34 C
Phnom Penh

ខៀវ សំផន ​ចូល​សម្រាក​ក្នុងមន្ទីរ​​​ពេទ្យ​មិត្តភាពខ្មែរសូវៀតដោយ​សារ​​​​​​ លំបាក​ដក​​​ដង្ហើម​ និង​អស់​កម្លាំង​

ដោយ ឌឹ ខេមបូឌា ដេលី

បទវិភាគ

ខៀវ សំផន ប្រមុខ​រដ្ឋ​​សម័យ​ខ្មែរ​ក្រហម​ត្រូវ​បាន​​បញ្ជូន​​ចូលមន្ទីរពេទ្យ​ កាល​ពី​ម្សិល​មិញ ដោយ​សារ​តែ​​មាន​ជំងឺ​ជា​ច្រើន​មុខ ​រួម​មានបញ្ហា​ពិបាកដក​ដង្ហើម​​ នៅ​ក្នុង​រយៈ​ពេល​​​តែ​បួន​ថ្ងៃប៉ុណ្ណោះ​​បន្ទាប់​ពី​ចុង​ចោទ​ នួន ជា ​​បាន​ដួល​ និង​ចូល​សម្រាកនៅ​មន្ទីរ​ពេទ្យ ​​​ដោយ​​​​​​សារ​ជំងឺរ​លាក​ទង​សួត​ធ្ងន់​។

លោក ឡាស អូលសិន (Lars Olsen)​ មន្ត្រី​​​​ទំនាក់​ទំនង​សាធារណៈ​របស់សាលា​ក្តី​ខ្មែរ​ក្រហម​​​​បានមាន​ប្រសាសន៍ថា ខៀវ​ សំផន អាយុ​៨១ឆ្នាំ ត្រូវ​​បាន​បញ្ជូន​ទៅ​​ព្យាបាល​​នៅ​​​ក្នុងមន្ទីរ​ពេទ្យ​មិត្ត​ភាព​ខ្មែរ​សូវៀត​ក្នុង​រាជ​ធានី​ភ្នំពេញ កាល​ពី​ព្រឹកម្សិលមិញ ហើយ​នឹង​ត្រូវ​សម្រាក​នៅ​ទីនោះ​រហូត​ដល់​ស្ថានភាព​ជំងឺ​របស់​គាត់​ត្រុូវ​បាន​ព្យា​បាល​រួច​រាល់​។

លោក ឡាស​ អូលសិន បាន​លើក​ឡើង​តាម​​​អីុម៉េល​មួយ​ថា “ ខៀវ​ សំផន ត្រូវ​បាន​បញ្ជូន​ទៅ​មន្ទីរ​ពេទ្យ​មិត្តភាព​ខ្មែរ​សូវៀត​​នៅ​ព្រឹក​មិញ​​នេះ​​។​ ពេល​នេះ​គាត់​​​កំពុង​​សម្រាក​នៅ​ទី​​​នោះ​​​ដើម្បី​ឲ្យ​គ្រូ​ពេទ្យ​ពិនិត្យ”។

នៅ​ពេលសួរ​ថា តើចុង​ចោទ​វ័យ​​​ចំណាស់​​រូប​នេះ​មាន​បញ្ហាអ្វី​​  លោក  ឡាស ​អូល​សិន ​បាន​លើក​ឡើង​ថា“ តុលាកា​រកំពុង​តែរង់​ចាំ​ការវិនិច្ឆ័យ​ជំងឺ​ពី​មន្ទីរពេទ្យ​ ប៉ុន្តែ​គាត់​ត្រូវ​ចូល​សម្រាក​នៅ​​ក្នុងមន្ទីរពេទ្យ​ដោយ​សារ​តែ​គាត់​ខ្សោយ អស់​កម្លាំង​ និង​ពិបាក​ដក​ដង្ហើម”។

លោក ឆឹង យ៉ៅយ៉េន ​អនុ​ប្រធាន​មន្ទីរ​​​ពេទ្យ​​​​មិត្តភាពខ្មែរ​សូវៀត បាន​បញ្ជាក់​ព​ី​ការ​​ទទួល​ ខៀវ​ សំផន ​ឲ្យចូល​​មន្ទីរ​ពេទ្យ​នេះ​។

