មេធាវីតំណាងជនរងគ្រោះ បានលើកឡើងកាលពីម្សិលមិញថា ជនរងគ្រោះដែលត្រូវពាណិជ្ជកររុស្ស៊ីឈ្មោះ សឺហ្គី ប៉ូលុនស្គី (Sergei Polonsky) និងជនជាតិរុស្ស៊ីពីរនាក់ផ្សេងទៀត វាយធ្វើបាប កាលពីខែមុន នៅក្នុងខេត្តព្រះសីហនុ បានដកពាក្យបណ្ដឹងរបស់ខ្លួន បន្ទាប់ពីទទួលប្រាក់សំណងជំងឺចិត្ត។
ដំណឹងនេះ បានលេចឡើងនៅពេលក្រសួងការបរទេសរុស្ស៊ី បានអំពាវនាវឲ្យប្រទេសកម្ពុជា ស៊ើបអង្កេតឲ្យបានហ្មត់ចត់ និងមានគោលដៅច្បាស់មួយក្នុងករណីនេះ។
លោក ប៉ូលុនស្គី អាយុ៤០ឆ្នាំ និងគូកនរបស់ខ្លួន ដែលជាជនជាតិរុស្ស៊ីដូចគ្នាពីរនាក់ទៀតឈ្មោះ កុនស្ដានទិន បាក្លេ (Konstantin Baglay) និងឈ្មោះ អាឡិចសាន់ដឺ ការាសុីនស្គី (Alexander Karacinsky) ដែលកំពុងត្រូវឃុំខ្លួនបណ្តោះអា សន្ន និងកំពុងតែប្រឈមមុខនឹងការចោទប្រកាន់នៅឡើយ កាលពីម្សិលមិញ ត្រូវនគរបាលចាប់ខ្លួនកាលពីថ្ងៃទី៣០ ខែធ្នូ បន្ទាប់ពីបានប៉ះទង្គិចគ្នាជាមួយកងរាជអាវុធហត្ថ។
ពួកគេត្រូវតុលាការចោទប្រកាន់កាលពីសប្ដាហ៍មុនពីបទបង្ករបួសស្នាម ដោយចេតនា មកលើកម្មករជនជាតិខ្មែរប្រាំមួយនាក់ ដោយប្រើកូនកាំបិត ហើយបានបង្ខំឲ្យកម្មករទាំងនោះលោតចេញពីទូករបស់ខ្លួន។មន្ត្រីកងរាជអាវុធហត្ថបានលើកឡើងថាពួកគេបានចាប់ខ្លួនជនជាតិរុស្ស៊ីទាំងនោះ បន្ទាប់ពីការបាញ់ព្រមាន និងជិះទូកដេញពីក្រោយពួកគេ។
លោក អ៊ូច សុភ័ក្ត្រា មេធាវីតំណាងឲ្យកម្មករខ្មែរទាំងប្រាំមួយនាក់ មានប្រសាសន៍ថាកូនក្ដីរបស់លោកសុខចិត្តទទួលយកប្រាក់សំណងជំងឺចិត្ត។ លោកបានបន្តថា “កម្មករទាំងនោះ ទាមទារប្រាក់សំណងជំងឺចិត្តម្នាក់ៗចំនួន៥.០០០ដុល្លារ ប៉ុន្ដែ ទីបំផុតជនជាតិរុស្ស៊ីទាំងនោះបានយល់ព្រមផ្តល់ប្រាក់សំណងជំងឺចិត្តទៅឲ្យកម្មករជនជាតិខ្មែរទាំងប្រាំមួយនាក់នោះសរុបចំនួន២០.០០០ដុល្លារ”។
លោកបានមានប្រសាសន៍បន្ដថា “ខ្ញុំបានដកពាក្យបណ្ដឹងពីតុលាការវិញហើយ ប៉ុន្ដែ ជនជាតិរុស្ស៊ីទាំងបីនាក់នោះនៅតែប្រឈមមុខនឹងការចោទប្រកាន់ដដែល”។ លោក សុភ័ក្ត្រា លើកឡើងថា កម្មករទាំងនោះ នឹងមិនផ្ដល់ភ័ស្ដុតាង ដើម្បីចោទប្រកាន់លោក ប៉ូលុនស្គី និងគូកនរបស់លោកឡើយ។ លោកបានមានប្រសាសន៍ថា “ការងាររបស់លោកចប់សព្វគ្រប់ហើយ”។
