ស្ត្រីជំនួយការមេផ្ទះម្នាក់ និងតំណាងអង្គការសិទ្ធិមនុស្សម្នាក់ បាននិយាយកាលពីម្សិលមិញថា ស្រ្តីជំនួយការមេផ្ទះវ័យជំទង់ម្នាក់ដែលទើបតែបានត្រឡប់មកប្រទេសកម្ពុជាវិញពីប្រទេសម៉ាឡេស៊ី បានអះអាងថាបុគ្គលិ កនៅភ្នាក់ងារជ្រើសរើសពលករនៅប្រទេសម៉ាឡេស៊ី បានវាយ និងបង្ខំនាងឲ្យធ្វើការជាច្រើនម៉ោង នៅភ្នាក់ងារជ្រើសរើសពលករ។
កញ្ញា អន ឈុនលី អាយុ១៨ឆ្នាំ ត្រូវបានជ្រើសរើសដោយភ្នាក់ងារជ្រើសរើសពលករឈ្មោះភ្នាក់ងារអភិវឌ្ឍន៍ ធនធានមនុស្ស ហើយនាងបានធ្វើការជាស្រ្តីជំនួយការមេផ្ទះនៅប្រទេសម៉ាឡេស៊ី ចាប់តាំងពីឆ្នាំ២០១០។
ទោះបីជានាងមានបទពិសោធធ្វើការជាមួយថៅកែជនជាតិម៉ាឡេស៊ី ក៏ដោយ នាងបាននិយាយថា នាងត្រូវបានគេធ្វើបាបនៅពេលគេបញ្ជូននាងឲ្យត្រឡប់មកដល់ភ្នាក់ងារជ្រើសរើសពលករវិញ។
កញ្ញា ឈុនលី បាននិយាយតាមទូរស័ព្ទពីស្រុកកំពង់សៀម ខេត្តកំពង់ចាមថា “ភ្នាក់ងារ ជ្រើសរើសពលករនៅប្រទេសម៉ាឡេស៊ី បានបញ្ជាឲ្យខ្ញុំលុតជង្គង់ជូតឥដ្ឋ ចាប់ពីម៉ោង៩ព្រឹករហូតដល់ម៉ោង៩យប់។ ភ្នាក់ងារជ្រើសរើសពលករតែងតែយកស្បែកជើងវាយក្បាលខ្ញុំជាញឹកញាប់ ហើយបានបង្ខំខ្ញុំឲ្យធ្វើការដោយគ្មានពេលឈប់សម្រាក”។
អ្នកស្រី ប៉ុច ឆន ម្តាយរបស់កញ្ញា ឈុនលីបាននិយាយថា បច្ចុប្បន្ននេះកូនស្រីរបស់គាត់មិនអាចដើរបានទេដោយសារនាងបានលុតជង្គង់ជាច្រើនម៉ោងនៅពេលនាងធ្វើការ។
កាលពីឆ្នាំ២០១១អ្នកស្រីបានដាក់ពាក្យបណ្តឹងមួយនៅការិយាល័យប្រឆាំងការជួញដូរមនុស្ស និងការពារអនីតិជននៃក្រសួងមហាផ្ទៃ នៅពេលអ្នកស្រីបានទទួលទូរស័ព្ទពីកូនស្រីរបស់គាត់ឲ្យជួយ។ អ្នកស្រីនិយា យថា “ខ្ញុំសូមស្បថថា ខ្ញុំនឹងមិនបញ្ជូនកូនស្រីរបស់ខ្ញុំឲ្យទៅធ្វើការនៅប្រទេសម៉ាឡេស៊ីទៀតទេទោះបីជាគេឲ្យប្រាក់ខែខ្ពស់ក៏ដោយ”។
លោក ហ៊ុយ ពេជ្រសុវណ្ណ ប្រធានកម្មវិធីនៅមជ្ឈមណ្ឌលអប់រំច្បាប់សម្រាប់សហគមន៍ ដែលបានជួយអ្នកស្រី ឆន ក្នុងការដាក់
ពាក្យបណ្តឹងរបស់គាត់ កាលពីខែវិច្ផិកា ឆ្នាំ២០១១ មានប្រសាសន៍ថា មជ្ឈមណ្ឌលអប់រំច្បាប់សម្រាប់សហគមន៍អាចផ្តល់ជំនួយផ្នែកព្យាបាល និងសម្ភាសកញ្ញា ឈុនលី ដូច្នេះគ្រួសាររបស់នាងអាចសម្រេចថា តើពួកគេមានបំណងប្តឹងភ្នាក់ងារជ្រើសរើសពលករនោះឬយ៉ាងណា។
តំណាងភ្នាក់ងារជ្រើសរើសពលករអភិវឌ្ឍន៍ធនធានមនុស្សម្នាក់ដែលបដិសេធមិនប្រាប់ឈ្មោះនិងតួនាទីរបស់លោកនោះបាននិយាយតាមទូរស័ព្ទថា មិនមានការធ្វើបាបលើ កញ្ញា ឈុនលី នោះទេ។ លោកបាននិយាយបន្តថា “ វាមិនពិតទេ ក្រុមហ៊ុនជ្រើសរើសពលករមិនដែលធ្វើបាបស្ត្រីជំនួយការមេផ្ទះឡើយ៕ឃិន ណៃ