គណៈកម្មាធិការជាតិរៀបចំការបោះឆ្នោតហៅកាត់ គ.ជ.ប. កាលពីថ្ងៃសុក្របានបញ្ចេញបញ្ជីឈ្មោះបោះឆ្នោតផ្លូវការសម្រាប់ការបោះឆ្នោតជាតិនាឆ្នាំនេះ ប៉ុន្តែ អ្នកសង្កេតការណ៍បោះឆ្នោតម្នាក់បានលើកឡើងថា លោក ព្រួយបារម្ភអំពីចំនួនអ្នកបោះឆ្នោតផ្លូវការនេះមានច្រើនជាងអ្នកដែលមានសិទ្ធិបោះឆ្នោតពិតប្រាកដ។
យោងតាមលោក ហាវ៉ាន់ ស៊ីវីឡៃ សមាជិកគ.ជ.ប. បានឲ្យដឹងថា អ្នកចុះឈ្មោះថ្មី ចាប់ពីចន្លោះថ្ងៃទី១ខែកញ្ញា ដល់ថ្ងៃទី១២ ខែតុលាមានចំនួន៩៤០.៤៤៥នាក់។ចាប់ពីថ្ងៃបិទការចុះឈ្មោះនោះមក គ.ជ.ប. បានពិនិត្យមើលនិងធ្វើបច្ចុប្បន្នភាពបញ្ជីតាមរយៈការលុបឈ្មោះ និងកែតម្រូវឈ្មោះអ្នកបោះឆ្នោត។
លោកមានប្រសាសន៍ដោយសំដៅដល់រយៈពេល ដែលប្រជាពលរដ្ឋអាចទៅពិនិត្យមើលឈ្មោះរបស់ខ្លួនក្នុងបញ្ជីឈ្មោះថា “ នៅក្នុងការបោះឆ្នោតកាលពីឆ្នាំ២០១២ មានអ្នកបោះឆ្នោតចំនួន៩.៦៧៥.៤៥៣នាក់ ហើយគ.ជ.ប. នឹងផ្សព្វផ្សាយព័ត៌មាននេះនៅថ្ងៃស្អែក និងបញ្ចប់នៅថ្ងៃទី២៦ខែកក្កដា”។ការបោះឆ្នោតចាប់ផ្តើមនៅថ្ងៃទី២៨ខែកក្កដា។
ចំនួនអ្នកបោះឆ្នោតនៅក្នុងឆ្នាំនេះបានកើនឡើងពី៩,២លាននាក់ ដែលជាចំនួនអ្នកបោះឆ្នោតចុះឈ្មោះ នៅ មុនការបោះឆ្នោតឃុំ-សង្កាត់កាលពីឆ្នាំមុន។
ប៉ុន្តែក្រុមអ្នកសង្កេតការណ៍បោះឆ្នោត នាពេលកន្លងមក បានបង្ហាញពីភាពខុសគ្នាជាមួយនឹងអ្វីដែលពួកគេជឿថា ជាបញ្ជីឈ្មោះបំប៉ោង ដែលមិនបញ្ជាក់ពីចំនួនអ្នកបោះឆ្នោតពិតប្រាកដ។
លោក ហង្ស ពុទ្ធា នាយកអង្គការនិកហ្វិក ដែលមានគម្រោងធ្វើសវនកម្មឯករាជ្យផ្ទាល់ខ្លួនលើបញ្ជីឈ្មោះអ្នកបោះឆ្នោតនៅពីរបីសប្តាហ៍ក្រោយនេះ បានមានប្រសាសន៍ថា “ ប្រសិនបើយើងពិនិត្យមើល យើងអាចមើលឃើញភាពមិនប្រក្រតី។បញ្ជីឈ្មោះអ្នកបោះឆ្នោតមានចំនួនច្រើនជាងចំនួនអ្នកបោះឆ្នោតជាក់ស្តែង”។
លោកបន្ថែមថា បញ្ហាមួយចំនួន ដែលនាំឲ្យមានការបំប៉ោងបញ្ជីឈ្មោះអ្នកបោះឆ្នោតនេះ គឺដោយសារតែគណបក្សប្រជាជនកម្ពុជាកំពុងកាន់អំណាច បានបញ្ជូនក្រុមការងាររបស់ខ្លួនចុះទៅតាមឃុំ-សង្កាត់ ដើម្បីឲ្យប្រជាពលរដ្ឋដែលបានចុះឈ្មោះក្នុងរាជធានីភ្នំពេញរួចហើយ ឲ្យចុះឈ្មោះនៅតាមខេត្តម្តងទៀត។
លោកបានមានប្រសាសន៍ថា “ ពួកគេមិនលុបឈ្មោះក្នុងរាជធានីភ្នំពេញចោលទេ។ពួកគេចុះឈ្មោះបន្ថែមទៀតនៅតាមឃុំសង្កាត់។ខ្ញុំគិតថា គណបក្សកំពុងកាន់អំណាចកាន់តែមានសមត្ថភាពធ្វើរឿងនេះ”។
លោកបន្តទៀតថា បរាជ័យរបស់គ.ជ.ប.ក្នុងការលុបឈ្មោះឲ្យបានត្រឹមត្រូវក៏ជំរុញឲ្យមានការបោះឆ្នោតមិនត្រឹមត្រូវផងដែរ។
លោកបានលើកឡើងថា បញ្ហាដែលមានបញ្ជីអ្នកបោះឆ្នោតបែបនេះមានន័យថា អាចធ្វើឲ្យប៉ះពាល់ដល់លទ្ធផលនៃការបោះឆ្នោតដោយសេរី និងយុត្តិធម៌ ពីព្រោះអ្នកបោះឆ្នោត មានឈ្មោះតែមួយ។
លោកបានមានប្រសាសន៍ថា “វាប៉ះពាល់ដល់ការបោះឆ្នោត ពីព្រោះវាគួរតែជាឈ្មោះមួយសម្រាប់ការបោះឆ្នោតមួយសន្លឹក ដូច្នេះ ប្រសិនបើ មានកំហុសធំខាងចំនួនឈ្មោះបែបនេះ វាមានន័យថា ក៏មានកំហុសធំពាក់ព័ន្ធនឹងលទ្ធផលដែរ”។
លោក ពុទ្ធា បានមានប្រសាសន៍ថា លោកមិនបានធ្វើការប៉ាន់ស្មានអំពីចំនួនអ្នកបោះឆ្នោតពិតប្រាកដ ដែលនឹងទៅបោះឆ្នោតនោះទេ។ ក៏ប៉ុន្តែ បញ្ហានេះវារំឭកឲ្យដឹងរយៈពេលចុះឈ្មោះបោះឆ្នោតកាលពីឆ្នាំ២០១១នៅមុនការបោះឆ្នោតមុនការបោះឆ្នោតឃុំ-សង្កាត់កាលពីខែមិថុនាឆ្នាំ២០១២។
នៅពេលនោះ គណៈកម្មាធិការសម្រាប់ការបោះឆ្នោតដោយសេរី និងយុត្តធម៌នៅកម្ពុជាបានប៉ាន់ស្មានថា មានប្រជាពលរដ្ឋតែចំនួន៨,៨លាននាក់ប៉ុណ្ណោះ ដែលអាចបោះឆ្នោតបានក្នុងការបោះឆ្នោតនោះ ប៉ុន្តែ បានរកឃើញថា គ.ជ.ប.បានចុះឈ្មោះពលរដ្ឋបានចំនួន៩,២ លាននាក់សម្រាប់ការបោះឆ្នោតនោះ៕ សុខុម