លោក សំ សុផល ប្រធានពន្ធនាគារខេត្តព្រះសីហនុ បានមានប្រសាសន៍ថា ជនជាតិរុស្ស៊ីទាំងនោះត្រវឃុំខ្លួនបណ្ដោះអាសន្នក្នុងពន្ធនាគារខេត្ត។ លោក សុផល បានលើកឡើងថា លោក ប៉ូលុនស្គី ដែលទំនងជាអាណិតអាសូរគូកនរបស់ខ្លួន ដែលមានការលំបាកក្នុងការស្នាក់នៅក្នុងពន្ធនាគារ ដោយសារមិនមានខ្យល់គ្រប់គ្រាន់ បានទិញកង្វារជាងដប់គ្រឿងរួចហើយឲ្យគេដឹកតាមរ៉ឺម៉កម៉ូតូចូលទៅក្នុងពន្ធនាគារ។ ទោះជាយ៉ាងណា ប្រធានពន្ធនាគាររូបនេះ បានលើកឡើងថា លោកបដិសេធមិនអនុញ្ញាតឲ្យប្រើកង្វារទាំងនេះនៅក្នុងពន្ធនាគារឡើយ ពីព្រោះនេះគឺជាបទបញ្ជាផ្ទៃក្នុង ហើយក៏ដោយសារតែ ដើម្បីសន្សំសំចៃអគ្គិសនីផងដែរ។
លោក ប៉ូលុនស្គី កាលពីឆ្នាំមុន បានទៅរស់នៅលើកោះដែកគោល ដែលលោកបានគ្រប់គ្រងរួមគ្នាជាមួយម្ចាស់ភោជនីយដ្ឋាន និងសណ្ឋាគារផ្ទះពស់ ក្នុងខេត្តព្រះសីហនុ។
លោក ផេង ភឿន អ្នកគ្រប់គ្រងសណ្ឋាគារផ្ទះពស់ ដែលបានជួយចរចាបង់ប្រាក់សំណងជំងឺចិត្តទៅឲ្យកម្មករជនជាតិខ្មែរទាំងប្រាំមួយនាក់នោះ បានបញ្ជាក់ថា ភាគីទាំងពីរបានព្រមព្រៀងគ្នាអស់ហើយ។
លោកមានប្រសាសន៍ដោយមិនបរិយាយច្រើនពីបញ្ហានេះថា“ កម្មករម្នាក់ៗទទួលបានប្រាក់សំណងជំងឺចិត្ត១.០០០ដុល្លារ រីឯប្រាក់ដែលនៅសល់ផ្សេងទៀតខ្ញុំប្រើ ដើម្បីបង់ទៅឲ្យមេធាវី និងចំណាយទៅលើអ្វីៗផ្សេងទៀត”។
នៅក្នុងសេចក្ដីថ្លែងការណ៍ ប្រកាសតាមអុីនធើណិត លោក ប៉ូលុនស្គី បដិសេធចំពោះការចោទប្រកាន់ទាំងនេះ ហើយលើកឡើងថា ហេតុការណ៍ដែលបានកើតឡើង គឺជារឿងយល់ច្រឡំគ្នាតែបន្ដិចបន្ដួចប៉ុណ្ណោះ។
នៅក្នុងសេចក្ដីថ្លែងការណ៍មួយ ដែលបង្ហោះនៅលើគេហទំព័ររបស់ខ្លួន កាលពីល្ងាចថ្ងៃពុធ នាយកដ្ឋានព័ត៌មានក្រសួងការបរទេសរុស្ស៊ី បានលើកឡើងថា ខ្លួនកំពុងតែឃ្លាំមើលសំណុំរឿងនេះយ៉ាងយកចិត្តទុកដាក់បំផុត។
