គណ​បក្ស សម រង្ស៊ី ស្នើឲ្យ​លោក​ ហ៊ុន​ សែន ដក​លោក ចម ប្រសិទ្ធ រដ្ឋ​មន្រ្តី​​ក្រសួង​ពាណិជ្ជ​កម្ម​ចេញ​

គណ​បក្ស សម រង្ស៊ី បាន​ស្នើ​សុំ​ឲ្យ​លោក​នាយក​រដ្ឋ​មន្រ្តី​ ហ៊ុន សែន ​ចេញ​បញ្ជា​​ឲ្យ​​លោក ​ចម ប្រសិទ្ធ​ រដ្ឋមន្ត្រី​ក្រសួង​ពាណិជ្ជកម្ម​លា​លែង​ពី​តំណែង​ដោយ​សារ​លោក​ខក​ខាន​មិន​បាន​នាំ​ផលិតផល​​ថែម​ទៀត​ចេញពី​ប្រទេស​កម្ពុជា​ទៅ​កាន់​ទី​ផ្សារអន្តរជាតិ​។

យោង​តាម​លិខិត​មួយ​ច្បាប់​​ចុះ​ថ្ងៃ​ទី​១០​ខែ​មករា​​ ដែល​​ចុះ​ហត្ថ​លេខា​ដោយ​​សមា​ជិក​សភា​មកពីគណ​បក្ស   សម រង្ស៊ី​ លោក ជា ប៉ូច លោក ឡុង រី លោក គង់ បូរ៉ា និងលោក ឃឹម ឡាក់គី ដែល​បាន​ផ្ញើ​ជូន​លោក ហេង សំរិន ប្រធាន​រដ្ឋ​សភា​បាន​បញ្ជាក់​ថា លោក ចម ប្រសិទ្ធ មិន​បាន​បំពេញ​ការងាររបស់ខ្លួនឲ្យ​​បាន​ល្អ​ ដើម្បី​ជួយ​​ដល់ប្រ​ជា​កសិករ​ខ្មែរឲ្យ​បាននាំ​ផលិត​ផល​របស់​ខ្លួន​ និង​​ជួយ​រកទី​ផ្សារ​ឲ្យ​​​ពួក​គាត់​​​សម្រាប់​លក់ផលិត​ផល​នៅ​បរទេស​​ទេ។

នៅ​ក្នុង​លិខិត​នោះ​បាន​លើក​ឡើង​ថា“គណបក្ស​ សម រង្ស៊ី សូម​ស្នើ​ឲ្យ​លោក​នាយក​​រដ្ឋមន្ត្រី​ដក​លោក ចម ប្រសិទ្ធ​ រដ្ឋមន្ត្រី​ក្រសួង​ពាណិជ្ជកម្មចេញ​ពី​តំណែង​​ ពីព្រោះ​លោក​មិន​អាច​​​រក​ទី​ផ្សារ​សម្រាប់​​ឲ្យ​ប្រជា​ពលរដ្ឋ​លក់​ផលិតផល​របស់ខ្លួន​បាន​​ទេ​។ យើង​សង្ឃឹម​ថា លោក​នាយក​រដ្ឋ​មន្ត្រីនឹង​ពិចារណា​លើ​សំណើ​របស់​យើង”។

លោក ចម ប្រសិទ្ធ បាន​បដិសេធ​មិន​ធ្វើ​សេចក្តី​អត្ថា​ធិប្បាយ​ទេ​នៅ​ពេល​សួរ​អំពី​លិខិត​​របស់​គណ​បក្ស​ សម រង្ស៊ី កាលពីម្សិល​មិញ​។

​ជា​ច្រើន​ឆ្នាំ​មក​ហើយ​ ​សេដ្ឋ​វិទូ​បាន​លើក​ឡើង​ថា ប្រជា​កសិករ​ខ្មែរ​​ចាញ់​ប្រៀប​​​​​កសិករនៅ ក្នុងបណ្តាប្រទេស​ជិត​ខាង​ខ្លួន ដោយ​សារ​​​​

មិន​បាន​នាំ​ផលិត​ផល​កសិកម្ម​ក្នុង​ស្រុក​របស់​ខ្លួន​ទៅកាន់​ទីផ្សារ​អន្តរជាតិ​។មិន​តែ​ប៉ុណ្ណោះ​ប្រជាកសិករ​ខ្មែរ​បាន​លក់​ផលិត​ផល​​មិន​ទាន់​​កែច្នៃ​​​ក្នុងតម្លៃថោក​ឲ្យ​ឈ្មួញ​កណ្តាល​ ដែល​ក្រោយមកបាន​ដឹក​ផលិត​ផល​ទាំង​នោះ​ ឆ្លង​កាត់​ព្រំដែន​ទៅលក់​ឲ្យ​​​ប្រទេស​ថៃ និង​​​ប្រទេស​វៀតណាម។

