37 C
Phnom Penh

បុគ្គលិក​ក្រុម​ហ៊ុនអឹមហ្វូន ​ប្តឹង​​តវ៉ា​ជុំវិញ​ការ​បណ្តេញ​ពួកគេ​ចេញ​ពីការងារ​ដោយ​ខុស​ច្បាប់​​

ដោយ ឌឹ ខេមបូឌា ដេលី

បទវិភាគ

បុគ្គលិក​ក្រុម​ហ៊ុន​ទូរស័ព្ទដៃ​អឹមហ្វូន​ ​បាន​ដាក់​ពាក្យ​ប្តឹង​​ក្រុម​ហ៊ុន​ ដែល​គ្រប់​គ្រង​ដោយ​ជន​ជាតិ​ថៃនេះ​ដោយ​ចោទ​​ប្រកាន់​ថា​​​ ពួកគេ​​ត្រូវ​បាន​បណ្តេញ​ចេញ​ពី​ការងារ​ ដោយ​ខុស​ច្បាប់​ និង​មិន​​មាន​ប្រាក់​សំណង។

កញ្ញា សូ លីដា អាយុ​២៦ឆ្នាំ​​​ តំណាង​​ឲ្យ​បុគ្គលិក​ក្រុមហ៊ុន​​អឹម​ហ្វូន​ប្រហែល​៥០នាក់​ បាននិយា យថា កាលពី​ថ្ងៃទី​១៦ ខែវិច្ឆិកា​ ឆ្នាំ​២០១២ ការិយាល័យ​​ធន​ធាន​មនុស្ស​​​បាន​ប្រាប់​​​ពួកគាត់​​ឲ្យ​ឈប់​សម្រាក​ពី​​​ការ​ងារ​​​រយៈ​ពេល​មួយខែ​។ ប៉ុន្តែ នៅ​ពេល​ពួកគាត់​​ត្រឡប់​មក​ធ្វើការ​វិញ កាលពី​ខែមុន អ្នក​គ្រប់​គ្រង​ម្នាក់​នៅ​ក្នុង​ការិយាល័យ​​នេះប្រាប់ពួក​គាត់​​​​ថា​​ពួក​គាត់​ត្រូវ​រង់​ចាំ​បទ​បញ្ជា​ពី​ម្ចាស់​ក្រុម​ហ៊ុន​ជាមុនសិន មុន​នឹង​អនុញ្ញាត​ឲ្យ​បុគ្គលិក​ទាំង​នោះ​ចូល​ធ្វើការ​វិញ។

កញ្ញា លីដា និយាយបន្តថា “ខ្ញុំ​ចង់​ឲ្យ​ក្រុម​ហ៊ុន​​​អឹមហ្វូន​ អនុញ្ញាត​ឲ្យ​​យើង​​​​ចូល​ធ្វើការ​នៅក្នុង​ក្រុម​ហ៊ុន​វិញ​ ប៉ុន្តែ ប្រសិន​បើ​ក្រុម​ហ៊ុន​​មិន​អនុញ្ញាតឲ្យ​ពួក​យើង​ចូល​ធ្វើការ​វិញ​ទេ ​ក្រុម​ហ៊ុន​ត្រូវ​តែ​បើក​ប្រាក់​ខែ​ និង​ប្រាក់​អតីតភាពការ​ងារ​​ឲ្យ​ពួកយើង​”។

ដើម្បី​ជួយ​ពួកគាត់​ដាក់​ពាក្យ​បណ្តឹង​ជា​ផ្លូវ​ការ​នៅ​នាយក​ដ្ឋាន​ដោះ​ស្រាយ​វិវាទ​ការ​ងារ​នៅ​ក្រសួង​ការងារ​ បុគ្គលិក​ទាំង​អស់​នោះ​បាន​ទាក់​ទង​សហជីពសេរី​កម្មករ​។

