កាលពីម្សិលមិញ លោកនាយករដ្ឋមន្ត្រី ហ៊ុន សែន បានមានប្រសាសន៍ថា រដ្ឋាភិបាលគួរតែបង្កើតច្បាប់ថ្មីមួយ ឲ្យបានមុនពេលបោះឆ្នោតជ្រើសរើសតំណាងរាស្ត្រក្នុងខែកក្កដា ដើម្បីដាក់ទណ្ឌកម្មអ្នកនយោបាយនៅក្នុងប្រទេសកម្ពុជា ដែលតែងតែជេរប្រមាថរូបលោកជាសាធារណៈ។
លោក ហ៊ុន សែន បានលើកឡើងនៅឯពិធីប្រគល់សញ្ញាប័ត្រនៅវិទ្យាស្ថានជាតិអប់រំថា លោកកាន់តែធុញទ្រាន់នឹងអ្នកនយោបាយ ដែលលោកមិនបញ្ចេញឈ្មោះ តែលោកអះអាងថា ជាអ្នកធ្លាប់និយាយមួលបង្កាច់លោកឥតឈប់ឈរ។
លោក ហ៊ុន សែន បានមានប្រសាសន៍ថា “ខ្ញុំគាំទ្រទង្វើប្រកបដោយក្រមសីលធម៌របស់អ្នកនយោបាយ ហើយចង់ឲ្យវាក្លាយជាច្បាប់មួយ។យើងគួរតែបង្កើតច្បាប់នេះមុនពេលរដ្ឋសភបញ្ចប់អាណត្តិទី៤របស់ខ្លួន”។
លោកបានបន្តថា “ប្រសិនបើគេប្រើពាក្យស្មោគគ្រោក គួរតផ្តន្ទាទោស”។ លោកមិនបានបរិយាយល្អិតល្អន់អំពីរបៀបផ្តន្ទាទោសទេ។ ដោយមិនបញ្ចេញឈ្មោះអ្នកប្រព្រឹទ្ធល្មើស លោក ហ៊ុន សែន បានមានប្រសាសន៍ថា គេធ្លាប់ហៅឈ្មោះលោកក្នុងលក្ខណៈមើលងាយ រួមមាន ”បុរសខ្វាក់” “ក្បត់ជាតិ””អ្នកលក់ជាតិ” និង “ទាសករវៀតណាម”។
លោក ហ៊ុន សែន បានមានប្រសាសន៍ថា “ ខ្ញុំធ្លាប់ឮពាក្យស្មោគគ្រោក និងប្រមាថបែបនេះ។ ពួកនេះស្មោគគ្រោកណាស់ ពេលនេះពួកគេប្រើពាក្យមកលើខ្ញុំ ដូច្នេះ ខ្ញុំត្រូវប្រមាថពួកគេវិញ ដើម្បីបញ្ឈប់ពួកគេវិញ”។
អ្នកវិភាគនយោបាយ និងសមាជិកសភាមកពីគណបក្សប្រឆាំងបានមានប្រសាសន៍ថា ច្បាប់ប្រឆាំងនឹងការប្រមាថអ្នកនយោបាយ នឹងត្រូវបានប្រើ ដើម្បីលុបបំបាត់សេរីភាពក្នុងការបញ្ចេញមតិនៅក្នុងប្រទេសកម្ពុជា។
លោកស្រី មូរ សុខហួរ សមាជិកសភាមកពីគណបក្ស សម រង្ស៊ី បានមានប្រសាសន៍ថា “វានឹងមានការលំបាកក្នុងការពិនិត្យតាមដាន និងវាស់វែងពាក្យសម្តីជេរប្រមាថណាស់។ វាជាការរំលោភសេរី ភាពក្នុងការបញ្ចេញមតិ ហើយការអនុវត្តច្បាប់ក៏អាចមានបញ្ហាដែរ”។
លោកស្រីបានបន្ថែមថា “តុលាការមិនយុត្តិធម៌ទេ ឬមានភាពលម្អៀងចំពោះអ្នកនយោបាយ។ វានឹងបង្កគ្រោះថ្នាក់ ប្រសិនបើច្បាប់នេះត្រូវបានអនុម័ត”។ បើទោះមានការត្អូញត្អែរអំពីការប្រើពាក្យជេរប្រមាថបែបបុគ្គល មកលើលោកក្តី ក៏លោក ហ៊ុន សែន កន្លងមកធ្លាប់ជេរអ្នករិះគន់លោកដែរ។
លោកនាយករដ្ឋមន្ត្រីបានផ្ចាញ់ក្រុមអ្នកយកព័ត៌មានអន្តរជាតិ ដែលមកចូលរួមយកព័ត៌មានកិច្ចប្រជុំកំពូលអាស៊ានកាលពីក្នុងខែមេសា ដែលពេលនោះលោកបានប្រើសន្និសីទកាសែតរយៈពេល៣០នាទី ដើម្បីរិះគន់ និងនិយាយច្រំដែលចំពោះអ្នករិះគន់លោក ដោយហៅពួកគេថា”អ្នកវិភាគឆ្កួតៗ” និងទស្សនវិទូឡប់ៗ” និងបានសំដៅដល់អ្នកវិភាគម្នាក់ក្បាលទំពែក ម្នាក់ ដែលគេជឿថា សំដៅដល់លោក ឡៅ ម៉ុងហៃ អ្នកវិភាគនយោបាយឯករាជ្យនៅក្នុងប្រទេសកម្ពុជា។
ក្នុងឆ្នាំ២០០៩ លោកក៏បានហៅស្ត្រីម្នាក់ ដោយមិនបញ្ចេញឈ្មោះថា ”ជើងខ្លាំង” ដែលជាពាក្យគេបែបប្រមាថផងដែរ។ ក្រោយមក លោកស្រី មូរ សុខហួរ បានប្រកាសនៅឯសន្និសីទកាសែតមួយថា ការលើកឡើងបែបនេះ គឺផ្តោតលើលោកស្រី ហើយលោក ស្រីក៏បានប្តឹងលោក ហ៊ុន សែន ពីបទបរិហាកេរ្តិ៍។ លោកនាយករដ្ឋមន្ត្រី ក្រោយមកក៏បានប្តឹងបកវិញពីបទបរិហាកេរ្តិ៍ ហើយលោកស្រីត្រូវបានតុលាការរកឃើញពិរុទ្ធភាព។
លោក ឡៅ ម៉ុងហៃ បានមានប្រសាសន៍ថា លោកមិនដែលឮថាមានច្បាប់ស្តីពីក្រមសីលធម៌អ្នកនយោបាយទេពីមុនមក ហើយថា ប្រទេសជាច្រើនមានក្រមសីលធម៌ ឬគោលការណ៍ក្រមសីលធម៌សម្រាប់ឲ្យអ្នកនយោបាយអនុវត្តតាម។ លោកបានមានប្រសាសន៍ថា “វានឹងធ្ងន់ធ្ងរណាស់ ប្រសិនបើរដ្ឋាភិបាលបង្កើតច្បាប់ស្តីពីក្រមសីលធម៌នយោបាយ”៕
ប្រែសម្រួលដោយ ចេវ ប៊ុននី