29 C
Phnom Penh

អាជ្ញាធរចាប់​ខ្លួន​អ្នក​ភូមិ​​ម្នាក់​ពាក់​ព័ន្ធនឹង​​ជម្លោះ​ដី​ធ្លី​ជាមួយ​អ្នក​ជំនួញ​ នៅក្នុង​ខេត្ត​បាត់​ដំបង

ដោយ ឌឹ ខេមបូឌា ដេលី

បទវិភាគ

អ្នក​ភូមិ​ និង​មន្ត្រី​តុលាការ​ម្នាក់​បាន​ឲ្យ​ដឹង​​​ថា ​កាលពី​ម្សិល​មិញ​អាជ្ញាធរ​បាន​ចាប់​ខ្លួន​​អ្នក​ភូមិ​ម្នាក់​​ពាក់​ព័ន្ធ​នឹង​ជម្លោះ​ដីធ្លី​​ដ៏រ៉ាំរ៉ៃ​មួយ​ជា​មួយ​​​អ្នក​ជំនួញ​ក្នុង​ស្រុក​​ម្នាក់​​ពីបទ​រំលោភ​ចូល​​ដី​មាន​​វិវាទ នៅ​ក្នុង​ស្រុក​បាណន់​ខេត្ត​បាត់​ដំបង​​។

ការ​ចាប់​ខ្លួន​លោក ពេជ្រ​ សុម៉ាលី ​ធ្វើ​ឡើងប្រាំ​ថ្ងៃ​បន្ទាប់​ពី​គណៈ​កម្មាធិការ​សិទ្ធិមនុស្ស​របស់​រដ្ឋា​ភិបាល ​បាន​ចុះ​ទៅពិនិត្យ​​មើល​ក្នុង​តំបន់​នោះ​ ដើម្បី​ស៊ើប​អង្កេត​ថា តើ​អ្ន​កភូមិ​ត្រូវ​បាន​អាជ្ញាធរ​​​ចាប់​ដាក់​ពន្ធនាគារ​ដោយ​អយុត្តិធម៌​ពាក់​ព័ន្ធ​នឹង​ជម្លោះ​ដី​ធ្លី​​ក្នុង​ពេល​ថ្មីៗ​នេះ​មែន​ឬ​អត់​។

កាលពីឆ្នាំ​២០០៤ អ្នក​ភូមិ​១២នាក់​ នៅ​ភូមិជ្រោយស្នា​ ត្រូវ​បាន​​គេ​ចាប់​​ឃុំ​ខ្លួន​រយៈ​​​ពេល​ខុស​ៗគ្នា ចាប់​ពី​ប្រាំពីរខែ​រហូត​ដល់​មួយ​ឆ្នាំ​ បន្ទាប់​ពី​អ្នក​ជំនួញ​ក្នុង​ស្រុក​ម្នាក់​ឈ្មោះ​ អ៊ាង អឿន បាន​ចោទ​ពួកគាត់​​ថា បាន​រំលោភ​យក​ដី​ដោយ​ខុស​ច្បាប់​។

លោក នួន សាន ព្រះ​រាជអាជ្ញាអមសា​​​លា​​​​ដំបូង​ខេត្ត​បាត់ដំបង​បាន​មាន​ប្រសាសន៍ថា លោក ពេជ្រ សុម៉ាលី​ ត្រូវ​បាន​ចាប់​ខ្លួន​បន្ទាប់​ពី​តុលាការ​បាន​ចេញ​ដីកា​ចាប់​ខ្លួនគាត់​​។ លោកក៏​បាន​មាន​ប្រសាសន៍​ផង​ដែរថា​ លោក​បាន​ជំរុញ​​សាលា​ដំបូង​​កុំ​ឲ្យ​​ឃុំ​ខ្លួន​អ្នក​ភូមិ​ដែល​ពាក់​ព័ន្ធ​​​ ពី​ព្រោះ​គណៈកម្មាធិ​ការ​សិទ្ធិមនុស្ស​របស់​រដ្ឋាភិបាលកំពុង​តែ​​​ស៊ើបអង្កេត​​លើ​​ករណីនេះ។

លោក សាន មាន​ប្រសាសន៍បន្តថា “គាត់​ត្រូវ​បានអាជ្ញាធរ​​ចាប់​ខ្លួន​តាម​​​ដីកា​របស់​សា​​​លា​ដំបូង​ខេត្ត​បាត់​ដំបង​ ទោះ​បី​ជា​ខ្ញុំ​បាន​​ស្នើ​សុំ​រួច​​​ហើយ​​ក៏​ដោយ​។ អ្វី​ដែល​ខ្ញុំ​អាច​បញ្ជាក់​បាន​នោះ​គឺ​គាត់​កំពុង​ស្ថិត​ក្រោម​ការ​ចាប់​ខ្លួន ​ហើយបច្ចុប្បន្ននេះ​ព្រះ​រាជអាជ្ញា​សាលា​ដំបូង​​​ខេត្តម្នាក់​កំពុង​សាក​សួរ​​គាត់​អំ​​ពី​ការ​សង្ស័យ​ថា ​គាត់​បាន​​រំលោភ​យក​​ដី​ ​មាន​ម្ចាស់​ស្រប​ច្បាប់​”។