លោកបាន​មាន​ប្រសាសន៍ថា “ គាត់​ត្រូវ​​បាន​​បញ្ជូន​មក​​មន្ទីរពេទ្យ​ កាល​ពី​ព្រឹក​មិញ​ ពីព្រោះ​គាត់​មិន​ស្រួល​ខ្លួន​ ប៉ុន្តែ ខ្ញុំ​នៅ​មិន​​ទាន់​ដឹង​ច្បាស់​ថា តើគាត់​នឹ​ង​ត្រូវ​សម្រាក​ព្យាបាលនៅមន្ទីរពេទ្យ​ឬក៏​អត់​នោះទេ​”។

លោក គឹម ​សំសាន ប្រធាន​ផ្នែក​ព្យាបាល​របស់​មន្ទីរ​ពេទ្យ​មិត្តភាព​ខ្មែរ​សូវៀត បាន​លើកឡើង​ថា ខៀវ​ សំផន ​ចូល​សម្រាក​​​នៅ​ម៉ោង​​​​ប្រហែល​​​​​១០​ព្រឹក​ កាល​ពី​ព្រឹក​ម្សិល​​​មិញ។

លោក គឹម​ សំសាន ​​​​​មាន​ប្រសាសន៍​ថា “យើង​មិន​ទាន់​ដឹង​ច្បាស់​ពី​ជំងឺរបស់​គាត់​ទេ ប៉ុន្តែ យើង​កំពុង​តាម​ដាន​សុខភាព​របស់​គាត់”។ លោក​បាន​បន្តថា ស្ថានភាព​ជំងឺ ​ខៀវ​ សំផន មិន​ធ្ងន់​នោះ​ទេ។

យោង​តាម​លោក វេជ្ជ​បណ្ឌិត គឹម សំសាន​​​​បាន​ឲ្យ​ដឹង​ថា ខៀវ​ សំផន ​​ប្រហែល​ជា​​នឹង​​ចេញ​ពី​​មន្ទីរពេទ្យ​​បួន​ទៅ​ប្រាំ​ថ្ងៃ​ទៀត​។

ការ​ចូល​សម្រាក​ក្នុង​មន្ទីរ​ពេទ្យ​របស់​ចុង​ចោទ​ទាំង​ពីរ​ធ្វើ​ឲ្យ​​យឺត​យ៉ាវ​​ដល់​​សំណំុ​​​​​​រឿង​​​០០២​​​របស់​សាលា​ក្តី​ខ្មែរ​ក្រហម ​ដែល​កំពុង​​គាំង​​ដោយ​សារ​​សវនាការ​តូច​ៗ​។

រហូត​ដល់​ថ្ងៃ​ម្សិល​មិញ ខៀវ​ សំផន ​គឺ​​​ជា​​​ចុង​​​ចោទ​មួួយ​រូប​ ដែល​មាន​សុខភាព​ប្រសើរ​ជាង​​​​ចុង​ចោទ​ផ្សេងៗទៀត។ ថ្វីបើ​ធ្លាប់​​ដួល​នៅ​ក្នុង​​​ផ្ទះ​របស់ខ្លួន នៅក្នុង​ខេត្ត​ប៉ៃលិន នៅ​ពេល​ល្ងាច​មុន​ពេល​​ចាប់​ខ្លួន​​គាត់​ កាលពីខែ​វិច្ឆិកា​ ឆ្នាំ​២០០៧​ ហើយ​បាន​ចូល​សម្រាកក្នុង​មន្ទីរ​​​ពេទ្យ​​មួយ​​រយៈពេលខ្លី​កាលពីខែឧសភា ឆ្នាំ​២០០៨​ដោយសារ​តែ​សម្ពាធឈាម​ឡើង​ខ្ពស់​ក្ដី​​​ ខៀវ​ សំផន បាន​មាន​វត្តមាន​នៅ​​​ក្នុង​​​​ការ​បើក​សវនាការ​នៅ​សាលាក្តី​ខ្មែរក្រហម​ជាប់​រហូត​។

