លោក គាត ឈន់ រដ្ឋមន្ត្រីក្រសួងហិរញ្ញវត្ថុបានមានប្រសាសន៍កាលពីម្សិលមិញថា មូលនិធិសម្រាប់សាងសង់ព្រះមេរុថ្វាយព្រះភ្លើងព្រះបរមសពសម្ដេចឪ នរោត្តម សីហនុ ត្រូវបានប្រគល់ទៅឲ្យក្រសួងព្រះបរមរាជវាំងរួចហើយ ថ្វីបើមានការលើកឡើងផ្ទុយពីនេះ កាលពីដើមសប្តាហ៍មុនពីសំណាក់លោក គង់ សំអុល រដ្ឋមន្ត្រីក្រសួងព្រះបរមរាជវាំងក៏ដោយ។
លោក គាត ឈន់ មានប្រសាសន៍អំពីថវិការដ្ឋសម្រាប់ចំណាយលើការសាងសង់ព្រះមេរុថា្វយព្រះភ្លើងព្រះបរមសពសម្ដេចឪ នរោត្តមសីហនុ នៅវាលព្រះមេរុខាងមុខសារមន្ទីរជាតិថា “ ថវិកាទាំងអស់បានបែងចែកទៅតាមគោលដៅទាំងអស់រួចរាល់ហើយ”។
លោក គាត ឈន់ បានមានប្រសាសន៍បន្ថែមទៀតនៅក្រៅពិធីចុះហត្ថលេខាសម្រាប់កម្ចីថ្មីពីធនាគារអភិវឌ្ឍន៍អាស៊ីថា “ពេលសំណើ [ពីក្រសួងព្រះបរមរាជវាំង] បានមកដល់ ថវិកានោះត្រូវបញ្ចេញភ្លាមតែម្ដង គឺមិនដល់២៤ម៉ោងផង”។
អំឡុងកិច្ចប្រជុំរបស់គណៈកម្មាធិការរៀបចំពិធីបុណ្យព្រះរបមសពសម្ដេចឪ កាលពីថ្ងៃច័ន្ទ លោក គង់ សំអុល បានសម្ដែងការព្រួយបារម្ភខ្លាចក្រែងក្រសួងរបស់លោកមិនបានទទួលថវិកាចំនួន១,២លានដុល្លារដូចបានគ្រោងទុកពីក្រសួងហិរញ្ញវត្ថុសម្រាប់ចំណាយលើការសាងសង់ព្រះមេរុនេះ។
ក្រុមហ៊ុនមួយក្នុងចំណោមក្រុមហ៊ុនដែលទទួលបន្ទុកសាងសង់ព្រះមេរុនេះ គឺក្រុមហ៊ុនវីស្ប៉ាន(Vispan)របស់អ្នកស្រី គង់ បញ្ញា កូនស្រីលោក គង់ សំអុល។
នៅក្នុងសុន្ទរកថាកាលពីថ្ងៃទី១៨ ខែធ្នូ លោកនាយករដ្ឋមន្ត្រី ហ៊ុន សែន បានថ្លែងការពារសេចក្ដីសម្រេចប្រគល់កិច្ចសន្យាសាងសង់ព្រះមេរុទៅឲ្យក្រុមហ៊ុនរបស់អ្នកស្រី គង់ បញ្ញា ដោយបកស្រាយថា ពេលវេលាសម្រាប់ការសាងសង់ខ្លីណាស់ មិនអាចផ្សព្វផ្សាគម្រោងនេះដើម្បីដេញថ្លៃជាសាធារណៈបានទេ។
លោក ហ៊ុន សែន ក៏បានបកស្រាយផងដែរអំពីការលើកឡើងរបស់ព្រះអង្គម្ចាស់ ស៊ីសុវត្ថិ ធម្មិកោ អ្នកនាំពាក្យខុទ្ទកាល័យព្រះបរមរាជវាំង ដែលបានមានបន្ទូលថា គេទូលទ្រង់ថា ការសាងសង់ព្រះមេរុចំណាយអស់ថវិកាចំនួន៥លានដុល្លារ។ លោក ហ៊ុន សែន បានមានប្រសាសន៍ថា តម្លៃពិតប្រាកដគឺត្រឹមតែ១,២លានដុល្លារប៉ុណ្ណោះ។
លោកឧបនាយករដ្ឋមន្ត្រី ញឹក ប៊ុនឆៃ បានមានប្រសាសន៍កាលពីម្សិលមិញថា រដ្ឋាភិបាលបានធ្វើតាមកាតព្វកិច្ច ផ្លូវច្បាប់របស់ក្រសួងព្រះបរមរាជវាំង។
លោក ញឹក ប៊ុនឆៃ មានប្រសាសន៍ថា “ទាល់តែបញ្ចប់ការសាងសង់បានចំនួន៧០ភាគរយ ទើបក្រសួងព្រះបរមរាជវាំងមានសិទ្ធិទទួលថវិកា ប៉ុន្ដែ ក្រសួងហិរញ្ញវត្ថុមិនបានប្រគល់ថវិកាភ្លាមៗនោះទេ ព្រោះលោក [គាត ឈន់ រដ្ឋមន្ត្រីក្រសួង ហិរញ្ញវត្ថុ] ត្រូវការឲ្យគណៈកម្មាធិការមួយត្រួតពិនិត្យការសាងសង់នេះសិន មុនពេលអនុម័តប្រគល់ថវិកា”។
លោក គង់ សំអុល បានមានប្រសាសន៍នៅឯកិច្ចប្រជុំកាលពីថ្ងៃច័ន្ទថា ការសាងសង់ព្រះមេរុនឹងត្រូវបញ្ចប់រួចរាល់យ៉ាងយូរត្រឹមថ្ងៃទី២៦ ខែមករា។ ព្រះបរមសពសម្ដេចឪ នរោត្តម សីហនុ គ្រោងនឹងដង្ហែទៅកាន់វាលព្រះមេរុនៅថ្ងៃទី១ ខែកុម្ភៈ និងប្រារព្ធពិធីថ្វាយព្រះភ្លើងនៅទីនោះ នៅថ្ងៃទី៤ ខែកុម្ភៈ៕ ប្រែសម្រួលដោយ ហម សុផាណ្ណា