ក្រសួងយុត្តិធម៌បានលើកឡើង កាលពីថ្ងៃសុក្រថា រដ្ឋាភិបាលកម្ពុជានឹងដោះលែងអ្នកទោសរហូតទៅដល់៥០០នាក់ រួមទាំងលេខារបស់លោក វីរ៉ា ស៊ុំខ្វាមឃីត ដែលជាអ្នកជាតិថៃនិយមជ្រុលឲ្យបានចេញពីពន្ធនាគារមុនពេលកំណត់រួមជាមួយអ្នកទោសដទៃទៀតនៅទូទាំងប្រទេសនៅដើមខែកុម្ភៈ ក្នុងឱកាសថ្វាយព្រះភ្លើងព្រះបរមសពសម្តេចឪ នៅរាជធានីភ្នំេពញ។
អំឡុងកិច្ចប្រជុំគណៈមេធាវីកម្ពុជា ក្នុងរាជធានីភ្នំពេញ លោក អង្គ វង្សវឌ្ឍានា រដ្ឋមន្ត្រីក្រសួងយុត្តិធម៌បានមានប្រសាសន៍ថា លោក វីរ៉ា ស៊ុំខ្វាមឃីត ដែលត្រូវតុលាការផ្តន្ទាទោសឲ្យជាប់ពន្ធនាគាររយៈពេលប្រាំបីឆ្នាំពីបទចារកម្ម និងត្រូវបន្ទូរបន្ថយទោសជាប់ពន្ធនាគារចំនួនប្រាំមួយខែ ហើយលេខារបស់លោក គឺលោកស្រី រ៉ាទ្រី ពីប៉ាតាណាប៉ៃប៊ូន និងត្រូវដោះលែងនៅថ្ងៃទី១ខែកុម្ភៈ។
លោក វង្សវឌ្ឍានា បានមានប្រសាសន៍ថា “យើងបានរៀបចំរួចរាល់ហើយសម្រាប់ជនជាតិថៃទាំងពីរនាក់នេះ។ សម្តេចតេជោ ហ៊ុន សែន បានស្នើឲ្យដោះលែងអ្នកស្រី រ៉ាទ្រី ពីប៉ាតាណាប៉ៃប៊ូន នៅថ្ងៃទី១ខែកុម្ភៈ ហើយយើងនឹងបន្ទូរបន្ថយទោសជាប់ពន្ធនាគាររបស់លោក វីរ៉ា ស៊ុំខ្វាមឃីត មកនៅត្រឹមប្រាំមួយខែ ពីព្រោះលោកបានអុវត្តទោសជាប់ពន្ធនាគារមួយ ភាគបីនៃទោសសរុបរបស់លោកហើយ។
លោកបានមានប្រសាសន៍ថា “នៅថ្ងៃទី៤ខែកុម្ភៈ ក្រសួងមហាផ្ទៃ និងនាំអ្នកទោសទាំងនោះទៅចូលរួមព្រះរាជពិធីថ្វាយព្រះភ្លើងព្រះបរមសព សម្តេចឪ”។ លោកបន្តថា អ្នកទោសសរុបប្រ ហែល៥០០នាក់នឹងត្រូវគេដោះលែងមុនការកំណត់ឬក៏ត្រូវទទួលបានការបន្ទូរបន្ថយទោស។ បន្ទាប់ពីត្រូវបានចាប់ខ្លួន កាលពីខែធ្នូ ឆ្នាំ២០១០ លោក វីរា៉ ស៊ុំខ្វាមឃីត និងអ្នកស្រី
រ៉ាទ្រី ពីប៉ាតាណាប៉ៃប៊ូន ត្រូវតុលាការផ្តន្ទាទោសឲ្យជាប់ពន្ធនាគាររយៈពេលប្រាំបីឆ្នាំ និងប្រាំមួយឆ្នាំ កាលពីខែធ្នូ ឆ្នាំ២០១០ ពីបទចារកម្ម និងបទលួចចូលមកក្នុងទឹកដីប្រទេសកម្ពុជាដោយខុសច្បាប់ ព្រមទាំងមានទោសពីបទលួចចូលតំបន់ហាមឃាត់របស់យោធា នៅក្នុងខេត្តបន្ទាយមានជ័យ។
កាលពីខែវិច្ឆិកា លោកស្រី យីងឡាក់ សុីណាវ៉ាត្រា នាយករដ្ឋមន្ត្រីថៃបានជួយអន្តរាគមន៍ជួសមុខឲ្យជនជាតិថៃទាំងពីរនាក់នេះ ដោយបានស្នើឲ្យលោក ហ៊ុន សែន ពិនិត្យមើលសំណុំរឿងរបស់ពួកគេឡើងវិញ។ កាលពីថ្ងៃព្រហស្បតិ៍ ក្រសួងការបរទេសបានលើកឡើងថា ក្រសួងយុត្តិធម៌នឹងធ្វើតាមសំណើរបស់លោកនាយករដ្ឋមន្ត្រី ហ៊ុន សែន។
លោក អង្គ វង្សវឌ្ឍានា បានមានប្រសាសន៍ថា “អ្នកទោសជនជាតិថៃមួយចំនួនផ្សេងទៀតក៏កំពុងជាប់ពន្ធនាគារដែរ ហើយខ្ញុំគិតថា យើងនឹងពិចារណាបន្ទូរបន្ថយរយៈពេលជាប់ពន្ធនាគាររបស់ពួកគេ”។
