មន្ត្រីបានឲ្យដឹងថា កាលពីម្សិលមិញលោកកែប ជុតិមា អភិបាលរាជធានីភ្នំពេញ បានជួបប្រជុំជាមួយមន្ត្រីជាន់ខ្ពស់ក្រសួងមហាផ្ទៃ ដើម្បីជំរុញឲ្យកងកម្លាំងនគរបាលជាតិសហការឲ្យបានជិតស្និទ្ធថែមទៀតជាមួយនគរបាលរាជធានីភ្នំពេញ នៅពេលធ្វើប្រតិបត្តិការនៅក្នុងរាជធានី។
ទោះបីលោក កែប ជុតិមា មិនបានបញ្ជាក់ច្បាស់លាស់ជាសាធារណៈពីមូលហេតុ ដែលលោកស្នើឲ្យមានកិច្ចសហប្រតិបត្តិការជិតស្និទ្ធរវាងមន្ត្រីនគរបាលជាតិក៏ដោយ ក៏សំណើរបស់លោក ដែលលើកឡើងដំបូងអំឡុងកិច្ចប្រជុំសម្ងាត់នៅសាលារាជធានីភ្នំពេញ កាលពីសប្តាហ៍មុននោះ ធ្វើឡើងមួយថ្ងៃបន្ទាប់ពីមានប្រតិបត្តិការបង្ក្រាបក្រុមជំរិតទារប្រាក់តាមប្រព័ន្ធអីុនធើណិតកាលពីថ្ងៃទី៥ខែមករា។ អំឡុងប្រតិបត្តិការនោះនគរបាលជាតិបានច្រឡំឆ្មក់ចូលភូមិគ្រឹះមួយរបស់លោក អឹុម សិទ្ធី រដ្ឋមន្ត្រីក្រសួងអប់រំ។
លោកឧត្តមសេនីយ៍ឯក ខៀវ សុភ័គ អ្នកនាំពាក្យក្រសួងមហាផ្ទៃ ដែលមានវត្តមានក្នុងកិច្ចប្រជុំ កាលពីម្សិលមិញនោះមានប្រសាសន៍ថា ” អាជ្ញាធរសាលារាជធានីភ្នំពេញ [លោក កែបជុតិមា] បានថ្លែងថា នគរបាលជាតិ និងអាជ្ញាធររដ្ឋាភិបាលគួរតែជម្រាបលោកនៅមុនពេលពួកគេចាប់ផ្តើមធ្វើការអ្វីមួយ”។
លោកឧត្តមសេនីយ៍ឯក ខៀវ សុភ័គ មានប្រសាសន៍បន្តថា ទោះបីជាមានសំណើររបស់លោក កែប ជុតិមា ក៏ដោយក៏ក្នុងករណីណាដែលនគរបាលជាតិគិតថា ជាការគំរាមដល់សន្តិសុខជាតិនោះ នគរបាលជាតិមានអំណាចធ្វើប្រតិបត្តិការដោយមិនចាំបាច់ជូនដំណឹងអាជ្ញាធរមូលដ្ឋានឡើយ។
លោកមានប្រសាសន៍ទៀតថា ” នគរបាលជាតិត្រូវតែទទួលខុសត្រូវនៅចំពោះមុខច្បាប់ ប៉ុន្តែ មិនចាំបាច់ជូនដំណឹងដល់អាជ្ញាធរមូលដ្ឋានឡើយ”។
កាលពីម្សិលមិញ លោក កែប ជុតិមា បានបដិសេធមិនធ្វើអត្ថាធិប្បាយអំពីកិច្ចប្រជុំក្រោមអធិបតីភាពរបស់លោក ស ខេង រដ្ឋមន្ត្រីក្រសួងមហាផ្ទៃទេ។ លោក ឡុង ឌីម៉ង់ អ្នកនាំពាក្យសាលារាជធានីភ្នំពេញ ក៏បានបដិសេធមិនធ្វើអត្ថាធិប្បាយអំពីកិច្ចប្រជុំនេះដែរ។
នៅក្នុងលិខិតមួយច្បាប់ផ្ញើជូនលោក អឹុម សិទ្ធី រដ្ឋមន្ត្រីក្រសួងអប់រំកាលពីថ្ងៃទី១០ ខែមករា លោក នេត សាវឿន អគ្គស្នងការនគរបាលជាតិបានសុំទោសលោក អឹុម សិទ្ធី ដោយសារកងកម្លាំងនគរបាលបានចូលទៅក្នុងផ្ទះរបស់លោកអំឡុងពេល”ធ្វើប្រតិបត្តិការចាប់បទល្មើសឆ្លងដែន”។ លិខិតនោះក៏បានលើកឡើងផងដែរថា ”ប្រតិបត្តិការនេះធ្វើឡើងដោយមានកិច្ចសហការពីព្រះរាជអាជ្ញាអបសាលាដំបូងរាជធានីភ្នំពេញ និងអាជ្ញាធរមូលដ្ឋាន”។
ក្នុងលិខិតនោះបានបញ្ជាក់ថា ” អគ្គស្នងការនគរបាលជាតិមានការសោកស្តាយយ៉ាងខ្លាំង… ដោយសារកងកម្លាំងនគរបាលបានចូលទៅក្នុងផ្ទះរបស់ឯកឧត្តមដែលមើលទៅដូចជាផ្ទះរបស់ឧក្រិដ្ឋជនអ៊ីចឹង ហើយការធ្វើដូច្នេះត្រូវបានចង្អុលបង្ហាញដោយអង្គភាពស៊ើបអង្កេត”។
ការឆ្មក់ចូលជាបន្តបន្ទាប់ទៅក្នុងភូមិគ្រឹះចំនួនប្រាពីរនៅក្នុងរាជធានីភ្នំពេញ កាលពីថ្ងៃទី៥ ខែមករា បានជោគជ័យនិងចាប់បានជនសង្ស័យចំនួន៨០នាក់ជាជនជាតិចិនតៃវ៉ាន់ និងចិនដីគោក ដែលជាប់ពាក់ព័ន្ធក្នុងប្រតិបត្តិការជម្រិតទារប្រាក់តាមប្រព័ន្ធអីុនធើណិតនៅកោះតៃវ៉ាន់ និងនៅប្រទេសចិន។
ការឆ្មក់ចាប់នេះ ធ្វើឡើងបន្ទាប់ពីនគរបាលបានចាប់ខ្លួនជនសង្ស័យជនជាតិចិនជាច្រើននាក់នៅក្នុងប្រទេសកម្ពុជា និងប្រទេសផ្សេងទៀត ក្នុងអាសីុអាគ្នេយ៍។ បទល្មើសដែលជាប់សង្ស័យនេះពាក់ព័ន្ធនឹងការប្រើប្រាស់ប្រព័ន្ធបច្ចេកវិទ្យាតាមប្រពន្ធអីុនធើណិត ដើម្បីហៅទៅកាន់មនុស្សនៅក្នុងប្រទេសចិន និងកោះតៃវ៉ាន់ដោយប្រើវិធីសាស្ត្រផ្សេងៗ ដើម្បីបោកបញ្ឆោតនិងជម្រិតទារប្រាក់ដោយការបញ្ចុះបញ្ចូលឲ្យពួកគេវិនិយោគក្នុងគម្រោងវិនិយោគក្លែងក្លាយ៕ប្រែសម្រួលដោយ ឃិន ណៃ