គណៈកម្មាធិការអចិន្ត្រៃយ៍រដ្ឋសភាបានយល់ព្រមបង្កើតក្រុមប្រតិកម្មរហ័ស និងតែងតាំងអ្នកនាំពាក្យមួួយក្រុមដើម្បីតំណាងរដ្ឋសភានិងទំនាក់ទំនងជាមួយប្រព័ន្ធផ្សព្វផ្សាយ។
យោងតាមសេចក្ដីប្រកាសរបស់រដ្ឋសភាចេញកាលពីម្សិលមិញឲ្យដឹងថា ក្រុមប្រតិកម្មរហ័សនេះមានតំណាងរាស្ត្រមកពីគណបក្សប្រជាជនកម្ពុជាចំនួនប្រាំរូប រាប់ទាំងលោក ជាម យៀប ប្រធានគណៈកម្មការធនាគារនិងហិរញ្ញវត្ថុរដ្ឋសភាផងដែរ។
ចំណែកអ្នកនាំពាក្យមួយក្រុមផ្សេងទៀតមានតំណាងរាស្ត្រមកពីគណបក្សប្រជាជនកម្ពុជាចំនួនបីរូប គឺលោក ឈាងវុន ដែលកាលពីខែវិច្ឆិកា បានទទួលរងនូវការរិះគន់យ៉ាងខ្លាំងចំពោះការហៅលោក កឹម សុខា តំណាងរាស្ត្រគណបក្សប្រឆាំងថា “ព្នង” ជាឈ្មោះរបស់ជនជាតិភាគតិច ដែលគេប្រើដើម្បីប្រមាថមនុស្សគ្មានអារិយធម៌ ឬគ្មានការអប់រំ។ ប៉ុន្ដែចាប់តាំងពីពេលនោះមកលោក ឈាងវុន ក៏បានសូមអភ័យទោសនៅក្នុងរដ្ឋសភាចំពោះការប្រមាថនេះ។
ក្រុមប្រតិកម្មរហ័សនេះក៏មានលោក ប៉ែន បញ្ញា លោក ម៉ុម ជឹមហុ៊យ លោក សុិក ប៊ុនហុក និងលោក ឡេង ប៉ែនឡុង ផងដែរ។លោក ញ៉ែម ថាវី និងលោក សុខ ឦសាន នឹងចូលរួមជាមួយលោក ឈាង វុន នៅក្នុងក្រុមអ្នកនាំពាក្យនេះ។
លោក ឈាង វុន បានមានប្រសាសន៍ថា លោកមិនទាន់ទទួលបានការតែងតាំងតួនាទីថ្មីនេះជាផ្លូវការនៅឡើយទេ ប៉ុន្ដែ លោកបានបញ្ជាក់ថា ក្រុមប្រតិកម្មរហ័សនឹងផ្ដល់ព័ត៌មានឲ្យប្រព័ន្ធផ្សព្វផ្សាយ។
លោក ឈាង វុន បានមានប្រសាសន៍ថា “រដ្ឋាភិបាលមានរដ្ឋមន្ត្រីក្រសួងព័ត៌មានជាអ្នកនាំពាក្យ ចំណែកទីស្ដីការគណៈរដ្ឋមន្ត្រីវិញ ក៏មានអង្គភាពព័ត៌មាននិងប្រតិកម្មរហ័ស ដែលហើយថ្ងៃនេះ កាលៈទេសៈតម្រូវឲ្យយើងបង្កើត [ការិយាល័យព័ត៌មានរបស់ខ្លួនឯងផ្ទាល់] ដើម្បីផ្ដល់ព័ត៌មានឲ្យបានគ្រប់គ្រាន់និងត្រឹមត្រូវដល់ប្រជាពលរដ្ឋ ជាពិសេសដល់អ្នកកាសែត”។
លោក យឹម សុវណ្ណ តំណាងរាស្ត្រ និងជាអ្នកនាំពាក្យគណបក្ស សម រង្ស៊ី បានថ្លែងថា ការបង្កើតក្រុមប្រតិកម្មរហ័សនេះនឹងធ្វើឲ្យមានព័ត៌មានលម្អៀងដែលរដ្ឋសភាផ្ដល់ឲ្យ ពេលក្រុមនេះចាប់ផ្ដើមដំណើរការ។