នួន ជា​ អាយុ​៨៦ឆ្នាំ​ ដែល​ជា​​បង​ធំ​ទី២​​​ត្រូវ​​​បាន​បញ្ជូន​នៅ​កាន់​មន្ទីរពេទ្យ​ កាល​ពី​ថ្ងៃ​អាទិត្យ​ បន្ទាប់​ពី​បាន​ដួល​នៅ​ក្នុង​​បន្ទុប​ឃុំ​ឃាំង​​នៅ​​សាលាក្តី​ខ្មែរក្រហម​។ វេជ្ជ​បណ្ឌិត​​នៅ​មន្ទីរ​ពេទ្យ​មិត្ត​ភាព​ខ្មែរ​សូវៀត បាន​​ពិនិត្យ​គាត់​​ កាល​​​​ពី​ថ្ងៃច័ន្ទ​ថា គាត់​មា​ន​ជំងឺ​រលាក​ទង​សួត​ធ្ងន់​។

អៀង សារី អាយុ៨៨ឆ្នាំ ជា​ជន​ជាប់​ឃុំ​​​ឃាំង​ចាស់​ជាង​គេ​នៅ​ក្នុង​សំណំុរឿង​០០២​​​នឹង​ជា​អតីត​រដ្ឋ​មន្ត្រី​ការ​បរទេស​​ខ្មែរ​ក្រហម ក៏​បាន​ចូល​សម្រាក​នៅ​ក្នុង​មន្ទីរ​ពេទ្យ​អស់​រយៈ​ពេល​ពីរ​ខែ​ផង​ដែរ​ កាល​ពីចុង​ឆ្នាំ​មុន​។

គាត់​មាន​ជំងឺ​ជា​ច្រើន​មុខ​ដូច​ជា ជំងឺ​បេះ​ដូង លើស​ឈាម និង​ជំងឺចុក​ចង្កេះ​ ព្រម​ទាំង​ធ្លាប់​​បាន​វះកាត់​បេះដូង​ចំនួន​បួន​លើក​មក​ហើយ​ចាប់​តាំង​ពី​ឆ្នាំ​១៩៩៤មក​។ គាត់​បាន​ចូល​សម្រាកនៅ​មន្ទីរពេទ្យ​យ៉ាង​តិច​ណាស់​១១លើក​ ចាប់​ពី​គាត់​​ត្រូវ​បាន​ចាប់​ខ្លួន​ កាល​​​ពីឆ្នាំ​២០០៧មក​។ ការ​ចូល​សម្រាក​នៅក្នុង​មន្ទីរ​​​ពេទ្យ​​​​នាពេល​​ថ្មី​ៗ​នេះ​​ គឺ​ដោយ​សារ​តែ​ឆ្អឹង​ដង​​​កាំបិត​​​​បាន​គាប​សរសៃឈាម​របស់​គាត់ដែល​ធ្វើ​ឲ្យ​គាត់​មាន​ស្មារតី​វង្វេង​វង្វាន់។​

លោក​វេជ្ជ​បណ្ឌិត ​គឹម សំសាន បាន​​​បន្ត​ថានួន​ ជា ​កំពុង​​​សម្រាក​​ព្យាបាល​នៅ​ក្នុង​មន្ទីរ​ពេទ្យ​នៅ​ឡើយ ប៉ុន្តែ ស្ថានភាព​ជំងឺ​របស់​គាត់​បាន​សះស្បើយ​ខ្លះ​ហើយ​។ លោក គឹម សំសាន បាន​បន្ត​​ថា “ នួន ជា ជា​បន្តិច​​ហើយ​ ហើយ​គាត់​នឹងចេញ​ពី​មន្ទីរ​​​ពេទ្យ​ប្រហែលនៅ​បួន​​ប្រាំ​ថ្ងៃ​ទៀត”។

លោក អាសើ វើខេន (Arthur Vercken)​​​មេធា​វីការ​ពារ​ក្តី​អន្តរជាតិ​របស់​ ខៀវ សំផន មិន​អាច​ទាក់​ទង​សំុ​អត្ថា​ធិ​ប្បាយ​បាន​ទេ។ ​អ្នក​ស្រី ​ខៀវ​ រតនា ​កូនស្រី​ចុង​ចោទ​រូប​នេះ​ បាន​និយាយ​តាម​ទូរ​ស័ព្ទ​ថា គាត់​មិន​បាន​ដឹង​​អំពី​ស្ថាន​ភាព​ជំងឺ​​ឪពុក​​របស់គាត់​ទេ​។