នៅពេលសួរថា តើលោក ម៉ម សូណង់ដូ ម្ចាស់វិទ្យុសម្បុកឃ្មុំ ដែលកំពុងតែជាប់ពន្ធនាគាររយៈពេល២០ឆ្នាំ ពីបទញុះញង់ឲ្យបង្កើតចលនាអបគមន៍ក្នុខេត្តក្រចេះ និងមេដឹកនាំគណបក្សប្រឆាំង គឺលោក សម រង្សុី ដែលបាននិរទេសខ្លួនឯងទៅរស់នៅប្រទេសបារំាង ដើម្បីគេចពីការផ្តន្ទាទោសឲ្យជាប់ពន្ធនាគាររយៈពេល១១ឆ្នាំ ពីបទញុះញង់ និងបំផ្លិចបំផ្លាញទ្រព្យសម្បត្តិសាធារណៈអាចទទួលបានការលើកលែងទោសដែរឬក៏អត់នោះ លោក អង្គ វង្សវឌ្ឍនា មានប្រសាសន៍ថាករណីបែបនេះមិនអាចទៅរួចនោះទេ។
លោក អង្គ វង្សវឌ្ឍានា បានមានប្រសាសន៍ថា “យើងដោះលែងតែអ្នកទោសណា ដែលសំណុំរឿងរបស់ពួកគេលែងស្ថិតនៅក្នុងប្រព័ន្ធតុលាការតែប៉ុណ្ណោះ តែរឿងនេះស្ថិតនៅក្នុងដៃតុលា ការនៅឡើយ ហើយមិនទាន់ចប់ទេ។ សម្រាប់សំណុំរឿងលោក ម៉ម សូណង់ដូចំណែកឯលោក សម រង្សុី បើបានទទួលទោសជាប់ពន្ធនាគារចាប់តាំងពីពេលនោះមក យើងនឹងពិចារណលើកលែងទោសជូនរូបលោក”។
លោកបានបន្ថែមថា អ្នកទោសណាត្រូវពិចារណាបន្ធូរបន្ថយទោស រួមមានអ្នកទោស ដែលបានជាប់ពន្្ធនាគារពីរភាគបី ហើយនិងបានកែអត្តចរិតល្អឡើងវិញ និងអ្នកទោសណាដែលមានអាយុលើសពី៦០ឆ្នាំឡើងទៅ។ អ្នកទោសដែលមានជំងឺ និងអ្នកទោសដែលមានកូនជាប់នឹងខ្លួនក្នុងពន្ធនាគារ ក៏នឹងត្រូវគេពិចារណាលើកលែងទោសដែរ។
លោក សំ ប្រជាមានិត អ្នកនាំពាក្យក្រសួងយុត្តិធម៌បានមានប្រសាសន៍ថា លោកមិនបានដឹងទេថា តើអ្នកទោសនយោបាយនឹងត្រូវរួមបញ្ចូលទៅក្នុងសេចក្តីសម្រេចនៅថ្ងៃទី១ ខែកុម្ភៈ ឬក៏អត់នោះទេ។
លោក សំ ប្រជាមានិត លើកឡើងថា “ ខ្ញុំមិនដឹងទេថា តើអ្នកទោសនយោបាយ នឹងត្រូវរួមបញ្ចូលឬក៏អត់នោះ។ ប៉ុន្តែ អ្នកទោសទាំងអស់ ដែលបានជាប់ពន្ធនាគារមួយភាគបីរួចហើយ និងត្រូវទទួលបានការបន្ទូរបន្ថយទោស ហើយអ្នកដែលបានជាប់ពន្ធនាគារពីរភាគបីរួចហើយ នឹងទទួលបានការលើកលែងទោស”។
នៅពេលអង្គការសិទ្ធិមនុស្ស និងប្រធានាធិបតីសហរដ្ឋអាមេរិក លោក បារាក់ អូបាម៉ា (Barack Obama) បានអំពាវនាវឲ្យប្រទេសកម្ពុជាដោះលែងអ្នកទោសនយោបាយទាំងអស់ លោក ផៃ ស៊ីផាន អ្នកនាំពាក្យទីស្តីការគណៈរដ្ឋមន្ត្រី បានមានប្រសាសន៍ថា តុលាការដោះស្រាយសំណំុរឿងដោយឯករាជ្យ ហេតុដូច្នេះហើយវាមិនមែនជាការងាររបស់លោក ហ៊ុន សែន ត្រូវលូកដៃឡើុយ។
នៅពេលសួរថាតើ ហេតុអ្វីបានជាសំណុំរឿងរបស់ជនជាតិថៃទាំងពីរនាក់ខុសប្លែកពីគេ លោក ផៃ សីផាន បានឆ្លើយតបថា “សំណុំរឿងទាំងពីរនេះពិតជាខុសប្លែកពីគេទាំងស្រុង។ មួយគឺជារឿងផ្ទៃក្នុង រីឯរឿងមួយទៀត គឺជារឿងអន្តរជាតិ។ជនជាតិថៃទាំងពីរនោះបានទទួលទោសជាប់ពន្ធនាគាររួចហើយ។ ករណីនេះគឺវាអាស្រ័យទៅលើកិច្ចសហប្រតិបត្តិការ និងទំនាក់ទំនងល្អរវាងប្រទេសទំាងពីរ ហើយក៏ដើម្បីផលប្រយោជន៍ជាតិផងដែរ៕ស៊ុយឈាង
(រាយការបន្ថែមដោយ កាំង ម៉េងហ៊ុន និង Lauren Crothers)