លោក យឹម សុវណ្ណ បានមានប្រសាសន៍ថា “ការបង្កើតក្រុមនេះបង្ហាញថា រដ្ឋសភាគឺជារដ្ឋសភារបស់បក្ស មិនមែនជារដ្ឋសភារបស់ជាតិទេ”។លោកបានគូសបញ្ជាក់ថា នៅក្នុងក្រុមប្រតិកម្មរហ័សនេះមិនមានតំណាងមកពីគណបក្សរបស់លោកដែលមានកៅអីចំនួន២៦ក្នុងចំណោមកៅអីរដ្ឋសភាទាំង១២៣នោះទេ។
លោក បានមានប្រសាសន៍បន្ថែមថា “ក្រុមនេះ ត្រូវបានបង្កើតឡើងសម្រាប់បម្រើផលប្រយោជន៍របស់គណបក្សប្រជាជនកម្ពុជាតែប៉ុណ្ណោះ មិនមែនបម្រើផលប្រយោជន៍របស់ប្រជាពលរដ្ឋនោះទេ”។
អង្គភាពព័ត៌មាន និងប្រតិកម្មរហ័សនៅទីស្ដីការគណៈរដ្ឋមន្ត្រី មានសំឡេងសកម្មណាស់ក្នុងការគាំទ្ររដ្ឋាភិបាលក្នុងរយៈពេលប៉ុន្មានឆ្នាំថ្មីៗនេះ ដែលយូរៗម្ដង បាននិយាយមិនល្អអំពីអ្នករិះគន់គណបក្សប្រជាជនកម្ពុជា។
ជាឧទាហរណ៍ មួយថ្ងៃបន្ទាប់ពីលោក ម៉ម សូណង់ដូ ម្ចាស់ស្ថានីយវិទ្យុឯករាជ្យមួយត្រូវបានតុលាការផ្តន្ទាទោសដាក់ពន្ធនាគាររយៈពេល២០ឆ្នាំ កាលពីខែតុលានោះលោក កែវ រ៉េមី អ្នកនាំពាក្យអង្គភាពព័ត៌មាន និងប្រតិកម្មរហ័ស បានធ្វើសន្និសីទសារព័ត៌មានមួយភ្លាមៗ ដើម្បីការពារលោកនាយករដ្ឋ
មន្ត្រី ហ៊ុន សែន ពីក្រុមអ្នករិះគន់ដែលគេមិនបញ្ចេញឈ្មោះ។
លោក កែវ រ៉េមី បានថ្លែងប្រាប់ក្រុមអ្នកសារព័ត៌មានថា “ខ្ញុំសូមលើកឡើងអំពីការចោទប្រកាន់ថា លោកនាយករដ្ឋមន្ត្រី ហ៊ុន សែន មានប្រាក់ច្រើនដោយសារអំពើពុករលួយនោះ។វាជាការចោទប្រកាន់មួយដ៏ធ្ងន់”។
ដោយលើកឡើងពីភូមិគ្រឹះរបស់លោក ហ៊ុន សែន នៅរាជធានីភ្នំពេញ និងនៅក្រុងតាខ្មៅ នោះ លោក កែវ រ៉េមី បានថ្លែងបន្ថែមថា “សម្ដេច ហ៊ុន សែន ធ្វើនាយករដ្ឋមន្ត្រី ជាច្រើនឆ្នាំមកហើយ ប៉ុន្តែ សម្ដេចមានផ្ទះតែពីរប៉ុណ្ណោះ” ។
សេចក្ដីប្រកាសដែលរដ្ឋសភាចេញផ្សាយកាលពីម្សិលមិញ ក៏បានលើកឡើងដែរថា សេចក្តីព្រាងច្បាប់ស្ដីពីការពន្លត់អគិ្គភ័យ និងការធានាពីរដ្ឋាភិបាល ដើម្បីបង់ប្រាក់សម្រាប់គម្រោងទំនប់វារីអគ្គិសនីសេសានក្រោម២នោះ ត្រូវបានបញ្ជូនទៅគណៈកម្មាធិការពិសេស មុនពេលយកទៅពិភាក្សាដេញដោលនៅរដ្ឋសភា៕
ប្រែសម្រួលដោយ ស៊ុំ សុខភុំ