32 C
Phnom Penh

រដ្ឋាភិបាល​បញ្ជា​ឲ្យ​ម្ចាស់​ហាង​ផ្អាក​ការ​រក​ស៊ី​របស់​ខ្លួន​​ប្រាំ​បី​ថ្ងៃ​អំឡុង​ពិធី​ថ្វាយ​ព្រះ​ភ្លើងព្រះ​បរម​សព

ដោយ ឌឹ ខេមបូឌា ដេលី

បទវិភាគ

ម្ចាស់​ហាង​នៅ​ក្នុង​ខណ្ឌដូន​ពេញ ក្នុង​រាជ​ធានី​ភ្នំពេញ បាន​និយាយ​កាល​ពី​ម្សិលមិញថា ពួកគេ​នឹង​មិនធ្វើតាម​​​សារាចរ​ណែនាំ​របស់​រដ្ឋា​ភិបាល​ឲ្យ​ផ្អាក​ការ​រក​ស៊ី​របស់​ខ្លួន​រយៈ​ពេល​ប្រាំបី​ថ្ងៃ ដើម្បី​ចូល​រួម​កាន់​ព្រះ​រាជ​មរណ​​ទុក្ខ​ជា​លើក​ទី២​របស់​​សម្តេច​ឪ​ ព្រះ​នរោត្តម​ សីហនុ​​ ​នោះទេ។

កាលពី​ថ្ងៃ​អាទិត្យ​​​ម្ចាស់​ភោជនីយដ្ឋាន​ និង​ហាង​លក់​ទំនិញ​នានា​​នៅ​តាមមហា​វិថី​សុធារស​ ផ្លូវ​​​​​លេខ​១៣​ ផ្លូវ​​​លេខ១៧៨​ និងផ្លូវ​​លេខ​១៨៤ បាន​​ទទួល​សារាចរ​ណែនាំ​​ពី​រដ្ឋា​ភិបាល​ឲ្យបិទ​​​អាជីវកម្ម​ជា​បណ្តោះ​អាសន្ន​ចាប់​ពី​ថ្ងៃទី​៣១ ខែមករា​ រហូត​ដល់​ថ្ងៃទី​៧ខែកុម្ភៈ​។ ​

ពិធី​ដង្ហែ​​ព្រះ​បរម​សព​សម្តេច​ឪ​​ នរោត្តម​សីហនុ នឹង​ប្រព្រឹត្ត​ទៅ​នៅ​ថ្ងៃទី​១ ខែកុម្ភៈ​ និង​​​ថ្វាយ​ព្រះ​ភ្លើង​នៅថ្ងៃទី​៤ ខែកុម្ភៈ។

លោក សំ រិទ្ធី ​ចៅ​សង្កាត់​រង​នៃ​​សង្កាត់​ជ័យ​​ជម្នះ​មាន​ប្រសាសន៍ថា ​មិន​មាន​ការដាក់​ទោស​ចំពោះ​ម្ចាស់​ហាង​ទាំង​នោះ​ទេ​​ ប្រសិន​បើ​ពួក​គេ​នៅ​តែ​​បន្ត​ការ​រក​ស៊ី​របស់​​ខ្លួន​នោះ​ ប៉ុន្តែ ពួក​គេ​ “ អាច​នឹង​ត្រូវ​អញ្ជើញ​ឲ្យ​​មក​ជួប​មន្ត្រី​សង្កាត់​” ប្រសិន​បើ​ពួកគេ​មិន​គោរព​តាម​បទបញ្ជា​នេះ​។

លោក​មាន​ប្រសាសន៍បន្ត​ថា “យើង​ចង់​ការពារ​ និង​ធានា​សន្តិសុខ​ឲ្យ​បាន​តឹង​រឹង [នៅ​ជុំ​វិញ​វាល​ព្រះមេរុ]​។ យើង​​ព្រួយ​បារម្ភ​ខ្លាច​​ភោជនីយដ្ឋានខ្លះ​លក់​​គ្រឿង​ស្រវឹុង​ ​និង​មាន​​មនុស្ស​ស្រវឹង​ស្រា​វាយ​តប់គ្នា​​បណ្តាល​ឲ្យ​មានស្ថាន​​ភាព​រញ៉េរញ៉ៃ​នៅ​ទី​​នោះ​”។​ លោក​បាន​បន្ថែម​ថា ផ្ទះ​សំណាក់​​ខ្លះ​អាច​អនុញ្ញាត​ឲ្យ​​បើក​ទទួល​ភ្ញៀវ​ស្នាក់​នៅ​បាន បើសិន​ជា​ភ្ញៀវ​បាន​ស្នាក់​នៅ​ទី​នោះ​រួច​ហើយ។

