យោងតាមសមាជិកក្រុមគ្រួសាររបស់បុរសជនជាតិបារាំង ដែលត្រូវគេប្រទះឃើញស្លាប់ជាមួយនឹងកូនៗបួននាក់របស់គាត់នៅក្នុងស្រះទឹក យ៉ាងអាថ៌កំបាំងកាលពីឆ្នាំមុនក្នុងខេត្តកំពង់ស្ពឺ បានលើកឡើងនៅសប្តាហ៍នេះថា សាច់ញាតិរបស់ខ្លួន ធ្លាប់មានជម្លោះក្នុងការកាន់កាប់ទ្រព្យសម្បត្តិដីធ្លី ជាមួយក្រុមគ្រួសារខាងប្រពន្ធរបស់ខ្លួន។
លោក សាវីយេ វ៉ាល្លីយេ (Xavier Vallier) ត្រូវជាបងប្អូនបង្កើតរបស់លោក ឡូរ៉ង់ វ៉ាល្លីយេ (Laurent Vallier) បានលើកឡើងក្នុងអីុម៉េលថា ទំនាក់ទំនងរបស់បងប្អូនលោកជាមួយនឹងបងប្អូនសាច់ថ្លៃ តែងតែមានបញ្ហាឈ្លោះប្រកែកគ្នា ជុំវិញបញ្ហាលុយកាក់។ លោកនិយាយថា “ សូម្បីកាលប្រពន្ធរបស់គាត់នៅរស់ក្តី គ្រួសារនេះចាត់ទុក ឡូរ៉ង់ វ៉ាល្លីយេ ជាមនុស្សចិត្តទូលាយ”។
តែទោះជាយ៉ាងណា បន្ទាប់ពីប្រពន្ធរបស់គាត់បានស្លាប់ទៅកាលពីឆ្នាំ២០០៩ ពួកគេចាប់ផ្តើមឈ្លោះគ្នាកាន់តែខ្លាំងឡើង។ លោកនិយាយថា “ នៅមុនពេលគាត់បាត់ខ្លួន [កាលពីខែកញ្ញាឆ្នាំ២០១១] គាត់ត្រូវចោរប្លន់ ចំ ណែ ក ទ្រព្យសម្បត្តិមួយចំនួនត្រូវគេបំផ្លាញ ហើយឆ្កែ និងជ្រូករបស់គាត់ត្រូវគេបំពុលឲ្យងាប់ទៀតផង”។
លោកបន្តថា “ មានរឿងចោរលួចជាច្រើនលើក ដោយករណីលួចគួរឲ្យកត់សម្គាល់បំផុត គឺករណីលួចប័ណ្ណកម្មសិទ្ធិដីស្រែ ទំហំប្រហែល១៥ហិកតា ដែលក្រោយមកបានក្លាយជាកម្មសិទ្ធិរបស់គ្រួសារសាច់ថ្លៃ”។
អ្នកស្រី ហ្សេណេវីវ វ៉ាល្លីយេ (Genevieve Vallier) ដែលត្រូវជាម្តាយបង្កើតរបស់លោក ឡូរ៉ង់ វ៉ាល្លីយេ ក៏បានសង្ស័យដែរថា ប័ណ្ណកម្មសិទ្ធិដីស្រែដែលកូនប្រុសរបស់គាត់ និងប្រពន្ធកូនគាត់ ដែលបានស្លាប់ទៅ បានទិញសម្រាប់ធ្វើស្រែចម្ការនោះ មានគេលួចយកទៅបាត់ហើយ។
អ្នកស្រីលើកឡើងក្នុងអីុម៉េលមួយថា
“ ដោយសារជំពាក់បំណុលគេរុំកោះ ខាងសាច់ថ្លៃបានលួចប័ណ្ណកម្មសិទ្ធិ ដីស្រែទំហំ១៥ហិកតា ដែល ឡូរ៉ង់ និងប្រពន្ធបានទិញ ដើម្បីយកដីនោះទៅលក់”។
អ្នកស្រីក៏បានអះអាងដែរថា ឪពុកក្មេករបស់លោក ឡូរ៉ង់ វ៉ាល្លីយេ ឈ្មោះ ទិត ឈួន បានទាក់ទងស្ថានទូតបារាំង ក្នុងរាជធានីភ្នំពេញ ពីរបីថ្ងៃមុនពេលសាកសពកូនប្រុសរបស់គាត់ត្រូវបានរកឃើញនៅក្នុងស្រះទឹកខាងក្រោយផ្ទះរបស់គាត់ ហើយក៏បានទាមទារសិទ្ធិគ្រប់គ្រងទ្រព្យសម្បត្តិរបស់គាត់ ពីព្រោះគាត់ និងកូនៗ “ បានស្លាប់អស់ហើយ”។
ការព្យាយាមទាក់ទងជាច្រើនលើកទៅបងប្អូនសាច់ថ្លៃរបស់លោក ឡូរ៉ង់ វ៉ាល្លីយេ គ្មានការឆ្លើយតបទេ។ តែទោះជាយ៉ាងណា ពួកគេធ្លាប់និយាយហើយថា ពួកគេគ្មានផលប្រយោជន៍ក្នុងដីស្រែទាំងនេះទេ ហើយមិនជាប់ពាក់ ព័ន្ធ ករណីស្លាប់របស់លោក វ៉ាល្លីយេ និងកូនទាំងបួននាក់របស់គាត់ឡើយ។
