យោងតាមគណៈកម្មាធិការរៀបចំព្រះរាជពិធីបុណ្យថ្វាយព្រះភ្លើងព្រះបរមសពសម្ដេចឪបានឲ្យដឹងថា នឹងមានអ្នកចូលរួមជាង៣.០០០នាក់នៅក្នុងពិធីដង្ហែព្រះបរមសពសម្ដេចឪ នរោត្តម សីហនុ ពីព្រះបរមរាជវាំងទៅកាន់ព្រះមេរុនៅខាងមុខសារមន្ទីរជាតិ នៅថ្ងៃទី១ ខែកុម្ភៈ។
លោក កឹម គុណវឌ្ឍន៍ អគ្គនាយកទូរទស្សន៍ជាតិកម្ពុជា និងជាសមាជិកគណៈកម្មាធិការរៀបចំការផ្សាយពីព្រះរាជពិធីថ្វាយព្រះភ្លើងសម្ដេចឪបានឲ្យដឹងថា ក្បួនដង្ហែនេះនឹងមានការអញ្ជើញចូលរួមពីសំណាក់មន្ត្រីរដ្ឋាភិបាលជាន់ខ្ពស់រាជវង្សានុវង្ស ព្រះសង្ឃ សមាជិកអង្គការជនជាតិភាគតិច មន្ត្រីកងរាជអាវុធហត្ថ មន្ត្រីក្រសួង និងតំណាងយុវជនជាច្រើននាក់ទៀត។
លោកបានឲ្យដឹងថា គណៈប្រតិភូបរទេសក៏នឹងចូលរួមក្នុងពិធីដង្ហែនេះដែរ ហើយលោកបានមានប្រសាសន៍ថា ពិធីដង្ហែព្រះបរមសពនឹងចាកចេញពីព្រះបរមរាជវាំងនៅម៉ោង៧ព្រឹក ថ្ងៃទី១ ខែកុម្ភៈក្នុងចម្ងាយប្រាំមួយគីឡូម៉ែត្រតាមមហាវិថីព្រះសុធារសមហាវិថីព្រះសីហនុ និង មហាវិថីព្រះរោត្តមមុនពេលដង្ហែទៅកាន់វាលព្រះមេរុនៅមុខសារមន្ទីរជាតិ។
ព្រះអង្គម្ចាស់ សីុសុវត្ថិ ធម្មិកោ អ្នកនាំពាក្យខុទ្ទកាល័យព្រះបរមរាជវាំងបានមានព្រះបន្ទូលថា រាជវង្សានុវង្ស រួមទាំងព្រះមហាក្សត្រ សីហមុនី និងព្រះវររាជមាតា មុនីនាថ នឹងចូលរួមក្នុងពិធីដង្ហែ និងពិធីថ្វាយភ្លើងរហូតដល់ចប់ព្រះរាជពិធី ប៉ុន្តែទ្រង់មិនប្រាកដថា ទ្រង់ទាំងពីរនឹងត្រូវធ្វើអ្វីខ្លះនោះទេ។
ព្រះអង្គម្ចាស់ សីុសុវត្ថិ ធម្មិកោ បានមានបន្ទូលបន្ថែមថា ការប្រើប្រាស់ដំរីជាព្រះរាជទីនាំងសម្រាប់ដង្ហែព្រះបរមសពដូចកាលពីបុរាណនោះប្រហែលជានឹងត្រូវជំនួសដោយព្រះទីនាំងជារថយន្តដែលមានការតុបតែងលម្អយ៉ាងប្រណីត ហើយថា ព្រះបរមសពសម្ដេចឪ នឹងត្រូវយាងចេញពីមញ្ជូសាទៅក្នុងព្រះបរមកោដ្ឋវិញ នៅឯពិធីថ្វាយព្រះភ្លើង។
