27 C
Phnom Penh

ក្រុម​ហ៊ុន​អចល​ន​ទ្រព្យ​បង្ហាញ​ថា​ អ្នក​ទិញ​ខន់ដូ​ភាគ​ច្រើន​គឺ​ជា​អ្នក​រក​ស៊ី​ទិញ​ដូរ​ ដើម្បី​រក​ប្រាក់​ចំណេញ​ភ្លាមៗ

ដោយ ឌឹ ខេមបូឌា ដេលី

បទវិភាគ

ក្រុម​ហ៊ុន​អចល​ន​ទ្រព្យ​ឈាន​មុខ​គេ​មួយ​បាន​ឲ្យ​ដឹង​ថា​ ខណៈ​ដែល​ចំនួន​អគារ​ខន់ដូ​ ដែល​កំពុង​លេច​ឡើង​ព្រោង​ព្រាត​នៅ​ក្នុង​រាជ​ធានី​ភ្នំ​ពេញ​ ត្រូវ​បាន​លក់​ដាច់​យ៉ាង​ច្រើន​នោះ​ អតិថិ​ជន​ទិញ​​ខន់ដូ​ទាំង​នេះ​ភាគ​ច្រើន​​​គឺ​ជា​អ្នក​រក​ស៊ី​ទិញ​ដូរ​ ដើម្បី​ទទួល​បាន​ប្រាក់​ចំណេញ​ភ្លាមៗតែប៉ុណ្ណោះ។

របាយ​ការណ៍​មួយ​ ដែល​ចេញ​ដោយ​ក្រុម​​ហ៊ុន​អចល​ន​ទ្រព្យ​អន្តរជាតិ​ CBRE​​ បង្ហាញ​ថា​ ទីផ្សារ​អចល​ន​ទ្រព្យ​នៅ​រាជ​ធានី​ភ្នំ​ពេញ​កាល​ពី​ឆ្នាំ​២០១២​មាន​ការ​កើន​ឡើង​ខ្លាំង​ ហើយ​របាយការណ៍​នេះ​ចង្អុល​បង្ហាញ​ចំពោះ “ ការ​រីក​លូត​លាស់​” ខាង​វិស័យ​ជួល​ផ្ទះ​ល្វែង។

របាយការណ៍​នេះ​បាន​បង្ហាញ​ថា​ ការ​ហូរ​ចូល​​ជន​ជាតិ​ជប៉ុន​មក​កាន់​ប្រទេស​កម្ពុជា​ បន្ទាប់​ពី​មាន​វិនិយោគ​ទុន​ជប៉ុន​ចូលមក​ក្នុង​ប្រទេស​កម្ពុជា​មាន​ន័យ​ថា​ ៩០​ភាគ​រយ​នៃ​ផ្ទះល្វែង​មាន​អ្នក​ទៅ​រស់​នៅ​ ជា​ពិសេស​គឺ​អគារ​ផ្ទះ​ល្វែង​នៅ​សង្កាត់​បឹង​កេង​កង​១។

បន្ទាប់​ពី​មាន​អនុក្រឹត្យ​ឆ្នាំ​២០១០​ ដែល​អនុញ្ញាតឲ្យ​ជន​បរទេស​អាច​ទទួល​បាន​កម្ម​សិទ្ធ​ិគ្រប់​គ្រង​អគារ​ជាន់​លើ​បន្ទាប់​ពី​ជាន់​ផ្ទាល់​ដី​បាន​រួច​មក​ មាន​អគារ​ខន់ដូ​រាប់​រយ​អគារ​ត្រូវ​បាន​សាង​សង់​ នៅ​ក្នុង​រាជ​ធានី​ភ្នំ​ពេញ។​ យោង​តាម​ក្រុម​ហ៊ុន​ CBRE​ បាន​ឲ្យ​ដឹង​ថា​ ខន់ដូ​ថ្មីៗ​ចំនួន​៦៣៦​បន្ទប់​ត្រូវ​បាន​ដាក់​​លក់​កាល​ពី​ឆ្នាំ​២០១២។