អ្នកស្រី ប៉ាស្កាល់ ហ្គូជេ (Pascale Gautier) ជាមិត្តភក្តិរបស់លោក ឡូរ៉ង់ វ៉ាល្លីយេ ដែលបានជួបគាត់តែប៉ុន្មានសប្តាហ៍ មុនពេលគាត់បានបាត់ខ្លួនកាលពីខែកញ្ញានោះ បាននិយាយថា នាពេលនោះសម្រាប់ ឡូរ៉ង់ មើលទៅ
អ្វីៗហាក់ដូចជាធម្មតា ប៉ុន្តែគាត់បាននិយាយអំពីជម្លោះជាមួយបងប្អូនសាច់់ថ្លៃ ដោយសារការទាមទារសិទ្ធិកាន់កាប់ដីធ្លី។
អ្នកស្រី ប៉ាស្កាល់ ហ្គូជេ និយាយថា “ទំនាក់ទំនងរវាង ឡូរ៉ង់ និងបងប្អូនសាច់ថ្លៃមិនដែលបានល្អម្តងណាឡើយ ហើយទំនាក់ទំនងនេះកាន់តែអាក្រក់ទៅៗ បន្ទាប់ពីកូនស្រីរបស់ពួកគេបានស្លាប់ទៅ”។
អ្នកស្រី គូជេ បានបន្ថែមទៀតថា លោក ឡូរ៉ង់ វ៉ាល្លីយេ ទើបតែលក់ផ្ទះរបស់គាត់ទៅរស់នៅក្នុងខេត្តព្រៃវែង និងធ្វើស្រែលើដីរបស់គាត់នៅទីនោះ។ គាត់មានផែនការជាច្រើនសម្រាប់ពេលអនាគត ហើយគាត់ជាឪពុកដ៏ល្អម្នាក់គិតអំពីអនាគតកូនៗរបស់គាត់។
មន្ត្រីសាលាដំបូងខេត្តកំពង់ស្ពឺ ក៏កំពុងស៊ើបអង្កេតពីជម្លោះដ៏អូសបន្លាយរវាងលោក ឡូរ៉ង់ វ៉ាល្លីយេ និងបងប្អូនសាច់ថ្លៃរបស់គាត់រឿងកម្មសិទ្ធិទ្រព្យសម្បត្តិដែរ ដោយសង្ឃឹមថា នឹងមានពន្លឺថ្មីនៅក្នុងករណីស្លាប់របស់បុរសជនជាតិបារាំងរូបនេះ។
លោក ឈឹម ឫទ្ធី ចៅក្រមស៊ើបសួរ បានមានប្រសាសន៍ថា នៅថ្ងៃទី២៤ខែមករា លោកនឹងសាកសួរមនុស្សប្រាំនាក់ រួមទាំងលោក ឈួន ឪពុកក្មេករបស់លោក ឡូរ៉ង់ វ៉ាល្លីយេ អ្នកស្រី ស សាវី ម្តាយក្មេករបស់គាត់ និងអ្នកស្រី ស្រី អូន ដែលត្រូវជាប្អូនថ្លៃផងដែរថា តើគ្រួសារនេះទទួលបានប័ណ្ណកម្មសិទ្ធិដីធ្លីក្នុងស្រុកកំពង់ត្របែក ខេត្តព្រៃវែង ដែលធ្លាប់ជាកម្មសិទ្ធិរបស់បុរសជនជាតិបារាំងរូបនេះដោយរបៀបណា។
ចៅក្រម ឫទ្ធី បានមានប្រសាសន៍កាលពីថ្ងៃអង្គារថា “ វាមិនមែនជាជម្លោះទេ ប៉ុន្តែគ្មានកិច្ចព្រមព្រៀងលើដីនេះទេ ហើយស្ត្រីដែលជាបងប្អូនសាច់ថ្លៃ បានទទួលការចោទប្រកាន់ថា បានលួចប័ណ្ណកម្មសិទ្ធិដីធ្លីទាំងនោះ”។លោកបន្ថែមថា លោកបានបញ្ជាទៅ
មន្ត្រីរៀបចំដែនដីខេត្តព្រៃវែង បញ្ជាក់ថា អាជ្ញាធរបានចេញប័ណ្ណកម្មសិទ្ធិដីក្នុងឃុំជ្រៃ នៅពេលណា។
យោងតាមលោក ខាន់ ព្រាច មេឃុំជ្រៃ បានឲ្យដឹងថា ប័ណ្ណកម្មសិទ្ធិដីទាំងប្រាំបួនច្បាប់នោះត្រូវបានស្ត្រីឈ្មោះ អូន ដែលជាបងប្អូនសាច់ថ្លៃចុះបញ្ជីកាលពីរបី ឬបួនខែមុន នៅក្នុងកម្មវិធីផ្តល់ប័ណ្ណកម្មសិទ្ធិដីធ្លីរបស់លោកនាយករដ្ឋមន្ត្រី ហ៊ុន សែន។ លោកបានមានប្រសាសន៍ថា “ ដីនោះត្រូវបានចុះបញ្ជីរួចហើយ ប៉ុន្តែយើងមិនទាន់បានប្រគល់វាឲ្យទៅគ្រួសារនេះនៅឡើយទេ”៕ សុខុម