លោកនាយករដ្ឋមន្ត្រី ហ៊ុន សែន បានស្នើឲ្យក្រសួងយុត្តិធម៌ពិចារណាការដោះលែង ឈ្មោះ វីរ៉ា ស៊ំុខ្វាមឃីត ជាអ្នកជាតិនិយមជ្រុលថៃ និងលេខារបស់គាត់ឈ្មោះ រ៉ាទ្រី ពីប៉ាតាណាប៉ៃប៊ូន ពីពន្ធនាគារ បន្ទាប់ពីបានជាប់ពន្ធនាគាររយៈពេលជាងពីរឆ្នាំពីបទចារកម្ម។
យោងតាមសេចក្តីប្រកាសមួយចេញ ដោយក្រសួងការបរទេសកាលពីម្សិលមិញបានឲ្យដឹងថា សំណើរបស់លោក ហ៊ុន សែន ធ្វើឡើងបន្ទាប់ពីនាយករដ្ឋមន្ត្រីថៃ លោកស្រីយីងឡាក់ សុីណាវ៉ាត្រា បានលើកឡើងពីបញ្ហានេះ អំឡុងកិច្ចប្រជុំកំពូលអាស៊ាន និងអាសុីបូព៌ា ក្នុងរាជធានីភ្នំពេញ កាលពីខែវិច្ឆិកា។
សេចក្តីប្រកាសនេះលើកឡើងថា “ ជាការឆ្លើយតបនឹងលោកជំទាវ យីងឡាក់ សុីណាវ៉ាត្រា សម្តេចតេជោ ហ៊ុន សែន បានណែនាំក្រសួងយុត្តិធម៌ឲ្យពិចារណា ក្នុងឱកាសថ្វាយព្រះភ្លើងព្រះសពសម្តេចឪ អំពីការកាត់បន្ថយទោសជាប់ពន្ធនាគារសម្រាប់លោក វីរ៉ា ដែលអាចឈានទៅដល់ការលើកលែងទោសនៅពេលខាងមុខ និងការលើកលែងទោសឲ្យអ្នកស្រី រា៉ទ្រី។
លោក វីរ៉ា ត្រូវបានផ្តន្ទាទោសឲ្យជាប់ពន្ធនាគាររយៈពេលប្រាំបីឆ្នាំ និងអ្នកស្រី រ៉ាទ្រី ជាប់ពន្ធនាគារប្រាំមួយឆ្នាំ ពីបទចារកម្ម ឆ្លងដែនខុសច្បាប់ និងចូលក្នុងតំបន់យោធាដែលមានការរឹតបន្តឹងនៅក្នុងខេត្តបន្ទាយមានជ័យ បន្ទាប់ពីត្រូវបានចាប់ខ្លួន ក្នុងខែធ្នូឆ្នាំ២០១០។
កាសែតថៃ The Nation បានរាយការណ៍កាលពីម្សិលមិញថា លោកស្រី យីងឡាក់ ត្រូវបានជូនដំណឹងរួចហើយថា ទោសជាប់ពន្ធនាគាររបស់លោក វីរ៉ា នឹងត្រូវកាត់បន្ថយមកត្រឹមប្រាំមួយខែ ហើយថា អ្នកទាំងពីរនឹងត្រូវដោះលែងនៅពេលឆាប់ៗនេះ។
កាសែត The Nation បានដកស្រង់សម្តីលោកស្រី យីងឡាក់ ថា“ ជួសមុខឲ្យរដ្ឋាភិបាលថៃ យើងខ្ញុំសូមថ្លែងអំណរគុណប្រទេសកម្ពុជា ចំពោះការយកចិត្តទុកដាក់ចំពោះរឿងក្តីនេះ និងផ្តល់ការលើកលែងទោសដើម្បីផលប្រយោជន៍នៃទំនាក់ទំនងទ្វេភាគី”។
អ្នកនាំពាក្យក្រសួងការបរទេស និងក្រសួងយុត្តិធម៌បដិសេធមិនធ្វើអត្ថាធិប្បាយអំពីការដោះលែងលោក វីរ៉ា និងជំនួយការរបស់គាត់ទេ។ ការប៉ុនប៉ងកន្លងមករបស់មន្ត្រីថៃ ដើម្បីឲ្យមានការដោះលែងអ្នកទាំងពីរ នេះ មិនបានសម្រេចឡើយ។ក៏ប៉ុន្តែប្រសិនបើអ្នកជាតិ
និយមជ្រុលទាំងពីរនេះត្រូវបានដោះលែងមែននោះ វាមិនមែនជាលើកទី១ទេ ដែលសមាជិកត្រកូល សុីណាវ៉ាត្រា ដ៏មានអំណាចនេះ បានធ្វើអន្តរាគមន៍បានជោគជ័យក្នុងការជួយឲ្យមានការលើកលែងទោសជនជាតិថៃម្នាក់ដែលជាប់ពន្ធនាគារនៅកម្ពុជា។
កាលពីខែធ្នូ ឆ្នាំ ២០០៩ ព្រះមហាក្សត្រនរោត្តម សីហមុនី បានព្រះរាជទានលើកលែងទោសដល់ជនជាតិថៃឈ្មោះ សុីវ៉ារ៉ាក់ ចូទិពង់ ដែលត្រូវបានផ្តន្តាទោសឲ្យជាប់ពន្ធនាគាររយៈពេលប្រាំពីរឆ្នាំពីបទចារកម្ម បន្ទាប់ពីអតីតនាយករដ្ឋមន្ត្រីថៃ លោក ថាក់សុីនសុីនណាវ៉ាត្រា បានធ្វើសំណើស្រដៀងគ្នានេះទៅលោក ហ៊ុន សែន៕ ប៊ុននី