របាយការណ៍​នេះ​បាន​បង្ហាញ​ថា​ ចំនួន​៦៦​​ភាគរយនៃ​ខន់​ដូ​ទាំង​នោះ​ត្រូវ​បាន​លក់​ដាច់​ ពោល​គឺ​មាន​ការ​កើន​ឡើង​ចំនួន​៥,១​ភាគ​រយ​ បើ​ធៀប​នឹង​ឆ្នាំ​២០១១។

ក៏​ប៉ុន្តែ​ របាយការណ៍​បង្ហាញ​ថា​ “ ទីផ្សារ​អចល​ន​ទ្រព្យ​” នៅ​តែ​គ្រប​ដណ្តប់​ដោយ​ខន់ដូ​ ដែល​ត្រូវ​បាន​លក់​ទៅ​ឲ្យ​អ្នក​រក​ស៊ី​ទិញ​ដូរ​ ដើម្បី​ទទួល​បាន​ប្រាក់​ចំណេញ​ភ្លាមៗ​ ទាំង​មិន​ទាន់​សាង​សង់​រួច​ ដោយ​ជា​រឿយៗ​តែង​តែ​មាន​ការ​បញ្ចុះ​តម្លៃ។

របាយការណ៍​បង្ហាញ​ថា​ “ ការ​ធ្វើ​បែប​នេះ​​បាន​ធ្វើ​ឲ្យ​ខន់ដូ​ ដែល​ត្រូវ​បាន​សាងសង់​រួច​​​មាន​អត្រា​អ្នក​ចូល​ទៅ​រស់​នៅទាប” ​ ហើយ​របាយ​ការណ៍​នេះ​បាន​កត់​សម្គាល់​ថា​ មិន​យូរ​ប៉ុន្មាន​ អ្នក​ទិញ​ទាំង​នេះ​នឹង​ខិត​ខំ​ស្វះ​ស្វែង​រក​លក់​អចល​ន​ទ្រព្យ​របស់​ខ្លួន​ចេញ​ ដែល​ការ​ធ្វើ​ដូច្នេះ​នឹង​ធ្វើ​ឲ្យ​មាន​ទីផ្សារ​ “ ដែល​មាន​ការ​​ប្រកួត​ប្រជែង​ខ្លាំង​”។

ក៏​ប៉ុន្តែ​ ក្រុម​ហ៊ុន​ CBRE​ ពិត​ជា​ព្យាករ​ថា​ តម្រូវ​ការ​ខន់ដូ​មុខ​ជា​នឹង​កើន​ឡើង​នៅ​ក្នុង​ឆ្នាំ​២០១៣​នេះ។ របាយការ ណ៍​នេះ​បាន​ចេញ​​នូវ​ការ​ព្យាករ​ដូច្នេះ​ថា​ “ នៅ​ពេល​ទីក្រុង​កាន់​តែ​​រីក​ធំទៅ​ ហើយ​​ធ្វើ​ឲ្យ​ដី​ឡើង​ថ្លៃ​ នោះ​ទី​ផ្សារ​​នៅក្នុង​ស្រុក ​មុខ​ជា​នឹង​ចាប់​ផ្តើម​សម្លឹង​រក​ទិញ​​ខន់​ដូ​ជា​មិន​ខាន​”។

លោក​ ស៊ឹង ប៊ុណ្ណា​ នាយក​ក្រុម​ហ៊ុនអចល​ន​​ទ្រព្យ​ ប៊ុណ្ណា​ រៀលធី​ គ្រុប​ (Bonna Realty Group)​ ​មាន​ប្រសាសន៍​ថា​ អ្នក​អភិ​វឌ្ឍ​ និង​អ្នក​ទិញ​គួរ​តែ​មាន​ការ​ប្រយ័ត្ន​ប្រយែង​អំពី​ការ​រក​ស៊ី​ប្រថុយ​ខាង​ខន់ដូ​។