អ្នក​ស្រី ខៀវ រតនា បាន​និយាយ​​ថា “ខ្ញុំ​មិន​​​​ដឹង ពី​ព្រោះ​ខ្ញុំ​មិន​ទាន់​បាន​ទៅ​​ជួប​​គាត់​នៅ​​ឡើយ” ។​ គាត់​បាន​បន្ត​ថា ម្តាយ​របស់​គាត់​បាន​​​សួរ​​មេធាវី​​របស់​គាត់​ថា ​តើ​​គាត់​អាច​ទៅ​​សួរ​សុខទុក្ខ​គាត​់​បាន​ទេ​។

លោក ឡុង បញ្ញាវុធ មន្ត្រី​កម្មវិធី​ប្រចាំ​គម្រោង​​យុតិ្តធម៌នៅ​​កម្ពុជា បាន​លើក​ឡើង​ថា ស្ថានភាព​សុខភាព​របស់​ ខៀវ សំផន មិន​ធ្ងន់​ដូច​ចុង​ចោទ​ដទៃៗ​ទៀត​ឡើយ​។​ទោះ​ជា​យ៉ាង​​​​ណា លោក​បាន​​ស្នើ​ឲ្យ​សាលាក្តី​ខ្មែរ​ក្រហម​ស្វែងរក​វិធី​សាស្រ្ត​ថ្មី​ ដើម្បី​​បញ្ចប់​ការ​បើក​សវនាការ​​តូចៗជា​លើក​ដំបូង​​ និង​មាន​ការ​គោរព​សិទ្ធិ​ទទួល​បាន​ជំនុំជម្រះ ​​ដោយ

​យុត្តិ​​​ធម៌​​​​ និង​ដើម្បី​​ធ្វើ​ឲ្យ​ជន​រង​គ្រោះ​ទទួល​បាន “ យុត្តិធម៌ពិត​ប្រាកដ”។ លោក​​មាន​ប្រសាសន៍ថា “ខ្ញុំ​គិត​ថា ធ្វើ​​​លោក ឡុង វញ្ញាវុធ បាន​មាន​ប្រសាសន៍​បន្ត​ថា “ ចៅ​ក្រម​​ត្រូវ​តែ​សម្រេច​ថា​តើ វា​មាន​​​​​​​

សារៈ​សំខាន់​ឬមិន​មាន​​ ក្នុងការ​ពន្យារ​ពេល​និតិវិធី​នៅ​ពេល​ចុង​ចោទ​មិន​អាច​សូម្បី​តែ​អង្គុយ​នៅ​ក្នុង​បន្ទប់​សវនាការ​​ដើម្បី​​ចូល​រួម​ស្តាប់​​សវនាការ​នោះ។ តើវា​ខុស​គ្នា​យ៉ាង​ម៉េច​​​​ដែរ ​ប្រសិន​បើ​ពួកគាត់​រង​ចាំមើលពី​បន្ទប់​​​ពន្ធ​​​នាគារ​ រឺក៏ពីមន្ទីរពេទ្យនោះ?”។

កាល​ពី​ថ្ងៃអង្គារ​​សា​លា​ក្តី​ខ្មែរ​ក្រហម​បាន​ផ្អាក​ការ​បើ​សវនាការ​ក្នុង​សំណុំ​រឿង​០០២ ដែល​ទើប​តែ​ចាប់​ផ្តើម​ កាល​ពី​ថ្ងៃ​​ទី​៨​​ខែ​​​មករា បន្ទាប់​ពី​ឈប់​​សម្រាក​អស់​រយៈ​ពេល​ពីរ​សប្តាហ៍។ លោក​ ឡាស អូសេន បាន​មាន​ប្រសាសន៍​ថា ​ដំណឹង​អំពី​ការ​បើក​សវនាការ​លើក​ក្រោយ​នឹង​ត្រូវ​ផ្សព្វ​ផ្សាយ​នៅ​ពេល​សមរម្យណាមួយ​៕ស៊ុយឈាង

 

© 2024, ខេមបូឌា ដេលី. All rights reserved. No part of this article may be reproduced in print, electronically, broadcast, rewritten or redistributed without written permission.

អត្ថបទទាក់ទង

អត្ថបទអានច្រើន

សេចក្ដីរាយការណ៍ពិសេស