32 C
Phnom Penh

លោកនាយក​រដ្ឋមន្ត្រី​ ហ៊ុន សែន ជំទាស់នឹង​​​​សំណើ​​​​​​សុំដកលោករដ្ឋមន្ត្រី​​​​​​​​​​​​ ចម ប្រសិទ្ធ​ ពីតំណែង

ដោយ ឌឹ ខេមបូឌា ដេលី

បទវិភាគ

កាល​​​ពី​​​ម្សិល​​​មិញ លោកនាយក​​​រដ្ឋមន្ត្រី  ហ៊ុន សែន បាន​​​​មាន​ប្រសាសន៍​ការពារ​​​លោកចម ប្រសិទ្ធ​ រដ្ឋមន្ត្រី​​​ក្រសួង​ពាណិជ្ជកម្ម ​ចំពោះ​​សំណើ​​​របស់​​​គណ​​​បក្ស​​​ប្រឆាំង​​​​សុំ​ឲ្យ​​​ដក​​​លោកចម ប្រសិទ្ធ​ ចេញ ដោយ​សារ​​​​មិន​​​បាន​​​ពង្រីក​​​ទី​​​ផ្សារ​​​អន្តរជាតិ សម្រាប់​​​កសិករ​​​​ខ្មែរ​។

សមាជិកសភាបួន​​​រូប ​​​មក​​​ពី​​​គណបក្ស​​​ប្រឆាំង បាន​​​ផ្ញើលិខិត​​​មួយ​​​ច្បាប់​​​ចុះ​​​ថ្ងៃ​​​ទី១០​​​​ខែ​​​មករា ជូន​​​លោក ហេង សំរិន ប្រធាន​​​រដ្ឋសភា ដោយ​​​ចោទ​​​លោក ចម ប្រសិទ្ធ​ ថា មិនបាន​​​​​​ជួយ​​​​​​កសិករ​​​ខ្មែរ​ក្នុង​ការ​កែ​ច្នៃ​ផលិត​ផល​របស់​​ពួកគាត់​ដើម្បី​​យក​ទៅ​លក់​​​នៅ​បរ​ទេស។

ថ្លែង​​​នៅ​​​ក្នុង​​​ពិធី​​​ប្រគល់ប័ណ្ណ​​​កម្មសិទិ្ធ​​​ដី​​​ធ្លី​​​ថ្មី​​​នៅ​​​ខេត្ត​​​មណ្ឌល​​​គិរី កាល​​​ពី​​​ម្សិល​​​មិញ ​លោកហ៊ុន សែន បាន​​​ចោទ​​​ប្រកាន់​​​សមាជិក​​​សភា​​​ទាំង​​​​​បួន​​​រូប​​​នេះ​​​ថា ​កំពុង​ផ្ញើ​​​សារ​ផ្សេង​​​គ្នា និង​​មាន​ន័យ​​ផ្ទុយ​គ្នា​​​​ទៅ​​​កាន់​​​​​​អ្នក​​​ទិញ និង​​​កសិករសម្រាប់​​​​ផល​​​ប្រយោជន៍​​​​នយោ​​​បាយ​​​​ផ្ទាល់​​​​ខ្លួន​​​។

លោក ហ៊ុន សែន​​​ បាន​​​មាន​​​ប្រសាស​​​ន៍​​​​​​​ថា “នៅ​​​ទី​​​ក្រុង ​ក្រុម​ប្រឆាំង​និយាយ​​​ថា ​រដ្ឋា​ភិបាលគ្មាន​​​លទ្ធភាព​​​​​​រក្សា​​​តម្លៃ ​​​អង្ករ​​​ឲ្យ​​​ចុះ​​​ទាប ​ហើយ​​​​នៅ​​​តាម​​​តំបន់​​​ជន​​​បទ​​​វិញ​​​ ក្រុម​​​ប្រឆាំង​​​បាន​និយាយបន្ទោស​​​​រដ្ឋាភិបាល​​​ថា ​​​មិនអាច​​​ធ្វើ​​​ឲ្យ​​​ស្រូវ​​​ឡើង​​​ថ្លៃ។​​​ដូច្នេះនៅ​​​ទី​​​ណា​​​ក៏​​​ដោយ ​ក៏ ​ក្រុម​​​ប្រឆាំង​​​នៅ​​​តែ​​​យក​​​ចំណេញ​​​រហូត”។

លោក ហ៊ុន សែន បាន​​​បន្ទោស​​​​​​តម្លៃ​​​ស្រូវ​​​​ចុះ​​​ថោក​នេះ ​ដោយ​​​សារ​​​ស្រូវ​មាន​​ច្រើន​​ហ​ួស​​ពី​តម្រូវ​ការ​​​នៅ​​​លើ​​​ទី​​​ផ្សារ​​​សកល។ លោក​បាន​​​មាន​​​ប្រសាស​​​ន៍​​​ថា “នៅ​​​ពេល​​​នេះ ប្រទេសឥណ្ឌា និងប្រទេសប៉ាគីស្ថាន​កំពុង​បញ្ចេញស្រូវ​ពី​​​​ស្តុ​ក​​​​របស់​​​គេ​​​ជា​​​ច្រើន ​ដូច្នេះ​ហើយ​បាន​ជា​​​វា​​​ធ្វើ​​​ឲ្យប៉ះ​​​ពាល់​​​តម្លៃ​​​ស្រូវនៅ​​​ក្នុង​​​ប្រទេស​​​កម្ពុជា”។