នៅក្នុង​លិខិត​នោះ​បាន​លើកឡើង​បន្តថា “ យើង​ដឹង​ថា ឈ្មួញ​កណ្តាល​បាន​ចុះ​ទៅ​ទិញ​ផលិត​ផល​កសិកម្មពីដៃកសិករ​មានដូច​ជា ពោត ដំឡូង​មី សណ្តែក និង​ស្រូវ​ដោយ​ឲ្យ​តម្លៃ​ថោក ពេក​ ហើយ​តែង​តែ​ធ្វើ​ឲ្យ​ប្រជា​ពលរដ្ឋ​ខក​ចិត្ត​យ៉ាង​ខ្លាំង”។

ទោះ​បី​ជា​វិស័យ​ពាណិជ្ជកម្ម​​របស់​ប្រទេស​កម្ពុជា​ នៅអន់​ក៏​ដោយ ​ក៏​​ការ​នាំ​ចេញ​ផលិត​ផល​ទៅ​កាន់​ទី​ផ្សារ​អន្តរជាតិ​​​កំពុង​កើន​ឡើង​​ដែរ ​​ដូច​ជា​​​វិស័យ​វាយនភណ្ឌ​ជា​ដើម​ ​ហើយ​កំពុង​​មានការដាក់ទុនវិនិយោគ​យ៉ាង​ច្រើន​​នៅ​ក្នុង​​ប្រទេស​កម្ពុជា​​ដែល​ត្រូវ​បាន​​គេ​មើល​​ឃើញ​ថា ​​បាន​ចាប់​ផ្តើម​​​នាំចេញ​ទៅ​កាន់​ទី​ផ្សារ​បរទេស​​កំពុងតែ​កើន​ឡើង​។

ជា​ឧទាហរណ៍​ ការ​នាំ​អង្ករ​ចេញ​កំពុង​​​មាន​ការ​​កើន​ឡើង​ក្នុង​រយៈ​ពេល​ប៉ុន្មាន​ឆ្នាំ​​ថ្មីៗ​នេះព្រម​ទាំង​ការ​នាំចេញ​ស្បែក​ជើង​ និង​ផលិត​ផល​មួយ​ចំនួន​ទៀត​ ដូច​ជា ម្រេចជា​ដើម​។

របាយ​ការណ៍​រដ្ឋាភិបាល​បាន​កត់​ត្រា​ការ​នាំ​​អង្ករ​ចេញ​កាលពីឆ្នាំ​មុន​ថា ប្រទេស​កម្ពុជា​​បាន​នាំ​អង្ករ​ចេញ​ចំនួន​២៥០.០០០តោន​ ទៅកាន់​ទីផ្សារ​បរទេស​ ហើយ​រដ្ឋាភិបាល​បាន​បញ្ជាក់​ថា ការ​នាំអង្ករ​ចេញ​ទៅ​កាន់​ទីផ្សារបរទេស​ នឹង​កើន​ឡើង​ចំនួន​៤០០.០០០​តោន​ នៅ​ក្នុង​ឆ្នាំនេះ​។ កាល​ពី​ឆ្នាំ២០១២ ការ​នាំ​អង្ករ​​ចេញ​ទៅ​កាន់​ទីផ្សារ​អន្តរជាតិ​​​ អាចរកចំណូលសរុប​បាន​ចំនួន​៥,៤៩​ពាន់​លាន​ដុល្លារ​ គឺកើន​ឡើង​៤,៨៨ពាន់​លាន​ដុល្លារ កាល​ពីឆ្នាំ​២០១១។

ខណៈ​ដែល​​ប្រទេស​កម្ពុជាមិនទាន់​អាច​នាំ​ចេញ​ផលិត​ផល​កសិកម្មទៅ​កាន់​​​ទី​​​ផ្សារ​​​អង្ករ​​ក្រៅប្រទេសឲ្យបានច្រើន​នោះ​​ក្រុម​​វិយោ​​​​គិន​​បាន​លើក​ឡើង​ថា ​តម្លៃ​ថាម​ពល​អគ្គិសនី​ និង​តម្លៃ​​នៃ​ការ​ដឹក​ជញ្ជូន​ត្រូវ​​តែ​បញ្ចុះ​តម្លៃ​ជា​មុន ទើបពួកគេ​អាច​​​មាន​​​លទ្ធភាពចូល​រួម​ប្រកួតប្រជែងនៅក្នុង​​​ទីផ្សារ​​​អន្តរជាតិ​ដើម្បីចាប់​ផ្តើម​នាំ​ផលិត​ផល​កសិកម្ម​ឲ្យបាន​កាន់​តែ​ច្រើនថែម​ទៀត៕

ប្រែសម្រួល​ដោយ ឃិន ណៃ​​

© 2013 – 2014, ខេមបូឌា ដេលី. All rights reserved. No part of this article may be reproduced in print, electronically, broadcast, rewritten or redistributed without written permission.