29 C
Phnom Penh

ប្រជា​​​ពលរដ្ឋ​​​ចំនួន​​​១៥០.០០០​​​នាក់​​​ខ្វះទី​ជម្រក ដោយសារ​គោល​​​នយោ​​​បាយ​​​ដី​​​ធ្លី​​​របស់​​​រដ្ឋាភិបាល​​​​​​

ដោយ ឌឹ ខេមបូឌា ដេលី

បទវិភាគ

យោង​​​តាម​​​របាយ​​​ការណ៍​​​ថ្មី​​​មួយ​​​របស់ សមា​គម​​​ធាង​​ត្នោត​​​ ដែលជា​​​អង្គការ​​​ក្រៅ​​​រដ្ឋា​​​ភិបាល​​​ក្នុងស្រុក បាន​​​ឲ្យ​​​ដឹង​​​ថា ​​​​​​ក្នុង​​​រយៈ​ពេល​​​ជាង​​​២០​​​ឆ្នាំ​​​កន្លងមក​​​នេះ ​​​ប្រជា​​​ពល​​​រដ្ឋ​​ខ្មែរជាង​​​១០​​​ភាគ​​​រយ ​ដែល​​​រស់​​​នៅ​​​ក្នុង​​​រាជ​ធានីភ្នំពេញ​​​ត្រូវ​​​បាន​​​បាត់បង់​​​លំនៅ​​​ដ្ឋាន​​​ ដោយ​​​សារតែ​​​គោល​​​នយោ​​​បាយ​​​​ដែល​នាំ​ឲ្យ​មាន​ការ​បណ្ដេញ​​​ប្រជា​​​ពល​​​រដ្ឋ​​ក្នុង​​​រាជធានី​ភ្នំពេញ​​ឲ្យ​​​ទៅ​​​តាំង​​​លំនៅ​​​ដ្ឋាន​​​ថ្មី​​​ នៅឯ​​​ជាយ​​​ក្រុង។

របាយ​​​ការណ៍​​​របស់​សមាគម​ធាង​ត្នោត​ដែល​​​មាន​​​ចំណង​​​ជើង​​​ថាការផ្លាស់ប្ដូរ​​​ទីលំនៅ​ថ្មីទាំង៥៤​​​កន្លែង នៅ​ក្នុងរាជធានី​​​ភ្នំពេញ​​​បាន​​​​​លើកឡើង​​​ថា “ទិន្ន​​​ន័យ​​បង្ហាញ​​​ពី​​​របៀប​​​ ដែល​​​រាជ​​​រដ្ឋា​​​ភិបាល​​​កម្ពុជាបាន​​​អនុវត្ត​​​​គោល​​​នយោ​​​បាយ​​​យា៉ង​​​ទូលំ​​​ទូ​​​លាយ​​​ក្នុង​​​ការ​​​បណ្ដេញ​​​ប្រជា​​​ពល​​​រដ្ឋ​​​ក្រី​​​ក្រ​​​​​​នៅ​ក្នុង​រាជធានី​​ភ្នំ​​​ពេញឲ្យ​​​ទៅ​​​នៅ​​​ជា​​​យ​​​ក្រុងក្នុង​រយៈពេល​ជាង​​​មួយ​​​ទសវត្សរ៍នេះ​​​​​​​​​​​​”។

​​​​​​​​​ដោយ​​​សារតែ​​​លទ្ធផល​​​នៃ​​​ការ​​​អភិវឌ្ឍ​យ៉ាង​​​ឆាប់​​​រហ័ស នៅក្នុងរាជធានី​​​ភ្នំពេញ ប្រជា​​​​ពល​​​រដ្ឋ​​​ក្រីក្រប្រមាណ​​​១៥០.០០០​​​នាក់​​​ រស់នៅក្នុងសហគមន៍​​​៥៤​​​កន្លែង ដែល​ស្មើ​​​នឹង​​​១១​​​ភាគរយ​​​នៃ​​​ប្រជា​​​ពល​​​រដ្ឋ​​​ក្នុង​​​រាជធានី​​​ទាំង​​មូល ត្រូវ​​​បានអាជ្ញាធរ​​​បណ្ដេញ​​​ចេញ​​​​​​ឲ្យ​​​ទៅ​​​តាំង​​​លំនៅ​​​​​ដ្ឋានថ្មី​​​​​​។

