យោងតាមរបាយការណ៍ថ្មីមួយរបស់អង្គការអន្តរជាតិទេសន្តរប្រវេសន៍(IOM)បានឲ្យដឹងថា បុរស ស្ត្រី និងកុមារកម្ពុជាជាច្រើននាក់ នៅតែត្រូវបានជួញដូរទៅប្រទេសជិតខាងរៀងរាល់ឆ្នាំ ដោយភាគច្រើនត្រូវបានគេឲ្យធ្វើការជាអ្នកនេសាទ និងអ្នកបម្រើការតាមផ្ទះ ដែលនៅទីនោះពួកគេតែងតែប្រឈមនឹងសា្ថានភាពការងារអមនុស្សធម៌។
យោងតាមរបាយការណ៍ ដែលចេញកាលពីដើមខែនេះ បានឲ្យដឹងថា ក្នុងចំណោមប្រទេសចំនួន១៥០ ដែលត្រូវបានត្រួតពិនិត្យនោះ ប្រទេសកម្ពុជាស្ថិតក្នុងចំណាត់ថ្នាក់ទី៦ បន្ទាប់ពីប្រទេសអ៊ុយក្រែន ហៃទី យេម៉ែន ឡាវ និងប្រទេសអ៊ូសបេគីស្ថាន។
ដោយប្រើទិន្នន័យថ្មីនេះ អង្គការអន្តរជាតិទេសន្តរប្រវេសន៍បានលើកឡើងថា ជនជាតិខ្មែរចំនួន២៥៨នាក់ ជាជនរងគ្រោះ ដែលទទួលបានជំនួយពីអង្គការ ដែលមានមូលដ្ឋាននៅទីក្រុងហ្សឺណែវនេះគ្រាន់តែនៅក្នុងឆ្នាំ២០១១។ ក្នុងករណីមួយក្នុងចំណោមករណីធំៗបំផុត អង្គការនេះបានជួយធ្វើមាតុភូមិនិវត្តបុរសចំនួន៦៣នាក់ពីទូកនេសាទមួយគ្រឿងនៅក្នុងប្រទេសឥណ្ឌូណេស៊ី។
របាយការណ៍នេះបានឲ្យដឹងទៀតថា “ករណីនេះបង្ហាញពីនិន្នាការដ៏ធំមួយនៅអាស៊ីអាគ្នេយ៍ ដោយមានសេចក្តីរាយការណ៍កាន់តែច្រើនឡើងអំពីការកើនឡើងនៃការជួញដូរមនុស្សយកទៅកេងប្រវ័ញ្ចកម្លាំងពលកម្ម” ជាពិសេសនៅលើទូកនេសាទ។
ក្នុងករណីទាំងអស់ ដែលអង្គការអន្តរជាតិទេសន្តរប្រវេសន៍បានជួយ មានជនរងគ្រោះជាបុរសចំនួន១១៤នាក់ក្នុងឆ្នាំ២០១១។ បុរសចំនួន៦៩នាក់ ត្រូវបានបញ្ជូនមកពីប្រទេសឥណ្ឌូណេស៊ី២៦នាក់ពីប្រទេសម៉ាឡេស៊ី និង២៤នាក់ពីប្រទេសម៉ូរីស។
របាយការណ៍នេះបានលើកឡើងថា “ជនរងគ្រោះភាគច្រើនបានវិលត្រឡប់មកវិញដោយមានជំនួយពីអង្គការអន្តរជាតិទេសន្តរប្រវេសន៍តាមរយៈក្រសួងការបរទេសកម្ពុជានិងភាគច្រើនបានទទួលជំនួយពីអង្គការអន្តរជាតិទេសន្តរប្រវេសន៍ និងអង្គ ការក្រៅរដ្ឋាភិបាលនានានៅពេលមកដល់។
លោក ប្រ៊ូណូ ម៉ាល់តូនី ប្រធានផ្នែកបេសកកម្មរបស់អង្គការអន្តរជាតិទេសន្តរប្រវេសន៍ប្រចាំនៅកម្ពុជា មានប្រសាសន៍ថា ប្រទេសជាគោលដៅ ដែលទទួលជនចំណាកស្រុកពីប្រទេសកម្ពុជា ជារឿយៗមិនសូវមានការការពារមនុស្សដែលចូលទៅស្វែងរកការងារធ្វើនោះទេ។