សេចក្ដីថ្លែងការណ៍នេះលើកឡើងថា “ដោយសារតែការចោទប្រកាន់នេះ ជាការចោទប្រកាន់ពីបទល្មើសធ្ងន់ធ្ងរ ហេតុដូច្នេះ យើងជឿជាក់ថា ចាំបាច់អាជ្ញាធរកម្ពុជាត្រូវស៊ើបអង្កេតឲ្យបានហ្មត់ចត់ និងឲ្យបានច្បាស់លាស់ អំពីហេតុការណ៍ទាំងអស់ដែលបានកើតឡើង”។
សេចក្ដីថ្លែងការណ៍នេះ ក៏បានលើកឡើងដែរថា ស្ថានទូតរុស្ស៊ីប្រចាំរាជធានីភ្នំពេញ “បានទាក់ទងភ្លាមៗជាមួយអាជ្ញាធរកម្ពុជា ដើម្បីឲ្យជួយការពារសិទ្ធិ និងផលប្រយោជន៍របស់ប្រជាពលរដ្ឋខ្លួន”។
សេចក្ដីថ្លែងការណ៍នេះ បានបន្ថែមថា“ស្ថានទូតរុស្ស៊ី បានផ្ញើលិខិតទៅក្រសួងការបរទេសកម្ពុជារួចហើយ”។ លោក ប៉ូលុនស្គី បានប្រាប់ឲ្យដឹងថា លោកបានលក់អចលនទ្រព្យរបស់ក្រុមហ៊ុនប៉ូថុក(Potok) ដែលលោកបានបង្កើតឡើង ហើយដែលកាលពីពេលថ្មីៗនេះ ត្រូវគេស្គាល់ថា មានឈ្មោះ មីរ៉េក (Mirax) ។ ក្រុមហ៊ុនអចលនទ្រព្យ ដែលមានឈ្មោះថា មីរ៉េក នេះ គឺជាក្រុមហ៊ុនសាជីវកម្ម ដែលមានទឹកប្រាក់រាប់ពាន់លានដុល្លារ ហើយគេបានស្គាល់ជាទូទៅ
នៅក្នុងទីក្រុងមូស្គូ និងកន្លែងផ្សេងៗទៀត រហូតទាល់តែក្រុមហ៊ុននេះអស់លុយដោយសារតែវិបត្តិហិរញ្ញវត្ថុពិភពលោក។
ក្រសួងមហាផ្ទៃរុស្ស៊ី បានប្រកាសថា ខ្លួនបានបើកការស៊ើបអង្កេតពាក់ព័ន្ធនឹងបុគ្គលិកមួយចំនួន ដែលគេមិនបានបញ្ចេញឈ្មោះរបស់ក្រុមហ៊ុន មីរ៉េក និងវិនិយោគិនមួយចំនួនទៀត ដែលធ្លាប់រកស៊ីជាមួយលោក ប៉ូលុនស្គី ដោយបានអំពាវនាវឲ្យអាជ្ញាធររុស្ស៊ីធ្វើបត្យាប័នលោក ប៉ូលុនស្គី ទៅកាន់ប្រទេសរុស្ស៊ីវិញ។
លោក ប៉ូលុនស្គី បានល្បីឈ្មោះដល់ប្រទេសរុស្ស៊ី កាលពីឆ្នាំ២០១០ នៅពេលលោកទទួលរងការរិះគន់ នៅក្នុងកម្មវិធីផ្សាយបន្ដផ្ទាល់តាមទូរទស្សន៍មួយ ពីអ្នកសារព័ត៌មានដ៏ល្បីឈ្មោះមួយរូបរបស់រុស្ស៊ី គឺលោក អាឡិចសាន់ដឺ ឡេបេដេវ (Alexander Lebedev) ដែលជាអ្នកគ្រប់គ្រងកម្មវិធីចំនួនពីរ គឺកម្មវិធី The Independent និងកម្មវិធី The London Evening Standard។ ជនល្បីឈ្មោះទាំងពីររូបនេះ បានប្ដឹងតវ៉ាគ្នាទៅវិញទៅមកតាមរយៈតុលាការ ទាំងនៅក្នុងទីក្រុងមូស្គូ និងទីក្រុងឡុងដ៍៕ស៊ុយឈាង