នៅក្នុងសារាចរណែនាំរបស់រដ្ឋាភិបាលកាលពីសប្ដាហ៍មុន លោកនាយករដ្ឋមន្ត្រី ហ៊ុន សែន បានប្រកាសពីព្រះរាជពិធីកាន់មរណទុក្ខសម្ដេចឪរយៈពេលប្រាំពីរថ្ងៃជាលើកទី២ចាប់ផ្ដើមពីថ្ងៃទី១ ខែកុម្ភៈ ដល់ថ្ងៃទី៧ ខែកុម្ភៈ។ មន្ត្រីរាជការនឹងត្រូវបានអនុញ្ញាតឲ្យឈប់សម្រាកពីការងាររយៈពេលពីរថ្ងៃគឺនៅថ្ងៃទី១ ខែកុម្ភៈ និងថ្ងៃទី៤ ខែកុម្ភៈ ជាថ្ងៃថ្វាយព្រះភ្លើងព្រះបរមសពសម្ដេចឪ។
សារាចរនេះបានប្រកាសថា “អំឡុងពិធីកាន់ព្រះរាជមរណទុក្ខលើកទី២នេះ គ្រប់ស្ថានីយវិទ្យុ និងទូរទស្សន៍ ព្រមទាំងកម្មវិធីកម្សាន្ដទាំងអស់ត្រូវផ្អាកការចាក់ផ្សាយកម្មវិធីកម្សាន្ត និងការប្រគំតន្ត្រីដែលមានលក្ខណៈសប្បាយគគ្រឹកគគ្រេង”។
នៅក្នុងសារាចរមួយផ្សេងទៀតសម្រាប់អាជីវកម្មនៅជុំវិញវាលព្រះមេរុកាលពីម្សិលមិញ រដ្ឋាភិបាលបានស្នើឲ្យហាង និងភោជនីយដ្ឋាននៅតាមមហាវិថីព្រះសុធារស និងនៅតាមផ្លូវលេខ១៧៨ លេខ១៨៤ និងផ្លូវលេខ១៣បិទរយៈពេលប្រាំបីថ្ងៃចាប់ពីថ្ងៃទី៣១ខែមករា។
លោក គៀត ច័ន្ទថារិទ្ធ អ្នកនាំពាក្យនគរបាលជាតិ បានមានប្រសាសន៍កាលពីម្សិលមិញថា កម្លាំងសន្ដិសុខចំនួន១២.០០០នាក់នឹងត្រូវដាក់ពង្រាយដើម្បីការពារសុវត្ថិភាពសាធារណៈអំឡុងពិធីដង្ហែ និងពិធីថ្វាយព្រះភ្លើងនេះ។
លោកបានមានប្រសាសន៍ថា “យើងនឹងប្រើប្រាស់កម្លាំងប្រហែលពេលយើងដាក់ពង្រាយនៅក្នុងអំឡុងកិច្ចប្រជុំកំពូលអាស៊ានដែរ”។ លោកបានបន្ថែមថា កម្លាំងសន្ដិសុខរួមមានកម្លាំងមកពីកងអង្គរក្សលោកនាយករដ្ឋមន្ត្រី កងរាជអាវុធហត្ថ ព្រមទាំងនគរបាលរាជធានី និងនគរបាលជាតិ។
ក្នុងខ្សែវីដេអូមួយផ្សាយតាមគេហទំព័ររបស់នគរបាលជាតិកាលពីថ្ងៃសៅរ៍ លោក នេត សាវឿន អគ្គស្នងការនគរបាលជាតិបានប្រកាសថា ចាំបាច់ត្រូវមានវិធានការទាំងនេះ “ ដើម្បីបិទផ្លូវសម្រាប់ពិធីថ្វាយព្រះភ្លើង និងដើម្បីការពារសុវត្ថិភាពជូនថ្នាក់ដឹកនាំពិភពលោក ថ្នាក់ដឹកនាំកម្ពុជា និងប្រតិភូទាំងអស់ដែលអញ្ជើញចូលរួមនៅក្នុងព្រះរាជពិធីនេះ”៕
ប្រែសម្រួលដោយ ហម សុផាណ្ណា