លោកបានមានប្រសាសន៍បន្ថែមថា “គ្មានយន្តការការពារច្បាស់លាស់ជាមួយនឹងប្រទេសដែលទទួលជនចំណាកស្រុកនោះទេ ហើយមានការលំបាកណាស់ក្នុងការស្វែងរកអត្តសញ្ញាណជនរងគ្រោះ។កម្មករចំណាកស្រុកជាច្រើនមិនហ៊ានទាក់ទងនគរបាល ឬអាជ្ញាធរមូលដ្ឋានទេ។
បន្ទាប់ពីមានសេចក្តីរាយការណ៍ជាច្រើនអំពីស្ថានភាពការងារឃោរឃៅរបស់អ្នកនេសាទខ្មែរនៅតាមទូកនេសាទថៃនោះ របាយការណ៍អង្គការអន្តរជាតិទេសន្តរប្រវេសន៍ ក៏បានផ្តោតលើការជួញដូរកុមារទៅប្រទេសថៃដែរ ដែលនៅទីនោះ ពួកគេត្រូវបានសាច់ញាតិរបស់ពួកគេប្រើឲ្យធ្វើជាអ្នកសុំទាន ឬបង្ខំឲ្យលក់បង្អែម លក់ផ្កា ឬខាត់ស្បែកជើង។
របាយការណ៍នេះបានរកឃើញថា “កុមារខ្មែរសុំទានភាគច្រើនមិនត្រូវបានជួញដូរតាមរយៈក្រុមឧក្រិដ្ឋជន ឬពួកអ្នកលេងនោះទេ ប៉ុន្តែពួកគេទៅប្រទេសថៃជាមួយឪពុកម្តាយរបស់ខ្លួន ឬសាច់ញាតិផ្សេងទៀត។
លោក យ៉ា ណាវុធ នាយកប្រតិបត្តិអង្គការការ៉ាម កម្ពុជា (Caram Cambodia) បានមានប្រសាសន៍ថា អត្រាអត់ការងារធ្វើខ្ពស់នៅជនបទដាច់ស្រយាល និងតម្រូវការការងារមានតម្លៃថោកនៅក្នុងប្រទេសជិតខាង គឺជាកត្តាសំខាន់ពីរដែលនាំឲ្យមានការជួញដូរកម្លាំងពលកម្មនៅក្នុងប្រទេសកម្ពុជា។
លោក យ៉ា ណាវុធ បានមានប្រសាសន៍ថា “មកទល់ពេលនេះ ប្រជាពលរដ្ឋខ្មែរជាច្រើនត្រូវបានជួញដូរឲ្យធ្វើការតាមផ្ទះ និងផ្នែកនេសាទផងដែរ ជាពិសេសសម្រាប់បុរសមកពីតំបន់ជនបទ ដែលត្រូវបានជួញដូរទៅប្រទេសថៃ” ហើយមានការប៉ាន់ប្រមាណថា មានពលរដ្ឋខ្មែរចំនួន២០០.០០០នាក់រស់នៅទីនោះ។
លោកបន្ថែមថា បើទោះជាលោកនាយករដ្ឋមន្ត្រី ហ៊ុន សែន បានដាក់បម្រាមមិនឲ្យនាំស្ត្រីជំនួយការមេផ្ទះទៅប្រទេសម៉ាឡេស៊ីក្នុងឆ្នាំ២០១១បន្ទាប់ពីកើតមានរឿងអាស្រូវរំលោភបំពានជាច្រើនក៏ដោយ ក៏ចំនួនស្ត្រីស្វែងរកការងារតាមផ្ទះនៅក្រៅប្រទេស មិនថយចុះដែរ។
លោកបានមានប្រសាសន៍ថា “ប្រសិនពួកគេមិនទៅប្រទេសម៉ាឡេស៊ីទេ ក៏ពួកគេទៅទីកន្លែងផ្សេងទៀតដែរ។ប្រសិនជារដ្ឋាភិបាលមិនព្យាយាមបង្កើតការងារឲ្យបានច្រើន និងធ្វើឲ្យសា្ថានភាពការងារ និងប្រាក់ខែបានប្រសើរទេនោះ ចំនួនជនរងគ្រោះកម្ពុជា នឹងនៅតែកើនឡើង”៕
(រាយការណ៍បន្ថែមដោយ មិុច ដារ៉ា)
ប្រែសម្រួលដោយ ចេវ ប៊ុននី