយការណ៍ពិសេស