លោក​បានមាន​ប្រសាសន៍​បន្ត​ទៀត​ថា “​ខ្ញុំ​បាន​ប្តឹង​ទៅ​​សាលា​ឧទ្ធរណ៍​​ជំទាស់​នឹង​​សេចក្តី​​សម្រេច​របស់​សាលា​ដំបូង​ខេត្ត​បាត់​ដំបង​​ក្នុង​​ការ​​ចេញ​ដីកា​ចាប់​ខ្លួន​បុរស​ទាំង​ប្រាំបួននាក់​នេះ​”។

វិវាទ​លើ​ដី​​ទំហំ​១៦១ហិកតា​នៅ​ក្នុង​ឃុំ​ខ្នាចរមាស ក្នុង​ស្រុក​បរវេល ខេត្ត​បាត់​ដំបង​នេះ​ បាន​​កើត​មាន​តាំង​ពី​ឆ្នាំ​១៩៩៩មក ​​ដោយ​​​​សារ​លោក​ អ៊ាង ​អឿន​ បាន​អះអាង​ថា ប្រជា​​​​ពលរដ្ឋ​រស់​នៅ​ទីនោះ​ដោយ​ខុសច្បាប់​​ ប៉ុន្តែ​​អ្នកភូមិ​បាន​និយាយថា ដី​នោះ​ជាដីស្រប​ច្បាប់​​​​​របស់​ពួកគាត់​ ព្រោះ​ពួកគាត់​​បាន​​​ធ្វើ​កសិកម្ម​​លើ​ដី​នេះ​តាំង​ពី​ឆ្នាំ​១៩៨៣​មក​ម្លេ៉ះ។

លោក គង់ ចាន់មុនី តំណាងអ្នក​ភូមិ​ដែល​​ជា​មនុស្ស​ម្នាក់​​ក្នុង​​ចំណោម​មនុស្ស​ប្រាំ​បួន​​​នាក់​ដែល​មាន​​ឈ្មោះ​​ក្នុង​​ដីកា​​ចាប់​ខ្លួន​​នោះ ​​ហើយ​បច្ចុប្បន្ន​នេះ​កំពុង​លាក់​ខ្លួន​នោះ ​បាន​និយាយថា ការ​ចាប់​ខ្លួន​​​លោក សុម៉ាលី គឺ​អយុត្តិធម៌ណាស់​ ហើយ​នេះ​គឺជា​គំរូ​មួយ​ទៀត​បង្ហាញ​ថា តុលាការ​លម្អៀង​ទៅ​រក​អ្នក​មាន​ លុយ ​ហើយ​គាប​សង្កត់​លើ​ប្រជា​ពលរដ្ឋ​​​ក្រី​ក្រ​។

លោក​មាន​ប្រសាសន៍​បន្ត​ថា “ខ្ញុំ​ខក​ចិត្ត​ខ្លាំង​​​​ណាស់​ ដែល​តុលាការ​បាន​សម្រេច​​ចាប់​ខ្លួន​និង​ឃុំ​ខ្លួន​គាត់​ ពីព្រោះ​គណៈ​កម្មា​ធិការ​សិទ្ធិមនុស្ស​របស់​រដ្ឋាភិ​បាល​កំពុង​តែស៊ើប​អង្កេត​លើ​ករណី​នេះ​នៅ​ឡើយ​​”។

លោក​ អឿន មិន​អាច​ទាក់​ទង​សុំ​ការ​​បំភ្លឺ​​បាន​ទេ​ កាល​ពីម្សិល​មិញ​។

លោក ចាន់ សុវ៉េត អនុប្រធាន​ផ្នែក​ស៊ើប​អង្កេត​ប្រចាំ​អង្គការ​សិទ្ធិមនុស្ស​​​អាដហុកបាន​​អំពាវ​នាវ​​ឲ្យ​មាន​ការ​ដោះ​លែង​លោក សុម៉ាលី ​ជាបន្ទាន់​​ ដោយ​លោក​លើក​ឡើង​ថា​​ការ​ចាប់​ខ្លួន​នេះ​​ខុស​ច្បាប់​ ពីព្រោះ​ជម្លោះ​ដី​ធ្លី​​នោះ​មិន​ទាន់​បាន​ដោះ​ស្រាយ​ទេ​។ លោកថ្លែងបន្តថា “ យើង​សោក​ស្តាយ​ខ្លាំង​ណាស់​ ហើយ​មាន​ការ​បារម្ភ​​យ៉ាង​ខ្លាំង​ចំពោះ​ការ​ចាប់​ខ្លួនអ្នក​ភូមិ​​ក្រីក្រ​នេះ​”៕

ប្រែសម្រួលដោយ ឃិន ណៃ​

© 2024, ខេមបូឌា ដេលី. All rights reserved. No part of this article may be reproduced in print, electronically, broadcast, rewritten or redistributed without written permission.

អត្ថបទទាក់ទង

អត្ថបទអានច្រើន

សេចក្ដីរាយការណ៍ពិសេស