យោង​​​តាម​​​លទ្ធ​​​ផល​​​នៃការសម្ភាស​​​ជាមួយ​​​​នឹង​​​ថ្នាក់​​​ដឹក​​​នាំ​​​សហគមន៍​​​​​​ និងតាម​​​ទិន្នន័យ​​​ប្រមូល​​​ដោយ​​បុគ្គលិក​​​សមាគម​​​ធាង​​​ត្នោត​​​ នៅក្នុង​​​ចន្លោះ​​​ខែ​​​ឧសភា ឆ្នាំ​​​២០១១ និងនៅ​​​ពាក់​​​កណ្ដាល​​​ឆ្នាំ​​​២០១២ បាន​​​អះអាង​​​​​​ថា  ​ក្នុងរយៈពេល​​​២០​​​ឆ្នាំ​​​មក​​​នេះ កន្លែង​​​សម្រាប់​តាំងទីលំនៅ​​​ដ្ឋាន​​​ថ្មី​​​ត្រូវ​​​បាន​​​គេ​​​បង្កើត​​​ឡើងដោយ ស្ថិត នៅ​កាន់​​​តែ​​​​​​ឆ្ងាយ​​​ទៅ​​​ៗ​​​ពីរាជធានី​​​ភ្នំពេញ ហើយ​​​កន្លែង​​​ទាំង​​​នោះ​​​ស្ទើ​​​រតែ​​​​​មិន​មានសេវា​​​សាធារណៈ ខ្វះ​​​សាលា​​​រៀន និង​​​មិនអាចរក​ការ​​​ងារ​​​ធ្វើសម្រាប់ចិញ្ចឹមជី​​​វិតទៀត​​​ផង។

របាយ​​​ការណ៍​​​នោះ​​​ក៏​​​បាន​​​លើកឡើង​​​ផង​​​ដែរ​​​ថា“ កន្លង​​​មក​​​នេះ កន្លែង​​តាំង​​លំនៅ​​​ដ្ឋាន​​​​ថ្មី​​​ កាន់តែ​ឆ្ងាយ​​​ទៅ​​​ៗពី​​​រាជធានី​​​ ហើយ​មិន​មាន​​សេវា​​សាធារណៈ​​​​​​​​​ទេ”។

របាយ​​​ការណ៍​​​បាន​​​បន្ដ​​​ថា “ជន​​​រង​​​គ្រោះ​​​​ជា​​​រឿយៗ​​​ត្រូវប្រឈម​​​នឹង​​​ផល​​​ប៉ះ​​​ពាល់​​ផ្នែក​​​​​​​​​សេដ្ឋ​​​កិច្ច​​​ សង្គម និង​​​ភាពងាយ​​​រង​​​គ្រោះ​​​គ្រប់​បែប​​​យ៉ាង ដែល​​​បណ្ដាល​​​មក​​​ព​​​ី​​​ការ​​​បណ្ដេញ​​​ចេញ​​​ជាបន្ដ​​​បន្ទាប់​​​​​​”។

របាយការណ៍​​​ដដែលនោះបានឲ្យដឹង​ទៀតថា ក្នុងចន្លោះ​​​ឆ្នាំ​​​២០០៩​​​ និង​​​២០១១ ចម្ងាយ​​នៃ​កន្លែង​​​តាំង​​​លំនៅ​​​ដ្ឋាន​​​ថ្មី​​ ដោយ​​​គិត​​​​​​ពីវត្ត​​​ភ្នំ ដែលជា​​​ចំណុច​​​កណ្ដាល​​​ គឺមាន​ចម្ងាយ​​​ជា​​​មធ្យម​​​ពី​​​១១​​​គីឡូ​​​ម៉ែត្រ​​​ទៅ​​​៤៧​​​គីឡូ​​​ម៉ែត្រ​​​ គឺកាន់តែ​ឆ្ងាយ​ទៅៗ។ ដោយ​​​សារ​​​និន្នា​​​​ការ​​​បែបនេះ លទ្ធភាព​ទទួលបាន​ទឹក​​​ស្អាត​​​ផ្គត់​​​ផ្គង់​ដោយ​​​អាជ្ញាធរ​​​​​​រដ្ឋាករ​​​ទឹក​​​ភ្នំពេញនៅ​តាម​បណ្តាទី​​​តាំង​​​ថ្មី​​​ ​​​​មាន​​​ចំនួន​​​ត្រឹម​​​តែ​​​៥៤​​​ភាគ​​​រយ​​​ ចំណែក​​​ទី​​​តាំង​​​ថ្មី​​​ ដែល​​​មាន​បណ្តាញ​ថាមពលអគ្គិសនី​​​រដ្ឋ​​​មាន​​​ចំនួន​​​ត្រឹម​តែ៥២​​​ភាគរយប៉ុណ្ណោះ​។​​​

