ក្រុមមន្ត្រីបាននិយាយកាលពីថ្ងៃសុក្រថា ក្រុមហ៊ុនមួយក្នុងចំណោមក្រុមហ៊ុនពីរដែលត្រូវបានសាលារាជធានីជ្រើសយកកាលពីក្នុងខែកញ្ញា ដើម្បីឲ្យធ្វើប្រតិបត្តិការប្រព័ន្ធរថយន្តក្រុងសាធារណៈក្នុងរាជធានីភ្នំពេញ បានដកខ្លួនចេញពីគម្រោងនេះហើយ ពីព្រោះក្រុមហ៊ុននេះមិនចង់វិនិយោគរួមគ្នាជាមួយក្រុមហ៊ុនកូរ៉េខាងត្បូង ដែលចាប់អារម្មណ៍ក្នុងការផ្តល់សេវានេះដែរនោះ។
ក្រុមហ៊ុនអភិវឌ្ឍន៍ពាណិជ្ជកម្ម (កម្ពុជា)ពិភពលោក ជាក្រុមហ៊ុនរកស៊ីរួមមួយរវាងវិនិយោគិនកម្ពុជានិងចិន ដែលពីដំបូងបានប្រកួតប្រជែងយកកិច្ចសន្យានេះជាមួយក្រុមហ៊ុនបីទៀត ដែលក្នុងចំណោមនោះមួយជាក្រុមហ៊ុន City Trans Cambodia របស់កូរ៉េខាងត្បូង។ កាលពីក្នុងខែកញ្ញា ក្រុមហ៊ុនទាំងពីរត្រូវបានជ្រើសរើសឲ្យធ្វើប្រតិបត្តិប្រព័ន្ធនេះរួមគ្នា ដែលគ្រោងនឹងចាប់ផ្តើមនៅចុងឆ្នាំនេះ។
លោក លឹម អង់ដ្រេ នាយកប្រតិបត្តិក្រុមហ៊ុនអភិវឌ្ឍន៍ពាណិជ្ជកម្មពិភពលោក បានមានប្រសាសន៍ថា “ខ្ញុំបានសម្រេចលុបកិច្ចសន្យានេះចោល ហើយខ្ញុំនឹងបញ្ជូនសេចក្តីជូនដំណឹងផ្លូវការមួយទៅសាលារាជធានីនៅថ្ងៃច័ន្ទនេះ”។ លោកបានមានប្រសាសន៍បន្ថែមថា វាមិនផ្តល់កម្រៃច្រើនទេក្នុងការគ្រប់គ្រងគម្រោងនេះរួមគ្នា។
លោកបានលើកឡើងថា “ភ្នំពេញមិនមានមនុស្សច្រើនទេ វាមិនដូចទីក្រុងតូក្យូឬហុងកុងទេ។ វាពិបាកសម្រាប់ក្រុមហ៊ុនពីរធ្វើការរួមគ្នា។ ក្រុមហ៊ុននីមួយៗនឹងត្រូវចេញសំបុត្ររថយន្តក្រុង ហើយនោះមានន័យថា អតិថិជនត្រូវចំណាយពីរដង”។
លោកក៏បានមានប្រសាសន៍ដែរថា ក្រុមហ៊ុនណាដែលចាប់ផ្តើមសេវារថយន្តក្រុងត្រូវចំណាយប្រាក់ច្រើនទៅលើការផ្សព្វផ្សាយពាណិជ្ជកម្ម និងការរកទីផ្សារសម្រាប់សេវានេះ។
លោកបានសួរថា “ដូច្នេះប្រសិនបើក្រុមហ៊ុនពីរធ្វើការជាមួយគ្នា តើនរណានឹងចេញថ្លៃចំណាយផ្នែករកទីផ្សារ?”។
លោក ឡុង ឌីម៉ង់ អ្នកនាំពាក្យសាលារាជធានីបានមានប្រសាសន៍ថា ក្រុមហ៊ុនពីរត្រូវបានជ្រើសរើសយកសម្រាប់គម្រោងនេះ ដើម្បីធានាគុណភាពសេវារថយន្តក្រុង។
លោកបានមានប្រសាសន៍ថា “សាលារាជធានីបានស្នើឲ្យក្រុមហ៊ុនទាំងពីរសហការគ្នាលើគម្រោងនេះ ប៉ុន្តែពួកគេមិនទាន់ព្រមព្រៀងគ្នានៅឡើយទេ”។
លោក ជ័រ ឌីយ៉ុង (Choi Dea Yong) ប្រធានក្រុមហ៊ុន City Trans Cambodia បានមានប្រសាសន៍ថា ក្រុមហ៊ុនលោកនឹងបន្តដំណើរការសេវានេះ។ លោកបានលើកឡើងថា “ យើងកំពុងមានផែនការចំណាយប្រាក់ដំបូង៥លានដុល្លារ ដោយមានចំនួន១០ខ្សែរត់នៅទូទាំងរាជធានី”។ លោកបានមានប្រសាសន៍បន្ថែមថា ក្រុមហ៊ុននេះមានបំណងដំណើរការតែឯងរយៈពេលប្រាំឆ្នាំដំបូង បន្ទាប់ពីដៃគូមួយដកខ្លួនចេញ៕ ប៊ុននី