មន្ត្រីជាន់ខ្ពស់ម្នាក់បានឲ្យដឹងថា អង្គភាពប្រឆាំងអំពើពុករលួយបានចាប់ខ្លួនបុគ្គលិកពីរនាក់របស់ក្រុមហ៊ុនក្នុងស្រុក ដែលមានទំនាក់ទំនងជាមួួយក្រុមហ៊ុនជីវឥន្ធនៈរបស់អង់គ្លេស ដែលបច្ចុប្បន្នកំពុងស្ថិតក្រោមការស៊ើបអង្កេតរបស់ការិយាល័យស៊ើបអង្កេតបទល្មើសក្លែងបន្លំ របស់ចក្រភពអង់គ្លេស (U.K.’s Serious Fraud Office)។
លោក ឱម យិុនទៀង ប្រធានអង្គភាពប្រឆាំងអំពើពុករលួយបានមានប្រសាសន៍កាលពីថ្ងៃសុក្រថា លោក ឱម សំណាង ប្រធានក្រុមហ៊ុនថាមពលបៃតងអន្តរជាតិ(Inter-national Green Energy) នៅកម្ពុជា និងបុគ្គលិកមិនស្គាល់ឈ្មោះម្នាក់ទៀត នៅក្នុងក្រុមហ៊ុននេះត្រូវបានចាប់ខ្លួន កាលពីថ្ងៃពុធ ក្នុងរាជធានីភ្នំពេញ និងត្រូវបានចោទប្រកាន់ពីបទក្លែងបន្លំឯកសារដីធ្លី។
លោក ឱម យិុនទៀង មានប្រសាសន៍ថា “ ខ្ញុំអាចបញ្ជាក់បានថា អង្គភាពប្រឆាំងអំពើពុករលួយបានបើកការស៊ើបអង្កេតលើករណីនេះ អស់រយៈពេលប្រាំបីខែមកហើយ។ យើងបានស្តាប់ចម្លើយពីប្រជាពលរដ្ឋជាច្រើន ហើយយើងក៏បានពិនិត្យភ័ស្តុតាងជាច្រើនដែរ”។
លោកបានបន្តថា “ ពីរបីថ្ងៃកន្លងមកនេះយើងក៏បានប្រមូលភ័ស្តុតាង និងស្ដាប់ចម្លើយសារភាពបន្ថែមទៀតផងដែរ។ តាមរយៈការសើុបអង្កេតយ៉ាងល្អិតល្អន់ និងការប្រមូលភ័ស្តុតាងនេះ យើងបានរកឃើញថា បុរសទាំងពីរនាក់នេះពិតជាមានពិរុទ្ធភាពពីបទពាក់ព័ន្ធនឹងបទឧក្រិដ្ឋមែន។ យើងបានចោទប្រកាន់ពួកគេពីបទក្លែងបន្លំឯកសារដីធ្លី ក្នុងបំណងដើម្បីលក់ដីយកលុយ”។
ក្រុមហ៊ុនថាមពលបៃតងអន្តរជាតិគឺជាដៃគូជាមួយក្រុមហ៊ុនថាមពលជីវឥន្ធនៈ (Sustainable Agro Energy) មានស្នាក់ការនៅក្នុងទីក្រុងឡុងដ៍ ដែលទ្រព្យសម្បត្តិរបស់ខ្លួនត្រូវបានបង្កក កាលពីខែកុម្ភៈ ឆ្នាំ២០១២ មុនពេលការិយាល័យស៊ើបអង្កេតបទល្មើសក្លែងបន្លំ ប្រកាសក្នុងខែមីនាថា ខ្លួនកំពុងស៊ើបអង្កេតក្រុមហ៊ុននេះពីបទគៃបន្លំប្រាក់ជាង៥៤លានដុល្លារ។
លោក ហ្គ្រែក ហ្វ្រីយេត (Gregg Fryett) ប្រធានក្រុមហ៊ុនថាមពលជីវឥន្ធនៈរបស់អង់គ្លេសថ្លែងថា លោកក៏ត្រូវបានអង្គភាពប្រឆាំងអំពើពុករលួយសាកសួរផងដែរ។ លោកបានលើកឡើងតាមអីុម៉េលថា “ ខ្ញុំសុខសប្បាយធម្មតាទេ ប៉ុន្តែ មានបញ្ហាខ្លះកើតឡើងចំពោះបុគ្គលិកផ្សេងទៀត ហើយពេលនេះខ្ញុំគិតថា អ្នកលក់ដីក៏មានបញ្ហាដែរ”។