លោក​បាន​មាន​ប្រសាសន៍​ថា​ “ នៅ​ពេល​ណា​ពួក​គាត់​ទិញ​ខុស​ពី​តម្លៃ​ទី​ផ្សារ​ធម្មតា​ ហើយ​នៅ​ពេល​វា​មាន​តម្លៃ​ខ្ពស់​ជាង​តម្លៃ​ ដែល​អ្នក​ទិញ​ត្រូវ​ទិញ​ នៅ​ពេល​នោះ​វា​ធ្វើ​ឲ្យ​​តម្លៃ​ប៉ោង​ឡើង​”។​ លោក​បាន​បន្ថែម​ទៀត​​ថា​ ​លោក​គិត​ថា​ គ្មាន​តម្រូវ​ការ​អចល​ន​ទ្រព្យ​ច្រើន​ទេ​ ប្រសិន​បើ​តម្លៃ​វា​ខ្ពស់​ជាង​១.៥០០​ដុល្លារ​ក្នុង​មួយ​ម៉ែត្រក្ រឡា​នោះ។ លោក​បាន​លើក​ឡើង​ថា​ “អ្នក​អភិវឌ្ឍណា​ដែល​ចង់​លក់​ក្នុង​តម្លៃ​លើស​ពី​២.០០០​ដុល្លារ ​ក្នុង​មួយ​ម៉ែត្រ​ក្រឡា នោះ​ហើយ​ជា​ក្តី​បារម្ភ​”។

លោក​ ស៊ុននី​ ស៊ូ​ (Sunny Soo)​ នាយក​ប្រចាំ​ប្រទេស​ក្រុម​ហ៊ុន​ ហ្វ្រែង​ ណាយ​ (Frank ​Knight)​ ​មាន​ប្រសាសន៍​ថា​ ការ​រក​ស៊ី​ប្រថុយ​អាច​ជា​ក្តី​បារម្ភ​ តែ​នៅ​ពេល​ណា​គេរក​ស៊ី​ធំ​ពេក​នោះ​ទេ​ ហើយ​អ្នក​ទិញ​ខន់ដូ​ទាំង​នោះ​តំណាង​ឲ្យ​វិនិយោគគិន​ស្រប​ច្បាប់។

លោក​បាន​ឲ្យ​ដឹង​ថា​ នៅ​​រាជ​ធានី​ភ្នំ​ពេញ “ មិន​មានចន្លោះ​ប្រហោង​ណាសម្រាប់​រក​ស៊ី​​ប្រថុយ​ ដើម្បី​ចំណេញ​បាន​ប្រាក់​ច្រើន​ខាង​ផ្ទះ​ល្វែង​នោះ​ទេ” ហើយ​លោក​បាន​បន្ថែម​ទៀត​ថា​ អ្នក​ទិញ​ប្រហែល​ជា​មិន​រស់​នៅ​ក្នុង​ប្រទេស​កម្ពុជា​គ្រប់​ពេល​វេលា​នោះ​ទេ​ ឬក៏​ប្រហែល​ជា​នៅ​តែ​ត្រៀម​ខ្លួន​ជួល​អចលន​ទ្រព្យ​ទាំង​នេះ​ទៅ​ឲ្យ​អ្នក​ជួល​។ការ​រក​ស៊ី​ទិញប្រថុយ​​នេះ​វា​ហួស​ទៅ​ហើយ។​ នៅ​​សល់​តែ​តម្រូវ​ការ​ពិត​ប្រាកដ​នោះ​ទេ​”៕​ កុក​ទៀន

© 2024, ខេមបូឌា ដេលី. All rights reserved. No part of this article may be reproduced in print, electronically, broadcast, rewritten or redistributed without written permission.

អត្ថបទទាក់ទង

អត្ថបទអានច្រើន

សេចក្ដីរាយការណ៍ពិសេស