​​​របាយ​​​ការណ៍​​នេះបាន​​​សន្និដ្ឋាន​​​ថា ដោយ​សារការ​​​តាំង​​​លំនៅ​​​ថ្មី​​​ គឺជារឿងមួយ​មិន​អាច​ចៀសផុត “ បើការផ្តល់ផល​ប្រយោ​ជន៍​ជា​សំណងចំពោះផល​​​ប៉ះ​​​ពាល់ដល់​​​​​​សេដ្ឋ​​​កិច្ច​​​សង្គមនោះ ការ​​​តាំង​​​លំនៅ​​​ថ្មី​​​នេះ គួរតែធ្វើ” តែរបាយ​​​ការណ៍​​​បាន​​​ផ្ដល់​​​អនុសាសន៍​​​ថា រាល់​​​ជម្រើសក្នុងការ​​​តាំងលំនៅដ្ឋាន​​​ថ្មី “ គួរតែ​​​ពិនិត្យ​​​មើល​​​ថា តើ​​ជម្រើស​មួយណាសមរម្យ​បំផុត ហើយអាចទទួលយក​​​បាន​​​”។

លោក សៀ ភារម្យ នាយក​​​លេខា​​​ធិការ​​​ដ្ឋាន​​​ក្រុម​​​ការ​​​ងារ​​​ពិសេស​​​សិទ្ធិ​​​លំនៅ​​​ដ្ឋានបាន​​​មានប្រសាសន៍​​​កាល​​​ពី​​​ម្សិល​​​មិញ​​​ថា ដរាប​ណា​មិនទម្លាក់គណបក្ស​​​ប្រជាជនកម្ពុជា​ ចេញ​ពី​អំណាចទេ​​​ នោះគោល​​​នយោ​​​បាយ​​​របស់រដ្ឋា​​​ភិបាល​​​នៅ​​​តែ​​​គិត​​​ការ​​​រីក​​​ចម្រើន​​​ផ្នែក​សេដ្ឋ​​​កិច្ចជា​​​ជាងគិតអំពីបញ្ហា​​​សិទ្ធិ​​​មនុស្ស​​​ ហើយ​​​ការ​​​បណ្ដេញ​​​ប្រជា​​​ពលរដ្ឋក៏​​​​​​នៅ​​​តែ​កើត​មាន​ដដែល។​​​ លោក សៀ ភារម្យ​​​ ​​​មាន​​​ប្រសាសន៍​​​ថា “យើង​​​ចង់​​​ឲ្យ​​​រដ្ឋា​​​ភិបាល​ប្រឹងគិត​គូរពី​រឿង​នេះ  ប៉ុន្ដែ​​​ គេធ្វើ​​​ព្រងើយ​​​កន្ដើយ​​​ដាក់​​​យើង។​ គេ​​​មិន​​​ខ្វល់ឡើយ”៕

​​​ប្រែ​​​សម្រួល​​​ដោយ ហម សុផាណ្ណា​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​

© 2023, ខេមបូឌា ដេលី. All rights reserved. No part of this article may be reproduced in print, electronically, broadcast, rewritten or redistributed without written permission.

អត្ថបទទាក់ទង

អត្ថបទអានច្រើន

សេចក្ដីរាយការណ៍ពិសេស