លោក ហ៊ុន សែន ក៏ បាន​​​ព្រមាន​​​កសិករ​​​ដាំ​​​​​ដំឡូងមី​​​ថា កសិករ​​​នឹង​​​បាត់​​​បង់​​​ទី​​​ផ្សារ​​​បរទេស​ប្រសិន​​​បើ​​​គណ​​​បក្ស​​​ប្រឆាំង​​​ឡើង​​​កាន់​​​អំណាចដោយសារ​​​តែ​​​ទំនាក់​​​ទំនង​​​មិន​​​សូវ​​​ល្អ​​​របស់​​​​​​គណបក្ស​​​នេះ​​​ជា​​​មួយ​​​​​​​​​ចិន និង​​​វៀតណាម។ លោកមាន​​​ប្រសាស​​​ន៍​​​​​​ថា “ប្រសិន​​​បើគណ​បក្ស​​​ប្រឆាំង​​​ឡើង​​​កាន់​​​អំណាច​​​ ពួក​​​គេនឹង​​​ធ្វើ​​​សង្គ្រាម​​​ជា​​​មួយ​វៀតណាម  ដូច្នេះ ​​​ទី​​​ផ្សាររបស់​​​កសិករ​ក៏​​​​ត្រូវ​​​​បាត់​​​​បង់​​​ដែរ។វា​មិន​​​មែន​​​ជារឿង​​​នយោ​​បាយ​​​នោះ​​​ទេ ប៉ុន្តែ ខ្ញុំ​​​គ្រាន់​​​តែ​​​​​​ចង់​​​បក​​​ស្រាយ​​​ប្រាប់​​ប៉ុណ្ណោះ”។

លោក ជា ប៉ូច សមាជិក​​​សភា​​​មួយ​​​រូប ក្នុង​​​ចំណោមក្រុម​​​សមាជិក​​​សភា​​​​​​​​​មក​​​ពី​​​គណ​​​បក្ស​​​សម រង្សុី ដែល​​ស្នើ​ឲ្យ​ដក​លោក ​ចម ប្រសិទ្ធបដិសេធថា សមាជិក​​​សភា​ទាំង​នេះ​មិន​​​បាន​​​ធ្វើ​​​ការ​​​ឃោសនា​​​បោះ​​​ឆ្នោត​​​នោះ​​​​ទេ ហើយ​បាន​​​ច្រាន​​​ចោល​​​​​​ការ​​​អះអាងរបស់​​​លោក​នាយក​​​រដ្ឋ​​​មន្ត្រី ដែល​ថា រដ្ឋាភិបាល​​នៅ​​​ក្រោម​ការ​ដឹក​នាំ​របស់​គណ​​​បក្ស​​​ប្រឆាំង​​​​ ដែលច្របាច់​​​​ចូល​​​គ្នា គឺគណ​​​បក្ស​​​សង្គ្រោះ​​​ជាតិ ​​​នឹង​​​ធ្វើ​​​​សង្គ្រាម​​ជា​មួយ​ប្រទេស​​​​ជិត​​​ខាង​​​​ខ្លួន​នោះ​។

លោកបាន​​​មាន​​​ប្រសាសន៍​​​ថា“ គណបក្ស​​​ប្រឆាំង​​​នឹង​​​ធ្វើ​​​​​មិត្តជា​​​មួយ​​​បណ្ដា​​​ប្រទេស​​​ជិត​​​ខាង ហើយ​​​យើង​​​មិន ដែល​​​ធ្វើ​​​ជា​​​សត្រូវជា​​​មួយ​​​​នឹង​​​ប្រទេស​​​ផ្សេងៗ​​​ទៀត​​​នោះ​​​ទេ។ លោក​ប្រធាន​ សម រង្សុី របស់​​​យើង បាន​​​គាំ​​​ទ្រ​​​គោល​​​នយោបាយ​​​ចិន​​​តែ​​​មួយ។ហើយ​​​ប្រទេស​​​វៀត​​​ណាម​​​ជា​​​ប្រទេស​​​ជិត​​​ខាង​យើង ​ប៉ុន្តែ​ប្រសិន​​​បើ​​​វៀត​​​ណាម​​​​​​ឈ្លាន​​​ពាន​​​ទឹក​​​ដី​​របស់​​​យើង​ យើង​​​​ត្រូវ​​​​តែ​វាយ​បក​​​​វិញ”។

ជា​​​រឿយៗ លោក សម រង្សុី បាន​​​ចោទ​​​ប្រទេសវៀត​​​ណាមថា បាន​​​ទន្ទ្រាន​​​​​​យក​​​ទឹក​​​ដី​​​របស់​​​​ខ្មែរ​នៅ​​​តាម​​​បណ្ដោយ​​​ព្រំដែន​​​​រួម​ និង​ចោទ​គណ​​​បក្ស​​​ប្រជាជន​​​កម្ពុជាដែល​​​កំពុង​​​កាន់​​​អំណាច ថា​បាន​​​ធ្វើ​​​មិន​​​ដឹង​​​មិនឮ។នៅ​​​ពេល​​​នេះ លោក សម រង្សុី កំពុង​​​និរទេស​​​ខ្លួន​​​ ដើម្បី​​​ចៀសវាង​​​​ពី​បទ​​​​ចោទ​​​ប្រកាន់​​​មួយ​​​ចំនួន​ចំពោះ​​​​ការ​​​ដក​​​តម្រុយ​​​បង្គោល​​​ព្រំដែន និង​​​ការ​​​បង្ហោះ​​​ផែន​​​ទី​​​ព្រំដែន​​​តាម​​​គេហ​​​ទំព័រ៕

ប្រែសម្រួលដោយ ស៊ុំ សុខភុំ

© 2024, ខេមបូឌា ដេលី. All rights reserved. No part of this article may be reproduced in print, electronically, broadcast, rewritten or redistributed without written permission.

អត្ថបទទាក់ទង

អត្ថបទអានច្រើន

សេចក្ដីរាយការណ៍ពិសេស