ក្រុមមន្ត្រីបានឲ្យដឹងកាលពីថ្ងៃព្រហស្បតិ៍ថា មជ្ឈមណ្ឌលអភិវឌ្ឍន៍កសិកម្មកម្ពុជា ឬហៅកាត់ថា អង្គារសេដាក បានចំណាយថវិកាចំនួន៥០០.០០០ដុល្លារ ដើម្បីសាងសង់រោងម៉ាស៊ីនកិនស្រូវមួយកន្លែងនៅខណ្ឌពោធិ៍សែនជ័យ រាជធានីភ្នំពេញ ដោយសង្ឃឹមថា នឹងអាចនាំអង្ករចេញទៅបរទេសបានកាន់តែច្រើន។
លោក យ៉ង សាំងកុមារ ប្រធានអង្គការសេដាកមានប្រសាសន៍ថា “ យើងសង្ឃឹមថា នៅឆ្នាំ២០១៣ យើងនឹងអាចនាំអង្ករចេញទៅកាន់សហរដ្ឋអាមេរិកបានចន្លោះពី២០០តោន ទៅ៣០០តោន ពីព្រោះឥឡូវនេះយើងមានរោងម៉ាស៊ីនកិនស្រូវផ្ទាល់ខ្លួន”។ លោកបានបន្ថែមទៀតថា អង្គការសេដាកនាំអង្ករចេញទៅកាន់សហរដ្ឋអាមេិកបានជាង១០០តោនកាលពីឆ្នាំមុន ដោយគ្មានរោងម៉ាស៊ីនកិនស្រូវផ្ទាល់ខ្លួន។
លោក យ៉ង សាំងកុមារ បានឲ្យដឹងថា អង្គការសេដាកបានទិញម៉ាស៊ីនកិនស្រូវពីក្រុមហ៊ុនផលិតម៉ាស៊ីនកិនស្រូវជប៉ុន តៃវ៉ា សេគី ខប (Taiwa Seiki Corp)។ លោកបានមានប្រសាសន៍ថា “ នៅក្នុងរយៈពេល១០ឆ្នាំខាងមុខ យើងសង្ឃឹមថា នឹងអាចសាងសង់រោងម៉ាស៊ីនកិនស្រូវបានចំនួន១០០កន្លែងនៅទូទាំងប្រទេស…ដើម្បីបង្កើនការនាំចេញអង្ករ”។
លោកក៏បានឲ្យដឹងផងដែរថា អង្គការសេដាក កំពុងតែជួយជ្រោមជ្រែងដល់ស្រុកមួយចំនួននៅក្នុងខេត្តព្រៃវែង និងខេត្តតាកែវ ដើម្បីទិញម៉ាស៊ីនកិនស្រូវផ្ទាល់ខ្លួននៅដំណាច់ឆ្នាំ២០១៣។
លោក យ៉ង សាំងកុមារ បានបន្តទៀតថា “ដំបូងយើងនឹងជួយសាងសង់រោងម៉ាស៊ីនកិនស្រូវក្នុងស្រុកកំចាយមារ និងស្រុកស៊ីធរកណ្តាល ខេត្តព្រៃវែងជាមុនសិន ហើយបន្ទាប់មកទៀតនៅស្រុកត្រាំកក់ ខេត្តតាកែវ។ យើងសង្ឃឹមថា នឹងអាចបញ្ចប់រួចរាល់នៅដំណាច់ឆ្នាំ២០១៣នេះ”។ លោកបានបន្ថែមទៀតថា ស្រុកនីមួយៗប្រហែលជាត្រូវចំណាយថវិកាអស់ប្រហែល២៥០.០០០ដុល្លារ ដើម្បីទិញម៉ាស៊ីនកិនស្រូវមួយគ្រឿង។
លោក យ៉ង សាំងកុមារ បានមានប្រសាសន៍ថា នៅឆ្នាំ២០១៤ អង្គការសេដាកសង្ឃឹមថា នឹងអាចនាំចេញអង្ករបានចំនួន៥.០០០តោន នៅក្នុងឆ្នាំ២០១៥អាចនាំចេញបាន១០.០០០តោន ហើយនៅឆ្នាំ២០២២ នឹងអាចនាំចេញបានចំនួន១០០.០០០តោន។
អ្នកស្រី សៅ សាមឿន ម្ចាស់រោងម៉ាស៊ីនកិនស្រូវក្នុងស្រុកកំចាយមារ បានឲ្យដឹងថា មានប្រជាកសិករចំនួន១.៦៨១នាក់ ដែលចូលរួមថវិកា ដើម្បីសាងសង់រោងម៉ាស៊ីនកិនស្រូវនេះឡើង។
អ្នកស្រីបាននិយាយថា “ រោងម៉ាស៊ីនកិនស្រូវនេះមានសារៈសំខាន់ណាស់ សម្រាប់ប្រជាពលរដ្ឋ ពីព្រោះនៅពេលប្រជាកសិករប្រមូលផលស្រូវបាន រោងម៉ាស៊ីននេះធ្វើឲ្យមានភាពងាយស្រួលដល់ពួកគាត់ក្នុងការលក់ស្រូវល្អៗ។ ខ្ញុំចង់ឲ្យសមាជិករបស់យើងទាំងអស់ក្លាយជាអ្នកមានទាំងអស់គ្នា”។
ប្រទេសកម្ពុជា បានខាតបង់អស់រយៈពេលជាយូរមកហើយ ដោយសារមានការនាំស្រូវមិនសូវល្អចេញទៅកាន់ប្រទេសជិតខាងជាច្រើន។ ក៏ប៉ុន្តែ រដ្ឋាភិបាលកម្ពុជា បានដាក់ទិសដៅនាំអង្ករចេញឲ្យបានចំនួន១លានតោននៅត្រឹមឆ្នាំ២០១៥។
បើយោងតាមលោក គឹម សាវុធ ប្រធានសហព័ន្ធអ្នកនាំចេញអង្ករកម្ពុជា បានឲ្យដឹងថា កាលពីឆ្នាំមុន ប្រទេសកម្ពុជានាំចេញអង្ករសរុបបានចំនួន២៥០.៨០០តោន។ លោកបានមានប្រសាសន៍ថា “ ឆ្នាំនេះ យើងសង្ឃឹមថា នឹងអាចនាំចេញបានជាង៤០០.០០០តោន”៕ កុកទៀន