លោកបានបន្តថា “ ខ្ញុំបាននិយាយជាមួយនឹង [អង្គភាពប្រឆាំងអំពើពុករលួយ] កម្ពុជាយ៉ាងយូរ។ ពេលនេះខ្ញុំបានមកដល់ប្រទេសថៃហើយ និងអាចធ្វើដំណើរដោយសេរីដូចសព្វដង។ ខ្ញុំសប្បាយចិត្តនឹងសហការជាមួយអង្គភាពប្រឆាំងអំពើពុករលួយ ដើម្បីសើុបអង្កេតករណីលក់ដី និងបញ្ហាពាក់ព័ន្ធនឹងគ្រឿងចក្រ។ របាយការណ៍មួយច្បាប់បានផ្ញើទៅឲ្យមេធាវីរបស់ខ្ញុំរួចហើយ ដើម្បីទុកជូនការិយាល័យស៊ើបអង្កេតបទល្មើសក្លែងបន្លំ និងទុកឲ្យផ្នែកការងាររដ្ឋបាល។ ខ្ញុំជឿជាក់ថា នឹងមានការប្រែប្រួលថែមទៀតពាក់ព័ន្ធនឹងបញ្ហានេះផ្ទាល់”។
ក្រុមអ្នកស៊ើបអង្កេតនៅក្នុងប្រទេសអង់គ្លេសបានអះអាងថា មានជនជាតិអង់គ្លេសរហូតដល់២.០០០នាក់ បានបាត់បង់ប្រាក់សន្សំរបស់ខ្លួន តាមរយៈគម្រោងធ្វើចម្ការដាំល្ហុងខ្វងនៅក្នុងខេត្តបន្ទាយមានជ័យ ដែលគេសង្ស័យថា ប្រធានក្រុមហ៊ុននេះជាអ្នកកេងបន្លំប្រាក់។
លោក ឱម យិុនទៀង មានប្រសាសន៍ថា ជនសង្ស័យទាំងពីរនាក់ ដែលត្រូវបានចាប់ខ្លួន កាលពីថ្ងៃពុធនោះ ត្រូវបានបញ្ជូនទៅកាន់សាលាដំបូងខេត្តបន្ទាយមានជ័យ កាលពីថ្ងៃព្រហស្បតិ៍ ដោយសារតែករណីនេះជាប់ពាក់ព័ន្ធនឹងបញ្ហាដីធ្លីក្នុងខេត្តនោះ។ លោកបានបដិសេធមិនផ្តល់ព័ត៌មានបន្ថែមអំពីករណីនេះទេ ដោយលោកថ្លែងថា ប្រសិនបើនិយាយអស់ពេក នឹងធ្វើឲ្យប៉ះពាល់ដល់ការស៊ើបអង្កេតដែលកំពុងដំណើរការ។
លោក អាំង មាលតី ប្រធានសាលាដំបូងខេត្តបន្ទាយមានជ័យបានបញ្ជាក់ដោយបដិសេធមិននិយាយលម្អិតថា “ ជនសង្ស័យជាជនជាតិខ្មែរទាំងពីរនាក់ ដែលជាបុគ្គលិកក្រុមហ៊ុនថាមពលបៃតងអន្តរជាតិ” ត្រូវបានបញ្ជូនមកដល់តុលាការរួចហើយ។
ក្រុមហ៊ុនថាមពលជីវឥន្ធនៈរបស់អង់គ្លេស កាលពីឆ្នាំ២០០៧ បានលក់ភាគហ៊ុនក្នុងចម្ការល្ហុងខ្វង ដោយសន្យាថា នឹងទទួលបានប្រាក់ចំណេញខ្ពស់។ ប៉ុន្តែ ក្រុមអ្នកស៊ើបអង្កេតនិយាយថា ក្រុមហ៊ុននេះគ្មានទ្រព្យសម្បត្តិពិតប្រាកដនៅក្នុងប្រទេសកម្ពុជា និងនៅតាមកន្លែងផ្សេង ដូចដែលខ្លួនបានអះអាងនោះទេ។ ការិយាល័យស៊ើបអង្កេតក្លែងបន្លំមិនទាន់បានឆ្លើយសំណួរពាក់ព័ន្ធនឹងករណីនេះទេ ដោយសារខ្លួនបានប្រកាសថា ខ្លួនកំពុងស៊ើបអង្កេត។
ចំណាប់អាម្មរណ៍ចង់ដាក់ទុនរកសុីក្នុងប្រទេសកម្ពុជាធំបំផុតរបស់ក្រុមហ៊ុននេះគឺតាមរយៈដីសម្បទានសេដ្ឋកិច្ចពីរកន្លែងស្ថិតក្នុងស្រុកស្វាយចេក ខេត្តបន្ទាយមានជ័យ ដែលមានទំហំសរុបជាង៦.០០០ហិកតា។
ក្រុមហ៊ុននេះមិនដែលទទួលបានសិទ្ធិជាផ្លូវការ ដើម្បីកាន់កាប់ដីសម្បទាននោះទេ ប៉ុន្តែ បាននិយាយថា ខ្លួនបានទិញដីនេះក្នុងតម្លៃប្រហែល២លានដុល្លារ ពីលោកជំទាវ ម៉ៅ ម៉ាឡៃ ភរិយារបស់លោកឧបនាយករដ្ឋមន្ត្រី កែ គឹមយ៉ាន៕ ប្រែសម្រួលដោយ ហម សុផាណ្ណា