អ្នក​ស្រី​ គឹម ពេជ្រពិសិដ្ឋ​ ម្ចាស់​ភោជនីយ​ដ្ឋាន​ដំរី​​នៅ​តាម​​ផ្លូវ​លេខ​១៣​បាន​សួរ​ថា “ប្រសិន​បើ [រដ្ឋាភិបាល] ​ពិត​ជា​ព្រួយបារម្ភ​អំពី​ពួកយើង​លក់​ស្រា​នោះ​​ យើង​អាច​ឈប់​លក់​​ស្រា​បាន​ ប៉ុន្តែ យើង​មាន​ភ្ញៀវ​ទេស​ចរ​ជា​ច្រើន​ចូលមក​ហាង​របស់​យើង​ ដូច្នេះ​តើ​​យើង​​ត្រូវ​ធ្វើ​ដូច​ម្តេច​ ​​មាន​តែ​​​ប្រាប់​ពួកគេ​ឲ្យ​​ចេញ​ទៅ​វិញ​? យើង​នៅ​តែ​បន្ត​លក់​​អាហារ​។​មិន​មាន​ហេតុ​ផល​ណា​មួយ​ឲ្យ​យើង​​បិទ​ហាង​នោះ​ទេ​”។

អ្នក​ស្រី សេង សុវណ្ណាពេជ្រ ម្ចាស់​ភោជ​នីយ​ដ្ឋាន​ ស៊ីបាស់​ស្ទៀន​ ដែល​ស្ថិត​នៅ​​ផ្លូវ​លេខ​១៣​ដែរ បាន​និយាយថា “យើង​គ្រាន់​តែ​លក់​វត្ថុផ្សេងៗនៅ​ក្នុង​ផ្ទះ​របស់​យើង​​ប៉ុណ្ណោះ វា​មិន​ប៉ះ​ពាល់​ដល់​ផ្លូវ​សាធា​រណៈឡើយ​។ ប្រសិន​បើ​ប្រជា​ពល​រដ្ឋ​ចង់​ចូល​ ​ពួកគេ​អាច​​ចូល​​បាន​។ យើង​ជួល​បុគ្គលិក​របស់​យើង​ ហើយ​យើង​នឹង​ខាត​បង់​​ប្រាក់​និង​អ្វី​​ៗ​គ្រប់​យ៉ាង​”។

អ្នក​ស្រី សៀន ងីន ម្ចាស់​ហាង​លក់​វត្ថុ​សិល្បៈនៅ​ផ្លូវ​​​​លេខ​១៧៨ មាន​ប្រសាសន៍​ថាអ្នក​ស្រី​​នឹង​នៅ​តែ​​បន្ត​បើក​ហាង​របស់​អ្នក​ស្រី​​​​​ដូច​ដែល​អ្នក​ស្រី​បាន​ធ្វើ​​​ នៅ​ពេល​ធ្វើ​មាតុ​​​ភូមិ​និវត្ត​​​ព្រះ​បរម​សព​សម្តេច​ឪ​ ​នរោត្តម ​សីហនុ​​​មក​ប្រទេស​វិញ​ កាលពីខែ​តុលា​អ៊ីចឹង។

អ្នក​ស្រី​បន្ថែម​ថា “ខ្ញុំ​នៅ​តែ​បើក​ហាង​របស់​ខ្ញុំ​ ពីព្រោះ​មិន​មាន​អ្វី​ខុស​ទេ។ នេះ​គឺ​ជា​ផ្ទះ​របស់​ខ្ញុំ​ ដូច្នេះ​ខ្ញុំ​នៅ​តែ​បើក​ហាង​របស់​ខ្ញុំ​​”។

លោកនាយក​រដ្ឋមន្ត្រី​ ហ៊ុន សែន កាល​ពី​ម្សិលមិញ បាន​ស្នើ​​ឲ្យ​ម្ចាស់​ហាង​លក់​ទំនិញ​ និង​ភោជនីយដ្ឋាន​សហការ​​គោរព​បទ​បញ្ជា​​ឲ្យ​ផ្អាក​ការ​រក​ស៊ី​​​នេះ​អំឡុង​ពេល​​​ថ្លែង​សុន្ទរ​កថានៅ​វិទ្យាស្ថាន​ជាតិ​អប់​រំ។

លោក ហ៊ុន សែន បាន​មាន​ប្រសាសន៍ក្នុង​អំឡុង​​ពិធី​ចែក​សញ្ញាប័ត្រ​នៅ​វិទ្យាស្ថាន​ជាតិ​អប់​រំ​ថា“ សូម​មេត្តា​យោគ​យល់​នៅកន្លែង​ខ្លះ​ នឹង​ត្រូវ​បិទ​ផ្លូវ​​ ប៉ុន្តែ យើង​ត្រូវ​តែ​​គោរព​​ព្រះ​មហា​វីរក្សត្រ​របស់​យើង​ ដែល​យើង​ត្រូវ​​លា​ព្រះ​អង្គ​ជា​លើក​ចុង​ក្រោយ​នៅ​ថ្ងៃ​ទី​៤​ខែកុម្ភៈ”៕ប្រែសម្រួលដោយ ឃិន ណៃ

© 2024, ខេមបូឌា ដេលី. All rights reserved. No part of this article may be reproduced in print, electronically, broadcast, rewritten or redistributed without written permission.

អត្ថបទទាក់ទង

អត្ថបទអានច្រើន

សេចក្ដីរាយការណ៍ពិសេស