អ្នក​​គ្រប់​គ្រង​​ម្នាក់​​នៅ​​ការិយាល័យ​ធន​ធាន​​មនុស្ស​របស់​ក្រុម​ហ៊ុន​​អឹមហ្វូន​ ដែល​បាន​បដិសេធមិន​ប្រាប់​ឈ្មោះ​ដោយ​សារ​​គាត់​មិន​ត្រូវ​បាន​អនុញ្ញាត​ឲ្យ​និយាយ​ជា​មួយ​​​អ្នក​សារ​ព័ត៌មាន​បាន​និយាយ​ថា ក្រុម​ហ៊ុន​​មិន​បាន​បណ្តេញ​បុគ្គលិក​ទាំង​នោះ​ចេញ​ទេ​ ហើយ​​ក្រុមហ៊ុន​​នឹង​ដោះ​ស្រាយ​បណ្តឹង​នេះ​ដើម្បី​ “ជៀស​វាង​​ការ​រំលោភ​​សិទ្ធិ​របស់​បុគ្គលិក”។

ពាក្យ​បណ្តឹងនេះ​ជា​​បណ្តឹង​ចុង​ក្រោយ​​ប្តឹង​​ក្រុម​ហ៊ុន​អឹមហ្វូន​ ដែល​កាល​ពី​ខែ​តុលា ​​រង​​ការ​​ចោទ​ប្រកាន់​ពី​ករណី​ផ្សេង​គ្នា​ថា មិន​បាន​សង​ប្រាក់​ ដែល​ខ្លួន​បាន​ជំពាក់​ក្រុមហ៊ុន​ថាមពល​មួយ​ និង​ក្រុម​ហ៊ុន​​ទូរគមនាគមន៍​​មួយ​ផ្សេង​ទៀត​។

ក្រុម​ហ៊ុន​ទូរស័ព្ទចល័ត​ហេឡូ​អាស៊ីត​តា​​(Hello Axiata Co. Ltd) និង​ក្រុមហ៊ុន​ឡាតែល ដែល​បាន​​រួម​បញ្ចូល​គ្នា​ ​បាន​គំរាម​ប្តឹង​ក្រុម​ហ៊ុន​អឹមហ្វូន​ ចំពោះ​ការ​​ជំពាក់​​ប្រាក់​​សេវា​ឆ្លង​ប្រព័ន្ធ​​រាប់​​សែន​​ដុល្លារ​។

ប៉ុន្មាន​​ថ្ងៃក្រោយ​មក សាលា​ដំបូង​រាជ​ធានី​​ភ្នំពេញ​បាន​បង្គាប់​​មិន​ឲ្យ​ក្រុម​ហ៊ុន​អឹម​ហ្វូន​​​​លក់​ទ្រព្យសម្បត្តិ​របស់​ខ្លួន​បន្ទាប់​ពី​ក្រុម​ហ៊ុន​ថាម​ពល​អេតិចវ៉ាល់លឺ របស់​ជនជាតិ​ន័រ​វែស​បាន​ប្តឹង​ទាមទារ​ឲ្យ​ក្រុម​ហ៊ុន​អឹមហ្វូន​ សង​ប្រាក់​​ថ្លៃ​សេវា​ចំនួន​៣,៧៣លាន​ដុល្លារ​។

ឆ្លើយ​តប​ចំពោះ​សេចក្តី​សម្រេច​នោះ លោក អាទីប រិទ្ធិតាផន នាយក​ចាត់​ការ​នៅ​ក្រុម​ហ៊ុន​សេរីងតុន អីុនវេសមិន (Sherington Investments)ជាក្រុម​ហ៊ុន​រកស៊ី​រួម​​គ្នា​ជាមួយ​ក្រុម​ហ៊ុន​អឹមហ្វូន​នៅ​ពេល​នោះ​ បាន​មាន​ប្រសាសន៍ថា ក្រុម​ហ៊ុន​អឹមហ្វូន​ ពិត​ជា​ជាប់​បំណុល​គេ​មែន​​ ហើយ​ព្យាយាម​ធ្វើ​យ៉ាង​ណា​ ឲ្យ​មាន​សេចក្តី​សម្រេច​មួយ​​នៅ​ពេល​ខាង​មុខនេះ​៕ ណៃ

© 2024, ខេមបូឌា ដេលី. All rights reserved. No part of this article may be reproduced in print, electronically, broadcast, rewritten or redistributed without written permission.

អត្ថបទទាក់ទង

អត្ថបទអានច្រើន

សេចក្ដីរាយការណ៍ពិសេស