36 C
Phnom Penh

នគរបាល​កំណត់​មុខសញ្ញាជន​សង្ស័យ​ក្នុង​ករណីជះ​ទឹក​អាស៊ីត​ បណ្ដាល​ឲ្យ​មនុស្ស​ស្លាប់​

ដោយ ឌឹ ខេមបូឌា ដេលី

បទវិភាគ

នគរបាល​ខេត្តបាត់​ដំបង​​​​ លើក​​​ឡើងថាខ្លួន​បាន​បាត់​បង់​តម្រុយក្នុង​ការ​ស្វែង​រក​​ជន​សង្ស័យតែ​ម្នាក់​គត់​នៅ​ក្នុង​ករណី​ជះ​ទឹក​អាស៊ីត​បណ្តាល​​​​​​ឲ្យ​​ស្ត្រី​វ័យ​ក្មេង​ម្នាក់​​ស្លាប់​ នៅខេត្ត​ព្រះ​​​សីហនុ កាល​ពី​ខែ​មុន។

លោក ចិត្ត​ វណ្ណី ស្នង​ការ​រង​នគរ​បាល​​ខេត្ត​ បាន​មាន​ប្រសាសន៍​កាល​ពី​ម្សិលមិញថា ​គេ​គិត​ថា ជន​សង្ស័យ​ឈ្មោះ​ រឿន មឿន អាយុ​​​២២​ឆ្នាំ បាន​រត់​គេច​ខ្លួន​ពី​ខេត្ត​បាត់​ដំបង​ទៅ​ក្រុង​ប៉ោយប៉ែត​ ខេត្ត​បន្ទាយ​មាន​ជ័យ ប៉ុន្ដែ នគរបាលមិន​ដឹង​ថា ជន​នេះ​បាន​ទៅ​ទីណា​ឲ្យ​ប្រាកដ​នោះ​ឡើយ។

លោក​បាន​មាន​ប្រសាសន៍​ថា “យើង​បាន​បាត់​តម្រុយ​ជន​នោះហើយ​”។ លោក​បាន​បន្ថែម​ថា លោក​បាន​បញ្ជូន​រូប​ថត​ និង​ព័ត៌មាន​ស្ដី​ពី​ជន​សង្ស័យ​ទៅ​នគរបាល​ក្រុង​ប៉ោយ​ប៉ែត​ជិត​ព្រំដែន​ថៃ​រួច​ហើយ​។

លោក ចិត្ត​ វណ្ណី បាន​មាន​​​ប្រសាសន៍​​​បន្ថែមទៀត​ថា “​យើង​បាន​បញ្ជូន​រូប​ថត​​ជន​នេះ ហើយ​បាន​ប្រាប់​នគរបាល​​នៅ​ជិត​ព្រំ​​​ដែន​​​​​ឲ្យ​​តាម​ឃ្លាំ​មើល​ជន​នេះ​”។

លោក ស៊ុន សាវុធ អធិការ​រង​ក្រុង​ប៉ោយ​​​ប៉ែត បាន​មាន​ប្រសាសន៍​ថា លោកគ្មាន​ព័ត៌មាន

​​អំពី​ទី​កន្លែង​លាក់​ខ្លួន​របស់ជនសង្ស័យ​​​​ឈ្មោះ​ មឿន ទេ​ ប៉ុន្ដែ លោកក៏​បាន​ផ្សព្វ​ផ្សាយ​​​ព័ត៌​​​មាន​​​​​​​​​​អំពីជន​សង្ស័យ​​នេះ​ទៅ​នគរបាល​ ក្នុង​ក្រុង​ប៉ោយ​​​ប៉ែត​​​​រួច​ហើយ​។

ស្ត្រី​វ័យ​១៩​ឆ្នាំ​ម្នាក់​ ​​​ឈ្មោះ គ្រុយ អាំង​ឆេង បាន​ស្លាប់​យ៉ាង​​​អាណោច​​​អាធមកាល​ពី​ថ្ងៃ​ទី​២២ ខែ​ធ្នូ​ឆ្នាំ​២០១២ កន្លងទៅថ្មីៗនេះ នៅ​គ្លីនិក​ឯកជន​មួយ​ ក្នុង​រាជ​ធានី​ភ្នំពេញ​ បន្ទាប់​ពី​រង​ការ​ស្រោច​ទឹក​អាស៊ីត​កម្រិតខ្លាំង​លើ​ក្បាល​ និងចាក់​ចូលទៅ​ក្នុង​មាត់​របស់​នាង​ នៅ​ក្បែរ​ផ្ទះ​របស់​នាង​ ក្នុង​សង្កាត់​លេខ​​​៤ ​ក្រុង​ព្រះសីហនុ​ ​នៅ​​យប់​​នោះ។

គ្រុយ អាំងឆេង គឺ​ជា​មនុស្ស​ទី​​២ ដែល​​បាន​ស្លាប់​ដោយសារ​ការ​ជះ​ទឹក​អាស៊ីត​​នៅ​​ឆ្នាំ​២០១២ និង​ជា​ជន​រង​គ្រោះដោយសារ​ការ​ជះ​ទឹក​អាស៊ីត​ទី​៧​នៅ​ឆ្នាំមុន​។

មិន​ដល់​​មួយ​សប្តាហ៍​ផង​ បន្ទាប់​ពី​ស្ត្រី​វ័យ​ក្មេង​រូប​នេះ​ស្លាប់​ ស្ត្រីម្នាក់​ទៀត​ឈ្មោះ​ យី អូន អាយុ​​៤០​ឆ្នាំ និង​កូន​ប្រុស​របស់​គាត់​ឈ្មោះ​ នួន ជីវ័ន្ដ អាយុ១៩​ឆ្នាំ បាន​រង​ការ​ជះ​ទឹក​អាស៊ីតពី​សំណាក់​បុរស​ពីរនាក់​ ដែល​មក​រក​ទិញ​ទំនិញ​នៅ​ផ្ទះ​របស់​ជន​រង​គ្រោះ​ នៅ​​ជាប់​ចិញ្ចើម​​ផ្លូវ​ ក្នុង​ក្រុង​សៀមរាប ​ហើយ​​ករណី​ទាំង​ពីរ​នេះ​គឺ​ជា​ករណី​ជះ​ទឹក​អាស៊ីត​លើក​​ទី​៨ និង​ទី​៩ ក្នុង​ឆ្នាំ​២០១២៕ សុខុម

© 2024, ខេមបូឌា ដេលី. All rights reserved. No part of this article may be reproduced in print, electronically, broadcast, rewritten or redistributed without written permission.

អត្ថបទទាក់ទង

អត្ថបទអានច្រើន

សេចក្ដីរាយការណ៍ពិសេស